【2019中秋】最新人气话题+送礼靓盒月饼集合
2019-09-09

话咁快又就嚟中秋(9月14号) ,各位月饼控等足一年又等到喇!不过年年都系传统月饼、奶皇月,甚至冰皮咁都可能开始食到闷闷地……所以每年有多款新潮口味月饼涌现,啱晒各位锺意试新嘢嘅勇士!

KFC 香辣鸡丝果仁月饼

讲到今年最有话题性嘅新月饼,KFC一定占一席位。话晒阿上校第一年出月饼喎……事前好多人都估会唔会系炸鸡味?中咗少少啦,系香辣鸡丝果仁月饼同黄金流心奶皇月饼。前者食落有少少似五仁月,都系好多粒粒果仁、杏仁、葵花籽等,再有丝丝微辣嘅鸡肉松;至於後者,感觉就偏甜咗啲。

太兴 满燻烧鹅果仁叉烧月饼

另一个话题月饼,应该就系太兴嘅满燻烧鹅果仁叉烧月饼喇。饼皮里面包住嘅,系以5种独门香燻料秘制而成嘅满燻烧鹅,加佢哋嘅招牌叉烧,好有港式风味。仲搭埋合桃、腰果等果仁,增加咸香同口感,至於夹唔夹就见仁见智啦~ 科科。

星月居   12黄大团圆月饼

呢间中菜馆今年推出全港最大嘅「大团圆月饼」,有成12只咸蛋黄咁多,唔使争,点切都一定人人有份!而且佢哋使用湖南嘅红莲蓉,相对上仲冇咁甜腻添,啱晒一家大细一齐食﹗纯人手制造㗎,限卖800个咋﹗

尚鲍   鲍鱼、燕窝奶黄月饼

想食月饼都豪华过人?咁呢个月饼一定系你嘅首选啦﹗今年尚鲍首创鲍鱼奶黄、燕窝软心奶黄月饼,前者以低温慢煮嘅南非鲍鱼切粒,混入奶黄中间,粒粒鲜弹。另外仲新出咗茅台朱古力软心月饼,贵州茅台结合比利时黑朱古力,冇咗传统月饼嘅甜腻感,食落仲有淡淡嘅酒香添﹗

KiKi 樱花虾芋泥麻糬蛋黄月饼

台湾面店今次唔再卖面,要应佳节卖月饼啦﹗佢哋推出嘅樱花虾芋泥麻糬蛋黄,听个名都知材料唔少啦。樱花虾乾同咸蛋黄,再加埋甜甜地嘅香芋同麻糬,充满台湾风味。

RISE Kitchen  抹茶红豆麻糬月饼

无独有偶呢间由前主播黄婉曼开嘅餐厅,今年月饼都加入麻糬呀!礼盒两款月饼分别系金沙奶黄同抹茶红豆麻糬口味,都用咗日本面粉、纽西兰有机牛油制作,後者更选用宇治抹茶粉同十胜红豆。略嫌抹茶香被红豆甜味盖过,但麻糬烟韧口感非常加分。

Ralph’s Coffee   咖啡流心月饼

相信唔少时尚达人都有听过呢间咖啡店,今年佢哋更大玩中西合璧,推出两款香港独家嘅月饼口味﹕奶黄流心同咖啡流心月饼,後者仲要系以自家品牌嘅咖啡豆做原材料。BTW,个饼盒造型系仿傚品牌经典咖啡美食车啊,又几靓。

Miss Marble 珍珠奶茶流心月饼

台湾珍珠奶茶大热,呢间主打流心蛋糕嘅甜品店推出全新珍珠奶茶流心月饼啊!粉红色云石纹加金色包装盒已经先加分,奶茶馅用咗Twinnings 茶叶,仲有一粒粒烟韧珍珠,味道唔会太甜。不过如果流心效果可以更彭拜就好喇。
 

圣安娜 金月奶皇月饼

呢间连锁饼店今年推出全新嘅金月奶黄月饼。同以往嘅金沙流心奶黄月饼唔同嘅系,呢款加咗用咸蛋黄蓉特制嘅「金月」,令奶黄嘅咸甜味更加出,奶黄控不妨试试!
 

