【随时更新】零食速报 每周新款零食、酒品点评
1天前

各大品牌同便利店成日都出新款零食,就算作为定期会去巡舖、入货嘅专业零食控,都未必试得到咁多款,有时又会惊中伏而却步。到底边款抵买抵食,边款伏味浓,就等开饭仔行匀便利店、超巿、零食店等,时不时帮大家留意住最新、最吸引嘅新品,一一试真啲!

***10月23号更新***

各大超巿   公仔鬼辣   鱼肉/鸡肉烧卖

最近出咗好多爆辣嘅零食,各位辣椒仔女可以搵嚟挑下机。先介绍好多时口痕都会想笃返两串嘅烧卖。方便简单,加一加热就食得,精髓当然系秘制鬼辣椒油,一点落去,哗,辣劲即刻爆发,直冲4只辣椒嘅辣度。不过唔好以为唔点椒油就冇事,无论系鱼肉烧卖定鸡肉烧卖,本身都已经加入咗少少辣嘅特制鬼椒粉架科科。
辣度:🌶🌶🌶🌶

百佳、惠康  公仔鬼辣  香辣味噌味点心面 (入门版)

唔好嫌佢咁细杯啊,到你食嗰阵你就会感谢佢系得咁细杯,再大杯啲就应该会辣到嗌救命。汤底以多种香料制成,辣得嚟几香。呢个入门版级别,如果你成功过关嘅,就可以准备升lvl打大佬喇!
辣度:🌶🌶🌶

各大便利店及超巿  公仔鬼辣  赤辣肉味炒面

你以为冇浸住辣汤,捞面就应该冇咁辣?傻猪嚟嘅,佢只捞面辣酱汁,混合咗辣至5级强度辣酱呀!但初头唔觉嘅,入口先有阵阵肉香,当你一放低防备嗰阵,浓郁嘅辣劲慢慢就喺喉咙度渗返出嚟,真心「辣到喷火」呀!建议有兴趣试嘅朋友仔,唔好一嚟就唧晒成包辣酱,唧少少热咗个身先~
辣度:🌶🌶🌶🌶🌶

Grozla网站  DAEBAK  鬼椒辣鸡捞面

另一只辣到喷火嘅捞面,由马来西亚着名品牌同韩国食品公司合作,用咗世界最辣嘅辣椒之一嘅鬼椒制作,黑色嘅面条,索晒啲辣汁,超级刺激,而且後劲非常凌厉,嗰阵辣感喺个口度停留咗好耐先至散得到,开饭仔试过就算即刻饮啤酒都冲唔散嗰阵辣。
辣度:🌶🌶🌶🌶🌶

各大超巿  日清湖池屋  激辣魔薯 三倍辣薯片

日清湖池屋最近出咗日本动画《机动战士Gundam》嘅特别包装版,其中有只系拥有三倍速技能嘅红彗星渣古,只薯片亦都跟手升咗三倍嘅辣度。不过呢只三倍辣薯片喺对比下,已经唔算太辣了,就算平时食开小辣嘅朋友仔应该都食得到。
辣度:🌶🌶


各大超巿  湾仔码头  「辣子鸡风味」白菜鸡肉水饺

辣水饺系列又多多个member喇。辣子鸡风味白菜鸡肉水饺,以多款辣椒同香料制成,辣度较同系列嘅水饺高,一啖咬开除咗有股辣劲冲出嚟外,都有啲鸡肉,同埋爽脆嘅椰菜同木耳等混和,帮手抒缓返少少辣感。
辣度:🌶🌶


KiKi网店 KiKi麻辣鸭血

呢个品牌嘅拌面就听得多,最近品牌嘅香港网店终於有台湾大卖嘅麻辣鸭血!选用来自台湾北部嘅纯鸭血,口感较一般鸭血更Q弹。台式麻辣汤头独家秘方调制,加入顶级青花椒丶花椒丶大红袍辣椒及辣椒粉,并配上多款中药材,如草果丶小茴丶荳蔻及八角等,饮落温和带麻香,唔会太辣,啱晒食辣BB班嘅朋友!即日起KiKi食品杂货(香港店)有售。
辣度:🌶

网店:www.kikifg.com.hk

***10月20号更新***

各大便利店及超巿   Minions x 菓汁先生

Bello, bello~ Minions嘅粉丝要出动喇。话说Minions联乘菓汁先生推出咗新包装同新口味嘅果汁,总共有成16款咁多,储齐咁多个樽就要勤力啲周围搵下啦。除咗一向饮开嘅橙汁、苹果汁等,仲多埋提子汁呢。

7-11 多款限定啤酒

7仔嘅雪柜最近多咗唔少新款啤酒呢,有好多都系限定系列嚟。好似麒麟本榨果汁汽酒咁,就系伏特加水果调酒嚟,分别有西柚同柠檬味,酸酸涩涩但又几清新。如果锺意饮IPA嘅朋友,可试Mahon Session IPA,感觉清爽;或者Grand Kirin IPA,果香味重少少,但又有啲啲涩口。Paulaner嘅慕尼黑啤酒亦系力推之一,阵阵麦芽甜香,容易入口。

7-11   7-select 甜品

开始有秋凉嘅感觉啦~ 又到咗蕃薯同栗子嘅季节。三款日本直送甜品包括安纳芋甜薯忌廉泡芙、法式鸣门金时甜薯蛋糕同法式栗子蛋糕,啖啖香甜系几开心嘅,不过cream嘅份量都唔少啊。

7-11  金猪流沙奶黄包、杂菌包

而家啲点心款愈嚟愈多之余亦都愈嚟愈cute,连便利店都有猪仔造型嘅流沙奶黄包啦,成个蘑菇嘅杂菌包,内馅多汁。

***10月15号更新***

Circle K 高普冠军纪念版 Erdinger 小麦白啤酒


为庆祝高普率领球队登上冠军宝座,德国小麦啤酒品牌 Erdinger 联乘高普推出冠军纪念版啤酒。小麦白啤酒散发出独特嘅果香,入口清爽顺喉并带有微微柑橘及香草味。罐上印有高普样貌以及签名,绝对值得球迷珍藏,期间限定发售,想买要快手喇~


7-11、Circle K及各大超市 嘉士伯无酒精啤酒

唔少减肥人士都怕饮酒,不过最近嘉士伯推出咗呢款无酒精啤酒,有别於市场上一啲无酒精啤酒味饮品,嘉士伯利用独特过程技术及特殊酵母移除大部份酒精,以天然方法酿造出啤酒,并同时保留传统啤酒清新自然嘅味道!呢款啤酒较一般啤酒热量低,每100毫升只含20卡路里,甚至比普遍的碳酸饮品同果汁都低,饮完都唔觉邪恶!


PING  Halloween特色鸡尾洒

就到万圣节,往年唔少人都会去酒吧庆祝,但今年可能唔少人都会因为疫情而却步。有见及此,呢间香港瓶装鸡尾酒品牌Píng就推出万圣节特色鸡尾酒,包括Jack-o’-Lantuern以四川麻辣为主调,琴酒加入花椒同麻籽浸超过 24 小时,更加入多款蔬果如南瓜、红萝卜、番薯和苹果,味道甘甜。而另一款Black Widow以香口芝麻为主题,选用日本有机麦芽豆浆、法国利口酒及金朗姆酒,有焦糖香甜中又夹杂微辣,易於入口。即日起至 10 月 31 号期间限定推出,只有官方网站有售。

购买网站:http://www.ping852.com/


***10月13号更新***

7-11、Circle K   Oreo  薄荷曲奇忌廉味冰冻甜点

Oreo再出雪条,外层系Oreo味朱古力脆皮加埋啲Oreo曲奇碎,内馅系薄荷味雪糕,同样都混入咗曲奇碎,啖啖脆口。薄荷味好强劲,食完透心凉,如果佢早多一两个月出到可能会啱feel啲科科。

