去日本、去台湾,行便利店似乎已经成为指定行程,最新嘅雪糕、甜品、朱古力等通通都充满惊喜,系咁易行个圈就收获丰富。不过,大家又唔使羡慕人哋嘅,识得搵,其实喺香港嘅便利店一样可以寻到好多宝!就等开饭仔微服出巡,时不时帮大家留意住最新、最吸引嘅新品啦。
***12月30日更新***
7-11 可口可乐 云呢嗱味
各位可乐迷,试咗呢只日本全新推出嘅云呢拿味可乐未先?好香浓嘅云呢嗱味,好甜身~
7-11 热朱古力
一到冬天总系好饮返杯热朱古力(虽然而家都未系好冻),去便利店搵啲即冲即饮嘅都好方便。Hershey’s嗰款香浓幼滑,Swiss Miss嗰杯仲有埋 棉花糖添,又暖又甜。
Circle K 少爷手工啤酒
Sanrio呢期好红呢~ 本地啤酒厂少爷都同佢哋联名合作,推出Hello Kitty雪糕苹果批手工啤同埋烈子和风香辛手工啤,两个罐装都超可爱呢~ 有别於少爷一贯精简嘅风格,值得收藏同入手呀。前者加入咗焦糖苹果,甜甜地中又有啲肉桂香;後者系清爽嘅lager,但饮到最後又会有少少辣度由喉咙渗返出嚟呢。
Circle K 酒心朱古力
呢两款由德国直送嘅酒心朱古力,啱晒酒鬼啊。一款系毡酒、一款系vodka,甜甜嘅朱古力中间一咬开,就流出醉人嘅酒香~ 嗯~ 食粒朱古力啫,唔会醉嘅。
***12月11日更新***
7-11 Hello Kitty 3.7北海道牛乳包‧花生朱古力酱
Hello Kitty粉继续要出动,呢个Kitty面包用上北海道3.7牛乳同日本面粉制作,口感松软,中间仲有个大大个Kitty头像喺度,so cute。另外有独立包装嘅花生酱同朱古力酱,要几甜都可以自己话事。
7-11 焦糖脆脆鸡蛋布丁波波
好多甜魔都好锺意焦糖鸡蛋布甸呢样甜品,便利店有得买就方便得多啦~ 用牙签拮穿个波波,再自行加焦糖脆脆洒面,又滑又甜。
7-11 朱古力忌廉夹心鲷鱼烧
夹住比利时朱古力酱嘅鲷鱼烧,虽然「肤色」就黑咗少少,但系味道浓甜,作为饭後甜品或下午茶小食都算称职。
各大便利店 Spoona纯‧凝酪
呢款乳酪唔单止换上《魔雪奇缘2》新包装,仲一口气推出两款新味:士多啤梨同热情果味!最啱就系畀小朋友当零食,因为口感滑溜够易食,亦无添加色素、无防腐剂。加上系低脂配方,活性乳酸菌又可以促进肠道健康,都好适合办公一族呀。
各大便利店 香蕉意式冰冻甜品、姜粒意式冰冻甜品
两款Gelato口感都好软滑,香蕉味Gelato用香蕉低脂牛奶饮品制造,香味同甜味都相当自然。而姜味Gelato更加入姜粒,入口冰凉但咬落就有辛辣後劲,好过瘾!
