佐敦唔係淨係得澳牛 | OpenRice 香港开饭喇

一班朋友約食飯，通常唔係旺角就係尖沙咀，一嚟多嘢食，二嚟算係多數人嘅中間點嘛。咁佐敦呢？夾喺兩區中間，但就硬係好似唔係好諗到有咩食咁，好多人一講起佐敦就只係會諗起澳牛，炒蛋夠大份嘛。但其實呢區一樣有好多好嘢食，睇完介紹，下次約食飯就多多個點選擇喇。

平民西餐　　Amour Cafe

Photos by Zabcd2009 & zeroni
好多嘢都唔可以睇樣，就好似呢間餐廳咁，就咁喺出面望入去，你以為係間普通茶記之後行走咗，咁走寶喇。佢個格局雖然好似茶餐廳，但原來係食西餐㗎，仲要水準都唔錯。主菜連湯連甜品，最貴都係70零蚊，幾抵食。餐牌每日唔同，大約有6個餐左右選擇，都係意粉類為主，如果你撞啱有米蘭豬扒長通粉或者奶油磨菇煙鴨胸意粉記得嗌，個汁幾夠濃，豬扒又夠juicy！而甜品就係芝士蛋糕或者好滑好重蛋味嘅焦糖布甸，都試得過。

邊行邊食法包　　添記法式三文治

Photos by David fai & Cherish Hoo
佐敦其實真係有好多寶，識行一定搵得到。呢間老店，一直都係賣包，除咗自家製嘅蒜蓉包，仲有法包！蒜蓉包脆得嚟又唔硬，仲好鬼香，離遠都聞到陣蒜蓉嘅香味。而法包有大有細揀，但一樣咁足料，扎肉、腩肉、嚼肉（雞潤加豬肉碎）同鹹豬手肉，再夾埋醃蘿蔔絲、青瓜，搽埋牛油同唧沙律醬，食落酸酸甜甜，又滲少少微辣，豐富到一個點。有時一個人唔想入餐廳食嘢，買個嚟食都可以當一餐。

老字號雲吞麵　　麥文記麵家

Photos by stinky0710 & cct1367
嚟得呢間食，唔使諗，一係食鮮蝦雲吞麵，一係食豬手麵。一碗有4粒，仲要係全蝦雲吞，鮮味就一定夠，皮又夠滑，加上湯底熬足4、5個鐘嘅，完全係精華。豬手嘅南乳醬亦都好香濃，炆得又夠腍又入味，入口仲有種漿漿地嘅感覺，不過，可惜，碗麵細碗咗少少，大食啲嘅應該唔夠飽。

濃湯彈牙拉麵　　熊拉麵

Photos by Hellowendy614 & cyc0817
雖然拉麵款唔算好多，但勝在由湯底、麵質到配料都可以自己揀嘛。想重口味少少嘅可以揀黑熊拉麵，即係黑蒜湯底，未食已經聞到陣香味！想要辣嘅就一定係赤熊拉麵，微辣過到口癮得嚟又唔會一味淨係得個辣字，依然可以食到豬骨湯底嘅香味。至於啲麵點揀，就睇你鍾意彈牙啲定係有咬感多啲喇，要前者就揀幼身，後者就粗身。湯底、麵條有質素，配料一樣有，特別係隻溏心蛋，橙黃色嘅蛋汁一咬就流出嚟，好正。

偏僻驚喜多國菜　　小酒窩餐廳

Photos by sandy_meow & iameatproduct
呢間餐廳位置係偏少少，但都幾多人等位。係一間多國菜餐廳嚟，包括咗中東、印度同尼泊爾等等。Kebab都係一道幾有呢啲國家特色嘅菜，將雞肉、生菜等等捲起，多汁多料，小心啲食。仲有Ribs幾乎係必食，燒到面層紅紅黑黑，色水幾好，同埋好入味，腍腍地唔太乾身，易入口，有機會仲係心形碟上。另外仲有脆卜卜又多料嘅四季pizza同羊肉沙律等等都幾值得嗌，多人嚟食試多幾款會開心啲，但啲位就有啲迫囉。

多選擇放題　　大喜家日本料理

Photos by yyKumi & 1加1等於1
放題嚟講，都係希望愈多款愈好，刺身壽司串燒天婦羅……咩都食到就最好。呢間應該都可以滿足到一班為食鬼嘅，雖然話放題食壽司唔抵，但呢度啲壽司有啲又真係幾特別，見到又會想嗌嚟試下，一兩嚿冇所謂嘅：脆蝦卷出面加埋卡樂B薯片、帶子壽司面頭又加埋黑松露咁。小食方面牛舌呀大阪燒呀都吸引嘅，仲有款唔係周圍有（唔係個個鍾意食）嘅苦瓜炒蛋！哈哈，係特別嘅。

抵食中式糖水　　佳佳甜品

Photos by lemywong & girlwearprada61
最後點會唔介紹飯後甜品畀大家吖。平時喺尖咀、旺角可能你成日都會食西式、韓式甜品，嚟到佐敦，不如轉下食中式吖。之前開飯餐廳專訪都介紹過嘅佳佳甜品，搬咗舖之後地方大咗，但價錢一樣咁抵，一碗糖水都係廿蚊有找。蕃薯糖水夠薑夠辣，芝麻糊定杏仁露都好夠味，呢排怕熱嘅咪叫返碗凍嘅西米露囉，爽。

文：Kar

隨時接收最新資訊
讚好OpenRice專頁！