又到转季嘅时候，好多餐厅都开始推出全新秋冬主题嘅下午茶套餐，大家又要拣定靓衫，准备去打个卡、enjoy下啦！以下介绍几款特色下午茶畀大家，有充满少女味，以花作主题嘅下午茶，亦有少见嘅火锅下午茶。不过开心还开心，大家都要记得保持社交距离，做足防疫措施啊。
火锅下午茶 宽巷子
呢个都系三层架下午茶呀！不过三层架上嘅唔系咸甜点，而系火锅配料！台湾人气火锅店宽巷子最近推出火锅Tea set「午後•百艳茶宴」，当中包括两款人气汤底供选择、特色三层火锅料、玫瑰高山清茶同埋全新推出嘅甜品——现代版凤梨酥。三层架嘅顶层有三朵由上等牛肉卷成嘅玫瑰，中层就摆咗五款台湾地道小食，其中不得不提墨条牛轧，师傅喺入面加咗墨鱼汁、花枝浆同鸡软骨等同牛轧糖完全扯唔上关系嘅元素，创新得嚟又几有惊喜～而最底层则系插到靓一靓嘅蔬菜组合。
供应时间：即日起，每日14:30 - 17:30（需提前一天预订）
价钱：$580（两位）
鱼子酱下午茶 La Rambla
想对自己好啲，就可以谂谂La Rambla推出嘅全新秋冬季Las Perlas下午茶，可以一试顶级鱼子酱餐点啊！每份下午茶包括一份30g嘅Kaviari顶级Baeri Caviar鱼子酱～唔使惊唔够喉，一系列嘅时令西班牙咸点亦有加入鱼子酱，其中招牌炸油条外层松脆，馅料十足。而4款甜品同样充满西班牙风味，好似churros同士多啤梨挞等。望住维港美景咁叹顶级鱼子酱，够晒chill。
供应时间: 即日起，每日15:00-17:00
价钱： $800／两位（另收加一服务费）
傲游意国下午茶 Cucina 
冇得飞，叹返个以意大利美食为主题嘅下午茶，就当快闪咗转啦～马哥孛罗香港酒店意大利餐厅Cucina推出最新意国下午茶set，足足有12款咸甜美点。意籍总厨选用地道意大利食材，将意国唔同地区嘅传统食材加入茶点，例如杏仁、开心果、羊奶芝士等。其中，杏仁就融合埋鸭肝制成马卡龙，甜而不腻；西西里嘅开心果亦制成口感幼滑、果仁味香嘅开心果慕丝朱古力球！
供应时间:星期一至五15:00-17:30，星期六、日及公众假期 15:30-17:30
价钱： $508／两位，连指定饮品两杯（另收加一服务费）
黑钻珍珠下午茶 Garden Lounge 
好多朋友仔都锺意饮珍珠奶茶，行街成日都忍唔住想买杯，而家可以坐定定慢慢饮啦！美利酒店嘅Garden Lounge联乘珍珠奶茶专门店圆贝，推出健康轻盈嘅黑钻珍珠tea set。龙虾沙律杯底有活性碳珍珠同腰果乳酪；黑芝麻抹茶杯就整到好似杯珍奶咁，香浓嘅绿茶忌廉够晒绵密，配上甜甜嘅珍珠，好有口感。另外，下午茶仲提供纯素烤饼、松饼同纯素珍珠奶茶饮品，後者用天然食材同自家制手工珍珠整架，咁健康，终於可以放胆食返次～
供应日期及时间：即日起 至 11月30日,每天14:45-16:30、16:45-18:30
价钱: $ 678 / 两位
订座优惠：正价85折单点餐牌
花香果漾下午茶 大堂酒廊 (九龙香格里拉大酒店)
花除咗香同好睇，仲可以食落肚。呢间酒店联同法国护肤品牌Darphin推出以牡丹、山楂同洋甘菊等植物元素做主题嘅花香果漾下午茶，配搭各种时令食材设计甜点和咸点，又健康又滋润。其中，值得推荐嘅有鸭肝冻配山楂及车厘子酱，同洋甘菊浸龙虾配橄榄油鱼子酱，龙虾散发住淡淡甘菊清香，简直系味觉、嗅觉、视觉三重享受～凡惠顾呢个下午茶，仲可以获赠限量Darphin皇牌护肤体验套装乙份（数量有限，送完即止）添~
供应日期时间： 即日起 至 11月30日，每日下午15:00-18:00
价钱: $628/两位，包括咖啡或香茶 (另收加一服务费)
「嚐燕．絮语」下午茶 one+one café & bar 
one+one café & bar乘联GLYCEL推出嘅下午茶以红色和白色为主，令人谂起浪漫嘅冬日。下午茶包括五款甜点同五款咸点，全部甜点都加入女士恩物——燕窝，滋补养颜，够晒矜贵。例如马卡龙除咗夹住金箔白酒啫喱之外仲加埋燕窝；酒店人气芒果拿破仑嘅变奏限定版，士多啤梨味加埋燕窝，层层酥脆，酸酸甜甜。咸点虽然冇加燕窝，但配搭新鲜，好似炸虾饼会伴西瓜沙沙汁咁。凡享用两位用下午茶，每位顾客仲可免费获赠GLYCEL尊贵体验装乙份，兼凭礼品换领卡兑换现金电子礼券等多项礼品。
供应日期时间：即日起 至 12月31日，星期一至日15:15-17:00
价钱: $ 458/两位 (包括两杯特饮)
文：Hailey
编：Kar