丰富鳗鱼定食、芝香梳乎厘班戟 荃湾新开木系西日Cafe(有片)
2019-09-11

美食可以疗癒人心,如果加上餐厅环境舒适嘅话就更好啦系咪?荃湾呢间新店就满足以上愿望喇。主打多款西日料理,好似蒲烧鳗鱼滑蛋定食、全日早餐、日式松软班戟等。装修以木为主,加上花草装饰感觉Homey,最啱嚟Hea返半日呀。
 



hōmu by favilla 嘅「hōmu」日文有「家」嘅意思,餐厅装修以温暖柔和嘅原木为主,配合半开放式设计,的确有种返到屋企咁嘅放松感。食物即叫即制,而且同其他分店一样选用日本鸡蛋、日本米,唔添加任何味精,仲有供应儿童餐!
 


蒲烧鳗鱼滑蛋定食($108,午餐时段$118配热日本焙茶或者热黑咖啡)

定食包括日式味噌汤、渍物、是日沙律、白饭。蒲烧无激素鳗鱼肉厚香甜,配埋滑蛋无论味道定口感都好夹。连沙律都有用心,酱汁味道酸甜开胃,原来系因为落咗鲜橙汁同蜜糖,再加开心果碎增加口感。
 


自家制意式雪糕(套餐+$30)

意犹未尽嘅话推介追加餐厅餐厅自家制嘅Gelato,有牛奶、伯爵茶、抹茶三款口味选择,伯爵茶香浓郁,独特嘅佛手柑香气清新解腻。Gelato口感绵密扎实,无一般雪糕咁Haevy。
 



温泉蛋牛油果蟹肉蕃茄酸种包($98,午餐时段配热日本焙茶或者热黑咖啡)

呢款就用咗比较烟韧有弹性嘅无添加酸种包,加上牛油果、蕃茄、蟹肉同温泉蛋,蟹肉分量十足完全唔使惊面包唔够味,而且笃穿温泉蛋嗰下真系好有治愈感啊。配搭黑醋汁沙律同鲜果,系食得饱又唔会太腻嘅轻食。
 


【素食】全日早餐($98)

同其他分店一样,呢度有供应和式、洋式,同素食三款唔同配搭嘅全日早餐。唔好以为素食就会寡,呢份素食All Day Breakfast有味噌炒蛋、大啡菇、秋葵、蕃茄、是日沙律同牛油吐司。味噌嘅咸香增加炒蛋味道,大啡菇加咗芝士更加香口,牛油吐司外酥内软。如果系食全素嘅朋友可以向店员要求走鸡蛋同芝士,好贴心。
 


蟹肉忌廉蛋黄汁阔条面($98)

比起其他分店,呢度有更多西餐选择,例如意粉、晚市更有慢煮焦糖猪手、炭烧和牛小排等!呢份蟹肉忌廉蛋黄汁阔条面就全日供应,忌廉蛋黄汁味道香浓,而且越南蓝花蟹肉落得够重手,捞匀後啖啖都有蟹肉鲜味,好满足。
 


儿童餐($88)

荃湾呢个商场系唔少家长会带小朋友嚟「放电」嘅地方,所以餐厅亦特别设计儿童餐,主食可以拣迷你饭团、迷你乌冬或者迷你汉堡,迷你汉堡用嘅系自家制鸡肉扒。配搭玉子烧、水果、粟米、炸鸡,同三色薯条,即系紫芯蕃薯、橙芯蕃薯,同蕃薯,颜色丰富而且可以配搭唔同酱汁,可以满足锺意探索小朋友嘅好奇心。饮品亦有100%纯橙汁、100%纯时令果汁,同泡沫鲜奶选择,爸爸妈妈们可以放心畀小朋友享用啦。
 

更多【新店直击】:
1. $298半自助午餐 海鲜、烧牛肉、靓蛋糕任食 抵食意大利餐厅进驻尖沙咀新商场
2. 伦敦名店Duck&Waffle现已进驻中环 必试鸭肉窝夫+香港限定菜式
3. 精致海胆竹筒饭Set、好玩流水乌冬 九龙湾新日式竹筒饭专门店

  


日式芝香松软班戟($98)

唔单止小食同主食,甜品亦有唔少新选择。好似呢份日式芝香松软班戟咁。空气感十足嘅班戟用咗日本鸡蛋同日本面粉,芝士更系意大利嘅Ricotta Cheese,味道清雅香醇。班戟口感轻盈,撒上糖霜後味道微甜。可以按自己配芝士忌廉同士多啤梨果酱,享受多重口味变化。
 


玫瑰鲜奶咖啡($45/Hot(M),$49/Hot(L),$49/Iced)

品牌主打精品咖啡,新店当然亦供应多款咖啡饮品。鲜奶咖啡用嘅House Blend混合危地马拉同埃赛俄比亚两个地方嘅咖啡豆,带花香同苺果香。自然同花香浓郁嘅玫瑰亦非常夹,加上咖啡拉花同玫瑰花瓣点缀,色香味同时满足。
 


自家制蓝柠檬苏打($48)

同坊间多数以蓝柑橘糖浆调配嘅唔同,呢度嘅蓝柠檬苏打用蝶豆花配搭柠檬苏打,既有抢眼嘅紫蓝色渐层,搞匀後更加会变成梦幻嘅浅紫色!柠檬苏打酸爽带少少气泡口感,提神或者消暑都得。
 


餐厅不时举办展览,最近就有插画师Octoberfourteenth嘅小店风情画





hōmu by favilla
地址:荃湾青山公路荃湾段398号愉景新城2楼2013号舖




文、相、片:Cathy

关键字
荃湾
Cafe
鳗鱼滑蛋定食
全日早餐
儿童餐
班戟
咖啡
homu
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
2020-09-11
全城抗炎!屋企都叹到三层架下午茶 Tea Set外送/外卖自取推介
2020-09-18
悠闲时光 9月份下午茶推介
2020-09-02
【9月生日优惠】最低至半价!生日平食放题.韩式炸鸡
2020-09-02
油麻地新开小木屋Cafe 叹西日Fusion龙虾汤乌冬配咖啡
2020-09-08