各位甜魔注意!呢間網上蛋糕店最近喺葵興開咗首間實體店,各款件裝蛋糕任揀之餘,仲新設咗唔同甜品套餐。無論你係和菓子控、洋菓子控甚至係抹茶控都總有啱你心水嘅!
瓜破菓子店係瓜破嘅第一間實體店,有坐位可以堂食,亦可以選擇外賣蛋糕或者曲奇返屋企慢慢嘆。開飯仔建議大家盡量平日下晝嚟,坐喺度睇住甜品師傅即席製作,等嘅時候都唔會悶又可以順便偷師,嘻嘻。
抹茶尽し($88)
抹茶控必點之選!100%選用丸久小山園宇治抹茶,總共有6款唔同口感同配搭嘅抹茶甜點,茶香濃郁程度都各有不同,所以完全唔會覺得過於單一。
團子、蜜柑、紅豆、抹茶慕斯
抹茶慕斯睇起嚟好似唔夠Smooth,但食落比想象中幼滑,有回甘但比較短暫。配料非常豐富,有煙韌嘅白玉團子、軟糯嘅黑豆、香甜嘅紅豆,同帶少少澀同酸嘅蜜柑。可以再按自己喜好加黑糖蜜。
抹茶栗子餡、最中餅
圓形嘅係日本運嚟嘅最中餅,下面就有栗子餡同抹茶餡。最中餅本身就無乜味道,所以要醬兩款餡料搽上去再食。栗子餡甜度較高,口感香滑。而抹茶餡就略嫌回甘唔夠突出,不過淡淡茶香就可以平衡返栗子嘅甜度。
黃豆脆餅、抹茶奶醬
抹茶奶醬睇顏色就知道濃郁,食落先品嘗到牛奶嘅甜香,之後到抹茶嘅甘味,但最後口腔又會有少少甜味出返嚟,味道層次非常討好。黃豆脆餅裡面有唔少果仁,香脆得嚟同抹茶奶醬又夾得埋,係有驚喜嘅配搭。
抹茶班戟、忌廉芝士、抹茶水饅頭
中間好似袋仔咁嘅,其實係抹茶班戟包住忌廉、忌廉芝士同抹茶水饅頭。當中以水饅頭最富抹茶香,甘醇突出口感煙韌。忌廉芝士同忌廉嘅比例得宜,令抹茶班戟一咬落去就有爆Cream效果之餘又唔會太膩。
抹茶松露朱古力
選用Valrhona 35%朱古力,朱古力香同抹茶香平衡有致,甜度適中。
抹茶卷蛋
裡面有原味忌廉同抹茶忌廉,兩款都非常輕盈,抹茶忌廉嘅茶甘味突出,所以連埋原味忌廉一齊食就甜度同餘韻兼顧。有啲可惜嘅係蛋糕比較乾,再濕潤啲就更好啦。
更多【新店直擊】: |
一口洋菓子($78)
以法式甜品為主,全部都係細細件Bite Size,就算自私食都唔怕食唔哂啦。而且店主表示開業初期佢地都想試下反應先,去到6月將會改哂呢九款洋菓子!
蜂蜜柚子瑪德蓮
瑪德蓮蛋糕濕潤而富柚子清香,味道輕甜,食完一個真係有啲意猶未盡想再食呀。
栗子白朗
幼滑嘅栗子蓉下面有朱古力,朱古力甜香比較霸道,有少少妹仔大過主人婆嘅感覺。最底係海綿蛋糕,減低膩感。
黑加侖子蛋白脆餅
建議大家可以盡量食咗蛋白脆餅先,因為蛋白脆餅接觸空氣太耐就會變淋。脆餅本來嘅口感應該係外滑內脆,入口即溶。淡淡黑加侖子甜香同淺紫色嘅賣相都係加分位。
芒果熱情果慕斯
層次分明嘅慕斯亦係口味比較清新嘅一款,慕斯富熱氣果香,甜度得宜。而中間就有一層金寶同忌廉,增加口感層次。
士多啤梨忌廉蛋糕
士多啤梨果肉比一般坊間嘅多,果香自然。蛋糕鬆軟而且忌廉唔多,比較輕盈嘅一款。
焦糖杏仁脆餅
焦糖香十足,唯一扣分嘅就係食完有少少癡牙。
朱古力橙杯子蛋糕
蛋糕濕潤,而且朱古力同橙嘅香味平衡,味道有啲似細過食到嘅朱古力橙餅。
焦糖曲奇泡芙
泡芙亦係建議盡快食嘅一款,因為泡芙皮比較薄,亦都比較快變軟。比起焦糖杏仁脆餅,呢款泡芙嘅焦糖香就無咁明顯,口感同味道都Light得多。
櫻桃開心果慕斯
賣相似足一粒放大咗嘅櫻桃,其實係櫻桃寒天包住開心果慕斯。不過兩款食材嘅味道都唔算突出,勝在口感層次都幾特別。
菓子店仲有供應其他甜品Set、芭菲、日本茶、咖啡同特飲。件裝蛋糕就可以選擇堂食配飲品或者外賣,最後仲有十款口味嘅曲奇同三款口味嘅金磚蛋糕以紙盒包裝,送禮或者自己食都得,得咗。
瓜破菓子店
葵涌葵昌路72-76號活@KCC 4樓409號舖
文、相、片:Cathy