7-11  乐天 黄豆粉/朱古力软心年糕批

朱古力批一向有唔少粉丝,今次呢两款系由韩国送到,外层嘅朱古力甜甜地,中间分别系烟烟韧韧嘅黄豆粉同软心年糕,几好咬口。

7-11  农心    鸡蛋多士味薯片

另一款由韩国直送嘅零食系鸡蛋多士味嘅薯片。最近啲薯片多咗好多喺餐厅menu上嘅菜式味道,但有部分都系得个咸字,唔够精髓。呢只就唔同喇,食落去系甜甜地又咸咸地嘅牛油香,仲有少少蛋香,完全想像到蛋多士嗰只味,像真度几高。不过甜嘅薯片始终都系食唔惯……

各大便利店+超巿   Ritz 、Oreo   季节限定海盐焦糖口味夹心饼

呢两款都系由细食到大嘅夹心饼,最近同时出咗海盐焦糖味,不过Oreo就系甜饼乾咸夹心,Ritz就调返转,咸饼乾甜夹心。两者都系一开包装,就已经令四周都畀浓郁嘅焦糖甜香笼罩住。食落嘅感觉都几唔同,Oreo块饼可能本身都系好甜嘅关系,就算加埋咸咸地嘅海盐焦糖夹心,依然都系甜度爆灯;反而Ritz嗰款balance做得唔错,咸甜有致。

7-11  嘉士伯  利物浦限定版

等咗咁多年,利物浦终於赢返次英超冠军,嘉士伯就乘势出咗呢款利物浦限量纪念版嘅罐装啤酒,转咗用利记嘅红色做主色,仲有利记嘅徽号同球员签名,好有纪念价值,利记迷必储!行多几间舖直至搵到为止啦。

***10月8号更新***

各大便利店及超巿  Haagen Dazs   全新柠檬柑橘雪糕

中秋都过埋,呢几日都开始有啲秋意,Haagen Dazs抓住夏天嘅尾巴,推出全新柠檬柑橘雪糕。用上由地中海区域采摘返嚟嘅柠檬同柑橘,制成真果雪糕,啖啖酸香之余,又渗有奶香,仲有粒粒柠檬片咬到,感觉清新。

7-11、惠康   SEOJU   法式波浪雪糕

韩国直送嘅呢款雪糕,感觉同千层雪糕好似。三层口感由上而下分别系,波浪型嘅朱古力脆皮、软滑嘅云呢嗱雪糕同朱古力雪糕,擘大啲个口一啖咬落去,一软一脆,口感丰富。

7-11、惠康  老虎堂   黑糖波霸珍珠奶茶雪条

又多款黑糖珍奶雪条!呢条黑糖波霸珍珠奶茶雪条,香港都有得食喇。雪条表面都好似平时杯嘢饮咁,有条条虎纹。咬落有粒粒烟韧黑糖珍珠,增加咬口,不过整体感觉就偏甜咗啲。

Circle K、GODIVA专门店   GODIVA   黑朱古力软心雪条

嚟自比利时嘅朱古力名店都推出两款黑朱古力软心雪条,分别系伯爵红茶风味杏仁黑朱古力软心雪条,同夏威夷果仁黑朱古力软心雪条!前者用英式伯爵茶配搭香浓黑朱古力,外层系朱古力杏仁脆皮,中心有伯爵茶黑朱古力流心。後者同样有比利时黑朱古力流心,但外层就改成澳洲夏威夷果仁朱古力脆皮,香脆可口。

***9月29号更新***

Circle K  Binggrae   韩国KAKAO FRIENDS造型雪条

好多朋友仔都系Kakao Friends嘅粉丝,最近韩国品牌Binggrae就推出联乘合作,有3款可爱造型嘅雪条,分别系Ryan布冧味、Muzi青提子味同Apeach水蜜桃味。全部都系用脱脂奶制作,低卡路里,啖啖果香。

各大便利店及超巿   NESCAFE

NESCAFÉ又有新包装,今次联同日本知名冷幽默插画家KEIGO(河尻圭吾)合作,一罐罐咖啡换上香港日常情景,好似有因为跑得太慢而畀外卖大叔抱住跑嘅树獭外卖仔、多条触须同时喺度切烧肉嘅鱿鱼烧味师傅等,既熟悉又有亲切感,有舖储罐瘾嘅朋友仔实好锺意。

***9月11号更新***

各大便利店+超巿  Haagen Dazs   Barista Collection

将café嘅饮品变成雪糕不是梦啦,Haagen Dazs做咗啦!新出两款Barista Collection口味,焦糖香料奶茶雪糕选用大吉岭同阿萨姆红茶,混埋豆蔻、肉桂、丁香等,食得出香料味几重,好少喺雪糕度出现呢啲味道,但未必个个都接受到;至於浓郁冰雪朱古力雪糕则利用比利时朱古力制作,有雪糕有朱古力酱仲有朱古力brownie,三重朱古力享受,每啖都系浓郁啲嘅~

惠康  珍珍  葱爆辣鸡煲味薯片

即将又进入鸡煲嘅季节,就连薯片都要赶上鸡煲嘅节奏。呢只新出嘅葱爆辣鸡煲味咸咸地,初头几啖唔觉辣,但当放低咗防备之後,啲辣就会慢慢喉咙度渗返出嚟。不过老老实实,唔多食得出鸡煲味。

各大便利店+超巿   日清拉王 杯面

呢两款杯面比平时嘅要渌耐少少,4分钟先食得。黑蒜油猪骨汤味几浓郁,阵阵咸香 仲有芝麻香;而辣猪骨汤味就咁睇汤底都感受到有返咁上下辛辣度,几刺激。

***9月7号更新***

The Ale ProjectSecond DraftAlvy’sPub1842少爷网店  少爷啤酒x Cookie DPT  限量版啤酒曲奇套装

BBQ最正就系烧棉花糖,烧到半溶状态,有阵阵炭烤香又甜到入心,呢种味道喺少爷最新出嘅手工啤酒度都搵到!GIMME S’MORE系一款烘焙棉花糖三重法国朱古力软心曲奇威士忌陈酿黑啤,口感厚身,烘烤麦芽嘅香甜,随住棉花糖同朱古力嘅甜味飘出嚟,细心嗒仲可以饮到桶味嘅余香。去Taproom饮当然最开心啦,但网店一样有货。仲可以连埋PDT嘅棉花糖夹心曲奇成套咁买。曲奇快速叮热8-10秒,就有半溶嘅棉花糖效果啦,口感松软,甜度十足。

各大便利店+超巿   Dreyer’s    三色脆皮雪糕批系列

今次呢个系列,以北海道牛乳搭配茗茶同充满日本特色嘅水果口味制成雪糕基底,分别系焙茶脆皮抹茶牛乳雪糕批同朱古力脆皮蜜瓜味牛乳雪糕批。前者嘅脆皮以静冈产焙茶制作,带有微微烘焙嘅炭香,宇治抹茶雪糕甘醇微苦,夹埋微甜嘅牛奶雪糕就啱啱好中和返;至於後者,蜜瓜果香够晒清新呢~

各大便利店+超巿    卡乐B     虾之脆虾片

虾片梗系要有虾味先好食!呢两款新出嘅虾片都可以一试,口感脆身,而且比时食开嘅感觉乾爽啲,冇咁油。浓厚虾片嗰款冇改错名,虾味系几浓香嘅,而日式七味唐辛子味虾片,就冇乜辣味,不过有阵阵咸香嘅紫菜味补返数。

各大便利店  NESCAFÉ    World Coffee瓶装咖啡

饮开咖啡嘅朋友仔,对咖啡豆嘅产地唔多唔少都有啲认识,各地嘅咖啡豆都有唔同嘅特色。今次呢个系列就推出多款单一地区嘅特色咖啡豆,打头阵嘅有巴西同印尼苏门答腊。巴西产嗰只口感温和平衡,带有坚果甜味;而苏门答腊嘅则浓郁醇厚,带有少少树木香。

***9月4号更新***

Circle K   Dreyer’s    比利时朱古力雪糕批

继续有新雪糕~ 朱古力控见到实心心眼,成条朱古力雪糕批由外到内到返外都系用咗比利时朱古力制作,外层脆皮、仲有粒粒杏仁粒,内层雪糕软滑,啖啖都系浓郁嘅朱古力香甜味道,大享受。

