【随时更新】最後倒数!2022即将结业嘅人气餐厅
2022-07-13

虽然本地第五波疫情过去,但仍有餐厅怀疑不敌疫情而结业,当中有唔少更系开业带起一阵风潮,一直以嚟深受街坊欢迎嘅小店。希望有一日「说了再见、约定再见,就会再见」。
 


太子白色门面人气Cafe  Cafe Paradise
最後营业日:7月30日

喺太子地铁站附近,呢间白色门面嘅Cafe,由拥有星级酒店经验嘅厨师主理,定价亲民又多选择。其中香脆猪手加入香料先焖4-5个钟,落单再即时半煎炸,皮脆用嫩。另外足料嘅All Day Breakfast,以及Cafe少有嘅石烧牛扒都系人气菜式。但品牌仅余嘅太子店,日前亦宣布将於7月30日结业。趁住重有时间,想去回味下就快啲book位喇~

图:sik6sak1mai5


已结业

西营盘和风素食小店  Good Good
最後营业日:7月3日

西营盘呢间楼高两层嘅小店主打西日素食料理,相当丰富完全无一般食素会寡嘅感觉,例如五目天丼将羽衣甘蓝、南瓜、茄子等蔬菜炸至金黄香脆,记得将溏心蛋切开,用蛋汁捞饭啖啖满足!甜点方面唔少款式会随季节更改,每次去试都有惊喜。想回味嘅朋友留意返餐厅一半位置可於网上预约,另一半则留作Walk-in。


图: jcpigpigzhu

 

日卖200份泰式香蕉煎饼  泰小子
最後营业日:6月30日

屯门呢间小店主打泰式香蕉煎饼,有成12款口味任拣,由经典Nutella榛子酱、朱古力,到少见啲嘅芋泥麻糬、芝士榴槤等应有尽有,创下日卖200份嘅记录!另一热卖系脏脏鲜奶麻糬系列,麻糬有鲜奶味又烟韧。亦有泰式饮品、泰式甜品例如芒果糯米饭等。小店为咗答谢客人支持,即日起至结业日买满$50即送指定饮品一杯。


图: nikileetcmember_510821

 

全港最强巴斯克蛋糕  in the moment
最後营业日:6月12日

港大港铁站附近有间Cafe藏身於巷仔里面,但依然有唔少人为咗巴斯克芝士蛋糕而潮圣,皆因系被Foodie们形容为香港最强嘅网店Hemma出品!中心半熟软滑,外层有淡淡焦香。咖啡同其他食品平均水准都唔错。小店日前宣布因租约期满结业,不过喺IG写上「完结 是休息後再进发」,希望可以暂休後再相见啦。


图: Tiffanynyt

 

驰名纯素软雪糕  DAMA
最後营业日:6月7日

尖沙咀呢间健康主题嘅轻食饮品店好受欢迎,皆因佢哋嘅软雪糕每日有四款唔同口味拣,食落味道自然又软滑,猫山王榴槤、红肉火龙果、芒果等都系人气口味。轻食就有卷物、汤、乳酪杯等等,大部分都系纯素,店内更有花草墙方便打卡。喺餐厅搵到新址重开之前,可以去便利店同指定餐厅^搵搵佢哋嘅纯素雪糕杯,一样可以健康消暑。

^雪糕杯销售点:7-11、sensory ZEROThe Coffee Academics14 South Lane、Slowood、高先电影院


图: foodie_bunny

 

手工汉堡小店  麻堡
最後营业日:5月31日

深水埗同长沙湾中间,有间主打汉堡嘅小店好受街坊、特别系酮学仔嘅欢迎,因为佢哋有生酮汉堡!面包系自家研发,用车前子粉、杏仁粉等制作,口感似欧包有咬口。非生酮汉堡都落足心思,安格斯汉堡扒足150g加上每日新鲜手打,配麻辣辣酱或者芫荽都好夹。可惜小店因为人手有限,加上老板娘有工伤需要休养,唯有忍痛结业。但老板亦有话希望之後可以喺有堂食嘅餐厅再同大家见面,希望早日听到好消息啦。


 