皇玥饼艺 流心姜汁白莲蓉月饼

呢间传统饼艺店虽然系今年先开业,但由前半岛酒店师傅兼半岛奶皇月饼始创者主理,所推出嘅月饼点都有啲保证。师傅仲改良咗奶黄月,令饼皮同馅结合唔会分散,令口感更丰富。另外,舖头亦推出流心系列,包括有流心芝麻、猫山王榴槤同姜汁白莲蓉等,喺室温情况下都有缓缓流心效果。

奥卑利 苏式月饼

传统月饼食得多,传统苏式月饼又食过未?苏式月饼饼皮系松脆嘅酥皮,奥卑利特别推出咗一款咸味同一款甜味,咸嗰款以碎猪肉,青葱,生姜、豉油、老抽和白胡椒粉做馅,而甜嘅则系自家制红豆蓉制成嘅豆沙馅。

四喜 迷你蛋黄豆沙月饼

唔少朋友应该都食过呢间港式饼店嘅皇牌奶皇月饼,佢哋今年新推出迷你蛋黄豆沙月饼呀,豆沙入口即溶,仲夹有咸蛋黄。另外,伯爵茶味嘅奶皇月饼亦重出江湖!
 

国金轩 玫瑰酱洛神花奶皇月饼

想食月饼又怕食得太多会肥会腻,迷你月饼就啱晒。国金轩今年新出一盒四味「精品四艺迷你月饼」,有金沙、陈皮柑桔、黑芝麻蛋黄,同埋首创嘅玫瑰酱洛神花奶皇月饼。以全天然嘅洛神花凉果同玫瑰酱调配奶皇馅料,甜中带有微微花香,女生啱晒。

祝奇饼 燕窝月饼

呢间曲奇饼店今年推出嘅「祝.亮丽」月饼礼盒就啱晒女士们啦﹗礼盒有荔枝燕窝、玫瑰燕窝金柚桂花燕窝三只口味,味道清甜,再加上可以美容养颜嘅燕窝,贪靓嘅女生们千万唔好错过呀﹗
 

黄大仙中心 曲巧奇月饼

黄大仙中心今年请嚟t前agnès b DELICES总厨,制作全球首创嘅「曲巧奇」月饼。月饼造型特别,劲似马卡龙咁,非常精致可爱。月饼口味有霹雳果、咸蛋黄、榴槤同抹茶,夹埋曲奇脆脆嘅口感,真系够晒特别呀﹗
 

豚王 月光宝盒奶黄月饼礼盒

真系估你唔到,呢间日式拉面店今年都推出月饼礼盒,用精美木盒装住四款唔同口味:原味奶黄、竹炭芝麻奶黄、红豆奶黄,同抹茶奶黄月饼各一件,原来系代表店里面四款人气拉面:豚王、黑王、赤王同翠王呀!
 

雪糕系

Häagen-Dazs 盈.伴月

夏天热辣辣,想试下冰凉啲嘅月饼?Häagen-Dazs今次新推出嘅「盈.伴月」,月饼以朱古力脆皮做外层,入面再加入巴西莓、藜麦、椰子、南瓜等材料,食落劲有层次。再配埋酸酸地嘅乳酪雪糕,真系fresh上加fresh!

榴槤系

duria™ 猫山王榴槤流心月饼

榴槤控今年又可以大饱口福啦﹗呢个嚟自马来西亚嘅榴槤品牌,除咗原味猫山王榴槤冰皮月饼之外,今年仲推出埋猫山王翡翠榴心月饼﹗传统月饼嘅外表,切开竟然绿色嘅?原来系用咗班兰叶,连埋香浓椰汁同莲蓉一齐制作,最中间就梗系主角,晓流心嘅马来西亚猫山王榴槤!

DURIAN HILL 榴槤冰皮月饼

呢个连续两年获得「世界榴槤锦标赛」冠军嘅榴槤品牌,今年推出嘅榴槤冰皮月饼,选材自马来西亚嘅猫山王榴槤,100%榴槤果肉馅啊,榴槤味劲重﹗黑色嘅榴槤月饼则配上竹炭冰皮,十分型格﹗

抹茶系

北川半兵卫商店   伝説。 抹茶月饼

呢间嚟自日本嘅造茶老店,已经有150年嘅造茶历史,而今年更首推抹茶月饼,用日本直送嘅高级抹茶粉,茶味甚为香浓,抹茶控去美食博览嘅话可以扫下货。

Valérie 流心宇治抹茶月饼

呢间深受抹茶控欢迎嘅本地人气网店,之前出嘅宇治抹茶月饼大获好评,而今次更升级加入流心内馅!流心馅散发住浓郁嘅茶香,食落仲有淡淡嘅回甘,建议微微加热後食嘅口感仲正。

