无论喺屋企定Office都要长备零食嘅各位零食控，想知有咩新出零食，同时又怕中伏？2023年开饭仔继续帮大家行匀便利店、超巿、零食店、啤酒舖等，第一时间开箱试食！
6月1日更新
Binggrae Freshes Premium士多啤梨雪条
销售点：7-11
韩国直送嘅果味雪条，除咗之前介绍过嘅扁桃同热情果味，最近仲嚟埋士多啤梨味！啖啖都系酸酸甜甜嘅果香，仲食到一粒粒士多啤梨籽，啱晒夏天解渴消暑。
Häagen-Dazs马卡龙雪糕系列
销售点：各大便利店及超巿
Häagen-Dazs今次同法国殿堂级甜点大师Pierre Hermé首度联乘，推出马卡龙雪糕系列，英国法国出完，而家香港都有啦！
士多啤梨红桑子味系最开心嘅，又有雪糕杯又有脆皮雪糕批。佢哋嘅士多啤梨味雪糕一向系大家嘅首选，而家混埋红桑子软心酱，仲有粉红马卡龙脆饼粒，微微酸甜中渗有杏仁香气，脆饼粒口感脆得嚟又有少少烟韧，层次丰富。
另外两款口味分别系双重朱古力马卡龙，同柚子柠檬马卡龙雪糕。两者同样有相应嘅马卡龙脆饼混入雪糕之中，增加口感。前者系以经典朱古力加Ganache 黑朱古力软心酱，香浓甘甜；後者仲加埋柚子柠檬软心酱，酸甜清新。
5月25日更新
KOKUAJI Premium Ice Cream 雪糕系列
销售点：惠康、Market Place、3hreesity 及 Oliver’s The Delicatessen 之香港店舖独家发售
选用日本人气咖啡品牌UCC The Blend 114、117 及炭烧咖啡即溶咖啡为原材料嘅3款咖啡雪糕，非常有惊喜！咖啡控一定要试啊。3款口味包括榛子碎咖啡、香浓咖啡碎同埋炭烧咖啡味，其中最推介嘅系香浓咖啡碎味，咖啡甘香味浓郁，而且仲有粒粒咖啡豆碎，无论口感定味道层次都再昇华咗。至於碳烧咖啡则以UCC炭烧咖啡所制，咖啡味道同样浓厚甘醇，更有阵阵焦香味道。
Bulla 乳酪雪糕杯
销售点：7-11
呢款乳酪雪糕由澳洲直送，分别有芒果同士多啤梨味，都系以澳洲新鲜牛奶加新鲜果肉制作。重点系每杯只得3%脂肪，食完都唔怕变肥仔。芒果味清甜，士多啤梨味则带微酸，果味较轻，面头嗰层嘅口感有微脆感觉。
卡乐B 宅卡力薯条
销售点：7-11
呢条Line嘅薯条系偏硬脆嘅口感，今次两款新口味包括双重芝士同紫菜味。前者制作时酿入车打芝士同忌廉芝士，每条薯条上仲可清楚见到啲淡橙色芝士粒粒，愈食芝士味就愈出。
卡乐B 传说蜜糖鸡味薯片
销售点：7-11
呢款应该系卡乐B出过咁多薯片以嚟，最细又最薄嘅一款。100%使用葵花籽油嘅韩国大热蜜糖鸡味，食落蜜糖甜味较轻，但胜在够脆口。
BIGCHURI烟燻鸡蛋
销售点：7-11
好多朋友仔都锺意食蛋料理，以後喺便利店又多一款选择啦。以韩国鸡蛋同秘制酱汁燻制，弹牙得嚟有嚼劲，有啲似台湾铁蛋。不过烟燻味就唔算太浓，反而有微微酸味。一包仔有2只，开嗰阵要小心漏汁啊。
珍珍 泰式肉碎生菜包味薯片
销售点：7-11及各大超巿
讲真见到呢个包装时系有啲期待的，始终生菜包嘅味道都比较复杂，到底点样可以融合晒落片薯片度呢？可惜食落系有些少失望嘅，还原度唔算高，最突出嘅应该系泰式肉碎嘅味道，另外仲有後劲嘅酸辣，但整体合埋一齐就系唔太似啊。
IF 椰青红茶饮品、士多啤梨火龙果芦荟饮
销售点：7-11及各大超巿
夏天最啱就系饮椰青或者果汁消暑，品牌新出嘅两款特饮，椰青红茶饮品清爽提神；士多啤梨火龙果芦荟饮品仲有粒粒芦荟，增加口感，味道酸酸甜甜。
5月17日更新
卡乐B 香辣青柠味虾条
销售点：各大便利店及超巿
成个包装都好清新，不过食落感觉唔太似青柠，但类似香茅、香料嗰啲泰国风味，微微酸，再喺喉咙度感受返啲辣，几特别嘅。
FRITOLAY 鸡肉紫菜味、洋葱清汤味薯条
销售点：7-11
扭扭状薯条口感较为硬脆，但亦因为咁而更易沾上调味料，令到每条薯条都好够味。蓝色包装嘅系鸡肉紫菜味，橙色嘅则系洋葱清汤味，阵阵洋葱甜香，唔觉唔觉好快就清咗一包。
