【随时更新】零食速报 每周新款零食、酒品点评
6天前

各大品牌同便利店成日都出新款零食,就算作为定期会去巡舖、入货嘅专业零食控,都未必试得到咁多款,有时又会惊中伏而却步。到底边款抵买抵食,边款伏味浓,2021年就等开饭仔继续行匀便利店、超巿、零食店、啤酒舖等,时不时帮大家留意住最新、最吸引嘅新品,一一试真啲!

10月15日更新

Schoggi Meier网店  -  Schoggi Meier可可果朱古力

喺香港自设厂房嘅朱古力品牌,最近推出全新嘅可可果朱古力,未打开包装盒,已经闻到浓烈嘅果酸。原来系因为呢款新朱古力采用源自玻利维亚嘅可可果,酸味系嚟自果实嘅天然果酸,可以话系可可果真正嘅味道,食落当然都有呢种果酸香,另外都会有朱古力嘅微苦微甜。3款口味喺味道上会再有唔同嘅变化,各有特色。72%可可果黑朱古力就系最原始嘅味道,酸甜平衡有致;64% 橘子可可果黑朱古力加入咗橘子味,微微苦涩中嘅酸度亦有所提升;72% 焦糖可可果黑朱古力则系相对较甜嘅一款。

7-11 - 湖池屋  牛肉清汤味薯片

呢个品牌嘅薯片都有唔少fans,今次使用日本牛肉,加入洋葱同大蒜等香料,创作出牛肉清汤味薯片,系有啲肉味嘅,薯片口感较食开嘅硬身。

7-11 - 湖池屋  醋味薯片

薯片除咗咸味之外,重可以有醋酸味?呢款新口味薯片实行冲击一下大家嘅味觉,不过放心,都系头几啖食落嘅醋酸味会比较重,即刻醒一醒神,食食下可能惯咗就觉得味道淡返啲。

7-11 – Wow! For x 阿华田朱古力麦芽窝夫

如果大家有印象,阿华田以前系出过雪糕嘅,仲要几好食。今次出咗两款新零食,比利时窝夫呢款嘅华田味较重,食落啖啖蛋香同麦芽可可香味,口感松脆,细细块会食唔停口。

7-11 -  唐舖子 x 阿华田朱古力麦芽吐司

至於另一款零食,系硬脆嘅吐司。呢款就朱古力味较重,甜身少少。不过好就好在系独立包装嘅,每次口痕时拆一包仔出嚟食下都OK。两款华田零食都系由台湾直送呢。

10月5日更新

7-11 -  Samlip X Kraft 义式焦糖奶油芝士千层酥

成日都话愈肥嘅嘢愈吸引,呢款传统意大利小食由108层酥皮烘焙而成,啖啖松脆而且渗出微微焦糖同cream cheese嘅香味。好彩佢系独立包装,每次拆开一条嚟食罪恶感都冇咁大。

各大便利店及超巿  - 卡乐B甜心薯蕃薯片

街上未有烩蕃薯,不过便利店就有甜心薯蕃薯片啦~  新版本细细片,但蕃薯味道更加突出,香咗甜咗,唔觉唔觉好快就清晒一包~

各大便利店及超巿 – 日清合味道杯面 x 新世纪福音战士

细细个食到大嘅合味道杯面,原来今年50周年喇,咁梗系要搞下大坛嘢啦~ 最近联乘日本超人气动漫《新世纪福音战士》,推出咗多款特别版包装杯面,一套6款包括有碇真嗣、绫波丽、明日香等多个角色,动漫迷要集齐喇。另外,亦有新口味杯面——鲜虾猪骨汤味登场,汤底浓稠。

7-11 日本直送冲绳黑糖系列甜品

耐唔耐行下便利店,都会发现有新嘅日本直送甜品。今次轮到冲绳黑糖系列甜品,冲绳黑糖双层忌廉泡芙,外层一如以往嘅软熟,而内馅嘅黑糖忌廉都几重味,好甜。

冲绳海盐黑糖忌廉千层蛋糕则除咗有浓郁嘅甜味之外,更有阵阵黑糖独有嘅炭烧味道,甜中带甘。而冲绳黑糖忌廉瑞士卷口感松软,系3款甜品中,相对冇咁甜嘅一款。
 

各大便利店及超巿 – 酒鬼花生

喺屋企睇波煲剧点可以唔食下花生先?呢个本地新创品牌就推出两款口味嘅花生,分别系醇香原味同麻辣味,麻辣味花生打开里面仲会有辣椒喺里面,又麻又辣认真过瘾!而且系真空包装,保存花生香脆口感~
 

9月30日更新

Marketplace、青菓屋 - 西瓜啫喱

呢个西瓜果冻系日本嘅人气新品,望落劲cute cute,QQ弹弹咁,重要用埋木薯粉做珍珠粒,整到好似真‧西瓜有埋核咁,啫喱就用咗日本西瓜汁加柠檬汁调味,食落唔算话好甜,但就好爽。

青菓屋 - 札幌水果炖蛋蛋糕

另一款日本直送嘅人气产品,就系札幌水果炖蛋蛋糕啦。分别有白桃味同士多啤梨味,面层有frozen咗嘅生果,味道甜香重好有冰感,下层则系滑捋捋嘅炖蛋蛋糕,啖啖蛋香几有惊喜,大推介啊。

全线Doughnut门市+TAP +少爷啤网店 - 少爷x Doughnut  超限量粉红啤酒GLAZED

粉红色嘅啤酒?系呀,少爷为Doughnut度身订造咗只清爽酸啤,粉红色嘅包装,粉红色嘅酒体,充满住少女心。闻落系好香嘅红桑莓味,不过饮落就轻身啲,微微酸又有微微乳糖甜咁。

少爷啤网店 - 少爷啤酒 HEA系列 CBG淡爱尔啤酒

走在潮流啄啄嘅大家,都知道而家好兴喺饮品中加入CBD,少爷啤更有一系列嘅CBD啤酒。最近呢个系列继续进化,用埋CBG𠻹啊!CBG比起其他大麻化合物更难取得,同样都有放松减压嘅作用。新嘅CBG啤酒系只pale ale嚟,每公升啤酒加入60mg高纯度CBG,口感轻盈清爽。

各大便利店及超巿 - 全新无糖可口可乐

锺意饮可乐又怕肥嘅朋友仔,通常都会拣无糖版。最近佢哋出咗全新嘅无糖可口可乐,唔止转咗包装,连味道都有轻轻转到,口感清爽咗,而且更似原味。但放心,依然都系无糖、无卡路里!

7-11 - Ize CoCo 4款泰式椰子壳造型雪糕

以前去泰国旅行,一定食当地用新鲜水果制作嘅雪糕降温。不过而家唔使飞,一样食到有「泰版Haagen Dazs」美誉嘅Ize CoCo雪糕,而且无麸质、无反式脂肪、无胆固醇同无奶类制品,素食者都可以一齐叹。雪糕质感似雪葩,而4款口味包括用时令水果制作嘅椰子味、芒果味、榴槤味同富当地特色嘅泰式奶茶味:

左:椰子味 | 右:榴槤

3款水果味道都用鲜果制作,但以椰子味最出色!有解渴感觉之外,重有椰果果肉,亦系4款之中唯一有馅料嘅口味。而榴槤味用金枕头同青尼榴槤混合制成,打开就闻到明显嘅榴槤味,但入口冇食果肉咁浓郁,锺意极浓口味嘅朋友可能觉得差少少。

左:芒果味 | 右:泰式奶茶味

芒果味用泰国盛产嘅水仙芒制作,清甜唔酸,重有微微果香。另外,将当地知名奶茶品牌Cha Tra Mue嘅泰式奶茶变成雪糕後,可能因为温度比茶饮低好多,甜度同茶味都减低咗。


9月20日更新

各大便利店及超巿 - 雀巢鹰唛  姜味奶条

今期唔知系咪兴将传统甜品变做雪糕口味,先有由姜汁撞奶变奏而成嘅姜味奶条。食落有微微辛嘅姜味,加埋浓甜嘅炼奶,还原度唔错,不过系偏甜嘅姜汁撞奶。

7-11 及各大超巿 - 雀巢  法式焦糖炖蛋甜筒

另一款甜品变奏版嘅雪糕就系法式焦糖炖蛋甜筒喇,配上海盐焦糖酱同朱古力酱,未食都已经可以想像到佢嘅甜度爆表,完全系甜魔之选。

各大便利店及超巿 -  DREYER’S  奇异果乳酪条

又怕肥又想食雪糕嘅朋友仔,当然要拣低卡嘢啦~ 呢个系列嘅乳酪条继士多啤梨、蓝莓同芒果热情果口味後,再出咗新嘅果味呀!奇异果乳酪条加入咗真‧奇异果果蓉,味道清甜微酸,外层乳酪口感幼滑,而且无添加防腐剂同人造色素,食完成支都系94kcal,OK啦。

各大便利店 - 森永 PARM抹茶雪糕批

年中总会有几款抹茶雪糕推出,呢款选用京都宇治一番茶制成,外层系抹茶朱古力而内系抹茶雪糕,不过食开森永产品嘅都知,口感系幼滑嘅,虽有微甘茶香,但系味道偏甜,奶味略重。

Circle K  - 乐天 Ghana 朱古力雪糕批

朱古力控不能不试呢款由韩国引入嘅朱古力雪糕批,真心力推!选用高级可可豆制成,外层有粒粒黑朱古力脆皮,内层系朱古力雪糕,朱古力味系由外到内到返外都咁浓郁,忍唔住食完一啖又一啖,好快就食晒,加埋crunchy嘅口感冇得输。

