叹丰富日式定食、Impossible汉堡 深水埗新开素食Cafe(有片)
2019-04-10

近年越嚟越多素食选择,今次深水埗呢间新店更加系素食Cafe,部分蛋奶素菜式更可以转为全素或走五辛,够贴心!菜式有齐日式及西式选择,好似日式定食、意粉、汉堡等。装修以白色同木纹为主,环境舒适最啱Hea返下。
 


YEARS由Kay同太太一齐打理,两位去唔同地方旅游嘅时候发现外国有唔少素食餐厅,另佢地开始有将更多选择带到香港嘅念头,最後就变成呢间餐厅。Kay负责西餐,太太Kit就负责日式料理。Menu上有标明系咪有蛋、奶或者五辛成分,有特别要求亦可以落单前向店员查询。
 


日式定食($88)

素食都可以好丰盛!呢个定食有齐面豉汤、什锦配菜、乌冬同甜品。面豉汤选用比较少见嘅白味噌,熟成时间较短而且味道温和,比起咸味反而甜味更突出,同重黄豆味嘅豆腐配合得宜。另一推介系高野豆腐,类似火锅常见嘅蜂巢豆腐,质感似海绵食落相当绵密,配芝麻酱做前菜够开胃。鸡蛋半熟,而且蛋香浓郁。
 


其他配菜同甜品会不定期更换款式,好似开饭仔采访呢日就有烤秋葵、炸紫薯饼、渍物,同抹茶蕨饼。秋葵比较清爽,炸紫薯饼吉利脆皮加上软棉紫薯蓉口感丰富,渍物酸咸爽口,而抹茶蕨饼亦有茶香,虽然回甘不及日本名店出品,胜在口感弹牙柔软。主食乌冬亦采用日本赞岐乌冬,口感滑溜,配香甜腐皮简单而满足。
 


不可能汉堡包($128)

Cafe另一主打系汉堡包,名当中嘅不可能其实系指Impossible™ Meat植物牛肉,以纯植物制作但口感同味道都同牛肉相似!店主Kay喺外国试过後,觉得系一个好嘅机会畀平时少食素嘅朋友试下。
 


用Impossible™ Meat配搭火箭菜、车打芝士同洋葱,Impossible™ Meat食落味道的确几似牛肉,口感比一般汉堡扒松散少少,但一样有肉汁效果。半熟洋葱嘅辛辣後劲几刺激,而车打芝士就增添香味芝士,Kay表示希望之後可以搵到合适嘅Vegan芝士,令食全素嘅朋友有更多选择。
 


黑松露蘑菇汉堡包($98)

另外亦有黑松露大蘑菇选择,大蘑菇香味最突出,口感Juicy。配以沙律菜、蕃茄、车打芝士、洋葱同惹味嘅黑松露蛋黄酱。特别一提呢度用嘅系无鸡蛋成分嘅Vegan汉堡包,所以食落口感比较韧亦更有颗粒感。外脆内棉嘅炸蕃薯条亦系亮点,番薯自然香甜味讨好。
 

 

野果多士($48)(加雪糕+$8)

下午茶时段供应唔同轻食甜品,呢款野果多士就系其中一款人气选择。西多士煎至香口,食落以蛋味为主,配多球雪糕一热一冻更刺激!除咗有士多啤梨等莓果之外,碟边亦以紫薯粉同开心果碎点缀,不妨加埋一齐食增加口感层次。
 


玫瑰花茶($42)

饮品方面就咖啡同花茶为主,玫瑰花茶当中有玫瑰、红枣同桂圆,一倒就闻到好香玫瑰花味,饮起嚟带淡淡甜味。
 


玫瑰咖啡($36/热)

咖啡闻起嚟就系玫瑰花香同咖啡香各半,咖啡唔会过酸同玫瑰花香几夹。值得一讃嘅系咖啡师拉花手势好,咖啡饮到底拉花都无走样。可以转为全脂奶、脱脂奶或Oatly燕麦奶。
 







YEARS
地址:深水埗福华街191-199号福隆大厦1号地舖




文、相、片:Cathy

关键字
深水埗
素食
vegan
cafe
定食
汉堡
甜品
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
2020-09-11
全城抗炎!屋企都叹到三层架下午茶 Tea Set外送/外卖自取推介
2020-09-18
悠闲时光 9月份下午茶推介
2020-09-02
【9月生日优惠】最低至半价!生日平食放题.韩式炸鸡
2020-09-02
油麻地新开小木屋Cafe 叹西日Fusion龙虾汤乌冬配咖啡
2020-09-08