同好友聚会可以谈心之余，试埋新店自然更加满足。开饭仔每个月会搜罗各区特色新餐厅，齐齐紧贴潮流打卡叹美食！11月就有和牛寿喜烧、海解自助火锅等，即睇边款啱你口味啦～
11月更新
纯白法式甜品屋 Patisserie Millefeuille
图：餐厅（IG）
中环Soho区一直畀人好chill嘅感觉，同呢间纯白法式甜品屋慵懒嘅氛围不谋而合，而半户外空间可接待宠物，感觉更加relax。甜点主厨曾於多间米芝莲星级食府任职，出品有保证，主打嘅迷你拿破仑千层酥有覆盆子开心果、云呢拿榛果等四款口味；另外亦有蒙布朗、柠檬挞、三明治等甜品同轻食。
韩国富人之家主题 会长之家烤肉
图：gayoung
以70年代韩国富人会长屋企为题嘅韩式烧肉店，复古布置走奢华风格，打卡别具特色。嚟到必试招牌牛油熟成五花肉，师傅用牛油包住五花肉再做恒温熟成，肉质更软腍多汁，而牛油嘅香气会渗入猪肉里面！另外韩牛牛肠、新鲜鳗鱼、酱油蟹等传统菜式亦值得一试。
朝咖夕酒新点 Rootdown
图：西营盘呢间店内外都以木为设计主轴嘅cafe，自然光充足之外，天花用灯箱设计嘅小天窗，会随时间调整光暗同颜色，气氛够晒chill，而朝咖夕酒形式照顾唔同客人需要𠻹。食物方面必试grilled cheese三文治，半融芝士有拉丝效果，配咖啡或highball都好夹。
日厨坐镇席前寿喜烧店 寿喜烧 树 
图：餐厅（FB）
由日藉主厨主理嘅席前传统关西风寿喜烧，选用高级和牛入馔，包括日本三大和牛之一嘅近江牛，以及京都姬牛。全部牛肉都由主厨亲自人手切割，避免破坏和牛嘅纤维，以确保和牛质素。餐厅主要提供套餐同omakase，分别配以蒸物、炭烧鳗鱼等风味料理。装潢以黑色为主调，12席嘅L形吧枱都可以欣赏到师傅手艺，想私隐度高啲亦可以选择VIP房间。
抵食海鲜自助火锅 壹号渔船 
图：平时靓装嘅中式海鲜酒家，都系食即炒小菜、点心，但呢间新店就加埋可以一人一锅嘅任食火锅，而且性价比高，午市任食$118起，定量火锅则$68起，配以唔同肉类、海鲜，相当抵食！如果想试海鲜料理，由镬气小菜、活海鲜料理到精致小点都有，如清蒸长脚蟹、香脆虾多士、蟹肉沙律盏等。
怀旧风中式酒家 欢乐大排档
图：westcoast202307、chiuwing123456789
以七、八十年代旧香江为设计灵感，用上戏棚、麻将枱等作装饰，怀旧气息满分，打卡都别有一番风味。酒家日间主打传统点心，即叫即蒸；晚市则供应大排档镬气小炒同怀旧菜式，如波士顿龙虾伏面、香喷喷焗鱼肠等，好啱同一班朋友开支大啤畅聚relax下。
可可博物馆×Cafe CACAOLAB
图：朱古力食得多，但你对佢有几了解呢？铜锣湾新开嘅可可博物馆占地三层，由可可嘅起源、品种等都有所介绍，会不定期开办朱古力工作坊外，更将其中一层开埋cafe𠻹。嚟到必试坊间少见嘅Fresh Cacao Juice，系用白色嘅可可果肉制作，味道清新；另外骰子吐司、黑朱古力软雪糕等烘焙食品同甜品亦系唔错嘅选择。当然品牌嘅朱古力，例如无添加糖嘅果味系列都可以喺度买到。
10月更新
釜山烧肉店登港 유명진의 육미정담
图：来自釜山嘅人气过江龙烧肉店，主打韩式烤肉同传统韩国料理，而肉类主要由韩国、日本引入。其中切成薄片半圆形嘅｢花卷五花肉｣，油脂丰盈，烤至略带焦香再蘸酱汁更加惹味；另外韩牛肉眼、新鲜鳗鱼都系唔错嘅选择。想浅嚐试下嘅话，午市套餐只系$78起，传统料理有薯仔排骨汤、烤小章鱼五花肉饭等选择，另外烧肉套餐则按款式包括2至6款肉类，总有一款啱你口味。
和洋风木系Cafe Relish Kitchen by ALOT
图：一间观塘起家嘅日式洋食Cafe开分店喇，今次打正旗号同日式家俬店合作，将数千尺空间打造成简约舒适嘅木系装修；加上两边落地玻璃无遮无挡，充足嘅自然光令整间店有种闲静感，非常relax。食物方面以轻食同意大利面为主，例如蜜糖烤日本南瓜软壳蟹沙律、鲜海胆芦笋蟹肉三文鱼籽忌廉汁意大利粉；而小食则推介较少见嘅牛小排饺子、酥炸特大多春鱼。
泰式火锅×街头小食 四面泰•火锅