湖池屋 芝士岩盐味薯片、松露盐味粟米片
销售点：7-11
芝士控值得试下芝士岩盐味嗰只薯片，芝士味几香，而且块薯片有啲厚道，口感唔错。至於松露盐味粟米片，则可能会令松露控失望。第一啖入口系有轻轻嘅松露盐香嘅，但好快畀粟米味盖过咗噜。
Nina Patisserie 别注限量版 Hello Kitty蝴蝶酥礼盒包装
销售点：Nina Patisserie
呢间酒店饼店嘅蝴蝶酥本身都好受欢迎，最近唔止推出2款新口味，仲出埋Hello Kitty别注限量包装添（原味都有Kitty版，放心），好靓，食完仲可以留返起。两款新口味分别系满满坚果香杏仁味，同埋一拆开就已经闻到好香嘅玉桂味，味道偏甜。
5月10日更新
卡乐B 宅卡B薯条烧烤味（企身袋装）
销售点：各大便利店及超巿
卡乐B最经典嘅BBQ口味终於变做薯条产品啦。一大包入面有5包仔，一条条粗厚薯条嘅薯味系十足嘅，仲有阵阵烤肉风味。不过唔知系咪食惯咗嘅关系，硬系觉得烧烤味配薯片系夹过同薯条。
乐事 日式椒盐海老天丼味、鱼子章鱼烧料理味薯片
销售点：各大便利店及超巿
Lays又出咗2款日式风味嘅期间限定口味薯片，日式椒盐海老天丼味嘅椒盐味相当突出，浓郁嘅咸香味中又轻轻渗有虾鲜味，几惹味，大大包有排食；至於鱼子章鱼烧料理味则比较似章鱼烧酱汁嘅味道，甜甜地。
Coolhaus 家庭装雪糕
销售点：惠康
美国呢只雪糕品牌标榜使用Perfect Day无动物成分乳清蛋白制作，无动物成分乳清蛋白系世界首创通过微生物群发酵而成，分子结构上与源自牛奶嘅乳清蛋白完全一样，所以佢哋嘅雪糕同样都可以有幼滑口感同香浓奶香，但就不含乳糖同胆固醇。今次引入香港嘅家庭装有5款口味，包括：焙茶珍珠。忌廉曲奇、芋香珍珠、软心朱古力同埋花生酱软糖。特别推介花生酱软糖，花生酱味够晒香浓，几有惊喜；芋香珍珠嘅芋头味略甜，混入埋一粒粒Q弹珍珠，绝对可以讨得一众珍珠控欢心。
King’s 宝冰 粒粒椰青雪条
销售点：Circle K
夏天总系会想食椰青，嚟自泰国嘅呢款椰青雪条就够晒开心。以椰子加入椰奶制成嘅雪条，椰香十足，而且仲有啖啖椰青肉，口感丰富，清爽解暑。
Binggrae Freshes Premium 扁桃/热情果雪条
销售点：7-11
呢2款果香味雪条则系由韩国直送，食得出以鲜甜果汁制作，尤其是扁桃嗰只口味，桃香甜得嚟几自然，仲有粒粒果肉食得到，开心仔！至於热情果嗰款，味道酸酸甜甜，同样布满热情果肉同埋热情果籽，真材实料。
Ekselence 焦糖花生脆脆配花生雪糕/曲奇饼乾面团配香草及朱古力雪糕
销售点：百佳超级市场
拉脱维亚雪糕品牌Ekselence今次推出两款新雪糕，焦糖花生脆脆配花生雪糕有粒粒花生碎，花生香十足，不过加埋焦糖酱味道真系比较甜。而曲奇饼乾面团配香草及朱古力雪糕里面系一半云呢拿雪糕加一半朱古力雪糕，两边当中都会有粒粒曲奇面团，口感更丰富。
少爷啤酒 酒花街5号
销售点：Circle K
酒花街系列嚟到第5款，今次呢只Hazy IPA选用嘅酒花系Cascade，酒体色泽偏浊黄色，酒花香味浓郁，带有柑橘、西柚等果香，口感乾爽，收尾有微微回甘。
少爷啤酒x Cloudwater 落花流水
销售点：Circle K
由本地精酿啤酒厂少爷同英国Cloudwater Brew Co合酿嘅Cold IPA，酿制过程中大量加入3款唔同啤酒花，不过饮落比想像中轻身，酒花香而不苦，带有热带水果，例如芒果同木瓜嘅果香。放耐多少少，麦芽中嘅甜味变得更加突出，愈饮愈甜。
YBC X PABLO芝士挞味脆条
销售点：7-11
深受港人欢迎嘅日本品牌PABLO联乘YBC，推出咗只芝士挞味脆条，1包有6条独立包装，脆条细细条，面层系软身嘅芝士，松化饼乾有层朱古力coating，一啖食晒刚刚好，淡淡嘅芝士香幸好冇被甜味盖过。
