無論係忙讀書忙打工定忙住抗疫，總要食餐好嘅嚟幫自己打打氣。新蒲崗呢度就有間新開嘅日式便當店，有多款主菜選擇，好似最受歡迎嘅吉列豬扒、牛肉壽喜燒、素食朋友都啱嘅日式炒雜菜等等，從世界各地精選優質食材，食得出用心㗎。
 

重光弁当主打即叫即做嘅日式便當，新店一開就足足有14款唔同主菜選擇，師傅話係參考咗唔少日本便當店嘅出品，當中挑選啱香港人口味又方便大家外賣拎走嘅配搭。全部便當選用北海道白米同日本製便當外賣盒，便當之外仲有天然果茶，配埋就係滿足嘅一餐。
 

重光招牌弁当（$65）

通常日式便當都以一款主菜為主，呢份招牌弁当就一次過有齊三款香口炸物：炸雞、鱈魚柳、蝦餅，配自家製他他醬。最出色嘅係炸雞，係廚師自己用雞髀肉腌好再炸，皮脆肉彈仲Keep到肉汁，唔點醬都夠好味。蝦餅裡面保留少少蝦肉，口感豐富。他他醬微酸，有唔少新鮮洋蔥粒，辛辣解膩。
 

便當配埋每日新鮮烹製關東煮、柚子雜菜沙律，同不定期更換嘅漬物，關東煮入味而唔過鹹，蒟蒻彈牙，蘿蔔清甜無渣。
 

自家製吉列豬扒弁当（$68）

招牌便當之一，吉列豬扒用荷蘭穀飼梅頭豬肉，先蘸上秘製玉子粉漿，再沾上師傅調配嘅日本麵包糠，咁樣炸出嚟嘅吉列豬扒唔單止夠香脆，吉列皮厚薄適中，又唔會同豬扒分離！而豬扒口感柔嫩，入口充滿肉香同脂香。
 

滑蛋鰻魚丼（$98）

最啱鍾意用醬汁撈飯嘅朋友！醬汁鹹甜平衡，加上用日本沖繩蛋煮成嘅滑蛋，就咁配飯食已經好滿足。而且鰻魚分量都唔少，魚肉唔算好厚，但勝在蒲燒香味突出，口感軟腍而且無細骨。順帶一提，小店好貼心咁分開白飯同滑蛋鰻魚，就算拎返辦公室或者屋企都唔使驚浸腍晒啲飯呀。
 

 

日式炒雜菜弁当（$58）

食素嘅朋友就可以揀呢款炒雜菜弁当，雜菜以椰菜為主，加上毛豆、芽菜、青椒、甘筍、蘑菇，炒過嘅醬油焦香加上爽脆嘅椰菜、芽菜，味道完全唔寡而且好啱送飯呀。
 

（左至右）黑金堂熱帶果紅茶、蜜桃烏龍、荔枝紅茶（$18-21/杯，購買便當+$12/杯）

小店更同志同道合，位於尖沙咀嘅黑金堂合作，喺呢度都買到三款天然果茶！品牌選用原片茶葉配搭唔同果乾，而且都係微甜配方，味道自然清爽。

熱帶果紅茶以濃厚熟成紅茶配搭熱情果、芒果同菠蘿果乾，茶香濃厚。蜜桃烏龍就係風乾蜜桃乾加上淺焙烏龍，淡淡蜜桃甜香同烏龍清香交織。荔枝紅茶就係荔枝乾加原葉紅茶，富荔枝香氣。
 

重光弁当
地址：新蒲崗崇齡街33號新蒲崗廣場1樓B05-07號舖

文：Cathy
相、片：Tom Li