锺意围炉打边边嘅朋友，可以一试沙田呢间最新嘅泰式火锅店，佢嘅秘制冬荫功鲜虾锅汤底，先炒香生猛海虾、花甲同辣椒膏，再加入泰国香料熬煮2小时，配埋秘制调料，鲜香惹味。如果想配鸳鸯锅，以椰子水、椰奶同椰浆煮成嘅椰奶鸡汤锅味道清润，而慢炖牛板腱清汤锅则加入泰国嘅香茅、南姜、豆蔻等香料熬煮长达8小时，香气独特。火锅配料首推宝藏海鲜手工金盒，另外手工竹笙虾卷、炭烧猪颈肉、招牌椰皇冻等配料、小食同甜品都值得一试。
日本过江龙立食寿司 寿司鱼がし日本一
呢间主打立食寿司嘅餐厅，系1989年喺日本创立，首间海外分店就位於启德新商场AIRSIDE！香港店采用开放式寿司吧枱形式，可以近距离欣赏师傅精心制作寿司嘅手艺。品牌宗旨之一系「不时不食」，标榜选用日本无污染海域、每日由当地市场直送到店嘅海鲜。供应厨师发办料理套餐、厨师特选寿司十贯配手卷、丼饭、单件寿司以及日本清酒等。
地道墨西哥菜 El Taquero
全港首间餐厅引入传统直立式旋转烤肉串架，所制作嘅传统墨西哥腌烤猪肉，烧制时必顺序穿上菠萝、猪肉同洋葱，令猪肉吸收蔬果香气。而一系列墨西哥中部菜式，包括坊间少见嘅仙人掌粟米夹饼、粟米蒸粽等款式，其中夹饼饼皮、粟米脆片於店内自家制作，保证新鲜。试埋加入细细只脆炸蚱蜢嘅啤酒鸡尾酒Michelada，更加风味十足！
IG-able黎巴嫩餐厅 RUE DU LIBAN 
异国情调新餐厅～以抢眼嘅蓝色同黄色做主调，加上大量花饰装饰天花，独立房间再铺上富民族色彩嘅地毯，全店每个角落都好啱打卡。菜式方面由曾於知名酒店任职嘅埃及主厨主理，当中包括多款羊肉料理，例如用金色烧炉呈上嘅阿拉伯传统烤肉、黎巴嫩羊肉肠、中东特色炸羊肉饼等。10月新张期间，晚市全单8折，兼送是日精选甜品一客，想试就把握优惠喇。
韩系休闲风打卡cafe Tamora
图：韩国有唔少空间宽敞嘅cafe，而大尾笃一间由韩国情侣主理嘅cafe亦跟随呢种风格，三层嘅座位之间保留足够距离，以水泥墙、红砖为设计主轴，加上对住湖景同山景，带畀人恬静淡然嘅感觉。食物方面暂时供应croffle、咖啡同济州茶饮，陆续会加入甜品同brunch，带嚟更多轻食选择。
9月更新
人气甜品店回归 聪。C Dessert
几年前全线结业嘅聪嫂甜品店，最近嘅选址湾仔重开，大家可以再之食到佢嘅招牌龙眼椰果冰喇！另外重有榴槤水晶珠、芒果奶昔双皮奶等选择。如果想试新品，可以考虑牛角窝夫系列，而仙草则换上新配方，口感更嫩滑，配上烟烟韧韧嘅北海道牛奶麻糬增加口感，大人小朋友都锺意食。
抵食养生米线 花胶鸡米线工房
米线控注意～上环开咗间花胶鸡汤主题小店，招牌花胶鸡米线只需$68，其花胶用老姜高汤浸泡，再蒸煮12小时至腍身；而慢煮三黄鸡则嫩滑有肉汁；配埋用老鸡、老姜、金华火腿等材料熬制12小时嘅汤底，香浓得嚟富胶质，养生朋友都啱食。而花胶鸡汤底外，亦提供胡椒猪肚汤同麻辣汤底畀你拣。留意由即日起至10月31日新张期间，2-6pm设有主餐牌全单9折优惠。
Fusion摩登泰国菜 ASOK THAI GARDEN
图：餐厅（IG）
人气泰式船面嘅姐妹店嘅姐妹店，主打一系列Fusion摩登泰国菜，而荃湾新分店沿用热带度假风为设计主轴，其白色墙身、藤制灯罩、木餐枱椅，予人休闲舒适嘅感觉。如果你系咖喱控，推介你试好下饭嘅蛋炒咖喱软壳蟹同红咖喱烧鸡；甜品方面，焦糖榴槤挞配雪糕同花生椰子雪糕都不失泰国风味。
新派韩式料理 ANJU
韩文안주（安酒）意指佐酒美食，亦系尖沙咀呢间新派韩式餐厅嘅重点美食，除了提供多款手工腌制泡菜，以传统调味料，如陈年酱油、韩国味醂、韩式辣酱等炮制料理外，更融入西式烹调风格，供应酱油带子鲍鱼、大虾辣味炒年糕、风味三重煮八爪鱼等惹味菜式。配埋有「深水炸弹」之称嘅烧啤、韩式米酒或韩风鸡尾酒，更加滋味倍增。
主打北海道成吉思汗烧肉 羊蹄山
图：餐厅（IG）
羊肉控福音～铜锣湾最近开咗间「北海道成吉思汗烧肉」主题店，主打嘅羊肉提供多个部位，其中羊颈柳有咬口兼肥瘦适中；锺意肉味浓郁又有油香，则推介你试羊臀肉。烧肉时记得将蔬菜围住圆拱型烤板边边，就可以吸收埋流落嚟嘅肉汁。另外重有羊肉饺子、羊肉汤等料理，可以自由搭配全羊宴𠻹。
创意港日Fusion拉面 新・麺舎
