中环新开日式炭炉串烧店 资深日本师傅驻场 主打12款鸡肉部位
2019-05-15

香港本身都有唔少串烧店,大部分都系以电炭炉同普通炭制作,中环最近新开咗一间日式串烧店,唔止有资深日本师傅驻场助阵,仲系以日本备长炭同真‧炭炉制作,主打12款唔同部位嘅鸡肉串,烧出嚟嘅鸡肉保留到更多肉汁同肉香,兼且有近百款酒类饮品选择,以後肉食兽又多个场拣喇。

资深日本师傅中尾翔SAN事事亲力亲为,由研发菜式、食材采购、堆炭起炉到制作串烧都亲自处理,搓肉、透炉、烧肉……每个细节都好讲究,特别系食材嘅新鲜度。餐厅只会用喺屠宰後24小时内嘅新鲜鸡,12款部位包括:免治鸡肉、鸡肝、鸡腿、鸡柳、鸡皮、鸡颈、鸡翼、鸡心、鸡肾、鸡胸软骨、鸡尾、同埋鸡心元,由於用真‧炭烧嘅关系,全部都带有淡淡炭香。

串烧分为酱烧及盐烧两种,另外亦配有两款酱料(清新开胃嘅柚子胡椒酱、微辣嘅日式芥末酱),建议两者可梅花间竹咁食,中和酱料浓度。

咁多个部位中,最花功夫嘅应该系免治鸡肉,师傅喺鸡肉中混入山芋、洋葱等食材,以人手搓肉处理,味道浓郁,而且口感丰富,软绵绵中带爽口感觉。

最受欢迎嘅系鸡肝同鸡心,前者迎合香港人习惯,大约烧至 85%熟,,入口甘香,鲜嫩弹牙,一啲腥味都冇;至於後者,则罕有地系原个鸡心上碟,虽然咁样喺烧制上较难煮熟,但口感会较佳,啱啱烧嘅即食,系会食到外脆内软嘅口感,加埋麻油、葱等调味就更惹味。

至於鸡腿,则会喺舖头熟成两日,烧出嚟肉味更浓更鲜而油腻减少,啖啖肉仲要连皮食系几正正子啊。

讲到鸡皮,好多人听到都会怕肥或者怕乾,但呢度烧得刚刚好,脆脆地仲渗有鸡汁,好鬼香口。而且师傅仲好细心咁切走啲肥膏先㗎,试得过啊。

而师傅私心推介嘅就系相当罕有嘅鸡心圆,即系鸡心隔篱嘅大动脉位置,每只鸡得一份㗎咋!对比鸡心,鸡心圆就多油啲啲,但系味道亦都香浓啲啲。

鸡,但唔全部都系鸡,猪牛串都有啲,和牛崩沙腩配wasabi比想像中夹,豚五花腩紫苏卷则有种清新感。

串烧以外,都有多款前菜同饭丼可以选择,要特别推介嘅就系呢款鸡肝酱配麪包。鸡肝酱相当浓香,搽面包食好开胃,同埋千其唔好吝啬,大pat大pat搽多啲啦,够搽有突!(细细声话你听,酱有净嘅话想添加面包都唔系问题啊)

睇到呢度,酒鬼实问:串烧怎能没有酒?啱啊!点可以冇酒?点会冇酒?呢度menu有近百款酒啊,啤酒红白酒sake咩类型嘅都有。Sake嚟讲,师傅建议串烧配衬啲比较辛口嘅酒会夹啲,阿部勘大吟酿呢只就啱晒嘞!不过如果女生偏爱甜身少少嘅,牧の限定大吟酿都系个唔错嘅选择,米香果香同时散发,仲会甜喺口中回荡一阵呢。

Birdie
地址:中环砵甸乍街45号The Steps ‧ H Code 9楼

文、相、片:Kar

关键字
中环
鸡肉
串烧
日式
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】便利店寻宝 每周新品速报
3天前
给自己一个休息时间 10-11月下午茶推介
2019-10-25
鼎王来了!味道服务媲美台湾 必食麻辣鸭血锅及员工教路秘制鼎王饭(有片)
2019-11-01
秋风起!5间大闸蟹放题食店集合
4天前
粮尾打气!5间湾仔平价饭堂推介
2019-10-24