呢間人氣Cafe繼台北開到銅鑼灣之後，最近又去到尖沙咀開分店！貫徹幽默嘅風格之餘仲新增唔少主食，包括食落估唔到幾夾嘅鹹蛋牛油果蟹肉Pizza，Light版嘅玉子豆腐豆漿燉飯等。一次過滿足晒打卡、醫肚同Hea返下嘅三個願望。
 

OMG Mamaday位於尖沙咀，同銅鑼灣店一樣係樓上舖，幾有旺中帶靜嘅感覺。開飯仔採訪當日未完全裝修好，但已經見到唔少過癮金句喺牆上面，連紙巾上面都印住「佛系減肥」，好抵死。
 

好邪惡既咸蛋牛油果蟹肉比薩（$116）

新店限定菜式之一，顧名思義呢個Pizza係鹹蛋口味，加牛油果肉同蟹肉做配料，鹹蛋分量唔會太多，食到鹹香味道同少少起沙口感，配鮮甜嘅蟹肉又幾夾。牛油果味道唔算突出，不過就增加一重柔滑嘅口感，而且批底又薄又脆，話咁易就食完一件又唔會太膩。
 

玉子豆腐豆漿蟹肉燉飯驚唔驚（$108）

另一款新店限定菜式，一般奶油燉飯都係用牛奶，呢度就改用豆漿，Creamy得嚟食落無咁Heavy吖嘛。加上外脆內滑嘅玉子豆腐同分量十足嘅蟹肉，絕對唔使驚食唔晒呀。
 

想唔想知咩叫健康的味道（$108）

開飯仔忍唔住好奇想知道咩叫健康的味道，答案原來係芫荽！啱嘅芫荽有豐富膳食纖維同多種維他命，的確幾健康。食落呢份「健康的味道」好重芫荽香味，加少少辣椒粉嘅辣勁，鍾意食芫荽應該會好鍾意，當然唔鍾意食芫荽嘅話奉勸大家改嗌其他燉飯或者意粉呀。
 

 

記住，期望愈大，失望愈大…雞翼（避風塘）（$68）

香口小食係無得輸嘅，仲要係香港人最愛嘅雞翼。雞翼皮炸得夠香脆，仲要加埋炸蒜粒同辣椒，惹味程度立刻飆升！
 

焦糖脆脆窩夫（$68）

甜品方面主要有蛋糕同窩夫，窩夫口感較為煙韌，而且蛋香唔算突出，所以同配料食會比較好。有淺藍色嘅海鹽雪糕、混入玫瑰花瓣嘅焦糖脆脆、同香滑嘅吉士醬。當中以焦糖脆脆最有驚喜，焦香同甜香平衡。不過記得打卡之後盡快食，唔單止雪糕會融，焦糖脆脆都會變腍呀。
 

抺茶牛奶無咖啡架傻豬（$48）

熱飲杯驟眼睇以為係一般懷舊花紋，點知細睇杯同碟上面嘅字竟然係「痴痴呆呆 坐埋一檯」。講返杯抹茶牛奶先，用日本宇治抹茶粉，記得搞勻先好飲，甜味適中無蓋過抹茶回甘，符合水準。
 

OMG Mamaday
地址：尖沙咀加連威老道29號信基商業中心2樓

文、相、片：Cathy