9月14日更新

Circle K  - 韩国乐天  辣炒芝士年糕雪米糍

辣嘅雪糕会系点?韩国出咗只新口味雪米糍,以韩国传统街头小食辣炒年糕为灵感,变咗做辣炒芝士年糕雪米糍。麻糬皮加入墨西哥辣椒制成,系有少少似年糕嘅真心,入面嘅芝士雪糕都加入咗辣味曲奇碎,但就唔算话好辣,系几特别嘅,勇士们可试试。

Circle K - 雀巢®KIT KAT® 可可威化抹酱夹心飞碟

呢间便利店一向都有唔少口味嘅飞碟供应,size啱啱好fit晒早餐或者下午茶。最近同Kit Kat联乘,推出雀巢®KIT KAT® 可可威化抹酱夹心飞碟,内馅系朱古力加威化脆脆,松软得嚟有微脆口感,甜度唔算好高。

9月9日更新

7-11 素食系列

素食朋友仔嘅选择愈嚟愈多,呢期便利店嘅素食系列又有新嘢出,几款新品用上唔同嘅植物肉制作。素肉炸酱韩式手卷以OmniPork新猪肉加天然香料调味而成,味道较清淡。

另外有两款台湾风味嘅饭团,分别系素肉松油条辣榨菜丝台式饭团,同素卤肉卤蛋菜脯台式饭团,都算做得几像真,微微咸香,早餐或lunch食一份啱啱好。而沙嗲素牛肉三文治则选用韩国嘅Unlimeat植物牛肉,以鹰嘴豆、藜麦同小扁豆制嘅素牛肉而成,加入特制沙嗲酱快炒,有淡淡嘅花生香,「肉感」略为扎实。

Market Place、雀巢香港网上商店等 –  雀巢  植物咖啡

呢两款新口味咖啡,同样为素食朋友而设。由日本直送嘅植物性即饮咖啡,不含乳制品、低糖,而且含零克反式脂肪同零毫克胆固醇。两款口味分别系杏仁咖啡同燕麦咖啡,既有咖啡本身香气之余,亦有阵阵坚果香。

9月6日更新

7-11、Circle K - 维记椰香雪花糕甜筒


将怀旧甜品椰香雪花糕,制成全新口味嘅甜筒,还原度唔错。外表极似云呢拿甜筒,面头同样系花生朱古力,但今次里面系混入椰丝嘅椰香雪糕,味道清甜又有咬口。
 

Circle K - 维记豆腐及芝麻(黑白)雪米糍

以传统中式甜品「芝麻糊豆腐花(黑白)」为灵感制成嘅豆腐及芝麻(黑白)雪米糍,今年再度回归喇。不过由上年嘅迷你装,变成正常size。用黑芝麻制成嘅烟韧糯米皮包住豆腐雪糕,大大啖咬落去,豆腐味比较香浓突出,但净系咬糯米皮,就会食到淡淡嘅芝麻味喇。
 

7-11、Circle K、HKTV Mall - Himalaya岩盐糖

做运动除咗要补充水分,仲要记得补充盐份及矿物质呀!呢款岩盐运动糖就可以帮大家补充80种人体必需矿物质,包括钾、镁、钙、钠等。仲有最新嘅Extra Cool配方,食落凉浸浸~有柠檬味同姜柠檬味,都系细细包方便带出街随时食。
 

8月18日更新

7-11、百佳、惠康、AEON - LINE FRIENDS X DOLL   旅游主题即食面

我哋未有得去旅行,但熊大同朋友仔有喇!Line Friends联乘Doll出咗两款旅游主题即食面,熊大一时着住和服一时又着住韩服咁,真开心。两款新味分别系日式柚子胡椒鸡白汤味,同韩式泡菜海鲜味。前者胡椒味重,渗有阵阵柚子酸甜甘香;後者味道微辣,不过泡菜就唔多食得出。

各大便利店及超巿 - 卡乐B    和风口味系列薯片

新出嘅两款口味都系以日式菜嘅味道作参考,日式葱乌冬味薯片食落又真系几似只乌冬汤底味,以京都九条葱成份制成味粉,青葱味浓郁;至於蒜香和牛味薯片系用咗日本和牛成份制作而成嘅味粉,但肉味都系略淡,反而香蒜味道就好突出,想像完全系铁板牛侧边几片蒜片咁。

官网及门巿 - 星球工坊 草莓牛奶爆谷

爆谷控有冇追住佢哋嘅新味先?最新出嘅呢款爆谷,粉红包系几charm嘅。用咗士多啤梨搭配牛奶制成,甜得嚟带酸,食下一甩食下又一甩,一个唔小心好快就食晒食包。

8月6日更新

各大便利店及超巿 - Haagen Dazs   岩盐焦糖泡沫咖啡雪糕

有追开哈根大师Barista Collection嘅朋友仔,有新嘢试喇,除咗之前两款咖啡雪糕同朱古力蛋糕咖啡雪糕之外,而家有最新嘅岩盐焦糖泡沫咖啡雪糕,都系由巴西咖啡豆制作,有杯装版亦有雪糕三文治版。岩盐焦糖酱咸甜交集,夹埋理所当然甘香浓郁嘅咖啡香味,咩减肥大计都要放埋一边,食咗先算咯。

7-11及日资超巿 - Haagen Dazs    芳醇咖啡脆皮雪糕三明治

飞唔到日本都有日版雪糕食系幸福嘅。呢款选用来自埃塞俄比亚Yirgacheffe咖啡豆制作,最外层嘅威化片有淡淡咖啡香,包住雪糕嘅系咖啡朱古力脆皮,呢层嘅甜度最高。雪糕则系咖啡牛奶雪糕,甜香中带有回甘。三层,三种唔同嘅啡香,可以话系三重咖啡享受呀。

百佳 - Ekselence 迷你拿铁雪糕批


呢个北欧雪糕品牌嘅皇牌产品迷你雪糕批,最近推出全新嘅Latte口味!100%北欧制造, 外层系比利时朱古力脆皮,里面就系咖啡酱同雪糕。咖啡酱香气浓郁,不过因为咖啡酱、朱古力同雪糕都有甜味,整体就偏甜咗少少。

百佳、一田、Circle K - Pols 雪糕曲奇 

呢个北欧雪糕品牌就推出雪糕曲奇迎接夏天,曲奇当中有朱古力脆片增加口感层次,不过始终都雪过,所以曲奇质地偏腍。中间夹住云呢拿雪糕,口感幼滑甜度适中,的确几啱消暑~
 

7月30日更新

各大便利店及超巿 - 乐事薯片 日式口味系列

前一轮出咗好多港式风味嘅薯片,呢期轮到日式喇!乐事新推出嘅3款口味,都系经常会喺日本料理中食到嘅味道。几款口味还原度各有高低,当中最似原本菜式嘅味嘅,系神户厚切牛扒味,咸香兼备,重食到肉香,blind test应该都试得出。铁板烧海鲜味都做得几似,芸芸海鲜味中,以虾鲜味最突出。豚肉生姜烧味就相对上争少少,要畀多啲想像力,味道微甜。

7月28日更新

7-11  阿奇侬   铁观音奶盖珍珠奶茶雪条

由手摇饮品变成雪条嘅奶盖珍珠奶茶味,还原度唔错。雪条上层系微微咸香嘅芝士奶盖,下层系铁观音、日本焙茶同红茶叶混制而成嘅奶茶雪条,微甜而茶味突出,仲有啖啖sharp sharp声嘅珍珠,系另一种爽。

Circle K -  阿奇侬  咸蛋黄珍珠雪条

呢款雪条口味够晒新奇,咸蛋黄夹珍珠,各自嘅味道都几突出。除咗加入炼乳中和咸蛋咸味,亦用鸭蛋黄同欧洲奶油制成咗奶黄酱淋喺雪糕上,所以食落咸蛋同奶味都几重。珍珠则加入黑糖制作,味道稍甜,但两者夹埋一齐就好似唔太friend了。

Circle K - 丸作食茶  粉红仙人掌珍珠雪条

粉红色嘅雪条,系几梦幻嘅。由饮品店招牌饮料变奏嘅口味,使用台湾澎湖仙人掌原汁,造出粉红虎纹效果,好啱打卡。珍珠则系饮品店嘅白玉珍珠,酸甜烟韧。

各大便利店及超巿 - 雀巢MEGA  海盐焦糖雪糕批

海盬焦糖呢个咸咸甜甜嘅配搭,收埋收埋唔少粉丝。今次呢款新雪条,外层系朱古力脆皮,内层以牛奶雪糕做基底,混入海盬焦糖酱,口感唔错,不过略嫌奶味偏重,如果本身为咗焦糖甜而试嘅朋友仔,可能会微微失望。

各大便利店及超巿 - 雀巢 Drumstick

讲真,味就唔系新嘅,都系大家细细个已经开始食嘅口味,但就请嚟活力十足嘅ANSONBEAN,以唔同造型为甜筒形象定格,推出全新包装。根据官方介绍,云呢嗱味系帅气文青嘅代表;朱古力味展现硬朗型格;芒果味散发热情活力,同埋香芋味渗透种率性不羁喎,各位粉丝饭团就自行参透下喇。