SUNLAVIEEN浓厚芝士蛋糕
销售点：7-11
切开成5条装嘅芝士蛋糕，用咗大洋洲产芝士忌廉，以六甲山麓牛乳而制成，另外加入咗少量白朱古力，所以食落有香浓嘅芝士同奶香味之余，亦有阵阵甜香。口感松软，不过就比平时食开嘅日式芝士蛋糕稍稍重身少少。
5月5日更新
华点 凤梨酥/奶油酥饼
销售点：官网 (按此)
华点系来自台湾嘅甜点品牌，主打法式甜点包括凤梨酥同奶油酥饼等，选用台湾特有嘅食材，而且多个工序均由人手制作。佢哋嘅酥饼以酥脆见称，最近打入香港巿场，更特别研发咗香港限定嘅口味——茉莉香橙凤梨酥。饼皮带有淡淡茉莉花茶香，内馅系冬瓜凤梨膏加香橙皮，清新酸甜，层次多变。另外嘅奶油酥饼则设盐花香草籽、盐花咸蛋黄、盐花焦糖馅、柴烧桂圆乌龙、58%朱古力同北港咸花生口味，全部都系酥香可口，好啱下午茶食返一块叉个电。
5月2日更新
味觉糖x LINE FRIENDS推广装连竹纤维碟
销售点：7-11
LINE FRIENDS粉丝最近行过便利店有冇发现到呢个新出嘅礼盒装？竹纤维碟共有2款设计，拎上手非常轻身，又靓又实用，仲有两包味觉糖都系LINE FRIENDS包装㗎。
BURTS淡海盐味、芝士洋葱味薯片
销售点：7-11
喺英国制造嘅薯片，无添加任何味精、人工香料同人工色素，而且仲符合Red Tractor及无麸质食品标准，素食朋友仔都啱食。两款口味各有特色，芝士洋葱嗰款就浓味少少，口感属硬身少少嘅薯片。而且每包薯片包装上面仲印埋生产时间、手炸员工同埋薯仔农个名，好认真。
Pocky 抹茶云呢拿雪糕味饼乾条
销售点：各大便利店及超巿
Pocky最近出咗唔少新款百力滋，抹茶控就必试呢款喇。粗身嘅百力滋，混合厚厚一层嘅抹茶朱古力同云呢拿，除咗有香甜嘅茶味外，仲有淡淡嘅奶香，新嘅朱古力发泡技术令朱古力口感更具空气感。不过一盒有2包，每包得6条，相当珍贵。
极脆帆立贝味百力滋饼乾
销售点：7-11
呢两款口味均由日本直送，绿色嗰盒系香草烤鸡味，红色则系帆立贝味，同上一款唔同，呢款则系幼身好多嘅百力滋。其中帆立贝味系以日式高汤制作，如果一次过将三几条同时放入口，再吮一吮埋呢，就会食到扇贝独有嘅咸香味喇。（温馨提示单一条食嘅话太幼，系脆嘅，但唔多食到帆立贝味罗）
固力果杏仁百奇朱古力
销售点：7-11
同样由日本直送嘅百力滋，浓甜嘅朱古力酱包住粗粒杏仁碎，口感丰富之余，更可食得出杏仁经过煎制，有阵阵嘅烘焙香味。
7-SELECT x 伊藤久右卫门「宇治茶の味」系列
销售点：7-11
便利店又同日本京都宇治抹茶品牌合作啦，6款期间限定嘅甜品中，最推介嘅系宇治抹茶红豆忌廉铜锣烧，唔止内馅系抹茶忌廉，就连饼皮都加入埋抹茶粉，食落啖啖都系抹茶嘅甘香，而且仲有微甜嘅红豆馅料添。至於抹茶忌廉泡芙则系一贯嘅水准， 内馅嘅茶忌廉浓郁满足。
另一特别推介嘅系宇治焙茶红豆忌廉蛋糕，忌廉幼滑，蛋糕软熟，焙茶微甘带甜，仲加多几粒红豆，整体味道平衡。而抹茶红豆忌廉瑞士卷则以日本面粉烘焙而成，口感软绵，茶香清雅。
早餐之选则有抹茶吉士红豆包同首次登场嘅宇治抹茶吐司，後者以日式烘焙技术制作，口感松软，带淡淡抹茶香。
华园酸菜鱼味焗鳕鱼柳
销售点：7-11
唔少人都系酸菜鱼嘅Fans，但当酸菜鱼变成零食後会系咩感觉？有零食品牌推出酸菜鱼味嘅焗鱼柳，不过味道就同想像中有啲分别。冇错系几香口几惹味嘅，仲有阵阵刺激嘅辣香，煲住剧睇住波食都一流，仲好夹啤酒添，不过可惜就争紧少少酸菜嘅精髓，酸度唔够。同埋平时食开嘅酸菜鱼都系软腍嘅口感，变咗偏硬身嘅鱼柳条就有少少唔太惯。
OOHA 柠檬蜂蜜味汽水
销售点：各大便利店及超巿
由Anson Lo代言嘅汽水，出咗新味呀。继续都系0糖0卡0脂肪，今次系柠檬蜂蜜味，味道清爽微甜，好啱而家春夏之交嘅时份饮。即日起至5月26日期间，到任何一间指定商户购买OOHA®产品满港币$30，即可透过指定广告#上嘅QR Code登入网站，上载收据参加抽奖！大奖可以得到「限量版 OOHA® World 惊喜礼盒」（26名），内有巨型A0海报、纪念卡、杯垫等纪念品（款式随机），幸运儿更有机会得到证书连Anson Lo亲笔签名啊！（详情按此）