各大便利店及超巿   百福甜品馆  冲绳黑糖豆腐花

想随时食到豆花嘅话,最方便当然系买定喺屋企,一开即食啦。新出嘅冲绳黑糖豆腐花,用加拿大一级非基因改造大豆制作,加入黑糖,豆花呈淡啡色。几滑身嘅,同埋只系微甜。

各大便利店及超巿  固力菓   超幼百力滋

细个食开嘅百力滋出咗超幼版,幼到只系得几mm咁,脆系脆咗嘅,不过幼得滞就唔够口感,可能一次过啪几支会过瘾啲。两款味道分别系冬荫功同孜然味,前者酸辣,後者浓郁。

各大超巿   家乐氏  超级莓果Granola

早餐食开麦皮、谷物嘅健康仔,可以试下呢款新出嘅Granola喎,混合咗5种天然谷物同埋由士多啤梨、小红莓、车厘子、红桑子同提子等制成嘅果乾,无论倒落牛奶定乳酪度,抑或就咁食都系有非常丰富嘅口感。

***8月31号更新***

HKTV mall  Dashin

个个都想瘦身,但瘦身之路唔简单,又要做运动又要节食……而韩国呢个人气品牌就提供多款健康食品同营养补充剂,令呢条路可以行得轻松少少。6款口味嘅糙米饭,放入微波炉叮4分钟就食得,好方便。糙米系稻米脱壳後嘅米,加工过程较少而又含有丰富蛋白质、膳食纤维等多种营养,而且更易控制血糖。当中以全州蒟蒻拌饭最低卡,而紫苏叶辣炒鸡饭则系蛋白质含量最高。

心思思想食甜品嘅有豆腐Tiramisu,采用韩国大豆磨成嘅全豆腐,混埋忌廉芝士,卡路里、脂肪同糖分都比平时食开嘅低。解冻廿分钟就食得,啖啖都系豆味,口感较实在。

另外有7款100%天然排毒沙冰,以原材料直接研磨而成,有丰富嘅膳食纤维,除咗有多种蔬菜同水果外,仲有加入燕麦、可可粉同椰子水等口味,例如橙色嗰包系甘笋+红菜头+苹果+香蕉,而黄色嗰包就系椰菜+苹果+梨汁+山药,味道清甜。

***8月19号更新***

各大超巿及便利店   Haagen Dazs  全新Gelato系列

Gelato比一般雪糕口感更绵密,Haagen Dazs最近就出咗几款新口味嘅gelato,朱古力嗰只用上比利时朱古加同比利时朱古力酱制作,令到佢嘅味道非常之咁rich;而焦糖味则系预期中嘅香甜软滑。

另外两款日版新品包括杏仁牛奶gelato同四重抹茶脆皮雪糕三明治,前者落咗杏仁蓉去制作,渗出淡淡杏仁香,後者绝对系抹茶控嘅选择,四重抹茶包括抹茶威化、抹茶朱古力、抹茶雪糕同抹茶曲奇,浓郁回甘香甜、松脆软身等咩味道咩口感都齐晒,好丰富。

各大便利店及超巿   雀巢  花生酱系列雪糕批

相信呢度有唔少花生酱迷,呢两款以花生酱做脆皮外层嘅雪糕批,味道浓甜,未食都闻到香味。内层分别以牛奶雪糕混合海盐焦糖酱同红桑子酱,前者偏甜而後者微酸,各有捧场客。

7-11、百佳   炒面王  麻辣味

呢只新款炒面啱晒麻辣控,用麻辣香料调制而成嘅酱汁辣劲十足,加滚水等3分钟後,倒返走啲水走加酱料搅匀就食得,够晒方便。但温馨提示,辣度几强,就住自己程度落几多酱啊。

7-11  珍珍  五香肉丁味薯片

平时去茶记食开五香肉丁面嘅朋友仔,薯片都有呢只味喇而家,用五香粉同秘制辣椒粉调制,不过味道比起茶记食开嘅略为淡咗少少,唔算好辣。唔知几时会有埋沙嗲牛肉味呢?

***7月31号更新***

百佳超巿 EKSELENCE 双色雪葩雪糕系列

今次呢三款都系双色系列,一半系以拉脱维亚牛奶同忌廉制成嘅雪糕,另一半系糅合清新水果制成嘅雪葩。车厘子雪葩配朱古力雪糕味道又酸又甜,但平衡得几好;芒果雪葩配云呢嗱雪糕用真‧芒果制成,啖啖果甜;杂莓雪葩配云呢嗱雪糕莓味突出,够晒酸,好清新。

各大超巿   福  全新东南亚风味面

呢个经典品牌今次推出两款东南亚风味嘅即食面,咸蛋味炒面嘅面条烟韧,落埋咸蛋调味粉捞匀食,咸香中仲带有少少辣;至於冬荫功味汤面采用秘制酸辣汤底,一啖食齐晒酸辣咸甜香,佢嘅辣度唔可以睇少啊。

Green Common Califia Farms氮气冷萃咖啡

一日要饮一杯咖啡先安乐嘅朋友仔,有冇谂过可以饮得健康啲?呢款氮气冷萃咖啡用燕麦奶冲制,喺冷萃咖啡入面注入氮气,令咖啡顶部可以有厚厚嘅泡沫盖,饮落更滑口。今次呢个系列总共有4个口味,分别系双倍浓缩、无糖燕麦、朱古力燕麦同焦糖海盐咖啡。

***7月27号更新***

各大便利店及超巿  日本の台所  浓抹茶杯装雪糕系列


品牌嚟自日本,首次推出嘅「浓抹茶杯装雪糕系列」采用日本南山园嘅西尾抹茶,有抹茶、抹茶玄米茶,同焙茶三款口味。雪糕都相当Creamy,当中最有惊喜嘅系抹茶玄米茶,既有淡雅抹茶香又有独特焙炒香及米香。抹茶就胜在茶香清新而且回甘悠长,焙茶口味嘅茶甘甜味突出。
 

7-11、各大超巿  DREYER’S   低卡、零脂水果雪葩条系列

日日都咁热,点可能唔食雪糕雪条?但食得多又怕肥,真系好鬼矛盾。呢个雪葩条系列就唔怕啦,零克脂肪、低卡路里,仲要用真‧果汁制造,青提嗰款味道清甜,白桃亦够冰感同果甜,食完都唔使咁大罪恶感。

惠康  珍珍 番茄炒蛋味薯片

珍珍最近好勤力不停推出新口味,呢款系每个屋企都好常会煮嘅家常便饭——蕃茄炒蛋。加入天然番茄粉同蛋黄粉制作,整出嚟嘅味道,酸酸地甜甜地,又真系几似喺屋企食到嗰碟咁。

***7月14号更新***

7-11 Haagen Dazs   日版期间限定雪糕

夏天总系日日都想食雪糕,特别系而家咁多新款口味雪糕出现。呢两只系日版期间限定味,极致浓厚焦糖雪糕以奶油糖制作浓郁焦糖,再融入牛奶,味道浓甜香滑,仲有淡淡盐香;而薄荷碎朱古力雪糕嘅薄荷超劲,冰感十足,食完完全透心凉。

各大便利店及超巿  Lays 章鱼烧/盐味芝士/照烧鸡味薯片

Lays薯片一向都有保证,今次带嚟几款日式口味。开饭仔试晒後觉得最有惊喜嘅系大阪章鱼烧味,只味几似啊,完全系章鱼烧只酱嘅咸甜味,仲隐隐有啲wasabi味添;北海道盐味芝士都唔错,咸咸香香,芝士味都突出;照烧鸡味呢一开就闻到好浓嘅酸甜照烧酱味,但就略为甜咗少少。三款薯片都系大波浪纹,口感特别香脆。

Don Don Donki   日清x Don Don Donki   薯片

由日本开到嚟香港嘅Don Don Donki,最近喺铜锣湾又开多间分店。仲为咗呢次开业,联乘日清出咗两款限定口味,分别系博多明太同炸猪扒汁味,前者咸香微辣,後者咸甜酸集一身,有啲复杂。

各大便利店及超巿 卡乐B   和风咖喱味薯片、星洲辣椒蟹味什菜薯条

平时去餐厅会食嘅咖喱饭同辣椒蟹,摇身一变成为薯片薯条。以日式咖喱调味,令到呢只薯片既有咖喱香,亦比一般薯片冇咁咸得嚟,仲多咗阵甜味;至於星洲辣椒蟹味什菜薯条,就少少咸少少辣啦。