有猪油渣，又有慢煮沙姜猪手粒，讲紧嘅唔系粤菜，而系港日fusion拉面！元朗呢间创意拉面店现时供应6款拉面，其中「很胶」拉面配上带花雕酒香嘅慢煮沙姜猪手粒，以及用猪皮、鸡脚制成嘅骨胶原厚啫喱；另外「很地」拉面则加入猪油渣，同火炙叉烧一齐食特别香口。而汤底按口味分别配上鸡清汤、豚骨白汤、番茄清鸡汤同酱油鸡清汤，带畀大家更多选择。
怀旧风酒吧餐厅 水七木巷
图：V Chan
又有打卡新店登场喇～位於中环嘅酒吧，装潢以80年代嘅香港为题，加入城寨舞厅、士多、茶餐厅、理发店等元素，无论边个位置打卡都够晒独特。食物方面有砵酒蚝意大利烩饭、炸鸡脚筋等港西Fusion口味，重有选用复古风中式茶杯盛载红豆沙等怀旧糖水。而鸡尾酒则以手摇饮品、香港特色饮料调制，创意十足！
8月更新
主打北海道汤咖喱 森．汤咖哩
北海道汤咖喱一入份有多款食材，好似观塘呢间专门店，主菜配上十款香炸时令蔬菜，口感同味道层次够晒丰富。而主菜提供海陆空口味，例如啖啖肉嘅慢煮嫩滑鸡髀、飞驒和牛汉堡扒、日本带子等；另外汤底加入大量蔬菜熬煮，香辛味适中，拌饭啱晒。
图：打卡泰国菜 摩登堂
用虹吸咖啡壶煮冬荫功海鲜汤？！冇错呀，荃湾呢间新派泰式餐厅，采用萃取咖啡嘅直立式虹吸壶，将冬荫功汤、泰式香料嘅精华萃取出嚟，味道层次分明亦好啱打卡。另外甜品同饮品，则推介充满当地特色嘅泰国奶茶雪山刨冰船、班兰生椰乳沙冰，叹返份解辣都唔错、
图：日本串烧酒吧餐厅 FireBird
品牌以高质食材同创意元素作招徕，一直受大家欢迎，最近进驻东涌，更推出即烧「浜焼き」料理，并正式成为国泰夥伴餐厅。8月期间2间分店都会推出国泰会员尊享嘅「初嚐及二嚐日本酒套餐」，当中包括海鲜珍宝大虾、甲罗烧同北海道珍宝帆立贝，配衬羽樱手造大吟酿、久保田千寿、獭祭45纯米大吟酿3款日本酒，提升鲜味指数！
新派中式私房菜 星御荟
炸物食得多，炸花胶你又试过未？尖沙咀呢间新派中式私房菜，以蟹膏汁制、黑鱼子配衬脆皮花胶，集香、酥、滑於一身。另外外型似粗身腊肠嘅特色黑醋冻猪手、黑汁豚肉叉烧都系坊间少见嘅款式。想试嘅话要留意，餐厅午市设有商务套餐，晚市则只供应私房菜，照顾唔同类型食客。
图：时尚宠物友善Cafe MOOJOO Lifestyle Cafe
大围新商场有唔少特色餐厅进场，好似呢间时尚宠物友善Cafe就提供选择多元化嘅餐单，包括中、英、印、台等口味，如英式早餐鸡蛋仔、印尼巴东牛肉饭都系餐厅推介菜式。想简单啲叹个甜品chill下嘅话，朱古力控必试Valrhona黑朱古力焦糖蛋糕；另外雪糕鸡蛋仔配手工果酱都系唔错嘅选择。
图：健康概念文青Cafe Bischofia by Mood
如果你锺意健康餐饮或想keep fit，不妨试下呢间健康概念文青Cafe，部份菜式由营养师推介，更提供卡邦尼蒟蒻面、糖养奶昔等较低卡嘅食品，致力推广咖啡慢活文化，同时将健康饮食融入生活。
图：7月更新
广角海景Cafe Umi
铜锣湾呢间西式Cafe位於商厦高层，面向维港嘅一排大玻璃窗可以饱览无敌海景，日夜景色都相当怡人，够晒浪漫。食物方面大份足料，好似炸软壳蟹咖喱蛋包意大利饭面层，放上原只香脆软壳蟹；自家手打和牛汉堡则啖啖肉，配埋薯条更加惹味。另外甜品同饮品都着重细节，例如伯爵茶蛋糕配上香橙乾做装饰、香蕉朱古力咖啡重饮到香蕉粒，诚意十足。
图：日本人龙丼饭店登港 日本桥海鲜丼
东京起家、将於7月17日正式登港嘅日本桥海鲜丼つじ半，连续6届荣获日本全国海鲜丼金赏，出品有保证。佢哋嘅丼饭系「一丼二食」，首先浅嚐两片配衬特制胡麻酱嘅鱼生片，再品嚐拌匀秘制酱汁嘅海鲜丼饭；当丼饭剩余约1/3分量时，加入来自日本嘅三叶芹、鲷鱼高汤等变成「汤渍饭」。而招牌「海鲜の山」丼当按级别配上金枪鱼蓉、鲑鱼子、象拔蚌、赤虾等海鲜，师傅会将各种海鲜切碎拌匀，砌成「海鲜山」放喺饭上，带嚟震撼视觉效果。
日本和牛+豚肉放题 梅吉涮涮锅
一个价钱任食几十款食材，啱晒有选择困难嘅朋友。西湾河呢间涮涮锅放题店，主打北海道十胜和牛唔同部位、以及数量珍稀嘅千岁豚肉，而自助区则供应鲜美海鲜、香港有机蘑菇、蔬菜等，如如青口、海螺、元贝、日本海藻等。汤底必试招牌「梅吉锅」，以鲣鱼、猪骨、日本红咖喱等熬煮而成，微辣香喷喷；另外所有汤底都会配上牛牛冰造型清鸡汤，混合起嚟味道层次丰富。