7月20日更新

各大超巿 – MÖVENPICK 全新口味

呢个瑞士雪糕品牌一向有保证,今次3款全新口味都几高汁。最推介嘅系朱古力榛子碎雪糕,以瑞士朱古力雪糕味做基底,加入咗榛子酱同榛子碎,双重榛子感受香甜浓郁,啖啖nuts仲好有口感。

热情果芒果及忌廉雪糕就最有夏日色彩,选用意大利奶冻味雪糕,加入热情果芒果雪葩,无论系果香定酸度都十足,够晒清爽。

反而瑞士蜂蜜杏仁雪糕就未必个个啱食,事关佢虽然基底系云呢嗱味雪糕,但加入咗栗子蜂蜜同焦糖杏仁碎後,杏仁嘅味道出奇地突出,奶味亦浓厚,锺意嘅会好锺意,但如果平时唔太好杏仁糊杏仁茶杏仁露嘅朋友仔就都系试返上面两只味啦。

各大超巿 - DREYER’S  海盐焦糖花生味雪糕

一家人一齐食雪糕就最开心,可以买大大盒家庭装share。新口味海盐焦糖花生味雪糕,以奶香味重嘅云呢嗱味雪糕做底,加入海盐焦糖酱同撒入花生粒,不过虽然咬到好多花生粒粒,但花生味都系略为淡,畀云呢嗱嘅甜味盖过咗。

7月13日更新

7-11 - 福源  花生酱麻糬

好耐都冇飞过台湾?忍多阵啦,台湾嘅人气手信有飞过嚟香港嘛。最近喺便利店发现到3款选用福源花生酱制作嘅零食,花生酱控们,出动!3款最值得推介嘅可以话系花生酱麻糬,外皮软滑烟韧,内馅嘅花生酱香甜得嚟,仲有粒粒花生碎,系会忍唔住想不停再食。

7-11 - 福源  花生酱雪花饼

方方正正嘅雪花饼,外层系甜身嘅棉花糖,包住花生酱饼喺中间,口感既柔软又酥脆,层次多变,但花生酱味冇想像中咁浓郁,时香时淡。

7-11 - 福源  水滴型蛋卷

而呢个由「新竹福源」同「雪之恋」联乘嘅蛋卷,形状就相当特别,大大粒水滴咁。咬落香脆嘅,但如果一心想食到花生酱香味嘅话就可能有少少失望,比蛋香抢咗少少风头,花生酱味较淡啊。

7月9日更新

GODIVA专门店、7-11 – GODIVA 黑朱古力软心雪条

一见到呢3条盛夏限定口味,应该好多人都变咗心心眼喇。柠茶、伯爵茶同夏威夷果仁味三款都喺黑朱古力嘅外层上分别加入夏威夷果仁或杏仁碎同朱古力脆片,一嚟中和咗少少甜度,二嚟增加咗香脆嘅口感。柠茶味几有惊喜,选用清新柠檬同锡兰红茶配搭朱古力,系三款中最清爽嘅一款。伯爵茶味则带有醇醇茶香,甜度适中。
 

各大便利店及超巿 - 雀巢 希腊式乳酪

呢个牌子三款希腊式乳酪都系香港新鲜制造,而且不含防腐剂。有原味、士多啤梨味同蓝莓味,後两款加入新鲜果肉,味道更清新。乳酪口感厚滑丰盈,味道微酸好啱夏天食。
 

7-11 - KOJIMAYA 微热山丘土凤梨雪糕

呢个由日本人开设嘅香港雪糕品牌同台湾知名品牌微热山丘合作,土凤梨雪糕选用100%微热山丘嘅台湾土鳯梨果肉同果汁,咬落唔单止保留咗台湾土凤梨嘅独特香气,仲咬到一丝丝果肉好有惊喜!味道酸甜自然。
 

7-11 - KOJIMAYA 微热山丘D24榴槤雪糕

呢杯就系同台湾微热山丘嘅旗下品牌FORBIDDEN合作,精选马来西亚D24榴槤制作而成。榴槤控可能会有少少失望,毕竟雪冻咗做雪糕香味无咁浓郁,胜在榴槤味道自然食得出唔系香精味,而且口感幼滑。
 

7月6日更新

惠康 - 珍珍 泰式辣鱿鱼味薯片

珍珍新出嘅泰式辣鱿鱼味薯片,净系得惠康独家发售咋。食落又真系有烧鱿鱼嗰阵嘅炭烧香,同埋酱油甜味,加少少想像都有啲feel嘅,而且食食下,会慢慢辣返出嚟,後劲不俗。

百佳、Fusion、Taste - 珍珍 麻婆豆腐味薯片

珍珍另一只口味,麻婆豆腐呢就系百佳嗰啲超巿先有得卖。以多重香料制作嘅豆瓣酱,加入花椒粉同辣椒粉调配,椒香味突出,但冇想像中咁辣,不过就带有麻香,辣得几有层次嘅。

7-11 - Nature Valley软烘燕麦饼

平时食开佢嘅energy bar,最近有新系列推出,软烘燕麦饼同样都系以天然全谷燕麦制作,作为零食嚟讲相对上叫做健康啲。两只口味分别系肉桂同花生酱味,前者香软微甜,後者花生酱味较淡。

7-11 - Mrs Fields 曲奇

多数喺港铁站经过都会闻到劲香嘅曲奇饼店,而家喺便利店都买得到佢哋嘅曲奇啦。三款口味包括牛奶朱古力碎曲奇、奶油软糖布朗尼曲奇同白朱古力果仁曲奇。三款口感都松软,而且甜度甚高,当中以白朱古力嗰只就最高。开袋即食当然方便,但想好食啲嘅,建议可放入微波炉叮廿零三十秒,带住少少微温食就更享受。

6月29日更新

各大超巿 - 雀巢牛奶公司  旧香港限量版雪条

时下兴怀旧,红豆乐、脆皮乐(香芋、云呢嗱味)同旺宝呢4款雪糕本身已经盛载住好多童年回忆,最近仲要联乘本地插画家麦震东,推出旧香港限量版包装,以几个旧时香港嘅场景做主题,无论系雪糕叔叔定士多、游乐场定屋邨,都有种似曾相识嘅感觉。新一代嘅小朋友未必识喇,就衬住呢个怀旧版,畀佢哋睇下旧香港系点啦~

Circle K - 少爷啤酒x谭仔三哥  汤底啤酒

汤底味嘅啤酒到底会系点?一向idea多多嘅少爷啤,最近同三哥合作,推出咗两款以三哥汤底为灵感嘅精酿啤酒。黑罐嘅煳辣‧黑啤顾名思义就系参考煳辣汤底创作,酿造时加入烟薰辣椒,既有stout应有嘅烘烤麦芽嘅焦香,亦有微微辣感喺喉咙回返出嚟,尾韵甘甜。至於红罐嘅麻辣‧酸啤系款德国Gose啤,呢种类型嘅啤酒通常味道较强烈,咸咸酸酸,不过未必个个都接受到。今次以招牌麻辣汤底为灵感,以乳酸菌发酵,将gose嘅精神完美发挥,咸酸度得宜,既有辛香感觉,亦有清爽快感,值得一试。

各大便利店及超巿 - 雀巢咖啡  少甜罐装咖啡

而家好多时饮嘢都会拣无糖或少甜,雀巢咖啡都出咗少甜系列呀。由欧洲直接进口嘅两款少甜低脂口味包括醇滑牛奶咖啡(Flat White)同盐香焦糖咖啡(Salted Caramel)。前者口感醇滑,淡淡奶香,微微甜但咖啡味唔多重。

百佳、屈臣巿 - Watson’s  X-Soda系列

两款新出嘅苏打水,以cocktails口味为零感创作,重点系零糖零脂零卡路里嘛,清爽得嚟又轻盈,唔使怕肥。椰林飘香酒精风味苏打水加入白朗姆酒,味道清甜,酒精只系0.4%;而荔枝马天尼酒精风味苏打水就混入Gin酒,饮落有淡淡嘅果香。

百佳 - KOJIMAYA PUI PUI天竺鼠车车雪糕


呢个由日本人喺香港创办嘅雪糕品牌,同之前大热嘅《PUI PUI 天竺鼠车车》联乘,推出五款唔同口味嘅雪糕!每杯都印上其中一个天竺鼠车车主角,雪糕口味都有衬返天竺鼠车车嘅性格,例如性格随和嘅POTATO就系云呢拿雪糕。另外仲有焦糖饼、忌廉芝士、朱古力同士多啤梨口味。雪糕口感柔滑,甜度适中。
 

各大便利店及超市 - 维他 新鲜茶系列


夏日炎炎想随手就饮到冰冻新鲜茶?呢个品牌最近就推出新鲜茶系列,有柠檬茶、金萱乌龙茶、蜂蜜绿茶同日式煎茶四款口味,全部都系低糖或者无糖配方,严选高品质茶叶,喺香港厂房以冷泡方式新鲜冲泡,无添加色素或防腐剂。柠檬茶甜度的确比坊间嘅低,饮到柠檬清香。
 

各大便利店及超市 - 维他奶 VitaOat燕麦奶


最近多咗人饮燕麦奶嚟取代牛奶,呢个品牌就推出全新嘅燕麦奶饮品,源自100%燕麦,无乳糖而且零胆固醇!低糖配方加上系纯素,健康无负担之余,饮落口感柔滑仲有淡淡燕麦香。温馨提示,饮之前记得要摇匀呀。
 

