尖沙咀新开和风小店 米粉班戟、午市定食配甘酒雪糕(有片)
2018-11-09

日式班戟热潮继续!尖沙咀呢间日本餐厅装修以木为主,落地玻璃窗加简约风格相当舒适。主打之一系日本近年兴起嘅米粉班戟,就算对麸质敏感嘅朋友都可以一试。而午市定食就提倡「一汁三食」概念,配埋有唔同功效嘅雪糕或者热茶,满足口福之余仲帮你健康加分!
 

甜咸口味米粉班戟


蜜庵本膳位於尖东站附近,主打日式料理同米粉班戟,後者采用米粉代替小麦粉,不含麸质,体质敏感嘅人都可以放心享用。店主指见未有餐厅将米粉班戟引入香港,所以就想一试,米粉亦特别喺日本搵厂房订制,用日本米磨成米粉。班戟浆就用米粉加日本鸡蛋、北海道粟米粉同法国发酵牛油调配。
 


相信大家最想知道嘅系米粉班戟同普通班戟食落最大分别系咩?其实味道方面唔会有太大分别,唔会食到有米味,不过班戟面口感比一般嘅烟韧啲,松软当中带少少弹牙。原来秘诀在於店主特别加入少少自家制甘酒,令班戟浆粘度更高。班戟全部即点即做,要等10至15分钟。
 


和·米粉班戟($92)

呢款口味系最有和风感嘅一款甜食班戟,配料有日本产红豆蓉、日本抹茶或焙茶粉、冲绳黑糖蜜、蜜渍黑豆、同混入黄豆粉嘅忌廉。开饭仔拣咗抹茶粉,清新茶香配松软班戟简单而满足。
 


黑糖蜜甜度颇高,大家可以按自己口味增加。反而红豆蓉唔太甜,起沙口感相当讨喜。黑豆软糯入味,最令人惊艳嘅系黄豆粉香味浓郁嘅忌廉,甜香柔滑。
 


南瓜芝麻·米粉班戟($138)

甜味班戟暂时有三款常设口味同三款期间限定,呢款有秋日气息嘅南瓜芝麻就系期间限定之一。日本南瓜酱当中加入甘酒同豆乳增添风味,碟边灰色嘅系用台湾芝麻粉整嘅香浓芝麻酱。南瓜同芝麻听落好似无乜关系,食落其实又几夹,先食到南瓜酱嘅甜味,芝麻嘅香味慢慢渗出。最值得一讃嘅系芝麻酱香味浓郁,但唔死甜亦无苦味。
 


和王牛汉堡咖喱($188)

三款咸食班戟中,应该以呢个用熊本产100% A5和王牛配特制咖喱嘅组合最能够满足一班食肉兽。和牛汉堡扒口感细软,可惜略为松散。而咖喱汁系用日本咖喱同印度咖喱调配,再加西班牙辣椒粉,後韵带辣加香料味,但又唔会盖过牛肉味道,同班戟亦夹得到。碟边黄色嘅系柠檬吉士酱,同菠萝乾一样达到微酸解腻嘅作用。
 

午市限定和风定食


午市自选三主菜定食($118)

定食配搭相当丰富,可以拣白饭或者十榖饭,配三选一嘅冷盘、烧物/炸物、锅物菜,连餐汤、沙律同甜品。背後系日本饮食文化常见嘅「一汁三食」概念:一碗汤、三道菜式配一碗饭,达至多样同均匀饮食。
 


开饭仔采访当日就拣咗白饭、合鸭酱油煮、冲绳红盐烧三文鱼,同山椒豚角煮。细节睇得出餐厅用心,例如饭特别选用岩手县珍珠米,粒粒饱满分明,口感软糯。合鸭酱油煮嘅鸭香同咸香突出,山椒豚角煮亦非常入味,同样适合送饭。
 


和王牛汉堡丼($158)(晚市供应)

晚市未有供应定食,而系以三款丼饭代替。汉堡扒同样选用熊本产100% A5和王牛,配酱油渍日本蛋黄同餐厅自家制汉堡香汁。
 


而红色嘅饭系因为加咗用红酒、红菜头等调配嘅酱汁,食落有淡淡酒香。和牛汉堡扒加酱油渍蛋黄增加香味,配搭嘅炸莲藕片薄脆香甜,有啲似食紧炸番薯片。
 

更多【新店直击】:
1. 泰式家庭口味!熬足12小时牛骨汤底 元朗新开船面专门店
2. 任食Movenpick、Haagen-dazs! 海洋公园酒店新开幕 首推全环保海鲜自助餐
3. 咖啡达人主理 尖沙咀酒店check-in饮精品咖啡

 
自家制甘酒软雪糕


美人软雪糕($38)

细心嘅话或者都留意到,餐厅唔少餐点都加入甘酒嘅元素,其实甘酒系日本嘅传统酒之一,近年因其滋补养颜功效同有天然益生菌,特别受年轻女士欢迎,甚至有「饮得嘅美容液」之称。呢度系香港第一间供应自家酿造甘酒嘅餐厅,原材料从北海道引入,再喺店酿酒。
 


虽然叫酒但其实并无酒精成分嘅,雪糕亦系无用到鸡蛋或者牛奶整,以豆乳为主嘅全素版本。软雪糕食落有甘酒甜味,带豆乳香。店主亦反覆研究配方,令软雪糕口感绵滑而入口即溶。另有京茶咖啡软雪糕口味。
 


游乐无罪·茶($32)

茶包里面有有机可可豆、牛奶乌龙茶同甜叶菊,有抗氧化、帮助燃烧脂肪同放松心情嘅功效。闻落系带甜味嘅奶香,饮落就以甜味为主,不过因为系热茶所以的确唔会有罪恶感。亦有梳打、咖啡同甘酒饮品选择。
 





蜜庵本膳
地址:尖沙咀赫德道8号地下A号舖




文、相、片:Cathy

关键字
尖沙咀
米粉班戟
pancake
甘酒
雪糕
甜品
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】最後倒数!即将结业的老字号及人气小店
2020-07-21
【随时更新】零食速报 每周新款零食、酒品点评
2020-07-31
全城抗炎!北角酒店最新应变 自助餐都有得外卖?
2020-07-17
全城抗炎!送上门懒人煮食包及套餐大合集2.0 花胶炖汤/火锅/铁板烧
2020-07-30
好人好店! 餐厅全日禁堂食 民间自发开放午膳空间地点一览
2020-07-29