传统×创意中菜 龙庄
人气创意点心店「龙点心」开副线！主打嘅新派粤菜款式新颖，好似以怀旧小吃蚬蚧鲮鱼球为灵感，制作蚬蚧鱼肉烧卖；又选用皮厚多肉嘅荷兰茄子，炮制鱼香原条荷兰茄子；而招牌菜「龙蟹膳」重可以一蟹两食，整成鲜味嘅蟹王煎肠粉同上汤煮肉蟹！餐厅占地约2,000尺，装潢沿用怀旧复古风，如马赛克砖墙、霓虹招牌、古典屏风等，带老香港情怀得嚟又唔老土。
非一般靓景酒吧餐厅 Intervals
上机前饮返杯？！香港机场禁区嘅Sky Bridge天际走廊，最近新开一间超级IG-able嘅Cocktail Bar，可以饱览停机坪美景，加上高楼底，睇日落更加浪漫有特色。餐厅可按旅客上机前剩几多空闲时间而量身调配专属酒品，另外精致嘅西班牙佐酒小食Pinchos，以面包或脆饼配上芝士、海鲜、蔬菜等，未到目的地都已经好relax！
图：lonicole
6月更新
澳洲打卡软雪糕登港 Aqua S
今个夏天食手工软雪糕消暑，不妨试下来自澳洲嘅软雪糕品牌。雪糕以欧洲奶源制作，质感幼滑，而每月1号、16号都会推出新口味𠻹。由即日起至6月30日就有意大利开心果、香浓黑芝麻味。如果想多啲变化，可以夹常驻皇牌海盐味做扭纹配搭，加埋自选toppings之一嘅「经典棉花糖云」，打卡度满分！品牌透露嚟紧会陆续推出港式怀旧雪条、脆皮雪糕珍宝珠等款式，带畀大家更多新鲜感。
唯美感亲子餐厅 Jello & Mellow
提到亲子餐厅，可能你会谂装修走Q版风格，但鰂鱼涌呢间新店就走唯美路线，即使大人自己嚟都可以融入其中。装潢糅合北欧简约风、童真感觉，例如以啡、白色波波注满波波池；「Secret Garden」则设有彩色花墙，打卡啱晒。而食物亦充满创意，好似「炭烧海鳗芝士煲仔薄饼」会喺客人面前即席点火，令海鳗增添焦脆口感；锺意惹味小食嘅朋友，则推介你试「韩疯炸鱼薯条」，其实系串烧版Fish & Chips，将鳕鱼裹上天妇罗炸浆脆炸而成，非常脆口。店内会不时举办互动工作坊，让你同小朋友边食边玩。
日本人气二郎系拉面 冈山一番店
乐富店系呢间日本冈山二郎系拉面店首间海外分店，来到试到招牌拉面、豚骨酱油沾面、芫荽辛辣拉面等。浓厚猪骨汤熬煮8小时以上，配搭自家制叉烧、太面同大量蔬菜，而蒜同油脂就可以按喜好选择分量。另外面嘅分量有4种，最细嘅小盛为150g，最大嘅特盛则有450g。餐厅更设有关东煮自助吧，蒟蒻、日本猪软骨等每款$9起，当加配菜都唔错。
图：韩烧放题 韩烧大叔
旺角呢间新店主打韩式烧肉任食，由韩国直送济州猪肉、庆州千年牛（韩牛）等食材，另外亦有美国或者澳洲安格斯牛嘅唔同部位，以及多款韩式热食例如炸鸡、泡菜煎饼、鱼片串等。午市除咗任食亦有韩式套餐，$78起包自选主食、小食、饮品同汤，性价比唔错。
图：冰凉椰子甜品 Komorebi Komo Komo Coconut Dessert
冰冻嘅椰青清甜又透心凉，夏天食就最啱～九龙城呢间外卖小店就主打椰子甜品，其中原个椰子装住嘅椰子冻，用椰子水制作而成；唔同口味嘅配料各有特色，锺意果香嘅可以拣榴槤、芒果，另外红豆麻糬、桂花味都唔错。而饮品则有抹茶椰椰、桂花酒酿椰、榴槤雪沙等消暑口味。
图：工业+怀旧风打卡Cafe Badgers Cafe
薄荷绿色窗框，为呢间怀旧风Cafe增添一份典雅嘅感觉，而店内嘅工业风装修再加怀旧家俬都充满特色，里里外外都好啱打卡。食物以西式轻食为主，其中All Day Breakfast特别配自家制红菜头鹰嘴豆抹酱，颜色鲜艳；另外重有牛肉布里欧三文治、自家制芝麻脆饼配咖啡等选择，好啱锺意轻食或打卡同时叹杯啡嘅朋友。
图：为食小那星
5月更新
宠物友善+法式Cafe Le Gouter
近排又有唔少宠物友善餐厅登场，好似西环呢间法式cafe，连室内都可以带宠物入内。小店走优雅法式路线，而设有伞形檐篷嘅户外座位更加系打卡必影。主理人於烹饪学校Escoffier毕业生，制作嘅烘焙品同轻食之中，必试圆碌碌、充满牛油香气嘅Le Roll，唔同口味会配上太阳蛋、蛋白霜等；另外法式柠檬挞、Canelé等都值得一试，好啱tea time、假日叹返份chill下。