A*Treat 特浓宇治抹茶流心月饼

呢个brand由旅游达人Benedict袁学谦开设,今年第一年推出月饼,抹茶控嘅朋友要试下佢哋嘅特浓宇治抹茶流心月饼喇,用上伦敦IG大热嘅Matchæologist宇治抹茶粉制作,微甜嘅奶黄流心中有阵阵甘醇嘅抹茶香,翻热後食更好。另外伯爵奶茶柠檬夹心月饼亦带有茶香同柑橘香,鲜柠檬夹心馅则使月饼冇咁甜腻,反而仲有啲小清新嘅感觉。

望月 抹茶红豆月饼

本地奶黄月饼品牌今年新出两款抹茶系列月饼——流心抹茶月饼同抹茶红豆月饼。前者采用宇治丸久小山园抺茶,茶香回甘,一切落去茶香就扑鼻而来;而後者就用咗北海道十胜红豆,豆味较一般红豆浓郁,中和返抺茶嘅甘味,甜中又带点甘,味道非常有层次。
 

中村藤吉本店A-1 Bakery 升呢版抹茶焙茶月饼

抹茶控当然唔可以错过嚟自日本京都宇治嘅抹茶老店嘅出品啦,佢哋再次推出礼盒,月饼用品牌100%日本严选茶粉制作,今年更加入全新特别嘅烘焙方法,令抹茶同焙茶嘅茶香更浓郁芳香,回甘亦更明显!礼盒有丸十抺茶奶皇月饼、丸十焙茶奶皇月饼各两件。

朱古力系

agnès b. CAFÉ   朱古力月饼

呢个品牌今年个月饼礼盒好鬼靓呀!系灯笼设计嚟,仲有开灯装置添。其中呢盒红色嘅系「花团锦簇巧克力月饼灯笼礼盒」,以经典朱古力做基底,设有唔同口味,包括杏仁牛奶、开心果、士多啤梨同埋柚子等,果仁、水果控都可以各自满足。

Schoggi Meier 银河系朱古力月饼

呢个朱古力品牌今年大玩gimmick﹗一反件件一样大细嘅传统,以「七星伴月」为主题;较大嘅「月亮」系意大利咖啡配72%黑朱古力加杏仁脆脆,而七色「星球」则系黑朱古力软心脆脆、热情果芒果、摩卡咖啡等唔同口味。造型亦一反传统,望落真喺几似闪闪发光嘅星球咁,靓到一个点。

Sift x Or Tea 法式月光朱古力月饼

呢间法式饼店联乘Or Tea推出朱古力月饼,造型有别传统月饼,好似一件精致嘅法式西饼咁;而内馅有杏仁焦糖牛奶朱古力,同格雷伯爵黑朱古力两种口味,前者松脆,後者清香,各有特色,随盒仲有一罐普洱黑茶,食完之後饮返啖茶消消滞~

龙岛 荷花朱古力月饼

食个月饼都可以好有诗意?呢款荷花朱古力月饼点睇?一嚟带有「中秋赏荷」嘅意境,二嚟仲意味住「幸福圑圆」。4片花瓣混合咗杏仁糖碎、乾果同埋73%纯黑朱古力,而中间嘅黄色蛋黄就系红莓榛子碎同蓝莓乾,味道丰富,内外都甜入心头啦﹗

Venchi   姜配椰丝双层朱古力月饼

月饼都唔一定腻嘅,可以有啲清新嘅。好似呢两款由Gelato及朱古力品牌推出嘅朱古力月饼咁,姜配椰丝双层朱古力月饼,上层姜搭白朱古力酱,甘醇幽香,下层椰丝配黑朱古力,微甜清新;至於伯爵茶双层朱古力月饼,则有淡淡茶香。

Godiva Chocolatier 朱古力月饼礼盒

呢间朱古力名店都推出月饼,有唔同果仁同朱古力嘅配搭:香烤腰果绿茶朱古力、香脆杏仁黑朱古力、香烤芝麻松子仁朱古力,同盐味胡桃牛奶朱古力共四款口味。当中绿茶嘅茶香唔算好突出,但比一般朱古力月饼嚟得清新,而香脆杏仁黑朱古力非常香口。
 

素食系

The Cakery X 庄馆 川椒朱古力月饼

随住素食文化愈嚟愈盛行,素食月饼亦大有巿场。一向主打cupcake嘅The Cakery联乘中菜府庄馆推出四件装嘅手工纯素月饼礼盒:口味包括黑白芝麻、玫瑰杂莓、香芒姜黄同埋独家口味:川椒朱古力。加入四川二荆条辣椒粉,中和咗黑朱古力原有嘅浓涩外,仲有丝丝辛辣快感。四款月饼全部都冇任何麸质、乳制品、蛋、精制糖、防腐剂和人工色素啊。