粉岭白色小屋Cafe  添饮咖啡馆
最後营业日:5月31日

前粉岭裁判法院旁嘅一间独立咖啡店,除咗系北区区内少见坐得舒服又好Hea嘅Cafe之外,小店亦用心推动本地农产,例如选用本地农场出产嘅有机番茄、萝卜等。疫情严峻前更举办过多个市集、咖啡班等活动。可惜老板之前宣布餐厅不获续约,尽管亦有意见指小店定价进取,但再唔把握时间回味或者就无机会喇。


图: eatingholiccc

 

大埔川式凉皮小店 凉皮小姐‧麻辣米线专门店
最後营业日:5月24日

呢间小店主打自家制凉皮,以红薯制作,滑溜爽弹,加上青瓜丝、炸黄豆、花生碎、白芝麻,同秘制麻辣酱,唔加餸都已经好够味。重有米线、小食同冰粉,例如一口酸菜鱼,真系细细份咁,一支公都可以满足到想食酸菜鱼嘅慾望。可惜小店即将结业,公告写上「希望有缘再会大家。希望大家身体健康,疫情快啲过。可以过返无口罩的日子。」


图: Pleplev3v

 

日籍厨师主理家庭料理 嘉兵卫
最後营业日:5月8日

元朗咁多日本餐厅,呢间食堂依然长期有捧场客,皆因小店由日籍嘅波多野先生同佢嘅港籍太太Emmy两夫妇主理,主打日式家常料理,好似滑蛋广岛蚝丼定食、名古屋风味鷄翼等,朴实温暖而有日本风味。日前公告5月会同大家暂别,写上「见证住香港各种变化,无奈地决定这刻休息一下,然後再展开未来嘅新开始」。


图: fxfxfh

 

大埔驰名清汤腩 群记清汤腩
最後营业日:4月29日

呢间小店开业多年,门口经常大排长龙,唔少人更系特别跨区去食!日前喺Facebook公告即将结业後,唔少网民都喺下面留言话好可惜,重有留言指佢哋嘅牛腩系全港最好食没有之一。但近年亦有食评指水准下降,亦有人指员工服务态度差,不过依然无损其人气。


图: Kankanmolly

 

元朗足料格仔饼 嘉发面包小食
最後营业日:4月27日

元朗呢间小食店由夫妇二人主理,佢哋嘅格仔饼同鸡蛋仔系唔少区内街坊同学生心头好,皆因变化多又足料。格仔饼有招牌薄脆同加厚两个版本,前者非常香脆,後者多一份烟韧口感,加上里面嘅花生酱、砂糖同炼奶都落得唔手软!鸡蛋仔粒粒都外脆内软,仲有黄金芝士、海苔肉松、粒粒朱古力等口味。


图: Angie<3

 

湾仔经典港式美食 来佬餐馆
最後营业日:4月25日

呢间主打港式「豉油西餐」嘅餐厅12年前喺中环开张,後来搬到湾仔依然有唔少捧场客。不时会有周末及加入早午餐,可以享受自选主菜加任食精选小食同甜品~亦有唔少节日套餐同季节限定嘅美食,例如之前推出嘅原煲窝心暖胃煲仔饭外卖。可惜餐厅早前宣布营业即将後结业,呢段期间会推出经典套餐,畀各位重温历年招牌菜式。


图: 餐厅Facebook

 

人龙台式牛肉面 阿木台湾面 (广华街)

旺角呢间人气台湾面店4月21日宣布,休业多时嘅广华街分店正式结束业务。以後大家挂住佢哋,想食返碗份量十足、肉香又入味嘅红烧牛肉面时,就记得要去佢哋旺角豉油街店啦。老板喺Facebook解释,因为每朝要来回两间舖头做嘢实在有啲攰同辛苦,嚟紧就可以更专注豉油街店生活百货


 

创意多国素菜馆 走肉蔬食研究所
最後营业日:4月18日

大角咀嘅人气素食自助餐餐厅走肉‧朋友年初结业後,估唔到喺荔枝角嘅姐妹店走肉蔬食研究所日前亦宣布租约期满後不再续租。餐厅以实验室为主题,唔单止装修成个班房咁,连菜式都好有创意,好似望落唔似素食嘅黯然销魂饭、秘制化皮乳猪伴荷花夹等,都系畀食肉兽们转试素食嘅好机会,惠顾午市套餐重送自助沙律吧,CP值高。


图: 食神大妈 Foodie Auntie

 

