同好朋友庆祝生日食咩好?蚝食海鲜篇
2017-08-22

平时gathering饭局谂食咩都已经好头痕,遇着生日饭局就更加头痕!通常你问主角想食问,佢都会答你冇所谓。但冇所谓之中,生日饭总不能够求其,环境气氛、食物质素、生日惊喜等,通通都系考虑因素。就等开饭仔畀啲建议你哋参考下。同有返咁上下份量嘅人庆祝,餐饭当然都要有返咁上下份量,如果寿星仔女系海鲜迷,不妨谂谂呢几间。

shake shake海鲜   The Captain's House

图:LazyDiary美*食家

环境:★★★★☆

尖沙咀,几方便,地利位置先赢一仗。餐厅内部装修以黑、白为主,几有格调。早卜枱嘅话应该有窗口位拣。

食物:★★★★☆

呢度最出名就系食海鲜袋,即系自选三、五或八种海鲜再拣酱汁,然後就会全部入晒落个蓝色网袋度,嚟个shake shake海鲜咁摇匀啲汁就食得。虽然卖相唔算太靓,但简单方便又入味,每件海鲜都可以索晒汁。唔好怕丑,戴手套之後用手直接拎嚟食,最有风味。

而除咗海鲜,都有唔少甜品同蛋糕款式,有得预早要求画碟写生日祝福呀。

超肥美生蚝    The Oyster House

图:KaKa522vivacchill

环境:★★★☆☆

湾仔地舖,地方坐落系窄窄地,但系以木为装修主要材料,枱面仲有烛光仔,系情调呀。

食物:★★★★★

唔想谂嘅可以直接嗌个海鲜拼盘,齐晒生蚝、黄金螺、带子、鲍鱼同青口,全部都好新鲜。如果系生蚝怪,庆生就梗系食尽佢,一於散叫。呢度有成7个国家10几种生蚝,美国,法国,爱尔兰,南非,西班牙,苏格兰、纽西兰,要海水味重嘅又有,要creamy啲嘅又有,只只都好肥美同鲜甜。

而甜品香蕉拖肥批就可以当生日蛋糕,忌廉底下有几条香蕉,最底系拖肥焦糖酱嘅饼底,够晒甜。(生日就豁出去,唔好谂个肥字住喇。)

麻辣卜卜蚬煲    为食仔海鲜火锅专门店

图:0G天边一只雁

环境:★★★★☆

呢间喺旺角嘅火锅店,环境当然冇西餐厅嗰啲咁舒适啦,有啲窄窄地。但系佢哋有几间VIP房,由5人细房到24人大房都有,其中两间仲有电动麻雀枱添,开到凌晨两点,搞个青春生日P系几啱。

食物:★★★☆☆

明明系夏天但潮流兴食卜卜蚬,呢间仲要有麻辣卜卜蚬煲,成煲都系鲜红色咁好刺激,确认成枱都食得辣嘅先好叫。啲蚬冇沙,辣得嚟又几清甜。不过如果唔想由头到尾都净系蚬蚬同埋蚬嘅,龙虾海鲜锅或者龙虾汤水煮龙趸锅都唔错。原只上啊,肉质爽口弹牙;龙趸仲好大条下,呢两个汤底更见鲜甜,啱啱滚起未系渌咗太多嘢嗰阵记得饮返几啖先。呀,最近仲新增咗芫荽饺添呀。

【生日饭局】:
1. 同好朋友庆生食咩好? 特色日式篇
2. 同好朋友庆生食咩好? 窝心西餐篇
3. 同重要的人庆祝生日食咩好? 优惠自助餐篇

全海鲜宴   御膳

图:智型食客KaterinaLin

环境:★★★☆☆

私房菜嚟,不过系两个人都可以食嘅私房菜,弹性几高。装修简单,木制餐枱。

食物:★★★★☆

锺意食海鲜嘅朋友仔嚟到实好开心,蟹可以拣煮法,避风塘炒、姜葱炒、定四川香辣炒都冇问题,最开心当然系花雕蛋白蒸,酒味够香呀,蟹肉亦新鲜。仲有蒜蓉粉丝蒸蛏子、白胡椒爆炒鲍鱼、生煎东星班等等全部都鲜味同惊喜十足。

之但系想有生日蛋糕嘅就要自己买上嚟喇,呢度只系得几款红豆糕、布甸等简单甜品,不过,好就好在唔收切饼费。

海鲜蒸气锅    正宗水上人气锅专门店

图:胃食小王子hkfoodiebobo

环境:★★★★☆

位於旺角中心地带,算系几宽敞,有卡位有圆枱,仲有大鱼缸,睇住啲海鲜好生猛咁游嚟游去,好想食晒佢哋。

食物:★★★★☆

海鲜都有好多种食法,呢间就食蒸气锅嘅。虾呀蟹呀蚬呀呢啲就梗㗎啦,美国生蚝蒸完都系大大只,而扇贝上面会加咗调校过嘅黑松露酱,味冇咁浓但依然香,继续食得出扇贝嘅鲜味。另外,成餐精髓查实系压轴出场嘅粥,料唔使多,南瓜同猪骨,但吸收晒海鲜嘅精华,鲜甜到一个点。

西班牙私房菜     Sabor Spanish Touch Private Kitchen

图:Lemon See SeeAlvin-p

环境:★★★★☆

餐厅格调以红、黑为主,灯光暗暗地,系几有feel嘅,但如果想影靓相就似乎有啲难度。

食物:★★★★☆

如果寿星仔女系旅行成瘾嘅话,呢间西班牙私房菜都几适合,喺香港都可以食到正宗西班牙嘢呀。食开清酒煮蚬嘅,嚟到会几有新鲜感,呢度用鱼汤煮,汤底煮到奶白色,好溶啊,记住要饮埋。带子又大只又鲜甜,蒜味烤墨鱼带微辣,一份份tapas食食下都几饱。当然唔少得西班牙名菜,海鲜饭啦,仲有墨鱼汁底拣,唔怕食到啲牙同个嘴黑麻麻嘅可以拣。

同餐厅夹菜单嗰阵讲声系生日饭,就会有个一人份量嘅朱古力蛋糕,可以讲埋想写咩祝福字句上去,而其他人就有会有其他甜品。


文:Kar

关键字
生日饭
生日饭局
旺角
尖沙咀
上环
观塘
海鲜
生蚝
火锅
私房菜
生日饭局
好友生日饭局的环境、食物质素、惊喜等因素都很重要,开饭仔集合各类最适合庆生的餐厅,方便饭局搞手。
餐厅资料
更多
收起
本月热门
【随时更新】零食速报 每周新款零食、酒品点评
2020-09-11
全城抗炎!屋企都叹到三层架下午茶 Tea Set外送/外卖自取推介
2天前
悠闲时光 9月份下午茶推介
2020-09-02
【9月生日优惠】最低至半价!生日平食放题.韩式炸鸡
2020-09-02
饮得嘅抹茶富士山!日式茶室旺角重开 必试抹茶系列、焦糖布甸拿铁
2020-09-10