各大便利店 Dreyers柚子雪糕杯
如果各位雪糕控有印象,应该会记得佢哋夏季嗰阵出过日式柚子扭纹甜筒,而家出埋杯仔啦~ 以日式柚子酱、牛乳制成,仲有啖啖柚子果肉,微甜清香。
7-11 珍宝珠百变玩乐珠
细个嗰阵好多人都锺意嗒住支珍宝珠,而家想回味返童年嘅味道都冇问题,而且仲多多只玩具添,系人见人爱嘅Line Friends呀,一套10款,睇下你哋抽中边只啦。
7-11 天仁茗茶爆米花(新口味)
呢间茶饮店耐唔耐都会出下新口味嘅零食,最近就出咗两款爆谷,味道都好特别下,分别系朱古力铁观音味同酸忌廉洋葱绿茶味,前者甜甜der,後者酸中又带咸,不过硬系觉得配落爆谷度就有少少违和感。
7-11 卡乐B薯片(新口味)
薯片控好忙,一次过要试几款新味。香港地道美食系列嘅有虾酱味同金蚝味,不过两者嘅味都系闻落较食落突出;另外仲有美式水牛城鸡翼味,呢只就真系几似,辣辣地几好食;至於Premium版就用上Premium嘅材料——真‧黑松露!厚度加倍嘅松露带子味,香口得嚟仲好有口感。
7-11 固力果百力滋(新口味)
固力果联乘满记,推出咗两款以香港地道甜品为主题嘅百力滋,芒果白雪黑糯米有淡淡嘅芒果味,杨枝甘露呢则将吕宋芒同泰国甘柚嘅甜味混合,BTW想食到「甜品」味就要畀多啲想像力喇科科。
***11月29日更新***
各大便利店 OREO三文治
继雪糕杯同脆皮雪糕批之後,今次OREO出三文治!外层系OREO软曲奇,夹住OREO曲奇忌廉冰冻甜点,个馅食落冰冻柔滑,感觉好似雪糕!便利店有110mL嘅单件装,超级市场就会有家庭装,一盒有6件55mL嘅迷你版,细细件Bite Size更方便食。
***11月28日更新***
Circle K Lavelee 生朱古力雪糕批
喺韩国热卖嘅生朱古力雪糕批嚟咗香港啦~ 外层系特浓牛奶朱古力雪糕,内层则系生朱古力,口感幼滑,仲好浓味添,可惜太细条啦。
Circle K Lavelee 士多啤梨鲜果乳酪雪糕杯
同样都系由韩国直送嘅雪糕,折开包装袋仲有多个包装,杯内嘅雪糕,以真‧士多啤梨果肉粒、士多啤梨果酱、乳酪雪糕合成,啖啖都酸酸咪咪,少少甜啦。
7-11 Hello Kitty包点
7仔呢排除咗同Sanrio合作,储印花可换一系列嘅陶瓷碗碟外,仲新出咗两款Hello Kitty包点!Hello Kitty枫糖牛油味班戟上印有Kitty个头像,pancake松软,但味道略为甜咗少少;至於Hello Kitty朱古力包,则系成个Kitty头像造型,采用日本制朱古力夹心,都系好甜啊。
***11月20日更新***
各大便利店 日清湖池屋X谭仔薯片
山小辣唔再净系米线等级嘅专利喇,而家连薯片都有分级喇!日清潮池屋激辣魔薯最近联乘谭仔同谭仔三哥,分别推出麻辣味(3小辣)同煳辣味(5小辣)薯片,两款都系波浪纹薯片,食落有几分似原本嘅米线汤底,辣喉㗎都,同埋愈食愈咸。
7-11 明辉黄金虾味虾片
印尼期间限定口味,每块虾片都有好多咸蛋黄粉,系有淡淡咸香嘅,但咸蛋味唔算好突出。
各大便利店 圣诞增量版薯片叔叔
薯片叔叔都要换圣诞装啦,三款冬日限定包装包括原味、酸忌廉洋葱味同多重芝士,芝士控一定要试啊,啲芝士粉系mix埋咗日车打芝士、忌廉芝士、水牛芝士同巴马臣芝士4款芝士制成㗎,好浓郁。而且每筒仲增量20%,可以食多几块咯。
***11月8日更新***
各大便利店 Kit Kat袋装朱古力