Godiva 夏之恋限定系列

话说原来嚟紧就嚟系七夕,即系又系要买朱古力氹另一半嘅日子!Godiva出咗最新嘅夏之恋限定系列,六款全新朱古力包括四款以两种唔同夹心组成的朱古力,同埋两款片装朱古力。例如草莓芝士蛋糕口味牛奶朱古力有清甜嘅士多啤梨酱香,柠檬红茶慕丝牛奶朱古力则同时食到清新果香同浓郁茶香嘅味道。

HKTV mall  Dashin 韩国塑身零食

各位健身界嘅朋友,除咗疯狂食鸡胸之外,都仲可以食零食嘅!韩国嘅塑身食品品牌进军香港,带嚟10种唔同口味嘅全麦蛋白零食,以烤焗代替油炸,每包嘅蛋白质仲有成12g添。呢几款零食包括有朱古力味同芝士味嘅脆皮卷、燕麦、黑芝麻味嘅蛋白燕麦条、果仁/韩式麻糬/蒜香牛油/辣味嘅高蛋白饼乾同埋原味、抹茶味嘅高蛋白曲奇。不过除咗脆皮卷外,其余嘅口感都偏硬,建议配埋牛奶或乳酪等一齐食,会比较好。

***7月9号更新***

7-11、各大超巿   雀巢 FAB士多啤梨冰条

出卖年龄系列啊!边个细个食过巨星嘅?经典回忆、消失多年嘅巨星最近重出江湖啦!同以前一样都系上中下三层色,最顶嘅系脆皮朱古力加彩虹碎糖、中间系云呢嗱味冰层,而最底嗰层虽然都系红色,但就由以前嘅西瓜味变咗做士多啤梨味,啖啖都系冰爽嘅果汁感。

各大便利店及超巿   雀巢  棉花糖及苹果味甜筒

雀巢今年出亲啲雪条嘅颜色都劲靓,今次系好似独角兽色咁嘅棉花糖及苹果味甜筒。个cone系粉蓝色,顶层薄荷绿色嘅雪糕系棉花糖味,夹杂住粉红纽纹嘅苹果味雪糕,又靓又甜。

各大便利店及超巿    OREO夹心饼

Oreo一向都畀人好甜嘅感觉,今次竟然有25%减糖版!虽然食落都仲系几甜,但至少冇以前咁甜腻,罪恶感少啲。另外仲有只抹茶卷味脆饼,饼底薄身啲,抹茶味都几香甜,试得过。

各大便利店及超巿 太平梳打饼 紫薯味

又一款细细个食到大嘅饼乾,最近出咗新口味,系近年大热嘅紫薯味啊!成块梳打饼都系浅紫色,加入咗自然紫薯粉,食落都个味都突出喎,有啲惊喜。

***6月26号更新***

7-11  7-Select x Oreo

香港好多甜魔,对甜到爆嘅甜品有份情意结,Oreo正系其中一个被宠幸嘅品牌。7仔联乘最新推出咗一系列Oreo甜品,全部都系甜滋滋der。包括有曲奇忌廉泡芙、曲奇忌廉瑞士卷同曲奇忌廉盆栽甜品杯,甜品杯仲有粒粒Oreo饼碎食到,粉丝应会几开心。

超巿+便利店   雀巢FITNESS 高纤脆片小食

零食都唔一定系邪恶嘅。一系列嘅雀巢高纤小食系个例外,有脆片有坚果仲有smoothie,脆片由燕麦、小麦、粟米及米四种全谷物组成;坚果则系非油炸,兼采用烘烤形式制成,包括有无加盐花生及杏仁、全谷物饼乾同藜麦夹心朱古力豆等,食完都唔使怕肥。

7-11 X 嘉士伯概念店

天口热特别想饮多几啖凉快嘅啤酒,嘉士伯出咗3款新酒,分别系高浓度而带有淡淡焦糖香嘅Elephant Strong、麦芽味较浓嘅EXPORT,同埋未经过滤,保留酵母、啤酒花同麦芽原味道嘅UNFILTERED,不过呢3款新酒,暂时都只会喺佢哋最新开张嘅7-11 X 嘉士伯概念店度先有得卖,入开愉景湾玩嘅可以留意下。

7-11/百佳超巿    珍珍薯片

细细个就食嘅珍珍薯片,呢排好勤力系咁出新味,锺意食辣嘅朋友记住要挑战下!bb级嘅有大虾冬荫功味,辣中带酸;中级嘅有麻辣火锅味,由多款四川麻辣火锅汤底配料包括辣椒粉、花椒粉调配而成,一入口就爆发麻香,呢两款都可以喺百佳/Fusion/Taste搵到;而大佬级就有花椒口水鸡味,麻中带辣,而且系慢慢渗出嚟,初头唔觉唔觉猛食嘅话,一发觉时已经成个喉咙都要发滚啦,想试呢款就可以去7仔搵下。

7-11   鬼灭之刃 味觉糖

有追开《鬼灭之刃》嘅动漫迷,要勤力啲四围捕获喇,呢次味觉糖联乘佢哋出咗几款主要角色嘅包装糖果,仲内附贴纸一张,个包装咁靓,买咗都舍得拆开嚟食。

***6月19号更新***

Market Place、3hreeSixty    SO COCO 纯素雪糕

呢个品牌嘅椰子布甸,一向大受欢迎,佢哋最近更加成功研发纯素雪糕,以有机新鲜冷压椰奶代替牛奶制作,无论椰奶定果肉都系新鲜材料。雪糕不含人造色素、人造香料、防腐剂同胆固醇。第一阶段先推出咗6款口味,包括朱古力、士多啤梨、抹茶、 热情果、 泰式奶茶同椰子,甜度适中,带有椰香。素食朋友都可以食雪糕啦~~

Circle K    Pols 

呢个北欧拉脱维亚嘅雪糕品牌,有雪糕杯都有雪糕窝夫。经典云呢嗱雪糕杯,以拉脱维亚牛奶制作,奶香十足。至於窝夫,则以细细个嘅窝夫载住雪糕,口味包括曲奇脆脆、朱古力脆脆同开心果等,中间真系食到粒粒曲奇/朱古力,增加口感。

Circle K   少爷啤酒

储罐迷注意!少爷啤酒最近联乘香港电车出咗两款叮叮啤呀,限量版嚟。两个罐一红一绿,都几靓,罐上印有旧式电车车款,收藏值高。红罐系清爽嘅小麦啤,加入咗中式材料好似生姜同桂花去酿制,饮落都甜甜地;绿罐系美式淡爱尔,加啲香橙同佛手柑 ,果香几重。

***6月5号更新***

HKTV Mall  猫山王榴槤冰心蛋糕

又到咗食榴槤嘅季节,相信各位榴槤控对呢两样由微热山丘同Forbidden出嘅榴槤产品,一定念念不忘!上年喺台湾出嗰阵,掀起热潮。猫山王榴槤冰心蛋糕外层系斑兰叶蛋糕,包住100%新鲜猫山王榴槤蓉,雪到冻冰冰拎出嚟摊一阵食,榴槤味浓郁甘甜之余,仲有阵阵凉浸浸嘅冰感!至於D24榴槤蛋卷,一盒廿条,渗有阵阵蛋香同淡淡榴槤香,口感酥脆。而家飞唔到台湾都唔紧要,香港有得食!

***6月3号更新***

Circle K  Skippy特浓花生酱雪糕三文治

去唔到旅行,好在都仲有韩国直送嘅特浓花生酱雪糕三文治食到!花生酱迷一定要试,三层口感都唔同,底面系松软嘅蛋糕,搽咗层香滑浓郁嘅花生酱糖浆,然後夹住浓味嘅花生雪糕,食完有种满足感!