4月20日更新
日本直送抹茶甜品
销售点：7-11
抹茶控想随时食到抹茶甜品，去便利店行个转就得。今期有3款由日本直送嘅甜品，包括TAIYO双层抹茶牛奶年轮蛋糕、MANNEKEN京都抹茶味窝夫，同埋IZUMIYA抹茶长崎蛋糕。双色嘅年轮蛋糕蛋香十足，仲有淡淡抹茶香，口感柔软；至於松软嘅长崎蛋糕，抹茶味则更浓郁。
华园、锋味 斋烧鹅味爆谷
销售点：7-11
细个成日食嘅斋烧鹅，大个变咗做爆谷？华园同霆锋主理嘅锋味两大品牌最近合作推出咗斋烧鹅味嘅爆谷，神还原经典嘅味道，一盒内有两大包，但呢啲香口嘢一拎上手就停唔到，两包都应该好快食晒。
H.K. Lovecraft 盼望Table Lager
销售点：各大精酿啤酒店、酒厂网站
呢罐系本地精酿品牌H.K. Lovecraft 出嘅第一罐茶啤啊，选用立山小种茶叶酿制。酒精浓度比一般啤酒低，得3.8%，而且酒体轻身，茶味突出，仲带有龙眼嘅甘甜同埋阵阵烟燻香味，好啱一班朋友gathering嘅时候畅饮啊。
CW香蕉麻糬朱古力曲奇、Hershey's朱古力麻糬曲奇
销售点：7-11
以前去亲韩国都被点名要买返嚟嘅朱古力麻糬曲奇，而家香港唔止有得卖，仲有新口味添。香蕉麻糬朱古力曲奇，一打开包装阵香蕉味就涌出嚟，香蕉麻糬夹心烟韧甜身，外层曲奇松软。
伊藤 迷你碎朱古力曲奇 / 迷你牛油曲奇
销售点：7-11
日本直送嘅曲奇，牛油味浓香，细细粒一啖一粒嘅size，绝对令人唔觉唔觉好快就自私食晒一包。另外朱古力味嗰款仲有埋朱古力粒，口感更丰富。
UHA 味觉糖 甜粟米味/金奇异果果汁味
销售点：各大便利店及超巿
软糖口味愈嚟愈多，出开果汁糖系列嘅Cororo，今次轮到金奇异果味，酸酸甜甜仲要有几粒奇异果籽喺中间，几唔错啊；但点都冇估到居然会有只粟米味嘅糖，嗒得出阵阵粟米甜香，但就唔系太习惯粟米变咗呢只texture咯。
4月17日更新
POLS 迷你云呢拿雪糕球
销售点：Market Place、惠康
北欧雪糕品牌POLS又有新品登陆香港啦，今次系迷你云呢拿雪糕球。牛奶朱古力脆皮里面系用顶级拉脱维亚牛奶制作而成嘅云呢拿雪糕，外脆内滑，而且Bite Size几方便食。另一加分点系包装选用可生物分解嘅纸盒，为环保出一份力啊。
4月12日更新
维他奶 VitaOat朱古力燕麦奶
销售点：各大便利店及超巿
VitaOat继原味燕麦奶後，4月最新推出朱古力燕麦奶，同样源自100%燕麦，口感顺滑。而且系低糖配方，加入可可粉後味道依然唔会太甜。唔单止适合有乳糖不耐症或者素食者享用，亦好啱控制体重或者注重健康嘅朋友仔饮呢。
4月4日更新
Hoegaarden 果味白啤酒雪葩
销售点：7-11
Hoegaarden出雪葩啊！！呢两款雪葩早前喺Clockenflap期间曾免费派发，而家喺便利店都有得卖啦！暂时见到嘅有两款口味，都系果味白啤酒系列——红桑子白啤酒味同蜜桃白啤酒味。两者都食得到有果香，不过甜味散得好快，然後啤酒嘅苦味就开始渗出嚟。比较嚟讲，会投蜜桃味多啲，但试过就够咯，之後都系饮返酒会开心啲。btw，提一提，两款雪葩都有2.5%嘅酒精架。
3月30日更新
日清 摩斯汉堡捞面
销售点：7-11
捞面口味愈出愈多，但点谂都谂唔到连MOS Burger味都有？！仲要有2款添，分别系芝士汉堡味同辛味热狗味，2款都系参照MOS Burger嘅食品创作研制调味粉。虽然食落同burger系有啲分别，但系番茄、肉酱同洋葱味都算还原到部分感觉嘅。
Hankyu x UHA味觉糖高级版Cororo仿果实软糖
销售点：city'super时代广场及海港城店限定快闪店 (即日起至2023年4月30日)
