尖沙咀「食街」新开小食店 酥脆牛角包+即叫即炸鸡髀
2020-12-11

去开尖沙咀搵食嘅,一定会认同厚福街系「口福街」,由街头行到街尾都有劲多间餐厅选择,最新又有间意大利风格嘅小食店插旗。虽然话就话系街头小食店,但除咗有炸物之外,连牛角包、意粉甚至铁板小食都有,款式多样。

小食店舖位细细,以外卖为主,附近返工嘅朋友买返office食都好方便。全部都系即叫即制,相当有心,不过就可能要有心理准备等耐少少。首先推介下牛角包,虽然系小店,但佢哋非常揼本,注重来货,例如牛角包同法包都取货自四、五星级酒店嘅供应商,再加入唔同馅料配搭,即叫即烘,酥脆又香软。其中,烟三文鱼蛋沙律牛角包,咸香中带清新嘅感觉。

即叫即炸嘅小食亦有多款选择,最受欢迎又最抵食嘅,应该系即炸鸡髀,大大只,多多肉。每日都用新嘅滚油生炸,以160度高温炸完一轮之後再转以170度炸多阵,令到鸡皮香脆而内里肉汁依然锁紧,咬落肉嫩多汁。鸡髀有辣有唔辣,锺意食辣嘅朋友仔可以请师傅帮忙,将香辣粉搽满成只鸡髀呢,阵阵刺激感。

铁板小食方面,则有铁板蒜香鸡翼尖、铁板炒肠粉、铁板蒜香鸡软骨等。

想饱肚少少嘅有意粉,特别要介绍下佢哋嘅卡邦尼慢煮温泉蛋鸡肉炒意粉,只温泉蛋特别用50分钟去慢煮出嚟架,令到蛋汁较平时食开嘅更为浆口,更易黏住啲意粉,口感厚啲,同时亦能保留营养。而意粉嘅酱汁亦系师傅自家调制,淡淡奶油香,creamy得嚟唔会太腻。

Ricco
地址: 尖沙咀厚福街9A号地舖

文、相、片:Kar

关键字
尖沙咀
小食店
牛角包
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
1天前
悠长假期 复活节下午茶推介
2021-03-26
【2021生日优惠】超爽着数!免费任饮任食日式烧肉/火锅(持续更新)
1天前
【只想专注做好牛腩】金融经纪转行湾仔开浓汤牛腩面店 招牌牛骨浓汤崩沙腩河
2021-04-01
【最平$298最贵$938】佐敦新开日式和牛烧肉放题 独家引入鹿儿岛小田和牛
4天前