6月17日更新

百佳 - 日清  杯装厚切薯片

今次系品牌首次推出杯装厚切薯片,厚度真心有返咁上下,厚得嚟依然脆身,薯味亦更浓。两款口味包括有黄金牛油味同焦糖味,前者牛油味浓郁,後者甜中带咸。

各大便利店及超巿 - 品客薯片  美式烤肋排味+浓泰式生菜碎肉味

细细筒嘅美式烤肋排味薯片,既有肉香亦有阵阵蕃茄味,可以话系酸甜咸味集一身;而生菜碎肉味又真系几有泰式风味,放入口初段感觉清新,差唔多食完嘅时候就会feel到後劲嘅微辣渗出嚟。

各大便利店及超巿 - 卡乐B 意式杂菜汤味+德国香肠味薯片

食薯片味游欧洲又夸张咗少少,但卡乐B最近出咗两款欧洲国家主题嘅口味,意式杂菜汤味咸甜并存,混入多款菜蔬嘅味道,当中以蕃茄味较香;德国香肠味就偏重喺个酱汁,即系芥末酱味多啲,细嗒嗒真啲都会食到微微肉香嘅。

City’super、Sogo - 双人徐  虾酥酸辣宽粉

台湾人气品牌最新推出嘅香港独家口味,虾酥酸辣宽粉最啱一众酸辣粉fans去试。汤底以品牌三代传承秘方制作,酸辣度适中,而且比一般嘅少油。宽粉煮得愈耐就愈软身,建议煮5-10分钟就最理想,索汁力高。而虾酥则利用低温真空技术处理白虾,以低於120度慢炸,口感酥香仲有淡淡鲜味。

星球工坊、诚品太古台湾古早市集-  星球工坊 甘梅地瓜爆谷

品牌每年都会推出一款台式风味嘅爆谷,今年就轮到甘梅地瓜喇。将原味爆谷高温爆炒之後,混搭瓜瓜园台农57号地瓜粉,再撒埋嘉义梅山半熟青梅调味。爆谷香脆,味道酸酸甜甜,初初食到酸嘅爆谷系有少少唔惯,食食下又觉得几过瘾。

各大便利店及超巿 - 好侍通加利粟米筒  海盐云呢嗱味

细细个最锺意插喺手指扮巫婆嘅粟米筒,最新口味有海盐云呢嗱味,打开包装就闻到好大阵甜味。食落还好,咸味先出,甜味後上,亦冇闻落嘅咁甜。

759阿信屋 - 日清  焦糖果仁谷物麦片

唔少人都锺意以谷物麦片配牛奶或者豆奶,有啲咬口得嚟又冇咁寡。继抹茶、士多啤梨等口味之後,品牌再推新口味:焦糖果仁谷物麦片。一倒出嚟已经有浓甜嘅味道扑鼻,不过幸好中间混埋有香脆腰果、杏仁、南瓜籽等,即使整体感觉都系偏甜,但都未至於甜腻。

6月4日更新

各大便利店及超巿 - DREYER'S   士多啤梨脆皮芝士味北海道牛乳雪糕批

DREYER'S最近频频出新味,呢条一啖食到好多种味。首先外层脆皮,系士多啤梨白朱古力,仲有粒粒士多啤梨乾果肉粒,酸酸甜甜;入面系两色雪糕,黄色嗰边系咸咸地嘅芝士味,白色嗰边则系北海道牛乳味,不过奶香味相对就较淡喇,有少少畀其他味盖过咗。

Circle K - Skippy 花生朱古力冬甩雪糕

Skippy花生酱一向有唔少捧场客,过往亦出过几款雪糕都大受好评。今次呢款冬甩造型嘅雪糕,相信同样能获取粉丝们嘅芳心。由韩国直送,外层脆皮系特浓花生朱古力,有粒粒花生碎咬到,入面系Skippy花生酱雪糕,味道都几香浓。食完可能会问,可唔可以食多一甩呀OMG。

7-11、百佳、惠康 - DREYER'S 三色北海道牛乳扭纹脆筒系列

两款新出嘅三色雪糕,都系以日本风味为主题,分别系静冈焙茶北海道牛乳扭纹脆筒,同士多啤梨北海道牛乳扭纹脆筒。前者以静冈产焙茶制成,带有微微烘焙炭香,青绿色嘅甜筒系抹茶味,由头到尾由外到内,啖啖都系茶香;後者使用士多啤梨雪糕味道酸甜中带奶香,脆筒系经典朱古力味。

7-select - 玫瑰味慕丝富士山造型蛋糕

粉蓝色富士山蛋糕造型吸睛,不过虽然系粉蓝色,但原来系玫瑰味呢。外层系啖啖玫瑰花香嘅慕丝,口感软滑,食到中间,仲有流流地心嘅玫瑰花瓣酱,花香味相当突出下。

6月3日更新

台湾最近又爆疫,以前近近地一个weekend就飞得,而家好似遥遥无期咁。有大型超巿就由即日起,至6月16日期间,举办「寻味台湾︰旧滋新味」活动,为大家带嚟各种怀念嘅味道同新品!以下系其中几样精选介绍返。

City’super - 段纯贞  经典红烧牛肉面

嚟香港开咗几间分店嘅段纯贞牛肉面,储落咗唔少粉丝。今次即食包有经典红烧牛肉面,简单加热就可以喺屋企都食到。汤头以牛大骨搭配四川陴县豆瓣酒酿同23种中药材熬煮而成,麻辣甘甜,系大众所能接受嘅辣度。传统细面挂汤力高,口感偏软腍;而牛肉都畀足秤,两大嚿牛腱心,嚼劲十足。

City’super - 星球工坊  秘传老火汤味爆谷

呢个品牌嘅爆谷一向口味多多而又有惊喜,今次同「这一锅皇室秘藏锅物」合作,将台式火锅嘅汤底变做爆谷,一样冇难度。其中一款就系秘传老火汤味,又做得几似喎。入口有阵阵药膳甘香,仲有些微胡椒香气,味道浓郁,值得一试。

City’super -  Simple Kaffa  挂耳式滤泡咖啡

咖啡控留意喇,呢个台湾咖啡品牌嘅共同创办人大有来头,系前台湾及世界咖啡师冠军吴则霖呢。未能亲身去到佢哋喺台湾嘅咖啡店朝圣前,可以先试试挂耳式滤泡咖啡。一盒有三只口味,包括「阿宝综合」、「巫里/水洗」同「极光庄园艺妓/日晒」,极光庄园艺妓中等body,带白花香,酸酸甜甜 。

City’super -   员林仙草甘茶

仙草系台湾嘅传统小食,呢款仙草甘茶系以100%纯天然台湾仙草同百年古法熬制,即开即饮又得,加热或雪冻饮都得,各有风味,阵阵甘香,而且仲选用减糖配方添。

6月1日更新

City’super - Ooh麻辣薯片、麻辣虾片

各位麻辣控attention!唔好错过咗呢款嚟自新加坡首个麻辣零食品牌嘅薯片同虾片,前前後後试过咁多款麻辣零食,呢款真心值得encore。以乾辣椒、花椒、茴香等传统香料制成,麻辣程度同麻辣火锅有得挥,薄切嘅薯片撒满麻辣香料,入口极速就嚟料,啖啖都有麻痹感,後劲重好凌厉。而佢嘅虾片冇薯片咁麻辣,但强度依然比一般嘅麻辣零食劲,而且,喺刺激嘅麻辣味中,渗有阵阵虾鲜香味,辣得嚟又唔舍得停口。

City’super -  Irvins辣味咸蛋虾卷

同样嚟自新加坡嘅零食,Irvins嘅咸蛋薯片大家应该都好熟悉,今次新出嘅系辣味咸蛋虾卷,一条条大约手指咁粗嘅虾卷,入面包住包着香辣虾米,仲撒上咸蛋碎,闪一闪过嘅辣劲中带有微微咸香。

各大便利店及超巿 - 乐事Lays 瑞士芝士、香酥鸡腿味薯片

见到有瑞士芝士味嘅薯片,芝士控可能即刻会好想试,不过要先有心理准备,呢只嘅芝士味唔算好浓郁,淡淡然嘅咸香咁啦。反而香酥鸡腿味波浪薯片有啲惊喜,波浪纹令到口感更脆身,味粉食落又真系有啲似炸鸡髀嘅。

7-11 - 卡乐B SEABROOK 炸鱼薯条、喼汁味薯片

嚟自英国嘅薯片,口味相当特别。Fish and chips都还好,但喼汁……一方面又会好好奇想试,但另一方面又好惊会伏。唔使惊,开饭仔即刻同大家试。一大包薯片拆开入面,原来系有6包细包装。两款都系波浪纹薄切嘅薯片,炸鱼薯条味嗒真啲,系有微微鱼鲜香嘅;至於喼汁,哈哈,强劲嘅酸涩味,食到要眯一眯眼,都系一个有趣嘅经验嚟嘅。

5月28日更新

各大便利店及超巿 - 乐事Lay’s  九州紫菜味薯片

呢款紫菜味薯片试得过呀,每块薯片都沾上以低温岩烧嘅海苔细粉,脆卜卜,紫菜味够晒香口。5粒星满分嚟讲佢至少有4粒。

各大便利店及超巿 - 品客 紫菜味嘅薯片

无独有偶,薯片叔叔都新出咗两款紫菜味嘅薯片:浓厚灸烧海苔、浓厚劲辣海苔。一拎出嚟成块都系密密麻麻布满海苔粉嘅样,原来喺制作时已经将海苔粉搓入面粉团,倒模印制做薯片後又再沾过第二层海苔粉,怪唔得食落有阵阵燻香海苔香味。至於「劲辣」嗰款,唔好畀个名吓亲,唔系好辣架咋,好轻微喺喉咙度辣一辣咁。 