果汁糖几时都好有market，无论大人细路都锺意食。今次殿堂级日本百货公司Hankyu喺city’super开pop-up店，引进味觉糖高级版Cororo仿果实软糖，粒糖仲要系普通版嘅1.5倍，以日本果汁制作，内层有仿种子嘅啫喱珠，啖啖都果香感十足，6款口味包括有香印青提、巨峰提子、甜王士多啤梨、法兰西梨、湘南黄金蜜柑同佐藤锦车厘子。开饭仔最推介黄金蜜柑，内有柑橘果皮，微甜清新。
city'super x Deadman比利时浓金黄苹果香槟艾尔啤酒
销售点：city'super独家发售
city’super联乘本地精酿啤酒厂Deadman Brewery，推出以香槟Brut风格酿制嘅啤酒，仲要融入咗超过300公斤嘅日本进口苹果，不过饮落嘅苹果味道又冇想像中咁突出，反而有些少丁香同梨等味道，微甜得嚟亦有微微香槟酸涩之感。
卡乐B 章鱼烧味/关东煮味薯片
销售点：各大便利店及超巿
卡乐B又又又有新味，今次系两款日本小食嘅味道。关东煮味其实系讲紧个汤头嘅味道，微咸中带点甜，但老实讲其实唔多食得出系关东煮味；反而章鱼烧味嘅还原度高啲，系面层日烧酱汁加蛋黄酱加海苔嘅味道。
万代 多啦A梦4D口袋朱古力
销售点：7-11
多啦A梦嘅粉丝实好锺意，虽然细细盒，由包装到造型都好靓。百宝袋feel嘅小盒，打开会有多款唔同道具造型嘅朱古力，随意门、记忆面包、缩小电筒等等都有，好cute cute，食之前仲可以玩个小测试睇下自己认唔认得晒咁多种道具。
春日井立顿 柠檬茶软糖
销售点：7-11
平时成日饮柠茶嘅朋友仔，要试下呢只柠茶软糖，无论系红茶香定系柠檬酸嘅平衡都做得相当唔错，甜度都适中，好似饮紧杯咬得嘅柠茶咁。
3月28日更新
童星超阔条面 麻辣味/咸蛋味
销售点：各大便利店及超巿
细个嗰阵点会估到呢只零食会出咸蛋味呀？闻落真心香嘅，不过可能expectation太高，食落反而唔觉得太重味，轻咗少少；麻辣嗰只就几刺激，後劲凌厉，feel到个喉咙热热地。
FRITOLAY JP高级焦糖爆谷
销售点：7-11
黑金色嘅包装有种高级感，焦糖味爆谷口感香脆，阵阵甜香，就咁一粒一粒食又得，加埋雪糕一齐食都夹，焦糖控试得过，但小心会食到停唔到口。
卡乐B Chill 辣味虾条
销售点：各大便利店及超巿
呢轮多咗啲辣零食，虾条又有Chill辣味，个名改得几好，因为真系辣辣地但又唔会令你辣得好辛苦，轻轻送少少刺激出嚟，点到即止。当然如果你一次过连啪十几廿条，就唔敢担保咯~
GODIVA 春季片装巧克力花形铁盒
销售点：GODIVA门巿
GODIVA最近趁住春天兼临近复活节，推出咗春季限量系列，其中呢个粉红花花铁盒深得女生们嘅欢心，内里有2款朱古力，分别系片装榛子黑朱古力，同50%黑朱古力，用嚟送礼都几啱。
3月21日更新
SunLavieen长崎蛋糕卷蛋 / 抹茶长崎蛋糕卷蛋
销售点：7-11
一盒已经预先切好4件嘅长崎卷蛋糕，以日本产鸡蛋制成，口感软熟，仲有阵阵蛋香，充满惊喜，可以话系便利店中嘅高质甜品之一，而且好就好在就算有cream都感觉轻盈；而抹茶嗰款则选取京都産宇治抹茶制成，微甜中带甘香。
SunLavieen软滑焦糖布丁挞 / 窑烧朱古力挞
销售点：7-11
日本直送嘅两款甜品挞，分别系焦糖布丁同窑烧朱古力味，前者忌廉系以北海道産生乳100%制成，加埋自家研发嘅吉士酱同焦糖酱，甜度唔算高，反而仲有微苦焦糖香，但感觉同焦糖布丁嘅还原度就仲争咗少少蛋香，同埋可能因为冷藏过嘅关系，挞底唔够脆；至於後者则选用六甲山麓牛乳同加纳产可可豆朱古力，朱古力味极其浓厚。提一提返几款甜品都系先储存喺冰格，到享用前3-4个钟放返入4-10℃雪柜解冻嘅效果最佳。
雀巢 抹茶红豆雪米糍
销售点：各大便利店
抹茶红豆呢对最佳拍档，拍埋一齐点都唔会失场。今次呢款雪米糍糯米皮薄软糯，内馅抹茶雪糕同红豆蓉甜甜香香，如果红豆蓉嘅比例再多少少会更开心。
