嚟自美國，以龍蝦作招徠嘅全球最大海鮮餐廳Red Lobster，今日喺銅鑼灣開業啦。除咗有多款龍蝦菜式外，都有得鋸扒嘅，仲有兩款香港限定。當然唔少得佢哋最出名嘅自家製車打芝士鬆餅啦，免費供應㗎！
免費供應嘅自家製車打芝士鬆餅，非常鬆軟，近乎一拎就碎，入口蒜蓉味香。
喺日本、馬來西亞、墨西哥等全球各國有超過750間分店嘅呢間海鮮餐廳，終於嚟到香港喇。餐廳樓高兩層，以紅藍白色為主調，有超過60款新鮮海鮮、牛扒、意粉、手工薄餅、沙律及甜品等，單係龍蝦都有好多唔同嘅品種、唔同嘅煮法，門口仲有缸活龍蝦添。
其中，由本地地道菜式避風塘炒蟹變奏而成嘅港式避風塘炒龍蝦，係香港分店限定。龍蝦由美國產地直送，肉質鮮甜，辣就唔係好辣，但好香口。
另一道香港限定嘅係黃金蝦，外層炸得甘脆，粒粒鹹蛋黃碎係幾惹味。
以椰絲舖面再炸嘅夏威夷椰子蝦，零舍脆口。面頭有菠蘿粒等配料，清新感消去咗啲膩度。
不過淨得幾隻蝦邊滿足到海鮮控？想一次過食到多幾款口味，無敵海鮮大餐先夠滿足，原條北美龍蝦尾肉嫩鮮甜，牛油味香；招牌蒜蓉蝦同酥脆炸蝦分別搭配熱牛油醬同海鮮醬；仲有隻蒸煮雪蟹腳，海水味濃，好啱幾個朋友一齊開心些牙。
同時身為肉食獸嘅朋友，就要揀海陸大餐喇，又有龍蝦尾，又有精選肉眼扒或西冷扒，啖啖都係肉。
甜品方面，巨浪朱古力蛋糕最有睇頭，上枱時有陣陣女神仙氣飄出㗎，記住拎定相機打卡啊。朱古力蛋糕口感鬆軟，甜度偏高。
至於愛溢布朗尼則相對硬淨啲，而且多咗啲杏仁等，比較有咬口，但一樣都係咁甜。
奶茶意式鮮奶凍
Red Lobster
地址：銅鑼灣Fashion Walk食街加寧街8號地下
文：Kar
相、片：Tom Li