图：宠物友善+新派韩国菜 Cafe Joo
另一间宠物友善餐厅，户外座位可以接待宠物外，更提供狗仔啱食嘅餐单。而主菜牌既有韩式街头小食，亦有Cafe风格嘅自家制甜品，选择几多，加上主厨以擅长嘅西式烹调手法炮制炸韩式紫菜饭卷、招牌济州岛炒八爪鱼配墨鱼汁意粉等菜式，风味独特。如果你系甜品/雪糕控，必试自家制牛奶软雪糕配烤法国窝夫牛角包。
浪漫泰式酒吧餐厅 Nafafa Thai Cuisine & Lounge
食泰国菜都可以有浪漫感觉嘅～铜锣湾呢间新店，用餐区嘅装潢以泰式同现代风格为主，而酒吧区则走西式酒店风，就连餐具都充满民族色彩，成个感觉几relax。餐厅请嚟泰国厨师，以当地嘅烹饪手法、新鲜食材同香料，炮制炭烧泰国大河虾等美式。如果想饮杯嘢chill下，亦有一系列以花为题嘅泰式鸡尾酒，带女伴嚟打卡都唔错。
图：餐厅（FB）
墨西哥酒吧餐厅 Uncle Miguel
想感受墨西哥民族风情，而家可以去中环呢间新墨西哥酒吧餐厅。店内以手工马赛克，拼出富当地色彩嘅饰墙，打卡一流。而主厨系墨西哥原住民，以自行调制嘅新鲜食材，展现墨西哥北部、中部地区嘅地道风味，如经典嘅墨西哥芝士馅饼、墨西哥烤肉等，配埋墨西哥地道特饮Horchata更能凸显风味。
新宠物友善Cafe Vive Cake Boutique
精品蛋糕品牌以全新Cafe形象回归中环，并加入唔同元素，包括宠物友善区、西日式料理同茗茶系列。装修方面走优雅风格，近店门嘅前半部空间可以接待宠物。菜式包括Roasted Eggplant、Fish & Chips等轻食同惹味款式；甜品方面必叹用自家制开心果味Mascarpone芝士制作嘅Tiramisu；而茶饮可选择中、西、日口味，选择几多元化。
图：四川小菜+火锅 山止川行
铜锣湾呢间木系装潢嘅四川菜餐厅，以供应川式小菜同火锅为主。小菜必试招牌辣子鸡，香辛惹味；而火锅嘅汤底同食材走高质路线，提供骟牯牛吊龙、鲜管廷、四川腊肠、活蛏子等配料，有选择困难嘅话则推介牛肉海鲜拼盆，让食客一次过品嚐唔同鲜味，而家试业期间有9折优惠㗎。
图：Andy Tan
4月更新
咖啡渣整牛扒 CARVER
各位锺意锯扒嘅朋友，铜锣湾新开嘅酒店炭烤扒房，特别自家制「美国20日咖啡渣乾式熟成西冷牛扒」！师傅将来自巴西产区嘅阿拉比卡咖啡渣混合多款秘制材料，令牛扒风味更独特。另外重有多款美国、澳洲、日本等地嘅高质牛肉，包括美国极佳级金标牛板腱、日本宫崎A4牛柳等。而牛肉以外，亦有真空慢煮鹿儿岛黑豚猪扒、冰镇海鲜、特浓朱古力蛋糕等款式。而家至5月31日期间，经OpenRice网上订座，可享全单9折，想试就把握优惠喇。
英式甜品专门店 Crumbled
来自英国嘅Crumble甜品专门店，装修跟随总店嘅粉红色设计，少女感十足又够晒吸睛。Crumble可以自选配料，如Oreo、M&M、小熊软糖、麻糬等，面层则淋上custard酱或配雪糕，而注入针筒畀你慢慢唧嘅酱料，则提供朱古力同焦糖味，砌成满满一碗後，视觉效果好澎湃，打卡啱晒！小店亦有几款回定组合，每款口味有7-8种材料，方便有选择困难嘅朋友。
图：亲民价越式汤面 越汤
通常用A5和牛制作嘅菜式都贵啲，但呢间越式小店，就以亲民价制作招牌火车头日本A5和牛汤粉，几十蚊就有日本A5生和牛肉片、手打牛丸、牛筋等5款餸料。餐厅更推出用料十足嘅海鲜面食，好似火炙香草蒜蓉龙虾汤粉，将龙虾虾身抹上香草、蒜蓉再火炙；另外辣味香草蒜蓉牛油焗牡蛎汤粉，则选用日本蚝，两款都鲜味十足。
融合关东、关西风味 寿喜烧 伊势熊
尖沙咀呢间专门店由日籍师傅主理，午市、晚市同厨师发办都主打寿喜烧，其酱汁结合关东酱汁炖煮概念，以及关西糖烤风格，口味独特；配搭嘅生鸡蛋汁提供传统款式外，重有将蛋白打成泡状嘅云朵造型，好啱打卡。牛肉主打日本橄榄和牛（以橄榄为饲料）同京都姬牛（黑毛和牛），亦有试期间限定特别款式；另外亦提供阿波酢橘鸡、北海道四元豚等选择。餐厅更选用产自日本岩手县嘅寿喜烧锅具，以及老字号窑厂「濑贞制陶所」嘅碗碟，让食客享受佳肴，同时欣赏日本传统工艺。
台湾夜市风味 麻吉灶咖
