不再沙漠系列 - 將軍澳篇
2021-07-29

以前提起美食沙漠,將軍澳絕對榜上有名,不過今時唔同往日喇!隨住愈來愈多新樓盤落成,海旁一帶愈來愈熱鬧,連Don Don Donki都進駐其中,加上康城嗰邊上年又有新商場開幕,所以吸引咗唔少餐廳喺區內開業,反而唔少人特登入將軍澳搵食添呀。而家無論你想食中、西、日、韓菜式定打卡cafe同甜品都大把你揀,一齊睇下呢個新晉美食熱點有咩好食喇~


高質壽司小店 鮪世市場 

相信你只要係將軍澳嘅街坊,都會對呢間位於坑口嘅人氣壽司店唔陌生。餐廳細細只有7至8個座位,所以長期都有人龍㗎,更有種去咗日本魚市場旁嘅壽司店一樣嘅感覺。食物方面主打手握壽司同丼飯,每款食材都好新鮮,師傅會喺bar枱前即叫即整,必試當然有中拖羅、大拖羅、海膽同牡丹蝦,特別啲仲有火灸鵝肝、金目鯛同極上本鮪魚鮫,性價比好高。另外佢嘅醋飯都做得唔錯,酸度恰到好處,值得入嚟食呀~

圖: Rachelwithfood


韓式創意cafe Seoulmate

本身係銅鑼灣嘅人氣韓式fusion餐廳,因疫情結業後再次嚟到將軍澳開店。重開後一樣咁受歡迎,烏卒卒火山燒汁黑豚肉飯係必叫,外層用蛋白製成火山形狀,包裹住燒汁黑豚肉炒飯,香甜惹味豬肉份量都好多,好味又可以相機食先,一舉兩得!韓燒牛肉蘑菇薄餅加入洋蔥、磨菇、韓牛同大量芝士,味道好rich,而且韓牛嘅牛味特別濃郁,餅底又烘得夠脆,係幾出色~甜品方面要試韓國米酒意式芝士蛋糕,用米酒製成嘅tiramisu真係好少見,食落有淡淡米酒香又唔會太甜喎。

圖: lltxnRubyWong1122


創意刨冰+Froyo 生命·有限·工司(甜品部)

食完飯想搵間甜品店坐低同朋友chitchat下,不如考慮下呢間新甜品店!呢間餐廳本身係主打創意韓式盒子吐司,而家就喺將軍澳開設咗pop-up甜品部,暫定會開到下年二月。餐廳主打超多口味雪花冰,冰底用100%純牛奶製成,香濃幼滑。提拉米蘇雪花係NO.1人氣之選,tiramisu cream係用咗酒店改良配方製成,食落真係有酒店級數!濃香芋頭·雪花由香濃芋頭蓉配黑糖芋圓,每食一啖都都有軟綿、Q彈同脆卜卜嘅口感,仲有芒果同朱古力等口味㗎~另外仲有Frozen yogurt同milkshake系列,一樣咁消暑。

圖: 餐廳Facebook


五十年潮州老店 陳儀興飯店

於新蒲崗足足有五十年歷史嘅潮州老店原來近排開埋去將軍澳!必試招牌潮式滷水鵝片,啖啖肉超入味,鵝肉肉質彈牙,最重要嘅滷水汁夠味之餘又唔會偏鹹,帶少少甜味,好出色~如果鍾意食內臟嘅朋友要叫埋滷水鵝肝,師傅用細火浸熟,口感嫩滑。另一款必食嘅蠔餅呢嘅蠔仔大大粒有鮮味,而且入口香脆又唔會過油。仲有多款小炒如蒜香骨、避風塘炒蜆、大漠牛柳粒都係餐廳好受歡迎嘅菜式,好有鑊氣,值得一試呀。

圖: zanvsfood


手打爆汁漢堡 Burger's Friend Forever

呢間漢堡店開咗短短時間區內口碑已經唔錯~裝修走美式工業風,食物就主打十款漢堡,所有漢堡肉都係用安格斯牛肉手打而成,牛味好突出!大推鵝肝安格斯漢堡,鵝肝嘅油脂香好明顯,配埋勁juicy嘅漢堡扒,每咬一啖都係幸福嘅感覺呀。食藍芝士嘅朋友,呢款丹麥藍芝士漢堡都好特別,藍芝士發酵得啱啱好唔會太搶,加埋焦糖洋蔥嘅甜味,成個漢堡好有層次感。餐廳漢堡嘅包皮烘得香脆帶甜味,配埋超豐富嘅餡料,難怪咁受歡迎喇。

圖: yogurtyogurtyogurt



文: Yanica
編:Kar


关键字
將軍澳
美食
壽司
韓國菜
漢堡
潮州菜
甜品
開飯專題
開飯仔為你提供各類型最新飲食情報及優惠,全面照顧你的飲食喜好。
餐厅资料
更多
收起
本月热门
持續更新! 2024生日優惠 食盡歐亞各式料理
2024-07-02
【2024新店精選】6月更新! 嘆和風鰻魚飯、雞白湯拉麵
2024-06-18
【隨時更新】零食速報 每周新款零食、酒品點評
2024-07-09
前五星級酒店烘焙主廚尖沙咀開店 推千層酸種蛋撻、牛角包
2024-06-26
壽喜燒推介2024!薈萃日本三大和牛關西壽喜燒、無限量食仙台A5霜降黑毛和牛
2024-06-18