一次過集近50間熱門餐廳郵茶葉蛋都有魚子醬流心版

人總係貪心嘅，如果唔係，點會每次揀食咩都咁難揀喎，呢間又想食、嗰間又想食，然後想食日本嘢嘅同時又想食西餐……協康會有個搞咗24屆嘅活動，叫「全港廚師精英大匯演」，就可以一次過滿足晒咩都想食嘅願望喇，呢個活動仲集咗近50間熱門餐廳同酒店嘅大廚喺埋一齊煮嘢食，好似自助餐嘅形式咁，一路行一路搵好嘢食！

馬來榴槤撻

Hotel Icon
一口榴槤撻雖然好迷你，但係榴槤味就好香好重，夾埋個餅皮一啖就擺晒落口，唔多夠喉。每round焗製需時，即整即食，熱辣辣㗎。

魚子醬茶葉蛋沙律

BrickLane
茶葉蛋本嚟係一樣好平嘅嘢食，但係配埋魚子醬即刻變得特別咗，質感仲要同平時食開嘅唔同㗎，蛋白好軟腍腍，一叉開就會見到，隻蛋係而家最多人鍾意食嘅流心蛋嚟㗎。

羊肚菌黑豚肉餃配黑虎掌野菌湯

L’ Hotel, Island South
呢道菜非常足料，黑虎掌野菌湯底好清甜，仲有幾種菇片，隻餃皮薄餡多，啲黑豚肉同羊肚菌都好鮮甜，係真「小鮮肉」呀，平時都比較少食到呢啲餡料嘅餃子，係有新鮮感嘅。

Dolce 88 Tiramisu

JW Marriott Hotel
現場仲有好多款唔同嘅中西式甜品，其中呢個tiramisu嘅cream打得好幼滑，而且唔會話好甜，食完都唔會有膩嘅感覺。而Hong Kong Opera Cake就會食得出一層層咖啡、焦糖同奶油味，最驚喜係個餅底原來係酥皮嚟！

Pink Lemonade

The Coffee Academics
美食大會通常都有好多酒類飲品，不過都會有啲非酒精類嘅，就好似呢間餐廳咁，除咗有咖啡提供，仲有Pink Lemonade，成杯真係粉粉地色，幾靚，女士們應該都幾鍾意，飲得出好fresh嘅檸檬味，食到飽飽地飲嗰陣就啱晒。

黑松露薯片

Abrate & Sons Ltd
仲有呢款薯片，好重黑松露味呀，令開飯仔都忍唔住食完一塊又一塊。不過，聽講巿面好似冇得買……

而呢晚所籌得嘅款項，都會用嚟為協康會有特殊需要嘅兒童及佢哋嘅家庭提供支援，又有好嘢食，又有好事做到，何樂而不為？下年再去啦~

隨時接收最新資訊
讚好OpenRice專頁！