各大便利店、超巿    低脂乳酪甜品

呢两款新出嘅乳酪,唔止系低脂,仲混入埋甜品,食完都唔会太有罪恶感~ 士多啤梨芝士蛋糕味啖啖酸甜,仲有芝士味饼碎食到添;而苹果奶酥味呢,又有果肉又有奶酥饼碎,口感丰富。

各大便利店、超巿   卡乐B

黄金虾味虾条用原只鲜虾制成嘅虾条,加埋咸蛋黄制作,阵阵咸香之余,仲有啲似食紧脆口版嘅黄金虾,好易食唔停口。至於美式酸辣味薯片,系期间限定口味嚟。大大块C-vut厚切嘅波浪形薯片,撒满美式酸辣粉,系几够味,先酸後辣,啲辣味系喺喉咙先至渗返出嚟。

***6月1号更新***

各大便利店、超巿   珍珍薯片

呢期潮流好似兴将啲菜式味道融入薯片度,珍珍两款新味薯片都系港人大爱嘅菜式口味,分别系咸香味浓嘅大漠孜然烧烤味,同埋阵阵咸鲜嘅日式蟹锅味。前者仲可以由自己调控咸度,加入适量嘅孜然粉,再shake几下先食。

Circle K   星球工坊 - 伯爵茶拿铁爆谷

伯爵茶拿铁爆谷,系由星球工坊同手调饮品店迷客夏联乘推出嘅新口味,一包倒出嚟有两只口味,白色嘅系炼乳,啡色嘅系伯爵红茶,两只味分开食又得,一齐啪落口又得,香甜脆口。

百佳、Aeon  家乐氏杂莓玉米片

食咗好多年嘅粟米片,终於有新口味推出喇!呢只杂莓玉米片,以天然士多啤梨果泥包住,仲有粒粒小红莓乾添,冲牛奶同豆浆一齐食都好夹,酸甜香脆。

TaSTe、Fusion、百佳    GREENE KING

英伦品牌GREENE KING,有超过220年嘅酿酒历史,最近佢哋一系列嘅手工啤酒引入咗香港,不论系pale ale、IPA、blonde ale定系stout等款式都有选择。其中GREENE KING印度淡色精酿啤酒(IPA)入口清甜,带淡淡酒花香,系入门之选。而BELHAVEN橡木桶精酿金啤酒仲用咗威士忌橡木桶酿制,饮落云呢拿味香甜突出,仲有淡淡橡木香。

***5月26号更新***

各大便利店、超市   叉烧饭味薯片、姜蓉切鸡饭味薯片

薯片控有印象嘅话,实记得佢哋上年出过烧鹅味同细蓉味薯片,今年再出地道港式嘅烧腊味。姜蓉切鸡饭味薯片有淡淡姜蓉味,但讲真blind test嘅话又唔太食得出;不过叉烧饭味嗰只就做得几似,蜜味酱汁咸中带甜。btw,有建议可以两款口味薯片叠埋一齐食,变成「叉鸡饭」味喎。

各大便利店、超市   三眼仔菓汁先生

三眼仔粉丝呢排要饮多几杯橙汁喇!菓汁先生换咗包装做「变装三眼仔」,樽装、纸盒装各有唔同造型,一阵变咗胡迪,一阵又变咗做劳苏,总共有6款咁多,慢慢搵,慢慢储。

各大便利店、超市  NESTEA®皇室奶茶系列

全新登场嘅呢款奶茶系列,有原味同低糖,两者均以红茶叶做茶底,茶味突出,奶同茶嘅比例调得唔错,过口瘾之余仲可以提神。

***5月22号更新***

K11 Musea(期间限定店)   Ekselence雪糕

呢个品牌嘅雪糕嚟自拉脱维亚,有多款口味例如红莓石榴、焦糖、白朱古力红莓、椰子、开心果雪糕批等,仲有低糖低脂嘅选择。最近喺尖沙咀K11 Musea 商场 B2楼开咗间pop up店,有兴趣试北欧雪糕嘅朋友仔不妨去下,pop up店开到6月12号呀。

***5月18号更新***

7-11、日资超巿  Haagen Dazs  日本直送雪糕三文治

冇得飞日本都可以食到日本口味嘅Haagen Dazs!今次引入嘅系士多啤梨松露朱古力,同香浓焦糖脆皮雪糕三明治,两款都系期间限定嚟!前者以法式Ganache朱古力酱融入雪糕中,士多啤梨雪糕加埋士多啤梨朱古力,系香甜嘅;後者则系甜魔必选。

各大超巿及便利店 Haagen Dazs  全新哈密瓜雪糕及芒果雪糕

呢两杯就用咗真‧果肉制作嘅,哈密瓜嗰杯,用咗欧洲同地中海限光培饲嘅哈密瓜啲果肉同果汁混入雪糕入面;而芒果则混会多国多品种嘅果粒果蓉制作,两者嘅果味都好真同好香呢。

各大超巿及便利店   Dreyer’s  红宝石朱古力脆皮雪糕批

相信朱古力控对於世界上第4种朱古力——红宝石朱古力绝对唔会陌生,Dreyer’s最近竟然出咗红宝石朱古力脆皮雪糕批呀!粉红色嘅脆皮,有阵阵莓香,包住原味雪糕,酸酸甜甜。

7-11  日本直送7 PREMIUM小食

要入手新零食嘅话可以考虑下呢堆由日本直送嘅小食,几款包括加入咗鲣鱼汁甜酱油调味嘅脆口紫菜天妇罗、豆香味浓嘅脆脆豌豆、甜中带微咸嘅焦糖脆条、细细粒又咸香嘅鹌鹑蛋。

***5月7号更新***

各大超巿+Circle K  DREYER’S  芒果热情果乳酪条

呢排天气咁热,要食返条雪条降下温先得。呢条乳酪条,外层法国乳酪混合咗果蓉,中间系真‧芒果同热情果果蓉,酸酸甜甜够晒清爽,重点系得89kcal咋一条,唔使怕肥。

Circle K  乐飞利乳酸雪条

冇得飞韩国都可以食到韩国直送嘅雪条,呢条乳酸雪条酸度够浓,两层都系用乳酸奶制作,大热天时食特别爽口。

各大便利店及超巿  Kinder缤纷乐 - 椰子口味

缤纷乐最新出嘅期间限定口味,充满住夏天嘅气息,系椰子味呀!食开嘅白朱古力中加入椰奶,再洒多层椰丝,甜得嚟都几有层次,可以一试。

各大便利店及超巿   固力果百力滋 - 芥末味

哗,今次呢只百力滋就刺激喇,wasabi!仲要系超浓超呛嘅wasabi,每条都有好多粉,食一条已经即刻feel到嚟料,如果两条打孖一齐食,或者一次过连续食多几条,绝对有潜力攻鼻到流眼泪,要挑战下呢。

7-11  HAITAI 忌廉曲奇蛋糕批

韩国直送嘅朱古力蛋糕,一盒有12件独立包装。出面嗰层又系朱古力,入面嗰层都系朱古力(曲奇忌廉)同埋蛋糕,够晒甜!

7-11卡乐B青豆脆条

7仔独家发售嘅青豆脆条,两款口味包括芥末味同盐醋味,前者嘅辛辣味相对温和,後者阵阵醋酸,口感香脆,都几啱拎嚟佐酒。

HKTV Mall  英国Karma Bites爆脆莲子

首次引入香港嘅脆口莲子,口感有少少似爆谷,但又畀爆谷脆多少少同埋健康少少。莲子以低温烘焙,低脂又低卡。5种口味包括焦糖、云呢嗱椰子、喜马拉雅粉红盐、日式芥末、霹雳辣椒,有甜有咸有辣亦有相对淡身啲嘅,梗有款啱试。

***4月27号更新***

7-11   伊藤家卷蛋

有两款新口味嘅卷蛋呀,仲系好港式嘅添。香浓粒粒奶酱卷蛋,选用Skippy粗粒花生酱制作,虽然食嗰阵又唔太食到粒粒花生酱,但都几甜香嘅;另一款黑芝麻蛋白卷嘅味就浓啲,两款口感都松软,早餐或下午茶啪返个都啱数。

各大超巿、便利店  卡乐B - 鳗重味米住米条

好多人都好锺意食鳗鱼饭,估唔到连零食都食到呢只味!「鳗重」即系「鳗鱼加重箱」,系日本料理中高档次级嘅鳗鱼饭咁解!今次呢款米条,选用鳗鱼肉厚骨少嘅中间部位,沾上酱汁喺炭火上反覆烧烤,难怪食落都有阵阵炭烧香,仲真系有鳗鱼饭嗰种味添,有惊喜。

