鍾意食牛嘅朋友，對牛舌專門店又點睇？尖沙咀最近開咗間舖頭，就係專食燒牛舌定食嘅，款式唔多，但勝在夠專一，夠似日本嘅味道，而老闆都係日本人嚟呀。

細細間舖頭，一眼望晒，如果想睇到師傅嘅功夫，就要坐吧枱喇，咁就可以一路食，一路睇住師傅燒牛舌，間唔時有一兩下好搶火嘅，都幾有視覺效果。

餐廳主打四款牛舌定食，包括咖喱牛舌同紅汁煮牛舌等等，而招牌菜就一定係「熟成招牌燒牛舌定食」，有飯有湯有小食當然唔少得主角燒牛舌啦。全店嘅牛都係嚟自巴西嘅，而呢款定食嘅牛舌，就一定係要成塊牛舌中心最腍嘅一部分，肉質含量18%左右，先放血，再用香料催熟，然後先至會拎去燒，燒完出嚟要趁熱食啊，燒到好腍身，腍得嚟又好爽口，灑埋少少鹽係幾入味，但就略嫌爭緊少少火喉。

至於牛舌其餘嘅部分，就會拎嚟用汁煮，或者做前菜等等，就好似「特製醬汁牛舌山芋飯定食」咁，一碗六塊牛舌圍邊，中間加隻生蛋黃，再放埋配菜，賣相係幾吸引嘅。呢個定食配埋山芋泥，撈埋碟邊嘅芥末之後，就可以一次過倒落碗飯度，再連埋隻生蛋黃一齊撈勻。每啖飯都沾有蛋汁之餘，仲有芋泥嘅甜同wasabi嘅微辣，層次好豐富啊。而牛舌亦同樣超腍，冇根㗎！

碗飯同湯都要再特別介紹下，啲飯笨唔係普通嘅飯，而係日本仙台食牛舌定食中必然配搭嘅麥米飯嚟，即係喺米粒之中再混入埋麥米一齊煮，好健康。至於碗湯，係牛尾湯，奶白色嘅，要用成6個鐘頭熬製㗎，所以啲湯水吸收晒牛尾嘅精華，好香好甜。

牛脷大輔
地址：尖沙咀赫德道25號尊豪坊地舖

文、相：Kar