周董加持!铜锣湾新开Fusion火锅店 海胆汤配日本日山和牛(有片)
2019-04-22

连周杰伦都要去嘅火锅店?原来铜锣湾呢间新店由周杰伦朋友开设,仲搵嚟有15年西餐同日法料理经验嘅总厨坐阵,以唔同创新汤底,配搭香港首度引入嘅日本日山A5和牛、自家制意大利面、新鲜海鲜、大埔振兴肉丸等,新鲜感十足。
 


总厨Ken(左二)师承日本名厨小西充,将西餐同日法料理精神糅合到火锅当中,难怪周杰伦(中)都嚟撑场!

Tasting Menu逐一睇


Tasting Menu($498/位起)

J Pot装修以音乐同表演为主题,主打精致而有玩味嘅餐饮概念。餐厅亦特别设计一份Tasting Menu!结合中西风格,既按照西餐每道菜式逐一上菜嘅方式,亦保留中式大家一齐围住边炉「烚下烚下」嘅热闹气氛。
 


意式海鲜薄片(图为1人份)


小食拼盘(图为1人份)

头盘先嚟两道完全唔同风味嘅菜式,意式海鲜薄片由厨师挑选当日新鲜海鲜,例如吞拿鱼等再腌制。而小食拼盘就有和牛春卷配格鲁耶尔芝士,同自家制鳕鱼皮,香脆惹味。
 


(左)「头啖汤」松茸野菌鸡汤,(右)「头啖汤」海胆面豉汤(图为1人份)


「头啖汤」滋补花胶汤(图为1人份)

「头啖汤」系希望大家围炉前先品尝汤底原味,会由店员席前倒入汤底精华!Tasting Menu三款特选汤底都各有特色,松茸野菌鸡汤用自家制松茸野菌清汤加入春鸡,令松茸野菌风味更突出;滋补花胶汤特别以意大利巴马火腿代替金华火腿令味道更柔和,「头啖汤」更会加入鱼子酱用炸藜麦增加口感;海胆面豉汤用北海道海胆配搭白味噌,味道鲜甜浓郁。
 


日山和牛拼盘(图为4人份)

系香港首度引入日山和牛!日山系日本一间超过百年历史嘅顶尖肉类供应商,主要供应青森同岩手县嘅黑毛和牛,油花纹理精细。餐厅有10款唔同部位同切割方法嘅日山A5和牛,而Tasting Menu嘅拼盘就由厨师挑选当中三款,好似开饭仔拍摄呢日就有西冷、牛臂股肉,同上後腰脊肉。
 


本地海鲜拼盘(图为4人份)

各地海鲜每日新鲜运到,同样由厨师挑选当日新鲜款式,拍摄当日就有海鲈鱼、美国青口,同虎虾。另有马尼拉蚬、日本带子、东星斑、美国桶蚝、本地珍珠龙虾等每日轮流供应。
 


精选火锅料理(图为4人份)

餐厅唔少食材都系自家制,好似呢度就有自家制和牛牛肝菌意大利云吞同白萝卜田螺饺子,配搭创新。而肉丸就由大埔振兴肉丸供应,品牌有超过50年历史,坚持香港制造、原汁原味无添加,当中牛蒡鱼蛋更系J Pot独家供应嘅复刻口味,牛骨浓汁牛丸就系品牌皇牌口味。开饭仔拍摄呢日有零添加牛筋丸同猪骨浓汁贡丸,同样出色。
 


自家制意大利面(图为1人份)

Tasting Menu嘅意大利面会好似西餐主菜咁,由厨师帮大家用挑选好嘅汤底口味烹调餐厅手工制作嘅意大利面。每日会有三款意大利面选择,总厨建议汤底较淡味可以选择幼身面,好似开饭仔呢碟就系滋补花胶汤配幼面。相反例如海胆面豉汤味道较浓,就可以拣粗身啲嘅意大利面啦。
 


滋补花胶汤(另加$198)

Tasting Menu除咗三款特选汤底之外,亦有和牛清汤同法式海鲜汤选择。和牛清汤用日山牛肉、牛骨、蔬菜等熬煮两日,最能够带出日山和牛原味。法式海鲜汤灵感源自法国菜当中嘅海鲜浓汤,集各款海鲜精华。
 


甜品拼盘(图为2人份)

唔单止配料多元化,嚟到Tasting Menu最後嘅甜品拼盘亦系会不定期更换款式,畀大家更多新鲜感。拍摄当日就有日本京都宇治抹茶配茉莉花泡沫海绵蛋糕、黄金咸蛋糯米糍,同金箔椰子芋头慕斯。
 

更多【新店直击】:
1. 食印度式全日早餐+$75自选四款手工啤 西环新开新派印度餐厅
2. 尖咀浜烧专门店 新店优惠$98任食味噌蟹甲罗烧
3. 全民造星Jason中环开茶主题玩味餐馆 入味普洱鸡翼+冻柠茶Cocktail

 
单点配料、饮品精选


脆炸和牛响铃($78)


和牛吉列薯饼($98)


海鲡鱼薄片配柑橘汁($198)

两款香口小食都以日山和牛为主,脆炸和牛响铃系少见嘅三角形,里面系和牛肉。而海鲡鱼薄片配柑橘汁就较为清新,特别系柑橘汁味道酸甜,最啱夏天享用火锅前醒胃。
 


自家制意大利面(各$58/180g)、自家制意大利云吞($58起)

打边炉食乌冬或者公仔面就试得多,配意大利面或者意大利云吞又试过未?呢度有八款自家制意大利面同四款自家制意大利云吞任君选择,意大利面选用意大利00级面粉、日本鸡蛋等制作。
 


(左至右)紫菜芝麻汁、海胆酱油、法式罗望子油醋汁(各$30/款)

如果汤底选择和牛清汤或者白菜乾马蹄汤呢两款清汤,会建议加配特制调味酱汁,分别搭配唔同嘅食材:紫菜芝麻汁配蔬菜、海胆酱油配肉类、法式罗望子油醋汁配海鲜,三款酱汁都系以食材鲜味为主,无添加任何味精。
 


(左至右)茉莉花柠檬雪梨果茶配蜜糖珠($68)、香桃乌龙果茶配热情果珠($68)、黑糖寒天珍珠奶茶($48)

饮品亦相当花心思,好似花茶都系比较清新嘅配搭,而且有爆浆效果嘅果珠或者蜜糖珠增加口感。而黑糖寒天珍珠奶茶当中就无台式珍珠,而系以伯爵奶茶配黑糖寒天,甜度适中唔会过腻。
 




J Pot
地址:铜锣湾谢斐道535号Tower 535 1楼




文:Cathy
相:餐厅提供、Cathy
片:Cathy

关键字
铜锣湾
火锅
日山和牛
意大利面
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
2020-09-11
全城抗炎!屋企都叹到三层架下午茶 Tea Set外送/外卖自取推介
2020-09-18
悠闲时光 9月份下午茶推介
2020-09-02
【9月生日优惠】最低至半价!生日平食放题.韩式炸鸡
2020-09-02
油麻地新开小木屋Cafe 叹西日Fusion龙虾汤乌冬配咖啡
2020-09-08