各大超巿  合味道-泰式咖喱蟹味

杯面党留心啦~ 新出嘅黄色包装,系东南亚系列嘅泰式咖喱蟹味。汤底微微辣啦,咖喱味几重,仲有泰式香料嘅味道,但蟹味就唔多食到喇。渌一渌,三分钟,当快闪咗转泰国咯科科。

各大超巿、便利店  菓蔬先生

菓汁先生出咗最新副线呀——菓蔬先生。即系又用蔬菜又用生果制作,够晒健康。橙色嗰支系100%胡萝卜南瓜橙混合果蔬汁,仲加埋南瓜原浆同芒果蓉添,酸酸甜甜;紫色嗰支则系100%紫甘蓝红菜头红葡萄混合果蔬汁,材料丰富呀:红葡萄汁、苹果汁、红菜头汁、柠檬汁、紫甘蓝汁、黑加仑子汁混埋一齐,仲有山楂原浆添,口感较浓稠。

***4月22号更新***

COA 罐装鸡尾酒LA PALOMA DE OAXACA

呢排酒吧又唔开得,又有限聚令,酒迷少咗好多地方饮返两杯。不过有好消息呀,喺屋企,就算自己唔识调都可以饮到cocktail!少爷啤酒厂最新联乘着名手工鸡尾酒吧COA,推出罐装鸡尾酒LA PALOMA DE OAXACA!以Arquitecto Tequila加Alipus Mezcal,仲有新鲜自家制西柚梳打调制,饮落清爽,酸酸甜甜带有微涩,一啲都唔觉酒精度有成11%咁多。而且每罐仲有包特制盐跟上,饮用前将盐加喺罐边或杯边,层次就更提昇喇。除咗COA有得饮外,少爷网店HK Brewcraft、Angry Beer同Momentai都买到。

***4月20号更新***

7-11 小丸子、蜡笔小新精品零食

小丸子同蜡笔小新嘅粉丝要留意喇,有便利店出咗好多佢哋嘅精品啊!收纳包、铁盒、索袋、卡等,款款都好可爱,打开入面仲跟棉花糖或者曲奇等轻便零食。

***4月16号更新***

各大便利店及超巿   Oreo 季节限定

今个樱花季冇得飞去睇樱花,都可以搵下啲樱花零食止下渴嘅。Oreo史上首次推出粉红色版呀!呢只樱花抹茶味,成块饼都樱花粉色,系几靓嘅,中间抹茶夹心则以真正抹茶粉调制,茶味甘甜。至於另一款限定则系白桃乌龙味,可惜只系食到偏甜嘅桃味,乌龙茶香就唔多突出。

各大便利店    雀巢KitKat (联乘SANRIO)

咁多位Hello Kitty粉丝,KitKat最近联乘Sanrio出咗一系列嘅Kitty文具盒朱古力,有唔同嘅场景包括茶记、竹棚、大酒楼等,除咗有欧洲直送嘅迷你版海盐朱古力及焦糖脆脆、榛子朱古力及榛子粒粒等,盒内仲有便利贴套装同原子笔!粉丝们如果想要储齐咁多款场景,可能就要走多几间搵喇。

7-11、各大超巿、嘉顿门巿   嘉顿朱古力手指(联乘B.Duck)

细细个食到大嘅朱古力手指,呢期都做紧联乘呀!佢哋同B.Duck合作,以「友情岁月」为主题推出限定包装版,仲随盒附送400mm X 400mm 嘅B.Duck咕𠱸套一个添。

奇华   海苔肉松凤凰卷

凤凰卷可以话系经典小食之一,呢款海苔肉松味最近新登场。凤凰卷皮薄脆,牛油味香,啖啖香浓海苔味,肉松碎唔算好多但刚刚好。而有舖储罐瘾嘅朋友仔,可以留意下佢哋最新推出嘅香港情怀特色曲奇礼盒,分别系巴士、电车同小轮造型,入面嘅熊猫、企鹅同树熊曲奇,好cute cute。

City’super  Mamcafe麸菓子、Tobishima蛋白饼

由明治15年创立嘅老舖制作,口感软脆嘅麸菓子涂上青森产果物制成嘅果酱,都几甜身。几款口味选择包括原味、苹果、芒果同蓝莓。至於蛋白饼,以品牌自家栽培嘅果物调味,有柠檬、柚子、覆盆子、蓝莓同蜜柑几款都系酸酸甜甜嘅口味拣,外脆内软。

Tea WG  季节限定繁盛花季系列

喜欢品茶嘅朋友仔,有几款季节限定嘅新茶介绍返。绿色圆罐装嘅蝴蝶夫人茶由清柔嘅绿茶加南方水果搭配而成,有微微桃香,酸甜平衡。小黄罐系夜露茗茶,由黑茶加薰衣草搭配,阵阵花香;至於小绿罐则系桔花乌龙茶,味道清香。

***4月9号更新***

7-11、超巿   Pringles 期间限定新口味

薯片叔叔成日都有新口味登场,今次出嘅系和风鸡肉串烧同博多明太子味,前者炭烧香味浓郁,坚系有啲似食紧鸡串,不过系脆鸡串嘅感觉;後者带有微微咸香,味道相对较淡。发挥少少创意,两只味叠埋一齐食,就变成明太子鸡肉串烧啦~

7-11、超巿   粟一烧 叻沙味

呢只期间限定嘅叻沙栗一烧,还原度都算高,入口满满椰奶香,同埋叻沙汤底嘅微辣香料味,会食上瘾。

7-11  不二家LOOK珍珠奶茶味朱古力

又一款珍奶零食!呢只朱古力由日本直送,就咁睇落平平无奇咪又系朱古力一粒,但咬开就有惊喜喇,珍珠奶茶真系有珍珠,软身嘅,朱古力嘅奶茶味都重。

***4月3号更新***

Circle K  少爷啤酒 飞云

 图:YoungMaster IG

政府落咗禁令,酒吧酒馆今日6pm起要关闭14日,除咗少数餐厅仍然有酒精提供外,惟有要drink from home啦。好在便利店都有手工啤酒卖,最新返货嘅系少爷嘅小麦啤飞云。呢款酒加入咗柑橘橙皮同新鲜磨制嘅芫荽籽,劲清新。

少爷网店  Beyond Possible #001

 图:少爷网店

再同大家介绍多款少爷新作,呢款Beyond Possible #001,只系得0.5%酒精度,但就充满酒花嘅香气,饮多几杯都唔怕会同人有亲密接触啦(应该系)。想试draft嘅话,Second Draft有呀。

7-11 Viennetta薄荷味千层雪糕

大家嘅童年回忆千层雪糕,早前啱啱再度面世时,就掀起一阵搜货潮,好多人都去便利店搵下有冇货。嚟紧佢哋又出多只味喇,今次系薄荷朱古力,冰感十足,好清新!

Aroma Truffle 黑松露薯片

呢个嚟自新加坡嘅黑松露薯片品牌,首间海外旗舰店即将登陆香港喇,选址铜锣湾,4月9号开业,到时最少有3款口味发售,包括原味黑松露、巴马臣芝士黑松露同蜜糖芥末黑松露。开饭仔试过,原味嘅黑松露味就最浓郁,蜜糖嗰只就几甜身。全部薯片都系厚切波浪纹,有口感呀。

***3月27号更新***

7-11 VIENNETTA

有返咁上下大嘅朋友仔,应该会对呢款千层雪糕充满回忆!最近喺便利店又见返佢踪影啦~ 除咗有经典嘅云呢嗱味,仲多埋香橙朱古力味添呀!两者都系喺层层雪糕中间夹有片片朱古力脆片,口感软滑得嚟又带脆,微甜刚刚好。

***3月25号更新***

H.K. Lovecraft  Nitro Dunkel氮气黑啤

平时饮开嘅啤酒,大多数打入嘅都系二氧化碳,不过氮气啤酒喺外国查实好流行下。香港最近都有酒厂新推出咗只氮气啤酒,斟出嚟嘅泡沫,比一般啤酒嘅绵密同埋顺滑,好creamy嘅感觉。而酒体本身带有烘烤过嘅麦芽香,仲饮到微微香醇嘅咖啡味。暂时得TAP The Ale ProjectSecond DraftThe Madhouse TaproomGolem Craft Beer 呢几间Taproom先有得饮!