将於4月11日开业嘅台式餐厅，店名都充满台湾风格，「麻吉」系当地人形容好朋友关系嘅讲法，而「灶咖」嘅台语则意指厨房。食物以台湾夜市风味为主，供应麻吉蚵仔煎、红烧牛肉面、特色刈包、蚵仔面线等。另外惹味嘅麻吉锅包括鸭血、臭豆腐、台湾香肠、墨鱼丸等11款食材，汤底可以拣猪肉鸡汤，或以台湾辣椒酱制成嘅麻辣牛肉汤，而番茄汤则啱晒锺意清甜口味嘅朋友仔。
新派鸡肉×辣味主题 辣鸡制造
自问嗜辣嘅朋友，必定要bookmark大角咀呢间新派鸡肉主题餐厅，佢同本地辣椒粉品牌合作，炮制香辣料理同自家创作辣味酱料盘！酱料分成10级辣度，如微辣嘅姜葱蛋黄酱、特辣辣油、烟燻辣椒盐等畀辣控挑战。餐厅选用无公害鸡只来自日本等地，其中需预订嘅皇牌烤爆汁鸡经腌制、风乾1晚後，等客人到场再即时焗制，皮香肉滑；另外重有酒糟杞子鸡子、香辣鸡肾等选择。而鸡肉以外，特色鸡尾酒辣蚝、麻辣猪手都值得一试。
图：怀旧装潢×精致手工粤菜 粤馔
餐厅走中高档路线，以深色巴西酸枝木配意大利黑白云石作布置，再结合典雅、复古同现代设计，有种上海滩嘅感觉。菜式专注传承广东菜风味，由前菜、主食、海味、汤羹、甜品等都有供应，其中招牌点心之一嘅原条花胶浸灌汤饺，灌汤饺内藏嘅上汤冻拌入鲜虾、瑶柱丝等材料，配上富胶质嘅花胶，够晒鲜味。另外珊瑚龙吐珠、香煎灌汤牛肉饼都系唔错嘅选择，同亲友聚餐，甚至接待商务客户都大方得体。
图：餐厅（FB）
熊仔主题Cafe Cakebearbear
由蛋糕网店做到开餐厅都以熊仔做主题，皆因造型可爱嘅招牌「睡眠熊芝士蛋糕」深受大家欢迎。餐厅嘅店门打卡墙、摆设到食品都加入熊仔元素，例如摆放bear bear公仔、供应一人份熊仔蛋糕、熊仔冰甜品/特饮等。主食提供西日口味，有香草烧汁羊架、阿根廷红虾龙虾汁意粉、蒲烧原条鳗鱼饭等选择。加埋鸟笼造型卡位、捕梦网主题墙画等设计，食物同环境都充满少女感，好啱打卡。
图：餐厅（FB）
3月更新
鸡煲火锅×冰室主题 尚上下夏2.8 - 养生鸡煲火锅x冰室
尖沙咀人气鸡煲店最近进驻湾仔，更加入冰室主题！朝早供应冰室食品，如招牌芫荽餐蛋三文治、特色鸡煲包、足料老火汤汤底面餐等。晚上则变身为鸡煲店，推出四重火焰芝士鸡煲，当中包括莫萨里拉芝士、巴马臣芝士、蓝芝士同车打芝士，保证「芝」味无穷；另外爆辣死神辣椒鸡煲用上大量有「死神辣椒」之称嘅Carolina Reaper辣椒，自问食得辣嘅朋友不妨去挑战一下。
英国人气龙虾+汉堡主题店 Burger & Lobster × OZONE
唔使飞都食到！首次登港嘅英国人气龙虾、汉堡主题店，今次以期间限定店形式同OZONE合作，由即日起至3月18日，将主打嘅汉堡、龙虾料理同龙虾包带畀大家。你可以喺尖沙咀全球最高嘅天台酒吧，享用香港限定嘅避风塘风味龙虾、期间限定嘅脆炸包配云呢拿雪糕啊～
图：餐厅（官网）
摩登菲律宾菜 BARKADA
呢度供应招牌香辣虾酱椰子面、铁板炒猪腩肉碎等菜式，估唔估到主打咩料理呢？系摩登菲律宾菜呀～餐厅由饮食集团Singular Concepts、美籍菲律宾人以及饮食网红Jen Balisi合作开设，装潢亦色彩缤纷，又混合园林、优雅、民族色彩等元素，充满热情同亲切感，即使嚟饮杯嘢轻松下都好relax。
图：中环打卡居酒屋 Yurakucho
中环最近开咗间IG-able嘅居酒屋，以东京站（火车站eki）周边环境为设计灵感，加入石墙、铁丝网等元素，时尚又型格。餐厅供应一系列炉端烧食品、炸物、甜品等，同时搜罗特色清酒、日本威士忌等酒类饮品，让大家放松身心享受美食。
图：kacti.foodi、餐厅（FB）
Whisky啡酒Cafe 一刻
尖沙咀呢间啡酒Cafe注入威士忌元素，更联同The Whisky Library，将5款来自苏格兰3大独立装瓶商嘅出品，以Tasting Set形式配搭盐酥鸡、迷你杂菌盛同炸莲藕片，畀大家试唔同风味。想饱肚啲嘅话，日式叉烧流心蛋汉堡都值得一试，Muffin包底同叉烧都系自家制㗎。Cafe全店采用水泥墙设计，配衬木制家具，环境几chill，重好啱打卡𠻹～
图：餐厅（IG）
2月更新
Jer@MIRROR与好友开树木主题Cafe 根