Hershey's黑白朱古力/碎朱古力/白碎杏仁曲奇
销售点：7-11
如果你系呢个朱古力品牌嘅fans，又有新款追啦。最新推出嘅松软曲奇系列，都几大块下，有一只手咁大呀！建议食用前放入微波炉轻轻加热，香味就更突出。无论边款曲奇都好，都几甜身，有埋朱古力粒嗰啖就更甜，绝对系为甜魔而设。
FRITOLAY JP牛油果味玉米片
销售点：7-11
好多人都锺意食牛油果，见到呢款新出嘅牛油果味玉米片或者都会有兴趣想试。报一报告返先，口感酥脆，带微微cream cheese嘅酸香，不过认真，就唔好期待会食到牛油果味啦，就咁食又得，加入沙律等当脆脆增加口感都唔错。
淳。茶舍 玉露、云抹
销售点：各大便利店及超巿
今次唔系出新味，而系升级原有口味。玉露同云抹均采用100%来自日本静岗、奈良茶叶，前者甘甜，後者鲜而不涩。而重点系嚟紧3月29日至4月30日期间，只要买淳。茶舍®及红茶花伝™ Craftea™指定金盖产品，即可参加抽奖，仲有机会赢到一票难求嘅舞台剧《爱我别走》门票！
3月14日更新
7-SELECT x PABLO 甜点系列
销售点：7-11
日本人气芝士挞专门店PABLO同便利店嘅联乘又返嚟啦，今年共有4款甜品同2款面包。
先讲最吸睛嘅一定系烧粟米造型白桃夹心乳酪芝士慕丝蛋糕，像真度甚高，虽然唔明点解白桃味但整粟米造型，但系几可爱嘅。切开有乳酪芝士忌廉，同埋白桃夹心，甜度十足。
日本直送嘅海盐焦糖芝士忌廉泡芙，则贯彻过往泡芙嘅水准，泡芙松软，有空气感；而内馅嘅芝士味忌廉虽然都几多，但味道轻盈，稍为被浓郁嘅海盐焦糖酱盖过。
白桃芝士忌廉瑞士卷同白桃乳酪芝士忌廉蛋糕同样都系由日本直送，前者采用100%日本面粉制成瑞士卷，桃味够晒甜身；而後者忌廉带有乳酪酸味，蛋糕偏湿润，但反而桃同芝士味都略为太轻。
两款面包分别系芒果芝士忌廉包同芝士忌廉包，同样以100%日本面粉制成，前者中间有薄薄一层嘅芒果酱；後者则有满满嘅芝士忌廉。
湖池屋ｘPepper Lunch蒜香酱油味/蜜味蒜香酱味薯片
销售点：7-11
相信大家对Pepper Lunch嘅黑椒牛肉饭一定唔会陌生，今次变成薯片口味，应该都会几多人想试。薯片系V-Cut款，口感较硬脆。无论系蒜香酱油味又好，蜜味蒜香酱又好，都系黑椒味比较突出，味道好浓，食多几块会开始觉得咸。蜜味嗰款相对平衡会好啲，咸香中带有微甜。
3月9日更新
卡乐B 鬼之麻辣味波浪薯片
销售点：各大便利店及超巿
又有辣嘢！呢只薯片用咗花椒同辣椒粉等多种辛香调味料制成，呈波浪纹状。一开封就闻到啲麻辣香味，做好晒心理准备之後食，反而又冇想像中咁刺激，後劲嘅辣感喺喉咙度慢慢出返嚟，轻轻拮下拮下咁。
一合缶 埼玉县24酒藏、久保田 雪峰 纯米大吟酿
销售点：City’super「清酒祭2023」 (3月8-22日)
清酒祭又返嚟啦，sake迷可以留意下。今年有20家酒藏直送超过200款日本酒过嚟，并以露营为主题，介绍多款好啱露营、烧嘢食pairing嘅清酒。其中特别推介细细罐，方便携带嘅一合缶 埼玉县24酒藏 集合版（24罐入）。24罐清酒集合咗埼玉县唔同酒造嘅风土同传统技术，纯米原酒、纯米吟酿、纯米大吟酿等都有；另外，如果BBQ嘅话就最啱配衬嚟自朝日酒造嘅久保田 雪峰 纯米大吟酿，以山废酒母酿造，酸度圆润，香醇旨口。喺清酒祭期间，买满指定金额更可获赠礼品，例如保温瓶等。
Monster Energy - Ultra Paradise
销售点：各大便利店及超巿
今次嘅全新口味倒出嚟系青绿色，味道酸酸甜甜，系集合咗奇异果、柠檬同青瓜嘅风味，饮落几清爽嘅，重点系无糖兼零卡路里呀。
3月2日更新
Binggrae Cledor 韩国直送雪糕批
销售点：7-11
