港铁坚尼地城站通车即将两年,方便咗唔少为食友嚟呢边「搵食」。唔好以为港岛区餐厅就比较离地,反而其实呢边嘅特色食店唔单止选择多,而且定价其实都几贴地!由日式鳗鱼饭到港式清汤腩,平民蛋挞到精致蛋糕都任你拣。
驰名隐世清汤腩 顺景食店
隐藏喺熟食中心嘅呢间粉面店睇落无乜特别,但其实佢地嘅清汤腩喺唔少食家嘅心目中绝对唔会输畀其他名店!中午嚟可以简单嗌碗清汤腩跟面或饭,不过最好都系搵多几个朋友,夜晚嚟嗌个清汤萝卜牛腩煲。一煲有齐牛腩、爽腩、肥腩同筋腩,牛肉味浓,加上有用Gas炉保温,个汤越煲越香可以打埋边炉!
精致紫薯绿茶蛋糕 诗饼坊
食厌咗连锁集团,又担心负担唔起酒店饼房嘅出品?其实香港仲有价钱合理又用心嘅小店,例如呢间水准一直都保持得唔错嘅蛋糕店。最出名嘅绿茶红豆蛋糕卖相优雅,外面系一跳条绿茶蛋白脆条,入面嘅蛋糕系无得输嘅绿茶红豆配搭。另一名物紫薯蛋糕嘅紫薯蓉软滑香浓,入面嘅蛋糕同忌廉软绵又唔会过於甜腻。
Burger Lover必试小店 罂粟花
图:CKCK612
除咗快餐店之外,其实汉堡包仲有好多种可能,例如呢间小店就用好有港式风味嘅菠萝包夹炸蟹饼!招牌自家制蟹饼汉堡用菠萝包代替普通面包,夹住沙拉酱、太阳蛋、番茄、同啖啖蟹肉碎嘅炸蟹饼,蛋汁令汉堡食落一啲都唔乾。香浓流心芝士虾丸同海胆樱花虾天使面都系足料又好味嘅推介。
吸睛日式流心Pancake 点子
图:amy0802
喺Facebook同Instagram上面,绿茶、流心同甜品应该都算系比较吸睛嘅关键字,呢度嘅出品就有齐哂以上特点!宇治绿茶日式流心厚松饼配豆腐雪糕嘅流心效果相当唔错,松饼入口松软有茶香,同轻怡嘅豆腐雪糕非常夹。不过有食家稍嫌绿茶香味唔够浓郁,而且偶然要等好耐先有。
对住海景叹炸鱼烤鸡 Fish & Chick
图:BMBMF
买唔起海景楼,都唔代表唔可以望海景Relax下嘅。香港专卖英式Fish & Chips嘅餐厅唔多,呢间就系其中一间较为出名嘅。炸鱼嘅皮薄脆而唔油腻,鱼肉新鲜又嫩口,如果块鱼肉再大块啲就更完美喇,粗薯条亦够外脆内软。烤鸡有阵阵香草同鸡油香味,皮薄肉嫩又多汁,配清甜粟米粒就啱哂。
怀旧平民茶餐厅 祥香茶餐厅
图:T.LAU914
老实讲,呢间茶餐厅嘅名物蛋挞同茶走,算唔上系香港数一数二咁出色。但或者每一区都需要一间街坊茶餐厅,而坚尼地城嘅老字号代表,就绝对要数到呢一间。蛋挞系牛油皮,入口酥化富牛油香,鸡蛋香甜。茶走嘅茶味比普通茶餐厅浓少少,所以同炼奶特别夹。唔够饱嘅话可以食多个菠萝油,不过大家要撞下手神,因为撞到啱啱出炉热辣辣嘅话会好食好多!
坚尼地城版深夜食堂 万家厨房
温馨提示一句,呢间店虽然下昼都会开,但只限後面超市部分,想食饭嘅话请等到五点後!专做晚市同宵夜时段嘅居酒屋,加上老板相当随意,令人回想起日剧《深夜食堂》。不过呢度最出名嘅系鳗鱼饭,大大条京都鳗鱼烧过後更显肥美,酱汁香甜啱哂捞饭,而且连饭都系越光米,米香特浓。
开饭编辑推介:
3. 10月份好评餐厅十强
热门文章推介:
1. 一齐滚起佢!季选任食火锅
3. 油麻地特色美食地图
随时接收最新资讯
赞好OpenRice专页!