人气男团MIRROR再有成员开餐厅！今次系同样为食嘅Jer柳应廷。新店概念源自出道作品「物语系列」同之後嘅「重生系列」，以树木重生为主题。特别同本地机构香港木库合作，用被台风吹塌嘅大树做成长櫈，更将800块树皮砌成Cafe里面嘅打卡大树。食物方面除咗Jer同一众柳柳粉一致推介嘅辣蒜香烤春鸡之外，亦有一系列呼应大自然主题而创作嘅植物造型甜品，例如栩栩如生嘅苔玉蛋糕。
图: YoKeeYeung
特务主题华丽装修中菜馆 花图
而家嘅中菜厅越开越多唔同主题，好似尖沙咀呢间新店就以王牌特工为灵感，豪花千万打造「特务神秘角度」酒廊区、「特务神奇道具衣橱」用餐区等，入去可以幻想自己系James Bond！餐厅主打重新演绎嘅经典粤菜，好似爵士汤、盐酥脆皮鸡、和牛宝盒等。午市供应点心，晚市另有火锅选择。
全港独家研发AI智能泡茶器 活在茶下
科技点样可以同传统饮食结连？有茶师团队用咗两年嘅时间，研发咗全港首个AI智能泡茶器，以人工智能根据各种茶叶嘅特性，自动调校水温同浸泡时间，增加冲泡出嚟嘅茶叶嘅稳定性。除咗莓果滇红茶、香茅茉莉等，更有利用燕麦奶冲嘅普洱茶，面头仲有八角，茶香回甘，微甜消脂又健康。新店仲有轻食menu，例如加入宣威火腿同芝士嘅鸡蛋仔，则带有pairing嘅元素。芝士同茶接触後，会产生淡淡嘅榛果香，层次多变。
性价比高任食台湾火锅 好呷台湾火锅
又一间任食台湾火锅店开业！新店位於铜锣湾，晚巿可以任食120分钟，供应18款汤底选择、53款食材包括台湾制特产，同埋猪鸡羊牛等肉类，澳洲M5和牛都系任食唔嬲呢。轻奢华盛盘食物更以三层架盛载，新鲜生蚝、鲍鱼、美国SRF和牛牛肋粒、手切牛下肩胛翼板等都可以食完再食。澳洲M5和牛肉味较浓，牛肩胛则油脂软滑，各有捧场客。性价比高在除咗火锅配料外，自助区更有多款台湾小食，甚至连手摇茶都有得饮。
中式商务自助早午餐 永8舫
西式早午餐食得多，想特别啲不如试下中式。湾仔新开嘅新派高质中菜馆，新张期间推出自助早午餐，可以任食逾30款精致点心同小菜，如啤梨咸水角、兔仔饺、油爆虾、芝士焗猪扒饭等；而每位享用自助早午餐嘅食客，都送上秘制天宫翅及波士顿龙虾半只（优惠暂定由即日起至2月28日）。加上装潢结合艺术感同优雅风格，又设有2间提供卡拉OK设备嘅贵宾房，同亲友聚餐或招待商务客人都大方得体。
现场即制手工意粉×澳洲菜 Man Mano
手工意粉梗系愈新鲜愈弹牙啦！东荟城呢间糅合现代风味嘅新意式餐厅，店内特设Pasta Corner，每日以优质小麦粉同美国鸡蛋，现场即制逾6款手工意粉，炮制牛脸颊肉酱阔条面、越南大虾慕斯意式云吞、澳洲羊肩通粉等款式。餐厅以优雅嘅淡粉色系作主调、碎花大理石台、木等元素布置4,000尺空间，重有少量户外座位，气氛写意温馨，好啱约会、一家人嚟放松身心享用美食。
图：餐厅（FB）
Farm-to-table+肉店概念意式扒房 Macelle
Soho区呢间意式扒房，2月3日起开始试业，其店名灵感来自意大利文「macelleria」，即系「肉类切割专员」或「屠夫」（butcher），皆因餐厅糅合肉店概念，食客可以自行喺扒柜选择直接从农民购入嘅进口肉类。招牌菜系分量十足嘅1kg Angus Fiorentina Steak，另有坊间少见嘅1.5kg M5和牛牛臀盖扒，而Steak of the Day则每日供应唔同部位，啱晒锺意新鲜感嘅朋友仔。
铁板上熟成阿根廷牛扒 La Parrilla Steakhouse
中环呢间怀旧风阿根廷扒房，采用红砖墙、仿木屋假天花设计，嚟到仿佛去咗外国咁，气氛好chill。餐厅设有自家熟成柜，将来自阿根廷唔同地区嘅牛肉熟成最少7-14日，令肉质更软腍。而牛扒上菜时亦好吸睛，皆因大木盘中间有铁板热住牛肉外，两旁分别放上6款酱料，如阿根廷青酱、芥末酱，让你一次过试到多种口味，其中主打肉眼扒、封门柳都值得一试。
图：jbyc
1月更新
集合欧洲4国美食 F.I.G.S. Bistro Mediterranean & Apéro Terrace Bar