旺角人气车仔面 旺囍车仔面
最後营业日:4月10日

呢间港式车仔面店有唔少熟客支持,有超过40款餸任拣,包括陈皮鱼蛋、秘制牛筋、辣汁鱿鱼等等。因为疫情近年亦开始做分区团购,招牌菜就变为古法头抽鸡!先煎香鸡皮再浸头抽汁,皮香肉滑。旺角店因为退租即将结业,不过好消息系老板宣布即将喺土瓜湾开外卖店,主打鸡、凉拌面同小食。


图: 餐厅Facebook

 

美国过江海鲜餐厅 Red Lobster
最後营业日:4月3日

铜锣湾呢间餐厅店如其名,主打龙虾同其他海鲜菜式,总部位於佛罗里达州奥兰多。供应菜式中香港限定嘅港式避风塘炒龙虾同黄金炸大虾都好受欢迎,另一特色系同全球其他分店一样免费提供自家制车打芝士松饼!2019年抵港後不时推出新菜式同套餐,可惜最後难逃结业命运。


 

西环打卡台湾菜馆 阿元菜市场
最後营业日:3月31日

坚尼地城呢间台湾菜馆由台湾人主理,一开始主打火锅,後来转型卖台式卤味、牛肉面等等,而最多人打卡嘅就系用铜炉上枱嘅芋圆火锅!三色芋圆、仙草、黑糖珍珠等配料加上自选饮品、冰底同沾酱,影相够抢镜又可以同朋友开心Share。但日前餐厅指无奈业主加租,只好放弃离开,之後可以去姐妹店继续支持佢哋。


图: Eat_dayday

 

尖沙咀烧酎专门店 野武士烧酎吧
最後营业日:3月31日

LMF成员陈匡荣(大飞/Dave)创办嘅日本烧酎专门店,店内有过百款从日本九州进口嘅烧酎,口味选择多元化,包括米、芋、麦、黑糖、泡盛。如果对烧酌认识唔多,可以请店员按你嘅口味推介。留意返而家只有星期一至六3至7pm供应外卖。


图: 餐厅Instagram

 

榴槤饮品+饭团小店 花果山
最後营业日:3月24日

呢间饮品店之前从旺角搬到尖沙咀,依然有唔少熟客捧场,原因之一系佢哋用足马来西亚猫山王同D24榴槤制作嘅一系列榴槤饮品!榴槤奶盖四季春同猫山王沙冰都好足料,另外亦有鲜果饮品,甚至系创意枇杷膏特饮。另一特点系不时会有日本人主理嘅日式饭团。


图: JoyfullFoodstagram

 

葵广即制刈包 刈Bao台式创意小食
最後营业日:3月12日

呢间小店主打台式小食,刈包即叫即做,古早味腩肉配埋酸菜、花生粉等,香口又唔油腻,黑松露鸡就胜在松露香气浓郁。另一必食小食系香芋地瓜球,外层金黄香脆,咬开里面系绵密微甜嘅芋泥,无得输。重有甜不辣、盐酥鸡、卤味等台湾夜市嘅常见小食。


图: hkfoodphoto

 

佐敦人气无骨鸡翼包 好包
最後营业日:3月12日

呢间小店之前从元朗搬到佐敦,一样咁受欢迎,全因出品用心。面包系自家制意大利拖鞋包,松软又唔乾~最多人食嘅系香蒜椒盐鸡翼包同蜜糖鸡翼包,前者香口後者微甜,最重要嘅系鸡翼全部已经去骨,食落啖啖肉!唔怕肥嘅话入口即溶嘅秘制慢煮猪腩肉都值得一试。


图: 餐厅Instagram

 

深水埗简约啡店 Coffee of the Day
最後营业日:3月3日

呢间装修简约,以白色、水泥同原木为主嘅咖啡小店2020年中进驻深水埗大南街,系唔少Cafe Hopping嘅啡迷嘅必去之选。明亮嘅铺面加分之余,咖啡同饮品都有水准。每杯咖啡重会附上一张纸仔写上句Quote of The Day帮大家打打气!亦有咖啡挂耳包、袋装Cold Brew等。


图: 餐厅Instagram

 

西环手工汉堡 C+ Burger
最後营业日:2月28日(2月28日只做午市)

