【隨時更新】最後倒數!2024即將結業人氣/老字號餐廳
2024-06-04

踏入2024年,結業潮似乎漸漸減退,但仍然有新一代人氣小店、老字號同大家講再見。如果唔想錯過餘下嘅時間,記得mark實最後營業日,提前去回味一番,希望有日可以再相見。


懷舊港式茶餐廳 興華茶餐廳
最後營業日:7月31日

呢間有46年歷史嘅港式茶餐廳,佢由原本做街坊生意嘅柴灣茶餐廳發跡,因為自家製生炸蔥油雞髀而爆紅,吸引唔少區外客嚟朝聖,可惜最近老闆娘同師傅年屆退休之齡,即使有第二代接手,仍然決定於7月31光榮結業。佢嘅炸髀大隻之餘,皮脆肉嫩,同蔥油汁好夾;西多士內層就加咗幾多花生醬。老闆透露正計劃籌備大閘蟹網店,年尾有機會喺柴灣開設限定門市,方便街坊自取,亦可以同大家見面聚舊啊。


人氣創意Cafe Mamaday  
最後營業日:7月31日

一間嚟自台灣,玩味十足嘅cafe,宣佈尖沙咀店7月底同大家講再見……喺最後嘅時光,餐廳以芫荽系列為告別作~6款芫荽餐飲之中,「吾系幾荽窩夫」有3重芫荽:芫荽窩夫漿、芫荽吉士醬同本地有機新鮮芫荽,而每條窩夫坑紋都加咗花生糖,食落香甜脆口。如果只想嚟回味一番,必食蟹蟹蟹意大利扁麵、泰式打拋豬烏冬同西班牙黑毛豬乳豬。


必比登推介台灣菜 吃什麼
最後營業日:6月8日

圖:whatthefood852pigfoodiexhk  

由外賣小店做到入舖,再獲得必比登推介,主理呢間台灣菜館十多年嘅兩位台灣媽媽都落足心機。招牌外省牛肉麵湯頭香料味道濃郁,牛腱夠入味兼具膠質,好有咬口。而幾乎每枱必點嘅蛋餅有多款口味,其中起司口味仲有拉絲效果𠻹。究竟會唔會重開仲係未知之數,但就有公布「我們有各自的計畫,也希望在不久的將來會將這些畫面一一呈現給大家。」,或者可以期待一下?


英式炸魚薯條專門店 Chip In Fish & Chips
最後營業日:5月31日

圖:leep001137Heyeatsmilo

講到啖啖肉嘅英式炸魚薯條,可能你會諗起西貢呢間人氣專門店,但可惜即將結業喇……佢嘅英式炸魚薯條選用MSC認證太平洋鱈魚,食落啖啖肉夠滋味,更設有素魚照顧素食朋友仔,夠晒貼心。另外圓碌碌、脆卜卜嘅炸OREO香甜軟糯,都多人食,佢仲有全日早餐、包款等選擇㗎。


和洋風居酒屋 晴舍  
最後營業日:4月30日(已結業)

圖:sorvetecc

店名寓意為煩囂嘅城市帶嚟喘息嘅綠洲,但呢片綠洲要暫別大家喇~居酒屋有大片落地玻璃,環境開揚又夠chill,又有咖啡師、唎酒師團隊,無論嚟食正餐或午後放鬆吓都唔錯。食物方面幾多選擇,包括刺身、一品料理、甜品等,例如西京燒銀鱈魚、秘制醬燒厚切白鱔串燒、是日千層蛋糕都值得一試。


鮮味檳城蝦麵 蝦麵店
最後營業日:2月29日(已結業)

圖:cfung426

搬舖再搬舖,呢間主打檳城蝦麵嘅餐廳宣佈鰂魚涌分店即將結業,不過亦提到籌備緊英國同新蒲崗嘅新概念店,所以可以期待再相見呀!喺新店開業前,大家重可以去灣仔分店嘆招牌辣味蝦湯底麵、白胡椒肉骨油條、自家製咖央多士等馬來西亞風味菜式。


薑汁撞奶主題糖水舖 葫蘆館
最後營業日:2月25日(已結業)

圖:JackySitfoodie.MnT

滑溜嘅薑汁撞奶,唔少人都鍾意食。而呢間1986年喺旺角起家嘅中式糖水舖,以即點即撞嘅薑汁撞奶吸引大家,曾經開數間分店,不過現存唯一間間觀塘店,亦將於2月24日結業,皆因店家表示「家庭式經營至今,因為年紀不少,是時候退下」。佢嘅招牌薑汁撞奶除咗原味,重有杏仁味、咖啡味、椰子味、阿華田味等多元化選擇,要夠薑嘅話,可以配埋薑汁芝麻湯圓㗎。


老字號日式放題 碗屋
最後營業日:2月25日(已結業)

圖:finger_consleewengii

中環呢間逾30年歷史嘅老字號日式放題店,可以話係香港純日式放題始祖,刺身船、壽司、燒物等樣樣齊,而濃厚人情味更吸引一眾熟客。可惜店家表示人情味敵不過現實世界,無奈於2月結業。大家把握最後機會,同呢間老字號一齊劃上完美句號啦。


懷舊手工食品小店 合興隆
最後營業日:2月9日(已結業)

圖:店舖(FB)- 相片為店家早年發佈,價格以現場展示為準

葵廣出名多小店、零食舖,而呢間懷舊手工食品小店可以話陪住街坊長大。店家自設工場,每日新鮮製作花生糖、蛋散、麥芽糖、米通等傳統食品,但今年年三十晚陪大家準備最後一次年貨,就光榮結業,亦表示唔會搬舖重開。如果有幫襯開嘅朋友,早啲去辦貨,將那些年嘅味道帶返屋企啦。


紐約過江龍創意甜品 當文歷餅店 by Dominique Ansel
最後營業日:1月31日(已結業)

圖:餐廳(FB)

以創意蛋糕而聞名嘅紐約人氣甜品店,將於月底全線結業!品牌自2020年進駐香港,推出益力多樽造型港式奶茶曲奇杯、紙包檸檬茶造型蛋糕、經典童年回憶蛋糕系列等充滿港式元素嘅甜品,一直貫徹創新、富玩味嘅風格,别具特色。



文:Cathy
最後更新日:2024年6月4日



关键字
結業
小店
人氣店
老字號
開飯專題
開飯仔為你提供各類型最新飲食情報及優惠,全面照顧你的飲食喜好。
餐厅资料
更多
收起
本月热门
持續更新! 2024生日優惠 食盡歐亞各式料理
2024-07-02
【2024新店精選】7月更新! 嘆印度土邦宮廷菜、典雅江南菜
6天前
前五星級酒店烘焙主廚尖沙咀開店 推千層酸種蛋撻、牛角包
2024-06-26
【隨時更新】零食速報 每周新款零食、酒品點評
2024-07-09
點心放題2024!經典香港懷舊點心主題、送極品花膠灌湯餃及鮑魚燒賣
2024-06-27