***3月20号更新***

Circle K  Skippy 特浓花生酱甜筒

早前出过雪条嘅Skippy花生酱,最近仲出埋甜筒添!花生味嘅雪糕,中间渗有花生酱,面层仲有粒粒花生碎,不过食落又冇想像中咁浓郁嘅花生香,微微甜咁啦,咬到花生酱嗰啖就开心啲啦。

各大便利店+超巿  雀巢鹰唛奶条

细细个食到大嘅雀巢鹰唛居然都攻入雪条巿场喎!成条白雪雪嘅雪条,以炼奶制成,啖啖都系炼奶香甜味,但又唔会话超甜,口感幼滑。

7-SIGNATURE x 伊藤久右卫门 抹茶系列

便利店继续同日本抹茶品牌合作,带嚟3款抹茶甜品,最推介嘅系抹茶长崎蛋糕,采用伊藤久右卫门宇治抹茶粉同日本面粉制作,做出嘅嘅蛋糕松软,渗有淡淡茶香,底部有烘烤过嘅粗砂糖,食落焦香甜身。另外,甜甜地嘅抹茶蜜瓜包同抹茶忌廉包拎嚟做早餐都唔错。

7-11 BE-KIND坚果棒

想食零食又要食得健康嘅,呢款美国坚果棒系个唔错嘅选择。本身已经有海盐黑朱古力、海盐焦糖杏仁等口味,最新出埋花生酱黑朱古力味!使用天然原粒坚果同野生花提炼而成嘅蜂蜜,配埋原粒烤花生磨制嘅花生酱同黑朱古力,甜度适中,重要嘅系呢款零食又高纤又含植物蛋白,啪一条就补充到能量啦~

7-11 SANRIO DIY曲奇套装连饼乾/软糖/棉花糖

呢排唔系wfh,就系减少咗好多聚会,总之就多咗时间留喺屋企,多咗时间可以做下啲平时冇乜机会做嘅嘢,例如自己整饼?Sanrio最新推出咗一set 3款嘅DIY曲奇套装,粉丝可以跟住自制到Hello Kitty、Little Twin Stars同My Melody造型嘅曲奇饼啦~

 7-11 公仔面重口味

又有新味捞面啦~ 两款都辣嘅,赤辣牛肉味捞面用咗牛至、罗勒等香辛料制作个辛辣酱汁;口水鸡味捞面亦都啖啖辣中带香麻,两者面条烟韧,索晒啲辣汁系几刺激嘅。

***3月17号更新***

各大超巿及期间限定店 Ekselence脆皮雪糕批系列

呢个北欧拉脱维亚直送嘅雪糕品牌旧年年底登陆香港,最近喺尖沙咀海运大厦LCX仲有期间限定店呀。品牌采用最高质嘅自由放养奶牛,用全脂天然牛奶制作,配搭比利时朱古力脆皮!

特别推介白朱古力红莓雪糕批同布朗尼雪糕批,前者以白朱古力配搭红莓酱,酸甜清爽;後者有香浓朱古力味,口感厚实。

各大超巿及期间限定店   Ekselence黑魔法酒布朗尼雪糕

品牌除咗雪条之外亦有雪糕,里加黑魔法酒系拉脱维亚嘅国酒,含45%酒精!所以加入朱古力同布朗尼,食落朱古力嘅甜同魔法酒嘅甘调和,香浓醉人。

各大超巿   Lakto北欧脆皮鲜涷芝士棒

品牌嚟自北欧,专门为小朋友设计嘅「芝」味营养小食,选用优质拉脱维亚芝士制作,有丰富蛋白质而且低糖低盐。脆皮鲜涷芝士棒系外面再包一层比利时朱古力脆皮,食落口感就好似雪糕批咁!新出嘅红桑子石榴夹心够清新,系小朋友同大朋友都会锺意嘅口味。

city'super 樱花祭

每年到咗3、4月,本嚟都系出游赏樱嘅时间,可惜今年冇得飞。不过唔紧要,有日式超巿举行樱花祭,有唔少以樱花为主题嘅季节限定同新货,止住瘾先啦。

日本樱花士多啤梨 (季节限定)

呢款粉粉地色嘅系樱花士多啤梨,全个日本得5位佐贺县农夫种㗎咋!由农园直送到港,清香味甜,果肉结实。

ROYCE’樱花系列 + Pioneer企划 梳乎厘樱花班戟粉

好多人平时返乡下都会买呢个品牌嘅朱古力返嚟做手信,今次推出期间限定樱花味朱古力,片片都带有花香;如果想喺屋企自己DIY梳乎厘班戟嘅话,可以拣呢款樱花味嘅班戟粉,配埋樱花果酱或者樱花糖浆就更有feel了。

***3月4号更新***

7 -11   伊藤久右卫门抺茶甜品系列

抹茶控出动喇!有便利店引入日本直送漑宇治抹茶甜品系列,包括抺茶千层蛋糕、甜品杯同忌廉泡芙。千层蛋糕有多层可丽饼皮叠住由伊藤久右卫门宇治抺茶制成嘅抹茶忌廉,不过抹茶味感觉较轻。

想要重味之选,呢个甜品杯就啱晒,五层分别系抹茶海绵蛋糕、抹茶忌廉、北海道牛奶忌廉等,口感幼滑。顶层再撒上宇治抹茶粉,阵阵甘醇茶香。

至於抺茶忌廉泡芙 ,口感软熟,以独家秘方制成嘅抹茶忌廉嘅茶味系几香嘅,收尾有微微甘涩。

各大便利店及超巿   红桑子脆皮雪糕批

Haagen Dazs又又又有新口味登场,红桑子脆皮雪糕批,唔止内里嘅雪糕有一条条红桑子果酱纹,外层嘅比利时白朱古力上都有一粒粒真‧红桑子乾果肉,味道酸酸甜甜。

***2月25号更新***

7-11  Häagen-Dazs  软芝士无花果冧酒脆皮雪糕三明治 

Haagen Dazs又有新味啦~ 系日本直送嘅软芝士无花果冧酒味,外层有马斯卡邦软芝士朱古力脆皮同威化,一咬落去,系奶香味重嘅软芝士雪糕,食到中间,仲有酸甜嘅无花果冧酒夹心。虽然得0.2%酒精应该唔会食醉人,但会醉心啊科科。

Circle K(优先发售)  DREYER’S  草莓红豆酱雪米糍

一包得一粒嘅雪米糍,系烟韧控嘅至爱。喺淡淡嘅士多啤梨雪糕中间夹有微甜嘅红豆酱,甜度有层次。

Don Don Donki/Sodamall 日田天领水

呢支日田天领水喺日本大为流行,而家引入咗香港啦。嚟自九州地区,取自大分县日田盆地嘅地下深层嘅天然水,水质纯净,氢自由基含量甚高,有助调整体质、促进新陈代谢,更有养颜之效。就咁饮又得,用嚟冲茶或熬汤则可以令茶/汤变得更醇更甜。

***2月19号更新***

7-11   CW麻糬朱古力曲奇

呜呀,呢只韩国出嘅麻糬朱古力曲奇平时要等Friend去完旅行送手信先有得食㗎,而家唔使啦~ 有便利店引入咗,外层系软身嘅朱古力曲奇,内馅夹住烟韧麻糬,好有口感。

7-11    全新包装排装朱古力

由细食到大,都系一粒一粒咁食嘅M&M'S同麦提莎,突然变咗一排排咁食,系有啲唔惯。不过都几有新鲜感,感觉就好似一次过将好多粒M&M'S放晒入口咁,甜度十足!

