澳门同香港有啲似,都系一个不夜天,无论系朝早6点几,定系凌晨2点几,一样都可以喺条街度搵到食! 今次就集中讲新马路一带嘅美食先啦。Check it out!
好嘅一日由特厚蛋治早餐开始 南屏雅叙
一场去到,当然就要坐低慢慢叹返个醒神早餐啦。识食嘅,一定系食特厚蛋治或者特厚叉烧蛋治,记得嗌烘底。话明特厚,当然有返咁上下份量啦,目测有成1.5寸高,听讲系用4只蛋炒㗎,又香又滑,食完又饱又满足!如果食得落,最理想就嗌埋份沙翁嚟食啦,而家唔系周围都搵到嚟食㗎。成个沙翁铺晒砂糖喺面,都算几松软,而且仲好香蛋味,好邪恶咩?都几㗎。不过香港人唔系愈邪恶嘅嘢愈锺意食㗎咩?
继续邪恶午餐:吉列猪扒包 胜利茶餐室
去澳门,食猪扒包是常识吧。不过猪扒包喺澳门相当普遍,大部分餐厅都有得食,随机入一间食又得,一早拣定间心水嘅又得。
呢间位於新马路,近营地大街嗰头嘅茶餐厅,装修比较旧,长方型旧式茶记格局,就咁睇同一般茶记冇咩分别。不过「舖」不可貌相,呢度就深藏咗令人一试难忘嘅猪扒包!
下午茶通街扫:葡挞X牛杂 玛嘉烈蛋挞店 、 明记牛什美食
呢度嘅葡挞,酥皮同蛋黄都烘到金黄色,仲有几粒「黑焦」喺面(唔知有冇人同我一样,觉得葡挞总系要有多啲啲黑焦喺面先至好食),酥皮香脆,牛油味重,层次分明,中间蛋浆部分幼滑得嚟亦充满蛋香,真材实料,甜甜der。美中不足系有啲油腻,垫住食嘅纸巾食完之後都索晒啲油。不过一餐半餐就算啦,咪谂咁多啦。但想食嘅,就要畀多少少耐性喇,舖头门口成日都大排长龙㗎。
而锺意食内脏嘅朋友就要留意了,澳门有间车仔档牛杂,充满街头风味,嚟到可以试下。呢间牛杂每日傍晚大约5点零6点先至开档,卖晒就收档。车仔档上面,卤水牛肚、牛肠、牛蒡、牛肺、牛柏叶……乜都有,一串一款咁买又得,一盒几款咁买又得,辣又得唔辣又得,得咗。啲卤水非常入味,全部都炆到好腍,而牛柏叶就好爽口,索晒啲汁,点忍?又或者应该问:点拣?如果同行嘅朋友唔好牛什,都仲有鱼蛋、鱼皮、萝卜、肠仔等等扫街小食可以拣,各取所需。
丰富海鲜晚餐 陶陶居海鲜火锅酒家
日头食咗咁多肉,夜晚都系时候轮到海鲜出场啦。陶陶居喺澳门有超过70年嘅历史喇,呢间老字号会提供新鲜海鲜,喺门口嘅鱼缸度就可以见到啲龙虾呀鱼呀喺度游嚟游去,睇到流晒口水。叫返碟圣子皇啦,大大条用蒜蓉、粉丝、葱花嚟蒸香,最简单嘅煮法同时亦最能保留原条圣子嘅鲜味!另一道清清地嘅海鲜推介就系清蒸开边鲍鱼,有大约半只手掌咁大只,嫩口弹牙。
绵绵蟹粥宵夜 六记粥面
最後再食多餐宵夜都唔系好过份啫(好似系),喺澳门夜麻麻要搵食,其实都唔难。
系,澳门去得多,有时已经唔知有咩好行,不过,食嘢嚟讲,依然都仲系可以由朝食到晚咁食足成日喎,大满足!仲等咩呀?OpenRice app已经全面Upgrade,下载了app的用户记得Update,而未下载的就到App Store或Google Play下载吧。咁得闲搵个周末咪又过下大海罗。
文:Kar
随时接收最新资讯
赞好OpenRice专页!
关键字
澳门
葡挞
猪扒包
蟹粥
新马路
复制到剪贴板