4款雪糕批分别系美式特浓朱古力、济州绿茶、韩国雪香士多啤梨同马达加斯加云呢拿味。全部都有层脆脆地嘅朱古力脆片喺外层，最浓味当然系朱古力啦；绿茶嗰只系采用济州早春第一摘绿茶磨成嘅绿茶粉制作，味道偏清新，aftertaste仲有少少回甘添；至於士多啤梨，有粒粒果肉增加口感，果味浓郁，微酸微甜。
乐天 特浓软心朱古力、特浓软心朱古力脆脆雪条
销售点：Circle K
同样由韩国直送嘅雪条，特浓软心朱古力味外层系朱古力雪糕，中间夹住软心朱古力，有双重口感，虽然唔算话超浓，但都几甜下；至於脆脆嗰款，就系中间再夹多埋脆香米，令口感更丰富。
Lotte 富士山河口湖完熟芝士小蛋糕、名古屋栗子味朱古力小蛋糕
销售点：7-11
日本直送嘅两款小蛋糕，口感松软，细细件两啖食完。芝士嗰款嘅芝士味唔太浓郁，反而畀朱古力味盖过咗；栗子嗰款就几有惊喜，虽然外层有朱古力包住，但仍难阻阵阵甜香嘅栗子味涌出。
森永 班戟味Choice饼、枫糖味玛丽饼
销售点：7-11
一向推出唔少甜品嘅呢个品牌，今次出两款饼都系加入咗枫糖制作。前者虽然话系班戟味，但拎上手一闻都系以枫糖味为主，好彩食落又唔算话好甜，下午茶食两三块都唔会好重罪恶感。至於圆形嘅枫糖味玛丽饼，则系日本森永期间限定嘅新品，但枫糖味同样唔算重，只系轻轻带过。
甘乐Marosh 葡萄苏打 / 乳酪苏打 / 香橙苏打味棉花糖
销售点：7-11
3款口味嘅棉花糖，都有激活味蕾嘅效果。事关只棉花糖就唔系完全软心嘅，略有咬口，咁一路咬就一路畀面层嘅酸粉刺激，眼瞓时嗒一两粒即刻醒咗。
2月15日更新
少爷啤酒 情人节限定啤酒
销售点：Circle K
2月系情人节嘅月份，少爷啤亦特意推出2款酸酸甜甜嘅限定酸啤，酸啤可以话系近年精酿界嘅潮流。2款口味分别系蜜桃酸啤同红莓酸啤，前者加入新鲜水蜜桃，甜得嚟有微酸；後者则加入大量新鲜红桑子，酒体亦呈深粉红色，睇见都浪漫。无论闻落定饮落都有阵阵莓酸，即使冇饮开酸啤嘅朋友亦容易接受。
湖池屋 海胆味脆格
销售点：7-111
见到海胆味嘅零食，的确会有份好奇心想试。呢只脆格海胆味唔算话好浓，无海胆嘅甘但有海胆嘅甜，做定少少期望管理再试系几OK嘅其实，加上酥脆口感，好快就可以食晒成包。
万代4D软糖 星之卡比
销售点：7-11
类似嘅包装之前应该都见唔少，但每次见到系自己嘅本命时，都系会忍唔住想买。今次轮到星之卡比做主角，系香甜嘅桃味呀，口感软得嚟几chewy ，卡比仲有2款表情添，好qq。
新世纪福音战士玻璃杯 / 水樽 连糖果
销售点：7-11
EVA粉丝呢期行过便利店好易守唔住，有太多周边出咗喇。其中呢2款玻璃杯同水樽都印有EVA 初号机同特务机关 NERV 标志，够晒经典，随盒仲会附送一包糖仔。
2月13日更新
情人节要食朱古力，呢间饼店乘势推出情浓朱古力礼盒，包括有岩盐朱古力蛋卷同首度推出嘅朱古力脆曲奇。前者以纯天然黑朱古力砖制作，香脆但唔易散，朱古力味浓香得嚟又带有微咸；後者则较为甘香，仲有牛油香添。
2月2日更新
Carb Balance 烤芝士/朱古力蛋糕
销售点：7-11
一盒6件蛋糕仔，2款口味分别系烤芝士同朱古力味，两者均减咗60%嘅糖分，所以食落又唔会话好甜腻。前者带有燻香嘅芝士味，後者则系相对轻身，甚至带少少微甘嘅朱古力口感。
TENKEI 朱古力蛋糕
销售点：7-11
一袋有5件独立包装嘅朱古力蛋糕，选用信州鸡蛋制作，甜度较上面嗰款高，但开心位系间中可以食到一粒粒朱古力，增加口感。
SANRIO创意朱古力工具套
销售点：7-11
情人节亲手做朱古力送畀另一半，够晒冧猪。呢个套装喺便利店就买到，齐晒模具同唧唧笔，仲有比利时原材料朱古力，盒底有说明教你点整，步骤简单，包保零失败。如果另一半系Ahiru no Pekkle、Little Twin Stars或者Hello Kitty嘅fans就真系冇藉口唔整了。
SANRIO心形朱古力棒棒
销售点：7-11
氹SANRIO粉丝开心其实好简单，突然送呢几支心形朱古力棒棒畀佢哋，都有小惊喜。话说啲朱古力都系用比利时朱古力整架。