5月26日更新

7-11 - SMORE烤棉花糖挞

挂住日本嘅朋友仔,便利店又有日本手信返货喇!S'MORE 烤棉花糖挞,虽然只系得原味,但都够晒止瘾。挞皮酥脆,有层朱古力上面再放埋棉花糖,开封就咁即食当然冇问题,但更推荐嘅食法系开封後,可以放入微波炉加热5秒。咁嘅话,成个挞除咗变得暖暖地之外,棉花糖仲拉到丝,系邪恶架喇,so what?!好食啲、甜啲嘛。

各大便利店及超巿 - OREO  春季限定口味

望住呢两款新出嘅包装,有冇一丝谂起日本?而且冇食开嘅Oreo咁甜啊。如果系粉丝嘅话可能会记得上年出咗只樱花抹茶味,今年就转咗做樱花草莓味,有用到真‧士多啤梨制作,甜得嚟带莓酸;至於以竹林为灵感嘅酸甜青梅味,系史上第一款绿色嘅Oreo呢,对比下酸味较重。

各大便利店及超巿 - 可口可乐咖啡汽水

「汽水樽里的咖啡」唔再只系一首歌,可口可乐真系推出咗咖啡味!以纯正巴西咖啡豆调制,无糖兼零卡路里,唔使怕肥仔。两款口味包括焦糖味同朱古力味,後者可乐味依然突出,渗有阵阵烘焙咖啡豆香,朱古力味就相对淡身少少,唔系太饮得出。

7-11 - 珍宝珠  碳酸汽水系列

珍宝珠出咗碳酸汽水系列,唔再系传统成粒圆波波咁样,变咗做一杯杯汽水,造型可爱。味道包括热带特饮、可乐味同橙汁味,啜住嚟「饮」嘅汽水,味道像真,连有汽嘅感觉都有!

5月14日更新

7-11  - 7-SELECT x伊藤久右卫门抹茶甜品系列

喺便利店搵甜品唔再系去日本先有嘅专利,香港都得。7仔最近联乘嚟自京都宇治,专营宇治抹茶业务嘅伊藤久右卫门,再度推出以宇治抹茶为主题嘅甜品!全部都系由日本直送。

 宇治抹茶忌廉瑞士卷

采用100%日本面粉制成嘅瑞士卷,口感软滑,淡淡抹茶香。早餐或者下午茶食一条都唔错。

 宇治抹茶千层蛋糕

平价版嘅抹茶千层蛋糕,抹茶忌廉同可丽饼皮层层相间,轻轻带出茶香,系啲饼皮略嫌厚咗少少,影响咗口感。

 宇治抹茶忌廉

泡芙口感软熟,入面嘅抹茶忌廉以独家配方制成,甘香浓郁,系咁多款抹茶甜品中最出色嘅一款。

 宇治抹茶忌廉红豆瑞士卷

呢个卷蛋嘅抹茶蛋糕都松软嘅,中间夹住嘅宇治抹茶忌廉亦算软滑,甜甜地好creamy,面头再加咗几粒红豆做点缀,不过如果多多几粒会开心啲。

 宇治抹茶蜜瓜包

选用伊藤久右卫门宇治抹茶粉同日本面粉制作嘅蜜瓜包,以日式烘焙技术制成,曲奇皮层微甜,但抹茶味就唔算突出。

5月3日更新

各大便利店及超巿 - Lays  地道口味系列

呢期啲薯片,咁啱大家都系吹紧港风,两大品牌推出嘅新口味,都系香港嘅地道味道。好多人去大排档或者酒楼都锺意叫嘅椒盐鲜鱿,就系其中一款。大波浪形嘅薯片,零舍脆口,而且椒盐味够晒浓香惹味,直情好似真系食紧道小炒咁。至於另一款系咖喱牛腩味,一打开包装,已经闻到好浓郁嘅咖喱味,入口一样浓味。两款嘅辣劲都唔可以睇少,会喺喉咙度慢慢辣返出嚟呢。

各大便利店及超巿 - 卡乐B   香港地道口味系列

去茶记食沙嗲牛肉面就多,变咗做薯片又会系咩味?V-Cut形嘅薯片,香脆嘅,但可惜同想像中嘅沙嗲牛味有些少差距,你会食到微微肉香,好似有少少花生味……而瑞士鸡翼味则系熟悉嘅甜酱汁味道,二者比较下会推介呢款多啲。还原度最高嘅系生炒排骨味粟一烧,酸酸甜甜。

4月30日更新

各大便利店及超巿 - 日清湖池屋   土匪鸡翼/麻辣猪耳味薯片

好多人都系谭仔同三哥粉丝,日清湖池屋继早前同佢哋联乘合作,出过两款汤底口味嘅薯片之後,最近又有新合作啦,轮到经典小食口味。几乎系每次必食嘅土匪鸡翼变咗做薯片,孜然香味依然冇减过,食到阵阵秘制香料味道;至於麻辣猪耳味,则以三小辣做指标,初初食嗰阵觉得辣感好轻微,不过食食下发现余韵都几长。

宽巷子    即食麻辣鸭血

每次食台式火锅,麻辣汤底入面嘅鸭血都系精髓,总系加完再加。呢间台式火锅店最近新推即食麻辣鸭血,等大家喺屋企都可以一解心瘾。加入灯笼椒、红花椒、绿花椒、朝天椒等炮制汤底,倒入锅滚又得,放入微波炉加热即食都得,够晒方便。不过麻辣香味较淡,平时想食但又怕辣嘅朋友仔就好啱,但就可能未必满足到食得好辣嘅朋友仔喇。

Le Fromage by Ma 手工纯素芝士

纯素、生机饮食成为近期饮食界嘅热潮,有间新开业嘅手工纯素芝士专门店,有超过廿款不含任何奶制品嘅纯素芝士选择,包括烟燻车打芝士、素卡芒贝尔芝士、粉红胡椒布里芝士、竹炭芝麻海盐芝士等,口感各有不同,有啲软绵啲,有啲滑身啲,用嚟配衬生酮面包或者饼乾都几唔错。另外推介佢哋嘅罐装芝士酱,软滑香口。

4月20日更新

Circle K - 珍珍薯片   青花椒味薯片 X  少爷啤酒   青花椒味啤酒「麻麻地」

薯片同啤酒一向都系绝配,两大本地品牌,珍珍薯片同少爷啤酒一拍即合,齐齐最新推出青花椒味嘅啤酒同薯片!青花椒味嘅薯片,除咗微辣之外仲带有柠檬花香,不过重点当然系「麻」啦,後劲十足,食完一阵条脷都重系麻麻地。呢个时候,再饮多啖用上新鲜青花椒酿制嘅青花椒味啤酒,嗰阵麻嘅後劲就更加刺激过瘾。而呢款精酿啤酒本身口感好清爽,一啲都唔系「麻麻地」啊。

百佳超级市场、FUSION、TASTE - 珍珍薯片   黑松露味薯片

所有加入松露嘅食物,都会即刻变得香咗。薯片当然都唔例外啦,每块薯片都沾满咗黑松露味嘅调味粉,无论闻定食都有淡淡嘅香味。

Magi Planet(网店+实体店) - 星球工坊   青花椒麻爆谷

香港人锺意食麻辣嘢,就连零食都愈出愈多麻辣口味。无独有偶,呢间人气爆谷店最新嘅爆谷口味都系青花椒麻味!佢哋选用四川九叶青花椒,再配搭椒麻粉、辣椒粉等同爆谷一齐炒香,阵阵麻香迅速就喺口中爆发,收尾有少少甜香,而佢嘅麻痹感留得都几耐下。

各大便利店及超巿 - Haagen Dazs   果漾脆皮雪糕批系列

各位哈根大师嘅粉丝,又有新味要试啦,佢哋呢排出咗咁多款,唔知你哋食唔食得切呢?今次系果漾脆皮雪糕批系列,全部嘅脆皮都系粉红色,就咁睇完全估唔到竟然系芒果同哈蜜瓜口味!芒果脆皮雪糕批外层有粒粒士多啤梨粒,雪糕混合埋热带芒果果粒同果蓉,酸甜有致;哈密瓜脆皮雪糕批嘅外层则系红桑子味,哈蜜瓜雪糕有清甜嘅果香;而最清新嘅就系红桑子脆皮雪糕批,外层有真‧红桑子乾果肉粒,入面嘅雪糕亦混入红桑子果酱,由外到内到返外都系阵阵酸感。

4月12日更新

各大便利店及超巿 - DREYER’S  粟米脆皮北海道牛乳雪糕批

今次呢款雪糕有啲新意同惊喜呀,灵感嚟自日本街头嘅粟米浓汤。粟米脆皮北海道牛乳雪糕批,淡黄色嘅外层系白朱古力脆皮配粟米粒,又甜又脆。入面系双色雪糕,分别系北海道牛乳雪糕同粟米味雪糕,粟米味够香甜啊。

各大便利店及超巿 -  卡乐B   「重口味」版人气口味

烧烤、Pizza同热浪三款口味,一向都系卡乐B嘅人气王,而家呢3款口味都推出咗「重口味」版本呀,加重咗料,比往时食开嘅味道更浓郁。热浪嗰只重用埋V-cut厚切薯片,愈食愈辣,忠粉必试。而香辣蕃茄味虾条则系期间限定口味,酸酸甜甜,又有微微辛辣。

