中环大馆呢间新店相当有趣,门口隔离有部粉红色自动售卖机,里面摆咗一支支玻璃樽花茶;舖头睇落以为系普通花店,原来只系啱一半:因为仲可以坐低叹即冲花茶同天然果乾!下次去大馆影相嘅话,就多个Check Point啦。
Hahahaflorist由香港一位花艺师开设,中环新店唔单止有花,亦有精选花茶!茶叶主要从德国进口,而配搭嘅花果就嚟自世界各地。小店里面摆齐六款花果茶叶,大家可以闻下香味同睇睇有咩材料,从而拣啱你嘅心水花茶。
荔枝花果茶($38)
用花花玻璃樽装嘅冷泡茶暂时只有六款口味,当中比较受女孩子喜爱嘅就系呢樽荔枝花果茶,用苹果、荔枝、柠檬草、小豆蔻等冷泡。因为长时间浸泡苹果会有酸味,所以冷泡茶当中特别加咗少少蜜糖,既增加甜味亦带出多种花果香。
牡丹白茶($38)
冷泡茶另一选择就系牡丹白茶,顾名思义即系用牡丹花瓣配白茶,白茶嘅清淡回甘唔会盖过牡丹温和嘅香味,适合唔锺意太甜,或者想试下清淡花茶嘅朋友。花艺师亦表示小店始终以花为主,所以花香味会比坊间一般饮到嘅花茶更重。
更多【新店直击】: |
玫瑰可可巧克力黑茶($38)
六款花茶都有提供热饮,其中以热带加勒比同玫瑰可可巧克力黑茶呢两款比较受欢迎。玫瑰可可巧克力黑茶当中有黑茶、粉红玫瑰、可可豆同朱古力片。用热水冲泡过後,可可同朱古力嘅香味相当突出,再加玫瑰嘅淡淡花香,天气转凉嘅时候饮就最啱!
而喺店里面享用花茶,可以配返店家特别调制嘅天然果乾。果乾会有三款唔同选择,不定期更换,呢期就有士多啤梨乾、芒果乾同山楂条。士多啤梨唔会太乾,好似食紧浓缩版嘅果肉咁。而芒果乾特别加入酸梅辣粉,带出芒果嘅酸甜香味。最值得一讃嘅系糖分唔高,配花茶一流。
茶包($20/包)
注意返喺店里面享用热茶需要自己冲热水,如果饮完觉得唔错想Encore,可以考虑买茶包返屋企自己冲。每个茶包都可以冲到一壶喔。
花店唔算好大,但特别划出一张长枱畀大家坐低慢慢叹茶,亦可以欣赏呢度嘅花艺作品。同时亦系花艺学堂,锺意花又锺意花茶嘅话不妨留意下!
Hahahaflorist
中环荷李活道10号大馆10&13座G02舖
文、相:Cathy