各大便利店      KOIKEYA火锅味脆条 + BABYSTAR火锅味脆片

好想打边炉但呢排又唔系好敢打住?试下呢款新出嘅零食啦,以火锅汤底味为主题,脆条嘅有生姜鸡同花椒味,脆片嘅就有鸡白汤同麻辣味,一路食一路幻想住自己打紧边边先啦。

各大超巿及零售店   日清湖池屋  蕃茄汁味薯片

就咁望可能你以为又系蕃茄味薯条,但望真啲,有啲唔同喎,系蕃茄汁味!日清湖池屋今次同番茄汁品牌KAGOME合作,采用特制蕃茄粉制成,一食就知,真系好「茄汁」,多咗份酸酸甜甜。

***2月14号更新***

Circle K  海太黑糖珍珠奶茶雪条

珍珠奶茶嘅热潮好似一直都冇减退过,最新嘅产品有呢款黑糖珍珠奶茶雪条。外层系奶香浓郁嘅奶茶雪糕,食嗰阵小心啲,咬开中间系会流出嚟嘅黑糖浆,细心啲会咬到几粒珍珠嘅,系几唔错,不过可惜细条咗啲,黑糖流心位好快完咗。

开售日期:2 月20 日

7-11 雀巢奶盖芝士桃茶味甜筒

呢排是咪兴将茶饮变做雪糕?呢款奶盖芝士桃茶味嘅甜筒,顶层系芝士味雪糕,但淡味咗少少。食食下就会食到桃茶味嘅雪糕,微甜啦;再食仲有朱古力浆,甜度几有层次。

***2月7号更新***

7-11  天仁茗茶面包

便利店同天仁茗茶联乘,推出咗两款茶味面包,绿茶红豆白玉包混入天仁茗茶台湾绿茶制,内馅粒粒白玉口感烟韧;黑糖珍珠红茶忌廉包,内馅嘅忌廉系阿萨姆红茶,又真系有淡淡红茶香,不过珍珠就略嫌少咗啲啲同腍咗啲啲。

7-11 栗子蛋糕

苦中一点甜!由日本直送嘅栗子蛋糕,以意大利栗子蓉同北海道牛奶制,口感幼滑,啖啖栗香。

7-11  冷泡无糖红茶

以冷泡技术冲制嘅茶饮,大吉岭红茶带有独特果香,而英式红茶则使用皇室传统英国混合茶,味道香浓。两者都系无糖,饮多几啖都唔怕肥。

***1月23号更新***

7 -11  PABLO忌廉芝士味新地

呢只大受港人欢迎嘅日本半熟芝士挞品牌,最近同香港便利店合作,推出咗只得香港先有嘅软雪糕口味呀!呢只忌廉芝士味新地口感软滑,食落完全系cheese tart嗰只味,$15都试得过呀芝士控。

7 -11  士多啤梨味可口可乐

过完年好快又情人节,可口可乐特别推出咗款甜到入心嘅新口味——士多啤梨味可乐!之前净系得日本有,而家香港都有啦~  就咁闻都闻到阵士多啤梨味,饮落只味反而冇咁出,淡淡地咁,但都可能会有人觉得微微药水味咁~

7 -11 Doritos芝士粟米片

脆卜卜嘅Doritos芝士粟米片出埋dip酱,分别有香蒜蛋黄酱同莎莎酱,dip下嚟食又真系唔同啲,两款口味都系香口嘢,仲有阵阵微酸,好易令人食唔停口。

Circle-K  DYDO X PIERRE HERMÉ朱古力咖啡

咖啡控又有新咖啡试,呢个brand联乘法国甜点品牌,选用清爽嘅巴西咖啡豆,搭配清香嘅厄瓜多可可豆,调配出嚟嘅咖啡带有朱古力香,甜度轻微。

***1月22号更新***

7-11 卡通精品连零食

今次同大家介绍呢批零食,相信主角都唔会系啲零食,而系一众cuty嘅卡通~ 迪士尼帆布包同透明包都连埋曲奇,前者有索绳又有手挽,放饭盒放零食都好方便;後者分别有Daisy大蝴蝶结同唐老鸭水手帽两款,大小朋友都啱用。

Chip & Dale、小飞象、Marie三款护照套内,各有三包蛋黄饼,唔好以为跟得呢啲精品嘅都唔求好食,呢几包嘢又几有惊喜喎,咸香脆口。

多啦A梦嗰款打开包装,哗!系多啦A梦造型嘅朱古力夹心饼呀!系几得意嘅不过可惜味道一般,口感唔够松化;至於Super Mario就系全块造型朱古力,好甜。

***1月14号更新***

Häagen-Dazs   日式紫薯挞脆皮雪糕三明治

终於唔使葡萄日本人,因为香港都食到日本直送嘅Häagen-Dazs雪糕同雪糕批啦!呢款外面有松脆嘅紫薯威化同紫薯朱古力脆皮,入面就系带蛋香嘅吉士雪糕同幼滑香甜嘅紫薯酱,紫薯味道香浓得嚟又自然,而且口感层次丰富。7-11有售,1月20号起日资超市有售。

Häagen-Dazs   香浓南瓜雪糕迷你杯

另一款香浓南瓜雪糕迷你杯用嘅系北海道产惠比寿南瓜,特色系圆润饱满,味道浓郁香甜。而南瓜更会烘烤以带出南瓜本身嘅甜味,喺绵密嘅南瓜雪糕中加入浓厚南瓜酱,双重享受呀~7-11有售,1月20号起日资超市有售。

***1月8号更新***

Rankingdak   鸡胸肉小笼包

健身朋友几乎餐餐都要食鸡,呢个嚟自韩国嘅人气即食鸡胸肉品牌,最近又新出咗几款鸡肉产品。鸡胸肉小笼包嘅外皮以薯粉制成,内馅有鸡胸肉有菜,三款口味包括有原味、泡菜味同烧肋骨味。放入微波炉(700W)叮3分钟,或者隔水蒸8分钟就搞掂。

Rankingdak  酱汁鸡胸片

餐餐都白烚鸡胸又真系寡咗啲嘅,为咗keep靓个body嘛。不过都唔系冇办法嘅,呢个LOVEEAT® SAUCE 系列选用韩国本土产鸡肉,伴以三款酱料:蒜味、烧烤味同蕃茄味,原本dry dry der鸡胸肉即刻变得惹味咗。未解冻时,直接放入微波炉(700W)加热 3分 30秒就食得,够晒方便。

Rankingdak  山蔘鸡汤饭

以韩国产鸡脚长时间烹煮而成嘅汤头,骨胶原丰富,配埋手撕鸡肉同初芽GABA糙米,既饱肚又健康。煮法亦方便,只需打开一半包装顶膜,再放入微波炉叮约7分30秒至8分30秒就可以食。

7-11 7-SIGNATURE x Pablo

Pablo可以话系香港人最爱嘅日本品牌之一,次次返亲乡下都要去食下佢哋嘅芝士挞同产品,新一年就有好消息带畀大家喇!而家喺香港便利店都买到Pablo喇!两款由日本直送嘅甜品,分别系杏脯啫喱芝士忌廉泡芙同杏脯啫喱芝士忌廉瑞士卷,两者都系酸酸甜甜,软绵绵嘅口感,但芝士味就淡咗少少,唔系好浓郁。

7-11 7-SIGNATURE热卷饼

冬天就算要快食,都会想食啲暖笠笠嘅嘢食,新出嘅热卷饼啱晒,放入微波炉叮一叮就食得,既方便又快捷。两款口味包括辣辣地嘅香辣肉酱肠仔,同埋可以微微拉到丝嘅芝士火腿。


文:Kar
相、片:Tom Li


关键字
零食
便利店
超巿
芝士
甜品
雪糕
饮食潮流
开饭仔为大家发掘香港这个美食之都的最新美食资讯,分享饮食潮流文化。
本月热门
【随时更新】零食速报 每周新款零食、酒品点评
1天前
全城抗炎!送上门懒人煮食包及套餐大合集2.0 花胶炖汤/火锅/铁板烧
2020-10-07
牛大人火锅姊妹店!旺角新开台式烧肉吃到饱 任食澳洲 M5 和牛、SRF极黑牛霜降牛肉眼
5天前
【即睇10月生日】酒店半价放题 Tiffany & Co.旗舰店导赏
2020-10-06
高级意大利菜餐厅尖沙咀重开 拥无敌海景 即席炮制经典芝士黑松露意粉+抵食3道菜午餐
2020-10-12