多啦A梦粉丝要把握时间过铜锣湾一转啦~ 事关全新「多啦A梦邮局」期间限定店今日开始登陆咗时代广场中庭喇,除咗有好多独家限定嘅精品之外,仲有多款特别版嘅软雪糕同大判烧!不过只系去到今个月尾咋……虽然你哋本命系多啦A梦,但佢都借唔到随意门同时光机畀你哋㗎。
平时以抹茶甜品为主嘅Sweets House Cha Cha,今次特地为多啦A梦创作咗几款限定甜品。软雪糕有两种味,一系就粉蓝色嘅波子汽水,一系就蓝白色嘅波子汽水配牛奶味,两种味道都唔算好甜。
PS. 全线分店都有得卖㗎,其中海港城、新城巿广场同又一城分店仲会卖到3月11号添
多啦A梦最爱嘅豆沙包就冇喇,不过就有10款大判烧。有咸有甜,分别系红豆、吉士、蕃薯、抹茶红豆、抹茶吉士、抹茶红豆吉士、千岛酱香肠、章鱼烧同芝士汉堡牛肉味!有选择困难?建议可以试下咸嗰几款呀,大判烧外层软熟,章鱼烧真系有粒粒章鱼㗎,有咬口,烧汁都系调配过嘅,好香口。
至於「邮局」内,就有好多款限定精品,好似道具午餐盒、碟、杯呀咁,以後就有多啦A梦陪住食饭啦~ 温馨提示买咗嘢记得拎单喎,因为凭单去食波子汽水软雪糕可以减6蚊鸡呀~
叫得邮局当然就有postcard同邮筒啦~ 好多款呢~ 即场写完仲可以拣选寄出嘅月份,再投入「未来邮筒」,多啦A梦仲会即时回信添~
期间限定:即日 至 2月28日
文、相、片:Kar