1月27日更新
DYDO X PH柠檬红茶
销售点：7-11
由日本入口嘅柠檬红茶，用足成粒柠檬去榨汁架，另外仲加咗柠檬皮同香茅提取物，难怪饮得出比一般柠檬茶嘅柠檬味更为突出，锡兰红茶叶亦令茶香味浓，惟一要挑剔系甜咗少少。品牌同时仲出咗香桃红茶味。
1月19日更新
IZUMIYA蜂蜜长崎蛋糕
销售点：7-11
日本早餐嘅味道，香港便利店都搵到。由日本直送嘅蜂蜜长崎蛋糕，口感松软，带有微甜蜂蜜香。底层有一排砂糖粒，系几有口感嘅但同时都好甜。
Taiyo 士多啤梨年轮蛋糕
销售点：7-11
同样由日本直送嘅甜品，士多啤梨年轮蛋糕，不过无论颜色同食落都唔算好士多啤梨，比想像中轻身，口感偏实净。
少爷啤酒 《鸳》IPA 、《鸯》Stout
销售点：Circle K
茶记有咖啡奶茶鸳鸯，精酿啤酒都有？！本地精酿啤酒品牌少爷啤酒趁住新年，出咗两只经典啤酒贺岁应节，仲可以沟埋一齐饮，点睇？经典IPA《鸳》甘苦味中带有柑橘香，而Stout《鸯》则有较浓嘅烘焙香味同朱古力味，两者各自各饮又得，沟埋一齐饮又得。沟埋嘅话Stout会变得轻身咗，IPA嘅苦涩感亦低咗。
生力 朱古力啤酒
销售点：7-11
难得见到生力啤有新嘢，朱古力lager，开罐後首先闻到嘅系突出嘅朱古力味，不过饮落就唔算话好浓味，反而有少少似攒盒内嘅金币朱古力味。如果玩开food paring嘅，可以试下夹埋啲朱古力食品一齐享用，提升朱古力甜味嘅辅助效能唔错。
Tenkei 豆沙奶油三明治
销售点：7-11
一包8件独立包装，分别有红豆蓉同栗子蓉2款口味，口感松软，味道微甜，细细件作为下午茶过下口瘾都几啱数。
MANNEKEN朱古力味窝夫
销售点：7-11
另一款由日本直送嘅甜品，感觉偏甜，无论朱古力味定系甜味，都略为单调咗少少。不过就几有饱肚感。
KITAGAWA朱古力甜甜圈
销售点：7-11
虽然呢个甜甜圈细细包，包装又唔算好吸引，但唔建议miss咗佢。甜甜圈外脆内软，啖啖浓郁朱古力味，甜魔表示好can。
1月16日更新
Asahi 新春限量版Asahi Super Dry
销售点：各大便利店及超巿
日本啤酒Asahi Super Dry换上新装，图案设计糅合日本传统Origami工艺及数码摺纸艺术，加上啤酒清爽口感，务求同大家一齐「朝气开好年」。
1月6日更新
Beard PaPa’s 年轮蛋糕家庭装 / 片装蛋糕
销售点：7-11
嚟自大阪嘅人气泡芙店出咗唔同包装嘅蛋糕，年轮蛋糕一包有12件，Bize Size最啱开心Share。直送片装蛋糕就有云呢拿、豆乳香蕉、芝士共三款口味，口感湿润而且甜度适中。
卡乐B 泡菜炒年糕味薯片 / 韩式烤鱿鱼味薯片
销售点：各大便利店及超巿
两款期间限定韩式新口味，泡菜年糕味食落的确系韩式泡菜嘅酸酸辣辣、食多两块甚至觉得几开胃，不过就唔系好联想到年糕罗。韩式烤鱿鱼味系V-Cut薯片，闻落鱿鱼香好劲，食落就系鱿鱼酱嘅咸香。
卡乐B 李锦记海皇XO酱味薯片
销售点：各大便利店及超巿
用本地工厂新鲜制作嘅李锦记海皇XO酱整成薯片，闻落XO酱嘅虾味特别明显，咸咸香香咁，食多几块就会开始觉得辣，系过瘾嘅辣味嚟。
Pokka Sapporo 杯装汤
销售点：7-11
冬天去日本必饮热粟米汤嘅朋友仔，喺香港都可以买呢个牌子嘅杯装浓厚粟米汤嚟过下口瘾嘅。另外有南瓜汤同参鸡汤，参鸡汤饮落其实无乜人参味，所以怕苦嘅朋友唔使惊。胜在口感浓稠更有一粒粒鸡肉，随时随地可以饮杯热汤暖下胃系几窝心嘅。
褔 韩辣福气锅礼盒
销售点：百佳超级市场、TASTE、fusion
韩风继续吹！连香港经典品牌都推出韩式礼盒，最加分嘅系里面有埋不锈钢韩式褔气锅，明火同电磁炉都用得！套装包括韩辣味汤面、辣鸡味捞面、芝士辣鸡味捞面同上汤伊面。买嚟送畀锺意食韩国菜嘅朋友都几啱。
文：Kar、Cathy.H