呢间小店位於港大附近,系唔少学生同街坊嘅爱店。一嚟因为定价亲民,由最平嘅素菜热熔芝士汉堡$38,到最贵嘅双层牛肉汉堡都系$68咋!二嚟即叫即做嘅汉堡够好味,自家手打牛肉汉堡扒好Juicy又有牛香。


图: super yummy

 

观塘辣汁鱼蛋 康和车仔面茶餐厅
最後营业日:2月27日

呢间喺观塘屹立36年、由车仔档起家、以秘制辣汁而闻名嘅车仔面店一直受街坊欢迎,皆因辣汁用多款香料同沙嗲酱制成,无论大、中、小辣都好惹味,配搭陈皮鱼蛋同车仔面都好夹。价钱亲民嘅车仔面则有近40款餸料,汤底味浓。另外,包含鱼蛋、鱿鱼同牛柏叶嘅沙嗲三宝、蜜汁龙须同秘制鸡翼尖都系热卖小食。


图:hhing91supersupergirl


观塘高质豉油鸡 扬英浦
最後营业日:2月23日

小店主打家常菜,无骨豉油鸡、豉油五花肉同无味精靓汤都系推介。无骨豉油鸡食落啖啖肉,鸡肉嫩滑得嚟又够入味。而靓汤就每日都有唔同款式,好似滋阴润肺嘅虫草花淮山圆肉煲鸡脚,有助抗氧化嘅黑蒜姬松茸煲鸡脚等等。


图: h0410232

 

元朗石烧吉列牛名店  The Backstreet Kitchen
最後营业日:2月13日

当年新开嘅时候,佢哋可以话系兴起本地石烧吉列牛热潮嘅始祖之一。就算之後同类舖头越开越多,依然有唔少客人会专门嚟元朗食,皆因抵食又高质!吉列牛小排外脆内嫩,可以自己用热石板再烧至理想熟度。就连汤都系切到成朵菊花咁嘅番茄豆腐汤,饭亦有加上自家饭素同紫菜,细节用心。


图: thegrainyspace

 

大坑驰名精酿啤酒吧  Second Draft
最後营业日:2月11日

大坑系近年开始多咗人去发掘美食嘅小区,当中有呢间开咗接近6年嘅酒吧餐厅,供应多款精酿啤酒,同埋新奇又有surprise嘅菜式,例如有腐乳卡邦尼、赛螃蟹面等,但最多人锺意嘅一定系远近驰名嘅大坑薯条,孜然、乾椒等调味夹埋一齐,好香好啱送酒。可惜不获业主续租,因而结业。


图: 餐厅Instagram

 

观塘文青Cafe  壹小店
最後营业日:1月30日

最特别嘅系里面有书纸墙,就算唔系文青瞬间都觉得自己多咗阵书卷味~必食推介有蛋饼同窝夫,前者唔系台式而系西班牙式传统蛋饼(烘蛋),里面会有薯仔、烟肉等配料,味道丰富;後者口感外脆内软又富蛋香,点三式窝夫就可以试匀原味、可可同年糕三款口味。之後想食西班牙蛋饼,就要去佢哋嘅姐妹店喇。


图: 餐厅Instagram

 

上环打卡咖啡  Gwee Coffee & More
最後营业日:1月18日

呢间咖啡店藏身於眼镜店当中,一到节日唔少人IG都会被佢哋嘅Seasonal Drinks洗版,通常会以咖啡加上唔同配料,再以蛋白糖、忌廉或者布甸制作可爱造型,好睇又好饮~不时又会有其他本地品牌嘅轻食,例如星期一二会有无添加贝果,周末会有适合生酮饮食嘅蛋糕等。可惜小店日前指因为眼镜店唔续租,咖啡店亦要暂别。


图: 餐厅Instagram





文:Kar、Cathy.H、Cathy.C
最後更新日:2022年5月30日

关键字
全城抗炎
结业
小店
人气店
元朗
尖沙咀
深水埗
西环
观塘
葵广
旺角
铜锣湾
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【2022生日优惠】持续更新!8月寿星叹免费生日蛋糕+串烧放题优惠
2022-07-29
【随时更新】零食速报 每周新款零食、酒品点评
7天前
【随时更新】最後倒数!2022即将结业嘅人气餐厅
2022-07-13
尖沙咀最新露营主题日式烧肉店!3700尺室内Glamping体验
2022-07-25
一年一度!全港4大榴槤放题/自助餐集合
2022-07-13