香积厨素食馆 玫瑰莲藕流心月饼

奶皇月饼都可以系纯素?冇错。呢间素食店今年首度推出纯素奶皇月饼,利用亚麻籽代替蛋,连同植物油、椰浆等天然材料,制作出全素奶皇馅,曲奇皮酥脆,内馅绵密。几款中最特别嘅应该系玫瑰莲藕味,粉红色饼皮系红菜头制成,再以玫瑰花瓣酱混合莲藕粉制馅,有阵阵清幽花香;而奶皇流心仲特意以稀少糖制作减低甜度。

卡通系

美心 Marvel系列流心奶皇月饼

Marvel粉丝最开心,今年又有Marvel系列啦~ 一盒集齐晒7个3D Q版超级英雄,Ironman嗰盒仲可以揿掣,然後佢对眼、心口反应器同埋掌心都会发光㗎!粉丝对眼都会跟住发光!月饼系流心奶皇月嚟,上面仲印有A字徽章添。

美心 迪士尼公主 奶皇月饼音乐礼盒

呢个月饼盒好靓啊,唔止有白雪公主、贝儿、茉莉同花木兰四个经典迪士尼公主喺上面,而且仲系个双层旋转音乐盒嚟!一路听住《阿拉丁》主题曲嘅纯音乐,一路食住印有公主皇冠嘅奶皇月饼,今个中秋够晒童话~
 

东海堂 Pokemon奶皇月饼

出嚟啦比卡超!喺月圆嘅中秋夜,pokemon就进化成为精灵球造型嘅奶皇月饼喇,每盒月饼仲会送个Tote bag添,粉丝梗要收藏。

奇华 Sanrio果味乳酪奶皇月饼

Hello Kitty、My Melody、PC狗同AP鸭嘅粉丝就mark住呢盒果味乳酪奶皇月啦。两款果味分别系香橙同士多啤梨,有粒粒橙皮同士多啤梨乾㗎食到,乳酪奶皇带微酸,感觉冇咁腻。随礼盒仲会附送个环保袋添。当然,有私心净系偏爱某一个嘅,单件装都有啊。

荣华饼家 P助兔兔流沙奶黄月饼

呢间连锁中式饼家今年就推出卡娜赫拉的小动物流沙奶黄月饼,无论铁罐、月饼定赠送嘅环保袋上都系印住可爱嘅P助同粉红兔兔!一盒四件流沙奶黄月饼,有香浓咸蛋黄香。

荣华饼家 B.Duck流沙奶黄月饼

呢间饼店另外仲推出B.Duck小黄鸭流沙奶黄月饼,用双层木制柜桶装住四件B.Duck流沙月饼,食完可以摆喺房或者Office枱面摆嘢,够实用!另外亦附送手提便当袋,Fans必买啦。

A-1 Bakery Snoopy四款口味月饼

Snoopy Fans就可以考虑买呢盒月饼,里面有LED灯可以将纸盒变Snoopy灯笼!仲送别注版手提袋。而月饼就有黑芝麻、日式紫薯、伯爵红茶,同提拉米苏四款口味各一件。如果只系想浅尝,礼盒以外亦有单个装。
 

英记饼家 Snoopy奶黄月饼

Snoopy去埋登陆月球?呢个登月礼盒内有三款奶黄月,奶黄、芝士奶黄同埋黑松露奶黄,松露口味嗰款香气最浓。每个月饼上面仲有Snoopy嘅唛头呢~ 唔知各位粉丝会唔会望住好耐都唔舍得切落去呢?

靓盒系

Van Gogh SENSES 香茶月饼礼盒

佢哋嘅包装年年都好鬼靓,今年都唔例外。「杏福团圆」系列设计取材自梵高名画《盛开的杏树》,盒面仲有立体凹凸感,文青必爱。有样都有内涵,香茶月饼礼盒内,除咗有奶香蛋浓嘅奶皇月饼,仲有不含咖啡因嘅花茶:「蓝莓之吻」、「仲夏向日葵」,前者清香後者甜香,食完月饼饮返啖茶,消滞啊。

Sugarfina 青花瓷月饼糖果礼盒

呢个嚟自美国嘅糖果店首次推出中秋系列,礼盒以中式青花瓷为设计灵感,优雅得嚟手工纸花仲可以亮灯啊!而「花樽」里面有喺香港手工制作嘅奶黄月饼两件,首次喺香港推出而且用香槟小熊软糖以 Dom Pérignon 年份香槟制作嘅香槟小熊家族软糖一盒,同大受欢迎嘅爆炸糖朱古力一盒,保证无论大人定小朋友都会锺意。

