东京辣麻味噌拉面店抵港 芫荽拉面冲击味蕾 (有片)
2019-08-20

自认好食得辣嘅辣椒仔女同我入嚟!最近有间由东京嚟嘅过江龙辣麻拉面店,开咗喺铜锣湾,餐厅有25种配搭嘅麻辣拉面选择,仲用咗全世界最辣嘅卡罗莱纳死神辣椒去制作!!!等住你哋去挑机啊!

呢度汤头主要系得一款,就系以猪骨、鸡壳、鱼鲜等熬制超过8个钟而成嘅秘制浓厚味噌汤,味道浓郁香醇,而且鱼鲜味突出。不过,辣度同麻度就分成5个级别,由(白碗)唔辣、小辣、中辣、(红碗)高级辣到(黑碗)鬼增辣都有得拣,造就出25种辣度嘅配搭。辣度由多款辣椒混合制作而成,当中仲包括有健力士世界纪录大全最辣嘅卡罗莱纳死神辣椒添!麻度则由烹调过嘅顶级和歌山葡萄山椒调制同其他多种山椒调成嘅香麻油所出。

嚟得就梗系冇奶油食唔辣㗎?至少都小辣啦,平时唔太食得辣但又想试下嘅话啱晒,辣度轻微。特制辣麻味噌拉面,有溏心蛋又有两大嚿慢煮叉烧,面条系混合咗3种唔同粗幼度嘅面(虽然就咁肉眼望未必望得出) ,索汤力一流,条条面都啜得到啲辣香啊。至於嚿叉烧,以慢火煨成,微甜带微焦香,口感软腍,好好食。

玉米笋辣麻味噌拉面呢就有好多条爽脆嘅baby corn喇,sharp sharp声好鬼爽。呢碗系中辣嚟嘅,色水上都睇得出,相对上系深红色少少,但依然系可以接受得到嘅辣度嚟。

至於高级辣呢,可以睇呢碗辣麻味噌拉面。红碗上阵,汤底色泽亦更加红,混合咗8种特制唐辛子呀,系几刺激嘅,有呛喉嘅感觉,仲有阵阵麻感。

终极王者就系鬼增级嘅辣度同麻度,混合咗9种特制唐辛子呀,落咗几款地狱级辣椒都未够,仲要有死神辣椒!如果现场你见到边位勇士只碗系黑色嘅,请你畀啲掌声佢!呢碗嘅辣度简直就系世界级!後劲凌厉,麻辣感久久不散。

另一款同样攻击力高嘅,应该就系芫荽辣麻味噌拉面喇!锺意嘅人就会好锺意,大大堆芫荽喺面,佢独有嘅味道,令喜欢佢嘅人觉得零舍清新,嫌未够多嘅话点餐时再叫增量,就可以得到座芫荽山喇!

胃口大啲嘅朋友仔,建议试完拉面之後,可以追加多碗叉烧饭!

鬼金棒
地址:铜锣湾谢斐道530号地舖


文:Kar
相、片:Tom Li


关键字
铜锣湾
拉面
日本菜
过江龙
麻辣
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
6天前
全城抗炎! 5间酒店自助餐转型 任点任食海鲜/主食/甜品 变阵保卫生
2020-03-17
【特约分享】超抵外卖陪你抗疫 即睇将军澳饮食地图!
2020-03-10
【随时更新】最後倒数!即将结业的老字号及人气小店
2天前
2月份好评餐厅十强
2020-03-05