伦敦名店Duck&Waffle现已进驻中环 必试鸭肉窝夫+香港限定菜式 (有片)
2019-09-09

今年可以话系过江龙嘅天下,一间又一间嘅外国名店相继进驻香港,踏入9月,就有英国伦敦嘅人气餐厅登陆。呢间以鸭肉窝夫闻名嘅餐厅,系伦敦以外嘅首间分店,嚟到香港,继续秉持传统,由朝早到深夜都开店营业!首本名菜当然有得食,另外仲有几款香港限定嘅新菜式添!

招牌菜鸭肉窝夫,无论制作定系食用都相当考功夫。选用由英国运到嘅鸭髀,先腌制48个钟再油封10个钟作备用,收到落单时再即场制作。厚身软绵嘅窝夫上,放上新鲜炸起嘅油封鸭髀同埋鸭蛋,卖相吸引。

相机食完就到自己食喇,先将鸭髀拆肉,拮穿只蛋黄,淋埋餐厅自家调制嘅芥末枫糖浆,一啖放入口就会感觉到咸甜交融嘅丰富口感,但又出奇地夹喎,而且鸭髀皮仲有微微脆口添!

另一道推介必食嘅系鹅肝焦糖布甸,运用鹅肝吉士酱入馔,再以焦糖烧焦表层,就咁望落好似平时嘅焦糖炖蛋一样,但食落就发现充满惊喜喇。鹅肝嘅羶香味浓郁,加上超creamy超滑嘅口感,就好似啖啖鹅肝酱溶喺口中一样,食到停唔到口。

香辣牛面颊冬甩亦系伦敦招牌菜之一,炸波波嘅外形灵感最初原来系嚟自传统中式包点,最後选择以冬甩做外层,里面包住辣辣地嘅牛面颊肉碎,外层脆内层软,记住要点少少汁食喎,酸酸甜甜咁原来系杏脯酱呀,感觉又清新又新奇。

 香辣烧烤脆猪耳

香港限定菜式不能不试啦?生牛肉他他混入烤过嘅牛肉脂肪,佐以腌洋葱、Marmite酱腌蛋黄同面包,满满肉香之余、口感软滑。

味噌吉士挞亦系香港限定嘅甜品。虽然话就话甜品,但食落系甜中带咸㗎,几过瘾啊!

呢度嘅cocktails同样充满特色,成只鸭仔浮喺面咁cute嘅呢杯系Slow Spritz,以黑刺李毡酒、蜜桃甜酒、Williams利口酒同青瓜苦精酒等制作,味道酸酸甜甜。女生想饮再甜啲嘅可以Sanpquack,呢杯直情用鸭仔杯上添~ 打卡一流。用上菠萝毡酒、荔枝利口酒、raspberry糖浆等,成杯都充满果甜。

而平时饮开Bloody Mary嘅朋友,就要试呢度独有嘅Ducking Mary喇!净系卖相都够晒特别,插咗件waffle同椒仔喺度,饮落比平时嘅Bloody Mary多咗阵若隐若现嘅咸香味!因为特地用咗鸭肉窝夫嘅调味料去制作啊原来,将鸭油放落vodka度浸咗几个钟,又加咗啲芥末籽同是拉差酱,唔怪得饮落仲有啲咸咸地啦。


Duck & Waffle
地址:中环港景街1号国际金融中心1楼1081号舖

文、相、片:Kar


关键字
中环
过江龙
英国
窝夫
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
7天前
九龙城$388 大闸蟹+台式小吃放题 任食多膏大闸蟹、肥美蚵仔卤肉饭
2020-10-27
优雅小聚 11月下午茶推介
2020-11-03
【订座感谢祭】 快闪$20餐饮券第八弹 激抵烧烤优惠
2020-11-06
桔梗姐妹店进驻牛头角 8,700尺自设炒豆房及饼房 手冲咖啡配轻食
2020-11-02