各大便利店及超巿 -  Oreo  一口威化

Oreo又有新搞作,推出一口威化,一啖一粒。两款口味分别系云呢嗱牛奶同榛子朱古力,夹心松脆,又冇平时啲oreo咁甜,不过前者嘅奶味略为重咗少少。

各大便利店及超巿 -  BE-KIND 乳酪坚果棒

成日都口痕想食零食嘅,最好梗系搵啲健康啲啲嘅零食啦。呢款坚果棒唔错,高纤又饱肚。两款新口味有车厘子奇亚籽同蔓越莓玫瑰乳酪坚果棒,都系以52%坚果融合法国乳酪粉嘅白朱古力,加埋蜂蜜制作,甜中带微酸。

4月1日更新

铜锣湾Pop up店、city'super、LOG-ON、TASTE - Chocolatory®  朱古力

以前每次去日本,都好锺意喺机场买唔同嘅KITKAT口味做手信,特别系高级系列嘅Chocolatory®  朱古力。估唔到而家飞唔到过去,但啲朱古力就飞咗过嚟,首次喺香港开pop up店呀,开心~ 仲带嚟4大系列共14款口味。

「Origin系列」系使用喺火山岛上培植嘅稀有可可豆,包括有瓦努阿图马拉库拉岛火山、巴布亚新畿内亚卡尔卡尔岛火山、菲律宾棉兰老岛火山朱古力,有啲酸辣甘苦,有啲带有清新果香。「Combination系列」则系combine咗朱古力同水果或者茶叶,6款味道包括柚子味、热情果味、黑加仑子味、覆盆子味、士多啤梨味同抹茶味。特别推介柚子同热情果味啊,酸度强劲,刺激味蕾。

「Type系列」就有甘苦朱古力、牛奶朱古力、红宝石朱古力同白朱古力4款,其中红宝石嗰款系嘅粉红色,系提炼自天然可可豆,有种高贵嘅感觉,食落莓果酸香味重。最後就系「Process系列」,使用比平时更低温嘅烘培方式嚟烘烤可可,将可可豆原生嘅自然风味完全咁散发出嚟,甘苦度高但可可豆香极浓。

Pop Up店详情
地址: 香港铜锣湾恩平道54号
期间限定:即日至5月2日

各大便利店+超巿  -  乐事  泰式风味系列薯片

好多人都锺意嘅Lay薯片,最新出咗4只泰式风味,都系由泰菜演变而成嘅。泰国常见嘅香料罗勒,配埋波浪形,制成甜罗勒味波浪薯片;泰国东北火锅味薯片就扮住打泰式边炉先啦:泰式海盐牛油蒜香薯片微咸鲜香,蒜蓉味重;泰式香辣青柠味薯片就最有泰国风味,香辣酸甜都齐晒,层次丰富。
 

各大便利店+超巿  -  麒麟一番搾  樱花季节版啤酒

今年去唔到日本赏樱,饮住樱花罐嘅啤酒先啦!呢个日本热卖啤酒品牌最近换上樱花罐身,啤酒就依然泡沫丰盈,味道清爽顺口好易饮。而且仲可以换购一系列樱花主题礼品,包括和风樱花啤酒杯(19/3超级市场有售指定套装)、和风樱花玻璃樽(31/3至13/4於7-Eleven便利店购买麒麟啤酒满$25或以上加HK$16换购),同和风樱花毛巾(1/4至14/4於Circle-K便利店购买麒麟啤酒满$25或以上加HK$16换购)!
 

Pret A Manger - 有机咖啡系列

Pret最近引入全新有机咖啡系列,精选产自秘鲁、洪都拉斯、苏门答腊及埃塞俄比亚嘅咖啡豆拼配而成。想自己冲嘅话可以买佢哋嘅咖啡豆同研磨咖啡,例如有机经典研磨咖啡嘅风味平衡,可以同时品尝到坚果香同少少果酸味,带焦糖同朱古力嘅苦甜香。各间分店亦有多款咖啡饮品供应。
 

3月26日更新

7-11 - 珍珍   北京填鸭味薯片

珍珍近年推出咗多款中菜口味嘅薯片,最新嘅有紫色sharp醒包装嘅北京填鸭味。用自家制甜面酱,加特有秘方,整出嚟又的确系有啲似填鸭酱味,甜甜地。

各大便利店及超巿 - 卡乐B   大人版帆立贝牛油味薯片

一打开包装就闻到好劲嘅牛油味啦,食落咸香之中,又带有淡淡嘅鲜味,一块一块好快就食晒。

各大便利店及超巿 -卡乐B   朱古力海盐焦糖味薯片

薯片加朱古力,两样都系邪恶嘅零食,平时夜晚睇波或者口痕,总系唔少得呢两样。而家佢哋合体啦,仲加埋海盐焦糖做队友,啖啖都超香甜。

7-11 Perrier x 村上隆   法国巴黎纯天然有气矿泉水

香港应该都有唔少村上隆嘅fans,佢哋今次联乘Perrier推出特别版花花罐装,激靓呀!而且只系$14,门槛咁低,粉丝要买多几罐好好收藏喇!

各大便利店及超巿 - NESCAFÉ   招财猫限定版香滑咖啡

储罐迷又可以有新目标啦~ NESCAFÉ®同日本京都知名设计品牌SOU・SOU合作,推出咗一系列共8款嘅招财猫限定版香滑罐装咖啡,以唔同日常场景为灵感,例如有学生有打工仔有电竞达人等,实行为各行各业嘅朋友仔打打气!同时仲推出咗多款限量生活小物,包括收纳式环保袋、雨伞、洗面毛巾同随身袋等,全部都好cute cute!

3月22日更新

各大便利店+超巿 - Haagen Dazs – Cocktail Collection

哈根大师真系好勤力,成日都出新味,最新嘅有三款夏日特调鸡尾酒口味,包括Lime Mojito 雪菓、Pina Colada 雪糕同埋Strawberry Daiquiri脆皮雪糕批。放心,唔使怕醉,三款都系加咗冧酒嘅,酒精少过1%。Lime Mojito雪菓采用墨西哥同巴西嘅青柠,加入薄荷酱,酸甜清新,系几似Mojito呀真系。Piña Colada雪糕就当然系椰子同菠萝啦,有惊喜呀呢杯,用埋椰肉制成椰丝洒喺面,增加口感。Strawberry Daiquiri脆皮雪糕批除咗有士多啤梨之外,仲加入咗青柠汁同白冧酒,外层嘅士多啤梨白朱古力脆皮系重点,够晒甜啊。

7-11 - Green Common  纯素冰冻甜点

主力推广素食嘅Green Common,最近连雪糕都出埋!无奶冰冻甜点系列采用 100%纯植物奶制成,以椰奶同坚果奶做基底,而且低卡路里、含0毫克胆固醇和0克反式脂肪,唔止素食朋友啱食,就连怕肥嘅朋友都OK呢。两款口味分别系醇之抹茶味同朱古力味,前者味道甘香,後者甜身带有奶油糖同椰香味。

3月18日更新

APM、铜锣湾Sogo - Tokyo Banana

以前去亲日本都会买返嚟做手信嘅香蕉吉士蛋糕,而家香港都买到喇,仲特意为咗今次嘅登陆,研发咗全新低温冷冻版本,仲可以保存耐啲冇咁快到期添。经典原味香蕉蛋糕冻食又得常温食又得,蛋糕软绵,冻食嘅话啲吉士仲会有啲似雪条咁嘅口感,爽呢。

牛奶香蕉朱古力味夹心曲奇外层轻薄酥脆,夹住一层香蕉味嘅牛奶朱古力,甜度较高。

限定店同时带嚟姊妹品牌Sugar Butter Tree 同镰仓五郎本店嘅手信。嚐甜嘅朋友仔一定会锺意埋白朱古力奶油砂糖夹心脆饼,以7种混合谷物制成麦香饼,涂上牛油同砂糖後再烘焙,夹埋白朱古力夹心,香甜酥脆,仲有粒粒砂糖嘅口感食到。

半月型嘅薄脆煎饼,系镰仓嘅传统小食。饼上压有兔仔图案,两种口味分别系红豆同抹茶,都系薄薄一层嘅香滑忌廉夹喺中间,一款微甜一款清香。温提一下限定店会分别做到4月20(铜锣湾)同30号(观塘)。

3月10日更新

DON DON DONKI   - 日清x DON DON DONKI  粟米浓汤味薯条

粟米浓汤味系好多人嘅飞佛,无论配落罐装热汤,定系香脆零食,嗰阵独有嘅甜香味道都令人食过番寻味。今次配落薯条度当然都唔例外啦,薯条系细细条幼身款,够晒脆口,味道香甜,得一细包仔未必够喉啊。但设计就好方便,可以喺角落前个细口,直接倒入口食都得。

DON DON DONKI   - 日清   果物谷物麦片 (士多啤梨酱味)

锺意食谷物麦片做早餐嘅朋友仔,有新选择啦~ 日清新出咗香甜嘅士多啤梨味谷物麦片,有粒粒脆球,仲有细片乾果,味道酸酸甜甜,几醒神。就咁当零食啪又得,加入牛奶、豆奶或者乳酪等一齐食都得,好多变化,唔怕闷啊。

