又一间日本过江龙Pancake登陆香港，今次到呢间被称为「名古屋No.1行列店」嘅Hoi Hoi Pancake House，於2011年成立，以用高级嘅日本原材料制作出夏威夷风味班戟闻名，系名古屋嘅人气人龙店嚟㗎！餐厅正式进驻九龙湾，仲带咗两款香港限定口味嘅pancake畀大家，各位日本班戟控ready未？
法式焦糖梳乎厘班戟($98)(香港限定)
香港限定味道！材料包括面粉、忌廉由名古屋直送，特别选用明治4.3特浓牛奶，质感更加软滑富空气感，配埋面层香脆嘅法式焦糖，双重口感啊！
抹茶忌廉梳乎厘班戟($118)(香港限定)
抹茶系唔少港人至爱嘅口味，呢款都系香港店先有供应，锺意抹茶嘅朋友有福了。选用来自日本滋贺县名店、成立超过150年，丸安茶业嘅高级特调抹茶粉制作抹茶忌廉，味道特别甘香，配埋北海道十胜红豆真系话都无咁夹！
夏威夷果仁忌廉班戟($108)
呢款班戟系选用当地面粉厂特意为HoiHoi调制嘅面粉，质感又几独特，松软带烟韧感，用埋岛根县新纪元鸡蛋，香气明显，加埋忌廉同香脆嘅夏威夷果仁，味道层次又丰富啲。
更多【新店直击】： |
秘制慢煮汉堡扒配手造面包($98)
除咗Pancake仲有供应多款咸点，汉堡扒由人手搓成3cm厚，再以密封式半蒸焗型式煮至全熟，肉质柔软juicy。不过酱汁口味就稍为偏重咗啲喇。
炸豚肉定食($88)、墨西哥Taco饭($78)
炸豚肉选用鹿儿岛豚肉眼，肥瘦均匀，口感松脆；至於呢个墨西哥Taco饭，酱汁用墨西哥香料制成，配埋豚肉碎、牛肩肉碎、牛油果、蕃茄及蔬菜，又几清新！
玫瑰牛奶咖啡($39)
本地咖啡店STUDIO CAFFEINE得奖咖啡师为HoiHoi特别调配之咖啡豆，入口有黑朱古力及烤榛子味道，亦有微微苹果及葡萄酸香。
地址: 九龙湾宏照道38号企业广场5期Megabox 1楼19-20号舖
文: Yanica
相、片: Tom Li