太古城中心最近开咗间地中海餐厅，主打法国、意大利、希腊同西班牙菜式，而店名亦取自呢4个国家名嘅第1个英文字母。餐厅全日供应法国海鲜炖菜、新鲜自制嘅意粉、希腊风味烤肉同经典西班牙菜式，如烟燻烤鸡肉串、巴斯克风味烤八爪鱼、鲜嫩烤蟹肉卷等。其装修则走玻璃屋风格，又有户外露天座位，环境好休闲写意。
创意日式风味 ROOM 3
锺意边叹美食边饮返杯嘅朋友，可以试下尖沙咀呢间新开Gastrobar。主打嘅日式料理同和风鸡尾酒不乏创意元素。好似仿海胆造型嘅「流心海胆」，用太刀鱼手工鱼蛋包着北海道海胆，再沾上紫菜炸成；而8款招牌鸡尾酒之中，The Fiction混合日本特有甲州葡萄酒、琴酒同香槟，上台时会加入烟雾效果𠻹。加上店内3个用餐区分别用上竹林、镜面等设计，啱晒潮人嚟打卡。
日本×欧陆风味 iza’bis by city’super
铜锣湾人气日式超市第2间餐厅，以日本居酒屋同欧陆酒馆为题，食物款式多元化。必试以独家引入乙女A5和牛制作嘅烧肉同吉列菜式外，另有慢煮有机羊膝、冰镇海鲜塔、鲟鱼鱼子酱配香槟及Tous Palais迷你薄煎饼。而店内所用嘅鱼子酱，系超市联乘法国百年历史品牌Petrossian旗下生产线制作㗎。
人气麻糬波波专门店 Silver Mine Bake
点解呢间小店一开就有唔少人捧场？皆因佢哋之前喺喺梅窝嘅士多寄卖时已经有唔少Fans，最近更冲出离岛落户中环！麻糬波波有原味、肉松、芝士、朱古力同抹茶红豆味，最多人推介嘅系肉松味，肉松落得够多、咸咸甜甜咁估唔到又几夹。而且麻糬波波外脆内烟韧，口感QQ。
图：美式德州汉堡 b.o.t.h By Texas Burger 
主打美式潮流汉堡嘅呢间餐厅，最新去到九龙湾开分店。新店室内设计以美式榄球运动场馆为蓝本，并有多款新菜式。为咗汉堡而去嘅朋友仔记得试小龙虾牛肉汉堡，小龙虾先以牛油同香草慢煮过，另外特调溶岩芝士酱亦由Velveeta cheese同墨西哥烟椒混合而成，好惹味！厚切咖啡猪鞍扒系另一推介新菜，选用加拿大天然无激素、无污染嘅猪鞍，面层舖满秘制腌料同偏坚果味嘅咖啡粉，再配埋以Kahlua 咖啡酒调配嘅酱汁，肉味更突出。
新派潮州打冷 鬼卤
打冷畀人感觉偏麻甩，但呢间新店则展示精致嘅打冷都啱撑台脚！餐厅装潢集怀旧风同西式酒吧元素，更选用风格雅致嘅餐具，例如2人份蚝仔粥会连埋葱粒、榨菜同芫荽3小碟，用木托盘呈上，整齐美观；潮式卤水火锅则用龙纹图案小锅，配搭卤水汤底，配上牛小排、潮汕牛丸等5款火锅料，另外亦供应鸡尾酒等西式饮品，风味独特又充满格调。
图：黑色魅力×席前铁板烧料理 夜。鐡板烧
呢间日式铁板烧餐厅以暗黑为题，但系指装修风格，唔系料理呀～店内特别用多盏背光灯打造阴影效果，令天花满布日式风格嘅投影，增加神秘感，同时不失高贵氛围。食物方面，餐厅特别制作创意十足嘅「色彩酱汁」，如绿色（日本青海苔酱汁）、紫色（蓝莓制成水果风味酱汁）等，炮制店内喺鱼缸放养嘅海鲜、宫崎牛等高质食材，配搭重会随季节更新㗎。
图：TMG22
高级铁板烧×寿司 赤の匠
铜锣湾呢间高级日式餐厅，装潢以火同赤色为灵感，呼应店名以及主打嘅高质铁板烧，另外寿司都系呢度嘅重点菜式。餐厅选用来自日本同世界各地时令食材，如飞驒牛、澳洲活鲍鱼等。其中招牌清酒蒸鲍用清酒蒸煮7个钟至软身，再席前用日本订制嘅玻璃蒸壶煮几分钟；而冬季限定香箱蟹寿司，则以雌蟹松叶蟹炮制，每年11月至12月尾期间捕捉，非常矜贵。
高级炸猪扒 低温扬げ 白とんかつ 白桜
中环呢间餐厅由日籍师傅主理，主打白炸猪扒嘅白色面糊用低糖制作，经低温油炸後，吉列皮颜色较白，内里肉质粉嫩；而调味料亦有好多款，例如黑松露盐、岩盐、芝士、用紫苏叶整成嘅紫红色酱汁等，一餐试到多种滋味。另外装修参考现代日式建筑美学，更选用日本优质木材，打造既简洁又高雅嘅感觉。
图：日本特色品牌三合一 天心
集合日本3个餐厅品牌系呢间新店嘅卖点，其中まるみつMarumitsu嘅鮟鱇鱼肝汤拉面、鮟鱇鱼肝锅；空海Kukai嘅白Groove拉面；人气芝士店Runny Cheese用法国芝士制作嘅甜品都值得一试。留意返餐厅日夜供应唔同食品，中午主打拉面，晚市有火锅，而甜品同串扬则全日供应。
图：文：Cathy.C，Cathy.H，Kar