各大便利店+超巿 - 好侍   通加利粟米筒花生酱味

细细个好锺意拎嚟扮女巫手指嘅粟米筒,有新味啊!系花生酱呢~ 老实讲第一眼见到系会bling bling眼,不过可惜食落花生酱味又唔算好突出,少许失望。

7-11  - Luke’s Organic  纯素白松露薯片

食得薯片都预咗系唔健康架喇… 但系呢只系天然有机纯素嘅,不含反式脂肪,无麸质,好似罪恶感冇咁大。白松露味好香啊,食完都仲有余香喺度。

各大便利店+超巿  - 卡乐B  台式牛肉面味粟一烧

打开包装,即刻成阵汤底味涌出嚟呀,不过食落就冇想像中咁浓,所以唔会话好咸。锺情台式牛肉面嘅朋友仔都可以试下。

7-11 - ORION   麻糬朱古力批红豆忌廉味

又有韩国零食啦~ 虽然冇得飞,但好彩零食方面都追得好贴,韩国嗰边出完冇耐我哋都有得食到啦。呢只麻糬朱古力批中间夹住薄薄一层嘅红豆蓉忌廉,不过都几甜下。

各大便利店+超巿  -  北川半兵卫商店伝说  荔枝乌龙茶/柚子乌龙茶

呢个品牌嘅茶饮一向都颇受欢迎,茶味温和香醇嘛。新出呢两款果茶口味,柚子就当然清新啦,荔枝嗰款就有啖啖甜香,都几啱而家呢啲咁闷热嘅天气饮。

3月8日更新

7-11  - PABLO限定甜品

挂住日本嘅味道嘅话,可以去便利店行个圈呀。7仔最近联乘日本半熟芝士挞品牌PABLO推出一系列期间限定芝士甜品。

最吸睛嘅一定系好似平时睇卡通见到嗰啲芝士咁嘅蛋糕啦,造型满分。不过食落就冇预期中咁浓郁嘅芝士香,反而有阵阵芒果嘅甜香,原来系芝士芒果味慕丝蛋糕嚟,口感仲好软滑。

瑞士卷有两款,一款系简单啲嘅芝士忌廉瑞士卷,另一款系杏脯啫喱芝士忌廉瑞士卷。前者就咁睇落同普通卷蛋冇咩分别,但食落就几有惊喜,除咗有蛋香,仲混和咗阵阵芝士嘅咸香;至於後者则多咗层酸酸甜甜嘅果酱,中和腻感。

同样都有杏脯啫喱嘅,仲有杏脯啫喱芝士忌廉泡芙,泡芙系软熟嗰type,有空气感。喺淡淡嘅芝士忌廉中间夹埋咗酸甜杏脯酱。

3月4日更新

7-11  - TAVOLA   纯素米饼

今星期多咗一堆纯素零食,其中呢只米饼,无麸质、无燕麦无粟米成分,经过两次烘焙之後,口感好松脆,两款口味分别系黑胡椒味同蕃茄罗勒味,前者胡椒味重,连续食几块就有啲咸,後者淡淡酸香就好啲。

7-11  - Tempe King  纯素天贝脆片

天贝片系印尼嘅传统食品,黄豆经过天然发酵再加红甜椒粉调味,不过唔使听到椒就即刻觉得好辣,试咗再讲。唔多辣嘅,反而仲有少少咸咸地甜甜地咁,口感较硬身。

7-11  - Simply 7   纯素脆片/脆条

唔是薯片,但同薯片一样咁脆口嘅呢几款纯素脆片/脆条,分别系羽衣甘蓝脆片 (刁草味)、扁豆片 (墨西哥辣椒味)同藜麦扭扭脆条,几款口味都系有好多纤维嘅。羽衣甘蓝嗰只嘅草青味比较重,而扁豆片呢就辣中带咸,至於藜麦嗰款,则系相对上最淡味嘅。

7-11  - East Bali Cashews 纯素腰果

呢两包腰果细细包,以天然海盐同椰子油调味,口痕嗰阵一粒一粒咁啪,眨下眼就食晒。不论系香脆海盐味定香脆可可朱古力味都各有特色。

7-11  -味丹随缘    纯素杯面

就连杯面都有纯素版,有汤面有乾捞面,素食朋友仔以後想速食就有更多选择喇。几款新推出嘅口味包括有热浪岛泰式酸辣汤面、鲜蔬百汇汤面、椎茸之味杯面、麻婆豆腐汤面、香椿素炸酱乾面、麻酱辣腐乳乾面等。建议调味粉落半包好喇,落晒都几重口味。

7-11  - Green Common纯素炖汤

想饮汤但又未必有时间自己慢慢熬嘅话,呢几盒汤包就啱晒,就咁放入热水加热又得,放入微波炉整热都得,够晒方便。口味包括有莲藕核桃栗子炖素汤、佛手瓜无花果眉豆百合炖素汤、牛蒡五行蔬菜三色藜麦粥、*南北杏莲子腐竹薏仁炖素汤、*牛肝菌舞茸百合炖素汤同埋*哈蜜瓜鲜淮山莲子炖素汤。  (**产品只系得港威商场内间7仔有得卖咋留意返)

3月2日更新

各大便利店及超市 - 雀巢 DRUMSTICK 薄荷朱古力脆筒


天气越嚟越热,品牌就出咗呢款薄荷朱古力脆筒同大家迎接初夏!打开包装就咁睇可能会以为得薄荷味雪糕,其实咬开里面系薄荷味雪糕同朱古力雪糕扭纹呀,薄荷雪糕口感清凉,朱古力雪糕就味道较甜。甜筒底仲有朱古力酱,口感丰富。单支装於各大便利店陆续发售,家庭装就会由惠康超级市场优先发售。
 

7-11   乐天  朱古力雪糕批

当朱古力bar、朱古力豆等零食通通都可以变成雪糕时,点解百力滋唔得?韩国大热PEPERO 百力滋用例子证明系wok嘅。新出嘅两款口味,花生朱古力雪糕批,同杏仁朱古力雪糕批,都系粗版百力滋造型,外层系特浓朱古力脆皮,并按口味分别加埋花生碎粒同杏仁碎粒,入面就系云呢嗱雪糕,配合起嚟有多重口感又唔会太甜,後者仲有淡淡果仁香添。

2月26日更新

一步、Kappening 、CAVE Beer Point、网购 - 琲月 Moffe‧on   

咖啡控,attention!又有一个新嘅本地咖啡品牌啦,琲月有多款嚟自世界唔同各地嘅咖啡豆选择,无论系新鲜自家烘焙咖啡豆,定系咖啡挂耳包都会耐唔耐就有新款返,就算日日饮啡嘅朋友,都可以日日唔同风味。例如前排有橙香同云呢嗱风味嘅埃塞罗比亚咖啡挂耳包,或者系带有水果甜、室温饮酸味又会突出少少嘅危地马拉咖啡挂耳包,整体苦涩度低。喺office冲嚟饮都好方便,而且质素几高啊。(更多销售点留意佢哋网站更新)

各大便利店及超市 - 雀巢ACTI-V   希腊式乳酪饮品

希腊乳酪比普通乳酪嘅蛋白质较高而糖分较少,所以好受玩开运动健身或者追求健康嘅朋友仔欢迎。呢款全新希腊式乳酪饮品喺香港制造,含有益生菌、蛋白质,不含防腐剂,口感浓稠,奶味香浓,早餐饮返支都唔错啊。

7-11 - HERSHEY'S  朱古力麻糬曲奇

知道大家挂住韩国零食,早前HERSHEY'S喺韩国嗰边出咗呢款朱古力麻糬曲奇,加咗品牌朱古力粒粒,内馅系烟韧嘅麻糬,不过好多粉丝就只得个望字,望住个mon啲相就当自己食咗。但而家香港都有得卖啦!

7-11/Green Common - OmniEat   即食便当、点心

素食嘅朋友有时想贪方便,落便利店买个饭盒,而家都有选择啦。7仔独家发售两款主食,包括黑椒新肉丝意粉 、芝麻烧汁新肉丝米线,都系用咗OmniPork Strip新肉丝,调味唔错,几有茶记风味,但略嫌油腻咗少少。
另外,想食light少少嘅有两款素肉点心,新猪肉烧卖同新猪肉鲜蔬水晶饺,前者嘅烧卖皮以天然姜黄去调色,入口有淡淡菇香,另外仲有OmniPork新猪肉同马蹄等馅料;後者则包住咗6款鲜蔬,例如蘑菇、粟米笋、甘笋等,适合食得比较清淡嘅朋友。

2月23日更新

7-11 -  雀巢 x KIT KAT脆皮雪糕批

大家都好熟悉嘅KIT KAT变咗做雪糕批呀,沿用经典红啡包装,喺雪糕柜中特别抢眼!外层嘅朱古力脆皮,有粒粒大大粒嘅KIT KAT朱古力威化碎,口感就同平时食朱古力一样咁脆,而且甜度仲略为低少少,几有惊喜。

7-11 -  Clédor  芝士蛋糕雪糕

韩国人气品牌Binggrae 新出Premium 系列,分别有朱古力芝士蛋糕雪糕同红丝绒芝士蛋糕雪糕两款口味,两款中间都有粒粒芝士蛋糕碎,前者另外加入咗榛子朱古力酱,算几浓甜,後者则加咗士多啤梨酱,淡淡酸甜。不过讲真,虽然有成粒芝士咬到,但芝士味就唔算超重,轻轻刷下存在感咁。