都爹利会馆 限量版灯笼月饼礼盒

有月饼点可以冇灯笼?呢个月饼礼盒就同时化身成为时尚灯笼啦,采用全息影像物料(holographic)制作,开埋LED灯,又型又靓,唔止个盒会发光,就连身边亲友嘅眼都会发光。盒内有8件手工奶皇月饼,以经典食谱炮制,奶皇甜香。
 

Vive Cake Boutique Artistry Mooncake Gift Box


讲到靓包装又点少得呢间以精品蛋糕而闻名嘅蛋糕店,今年佢地推出八件装「Artistry Mooncake Gift Box」,外型粉红色够晒少女心,揭开盒顶会弹出寓意团圆嘅满月同星光,有埋品牌标志独角兽。礼盒以抽屉式设计,鼓励大家重复使用,好环保~Gift Box包含招牌「酥皮金沙奶皇月饼」同全新嘅「酥皮流心奶皇月饼」,仲有台湾有机茶包,食多两件都无问题。
 

Starbucks 星巴克月饼礼盒

呢间连锁咖啡店每年推出嘅月饼礼盒都好靓,今年设计就以星巴克美人鱼同湛蓝星空做主题,纸盒仲可以开灯变成月亮灯盒!而里面就有朱古力咖啡麻糬月饼同伯爵红茶麻糬月饼,分别以朱古力咖啡同伯爵红茶呢两款饮品为灵感,再加入香软麻糬增加口感层次,无论系送礼定自私食都咁啱!
 

唐人馆x上海滩 限量版月饼

中秋送礼想好好睇睇,咁呢个「月光宝盒」就啱晒啦﹗一打开个盒就系闪闪发光嘅中秋夜景纸雕,够晒浪漫。食完月饼,留返个盒装饰屋企,哇~呢啲咪叫情调罗﹗入面系传统蛋黄白莲蓉月饼,大大只咸蛋黄。真系好睇又好食呀﹗
 

礼盒系

PAUL LAFAYET 榛子牛奶朱古力+ Calisson

以法式焦糖炖蛋赢得人气嘅法式甜点店,趁住中秋亦推出中秋礼盒。一盒12粒法国手造百年皇室甜点Calisson,包括有青柠薄荷、桑莓抹茶、梨等6款口味,另外仲有法国人手制造榛子牛奶朱古力同埋限量版手工精制嘅莲花图案骨瓷瓷器,用嚟送礼够晒得体!

Johnnie Walker X 富临饭店 西班牙火腿月饼+Blue Label

对於无时无刻都想饮酒嘅酒鬼嚟讲,呢个由Johnnie Walker同富临饭店联乘推出嘅礼盒就啱晒。基本版有两个带有微微咸香兼有啖啖夏威夷果仁嘅西班牙火腿月饼,加一支Blue Label。而升级版更有多罐质感软腍而味道香浓嘅红烧乾鲍添。一啖月饼一啖酒,月光下带点微醺。

Tea WG 茗茶月饼

呢间新加坡茗茶品牌今年推出嘅月饼充满茶香,以狮城早餐茶、可可茶、密斯特茶及抹茶为主题,夹返传统嘅莲蓉馅,真系够晒特别。最後饮返啖茶,识叹一定咁叹!
 

Durian Capital 猫山王礼盒

想特别啲,唔送月饼唔送杨桃,中秋送榴槤都有得谂啊。有间榴槤专卖店新开冇耐,主力卖来自马来西亚自家果园种植嘅猫山王,仲特设中秋礼盒装。型格黑色礼盒内有两pack甘甜偏甜嘅猫山王,仲附埋冰袋同手套,好贴心,送礼一流。

关键字
月饼
中秋节
奶皇
流心
卡通
抹茶
开饭专题
开饭仔为你提供各类型最新饮食情报及优惠,全面照顾你的饮食喜好。
本月热门
【随时更新】便利店寻宝 每周新品速报
3天前
尖沙咀新商场开幕 过江龙餐厅一览
2019-10-11
【特约分享】食鱼生转运 三种好意头日本海产介绍
7天前
亚洲首间 Tiffany Blue Box Café 打卡必到!三层架下午茶 + 棉花糖鸡尾酒
2019-10-08
日本人气茶室登陆尖沙咀 招牌Tea Set、甜品推介(有片)
2019-09-25