2月19日更新

网购平台  -  What The Soup  自家汤品

想皮肤靓靓,几时都需要汤水滋润。最近有个新推出嘅本地自家汤品品牌,有多款汤水口味,由注册营养师计晒卡路里,款款足料得嚟又高纤低卡,不含防腐剂、人造色素、味精、鸡粉及添加剂,连埋包装一齐加热,几分钟就饮得,够晒方便。其中,港式罗宋汤嘅牛骨汤底,加入咗大量牛骨同牛腩熬制;羽衣甘蓝白豆汤咁,就有大量嘅新鲜蔬菜;锺意菇香嘅朋友仔实会锺意牛肝菌蘑菇汤,菇香四溢,口感浓稠仲啖啖有嚼口。

Grozla - Eatmate  韩国鸡胸肉

对於各位想健身或塑身嘅朋友仔,蛋白质丰富嘅鸡胸肉可以话系佢哋嘅主要食粮。不过餐餐都鸡胸肉,又韧又寡,食多几餐都只可以靠意志去坚持。而家有救星啦~ 有平台引入全新韩国鸡胸肉品牌,多款加入鸡胸肉制成嘅食品,好似小笼包、热狗同炒饭等,仲有多款口味,有啲更可用气炸锅处理,够晒方便。

鸡胸肉小笼包有原味、泡菜味、烧肋骨味、辣海鲜汤味,皮虽然厚咗少少,但咬开肉汁满满。

软滑鸡胸有原味、蒜味同胡椒味,比起平时就咁白烚鸡胸,有风味得多,啲肉质仲好嫩滑。

韩国热狗喺街头大行其道,健身版一样有韩式鸡胸肉热狗。以面粉、面包糠、烤糙米粉等材料制成外层,包住入面一条鸡胸肉肠,有烟燻味同辣味选择。放入气炸锅或微波炉整都得。口感微微脆,小辣。

营养炒饭拼鸡胸肉肠以韩国白米同多种蔬菜合成,低卡路里,炒饭唔会太乾,3款口味包括烟燻味、蒜味、辣味,不过对比以上几款食物,炒饭嘅味就相对淡啲。

2月10日更新

Food Benefit网上商店 - Mr. Lee  健康杯面 / 即食粥

有时贪快贪方便,又或者夜麻麻想搵宵夜食,都会快手渌个杯面顶肚。但个个都知杯面本身高油高钠又高卡,食得多冇乜益。最新引入嘅英国品牌,低糖低钠低卡仲冇加味精同添加剂等,可以话算系比较健康嘅杯面。佢哋以越南白米制嘅低卡河粉做base,配搭多款具亚洲风味嘅汤底,例奴椰香鸡肉喇沙、蔬菜清鸡汤同五香牛腩汤等,食嗰阵记得要插到底揽匀先好食啊,每款嘅味都几浓下。

而除咗健康杯面,仲有即食粥品,有原味有蘑菇鸡肉味。用白米加3种谷物制作,加热水3分钟就食得,方便到一个点。

各大超巿 - 公仔点心面   红烧牛肉味

继同Hello Kitty联乘之後,今次轮到布甸狗啦~ 口味系红烧牛肉味,汤底有浓浓嘅牛肉香甜味。不过为咗布甸狗而买嘅粉丝要有定心理准备,只系得盒身只西部牛仔布甸狗咋,开封後入面冇架。

7-11 - 无双  酸辣粉

又有新嘅辣杯面啦~ 不论你系锺意酸辣定麻辣,都有得拣。浓郁惹味,辣劲凌厉,愈辣愈上瘾呢。冬天都可能会食到流汗啊科科!

Feather and Bone - Lekker Stuff CBD

近期卷起一阵CBD热,不论咖啡、啤酒定系朱古力等,都好兴加入CBD大麻二酚嘅成分。唔使惊纯CBD大麻二酚系合法嘅,同传统认知嘅危险药物——THC四氢大麻酚系唔同嘅。CBD大麻二酚具抗氧化、保护同舒缓神经等功效。有品牌推出嘅纯素朱古力,每份注入10克,由南非人手配制嘅CBS大麻二酚萃取物,食落同一般朱古力冇分别,都系微甘带甜。另外仲有只CBD油,按时按量食嘅话更有效抗压镇静,改善睡眠质素等。呢只油可以滴落清水度一齐服用又得,滴落牛奶或咖啡度都得。

Circle K、百佳 - 雀巢   鹰唛红豆奶条

情人节就是要来点粉红!呢款炼奶红豆雪条采用北海道十胜红豆制成红豆酱,豆香清甜,炼奶甜香十足,成条就系甜嘅感觉。

7-11 - Pocky    心形樱桃饼乾条

呢个2月份预咗要不停被闪盲吧,连百力滋都要出心心版!情人节限定嘅樱桃味百力滋,食落就微微甜,不过每条嘅底部都系粉红色心心,就绝对可以补充甜度啦。

7-11 - 粉红火箭炒年糕拉面  原味

呢盒100%韩国制造嘅韩式风味年糕拉面,外表粉红,内里火红!年糕口感烟韧,酱料甜甜地但辣度十足,一啲都唔可以睇少,怕辣嘅朋友记得唔好落晒成包粉啊。

7-11 - 乐天  棉花糖味碳酸饮料

好多人都锺意饮忌廉沟鲜奶,呢只都系架,不过系为咗情人节而特地推出嘅粉红色棉花糖版,甜到漏,少女心一路饮一路要爆发啦。

1月21日更新

Circle K   少爷啤 x 甄沾记   椰子啤酒

本地酒厂少爷啤一向都同好多唔同品牌玩crossover,今次就联乘本地老字号甄沾记一齐出咗两款椰子啤酒。红色罐嘅系椰子斑兰啤,闻落去有好香甜嘅椰子味,饮落就有微微甜啦,带有清爽嘅果香同阵阵斑兰叶香;蓝色嗰罐则系椰子花生黑啤,除咗有黑啤常有嘅可可、咖啡等香气外,都有淡淡椰子同花生香,口感就偏薄身。过几日(25/1)仲会有限量版嘅贺年礼盒套装卖添。

7-11 独家   Godiva  醇享朱古力系列

今次呢4款口味都好吸引呢,分别系72% 黑朱古力、海盐黑朱古力、烤杏仁黑朱古力同牛奶朱古力,全部细细盒,一盒8条。除咗牛奶朱古力嗰盒相对比輆甜啲之外,其余3盒都带有微甘,各有唔同口感。

7-11 Lotte  酒心朱古力

食呢粒朱古力记得要一啖摆晒落口,因为中间嘅酒心都几流心啊,咬开一半嘅话分分钟流泻咗。佢混和咗牛奶、白兰地同咖啡,食落嘅咖啡味好香,又渗透住阵阵酒香,几好食。

7-11 FUJIYA   酒心朱古力

呢只酒心朱古力,完全系另一种味道嚟。呢只带有柑橘香气,微微酸,带少少甘苦。

Smarties  纽纽朱古力袋装

细细个食到大嘅聪明豆,新装由英国直送。3款口味包括白朱古力、牛奶朱古力同橙味朱古力。几粒脆口朱古力豆连埋香浓嘅朱古力,甜度爆灯。

1月13日更新

卡乐B   薯条

今次呢款薯条,用咗美国嘅Russet薯仔制作,每条都好粗壮,口感当然实净啲,又脆口啲。两款新口味包括海盐与醋味,同烟肉芝士味,前者喺突出嘅薯味中渗出阵阵醋酸,後者则系熟悉嘅经典咸香感觉,好易食到停唔到口。

品客薯片 期间限定口味

薯片叔叔都好勤力出新口味,一向都人气嘅洋葱味薯片,今次加咗3位浓度!虽然开饭仔分唔到系咪真系浓咗3倍,但总之佢个洋葱味真系好浓好浓啊,好似放咗成条洋葱入口咁,重口味朋友仔会好锺意。另外两款期间限定分别系义大利起司四重奏同四川宫保鸡丁味,前者味道相对较淡,而鸡丁个酱味都算突出,有啲啲辣咁啦。

Neonotic Brews    精酿Cider

大部分女生都锺意饮啲果香味重啲嘅啤酒,cider就啱晒喇。呢间酒厂有多款精酿cider,除咗大家最熟悉嘅apple cider之外,仲有柠茶cider同桃味cider等。其中apple cider系以几个唔同品种嘅苹果汁沟出嚟制作,味道香甜仲带有啲热带菠萝同芒果嘅香气。柠茶嗰只几清新,Just Peachy呢(即系桃味) 系限定款式嚟,都几fruity。顺带一提,常设款嘅酒标经过精心设计,放咗好多唔同嘅彩蛋元素落去,几款樽嘅场景仲可以连埋一齐睇嘅添~

明治 抹茶朱古力

呢两款抹茶朱古力都几甜下,但甜得嚟又带住抹茶嘅甘涩,抹茶控都乭以试下。开饭仔就比较推介有杏仁嗰款,口感丰富啲。不过如果锺意奶香味多啲嘅朋友,就可以拣方块形嗰款抹茶朱古力。



文:Kar
相、片:Tom Li


关键字
零食速报
精酿啤酒
薯片
薯条
朱古力
雪糕
饮食潮流
开饭仔为大家发掘香港这个美食之都的最新美食资讯,分享饮食潮流文化。
本月热门
【2021生日优惠】持续更新!10月寿星半价叹自助晚餐/免费放题
2021-09-30
【随时更新】零食速报 每周新款零食、酒品点评
6天前
4间大闸蟹食店集合!米芝莲食府大闸蟹宴+最平$368任食大闸蟹
2021-10-06
9月份好评餐厅十强
2021-10-08
初秋甜蜜蜜!10月份下午茶提案
2021-10-07