秋天就系要食蕃薯同栗子嘅季节,朱古力威化都要加装,两款都系以白朱古力做外层!蕃薯馅嗰只好香甜,好得人锺意;至於栗子嗰款,就略嫌唔够突出,畀白朱古力嘅甜抢走咗啲味。
7-11 麦提莎松露朱古力礼盒
为下个月嘅圣诞做准备,各大品牌嘅朱古力陆续推出礼盒装。麦提莎仲有新口味添,内馅系松露朱古力软心加朱古力脆粒,系几有惊喜啊。
7-11 品客薯片
口痕时总会想搵薯片咬下,薯片叔叔最近出咗两只新味,一只系将已有嘅酸忌廉洋葱升lvl,变成2倍版,加入更多酸忌廉,酸得更过瘾!另一只则系美式辣酱牛排,辣喺条脷度嘅。
7-11 Tirol珍珠奶茶朱古力
大众飞佛嘅珍奶,又化身变成零食啦,今次呢只珍珠奶茶朱古力,系由奶茶味嘅朱古力,包住几粒黑糖味嘅橡皮糖,不过口感就唔太似,黑糖味唔算太浓,但有一样十足珍奶嘅,就系都系好甜。
***10月30日更新***
7-11 云呢嗱千层蛋糕
便利店内藏唔少甜品㗎,新出嘅云呢嗱千层蛋糕就系其中一款,层层蛋糕皮中间,夹满北海道牛奶忌廉,食落奶味几浓郁,系啲蛋糕皮略为厚咗少少。
7-11 天仁茗茶 爆谷
呢间茗茶店又出爆谷啦,今次系香芋珍珠奶茶味同黑糖铁观音姜茶味,前者用阿萨母红茶结全奶酱同香芋制作,带有淡淡芋香;後者则用铁观音加入黑糖姜茶,先甜後微辣,食下一甩食下一甩好快清袋。
7-11 卡乐B 宅卡B 芝士烟肉薯条
呢只新口味芝士烟肉味薯条,咸香脆口,好香烟肉味,可惜每包都太细包啦,一次过食几包都唔够喉。
各大便利店 Haagen Dazs
食雪糕无分季节,开party就更加要食啦。Haagen Dazs带嚟节日版冰袋套装,Toy Story 4同Frozen嘅粉丝记住要入手啦~ 每款冰袋内有11款雪糕,当中包括最新嘅烟韧麻糬系列同脆皮雪糕批等。另外有几款口味更有节日特别版包装,杯盖上印有祝福呢。(不过Frozen版就要等到11月尾先开始卖啊)
各大便利店 即食谷物乳酪
好多人食早餐时都会倒啲谷物落yogurt度一齐食,以後唔使烦喇,有两款新出嘅即食谷物乳酪,唔使捞,直接食就得。低脂紫米及谷物乳酪以紫米、燕麦同小麦制成,而低脂奇亚籽及谷物乳酪 则加入奇亚籽、大麦及小米,口感丰富。
7-11 饭团
饭团一向系速食求饱肚朋友嘅恩物,以後又多两款新口味选择。一款系肉松、一款系芥末八爪鱼,各有粉丝啊。
***10月18日更新***
7-11 7-SIGNATURE日本直送甜品
日本甜薯特别得人欢心,香甜嘛,呢两款日本直送嘅甜品满满薯香,甜薯忌廉泡芙中间啲忌廉都系用鸣门金时甜薯制成,成个puff松松软软又唔会好甜;甜薯忌廉瑞士卷亦好香口啊,感觉唔太腻。
7-11 7-SIGNATURE日式小食
叮一叮就有两款日式小食食啦,好方便~ 照烧三文鱼腩选用挪威三文鱼,都几肥美,厚烧玉子则用日本鸡蛋制成,微甜。
7-11 韩国直送 ACHIM鸡肉
有玩开健身嘅朋友,成日都要食鸡,呢几款喺便利店就买到,仲要系即开即食嘅鸡肉就相当方便喇。大大块原味、烟燻鸡胸肉又有,打孖上嘅香辣味鸡胸肉肠都有,而且冇白烚鸡胸咁寡,想操肌都有多啲食物选择啊。
***10月15日更新***
各大便利店 Haagen Dazs麻糬系列
最新推出嘅麻糬系列,有法式焦糖布丁麻糬雪糕同北海道红豆麻糬雪糕,前者加入香浓焦糖酱,啖啖都系甜香,间唔时仲有一两粒烟韧麻糬咬下咁;後者除咗粒粒麻糬外,仲有粒粒红豆,口感满分。
Circle K 调酒可乐
呢几支调酒专用嘅可乐,早前喺伦敦推出後,最近终於嚟咗香港!几款口味包括适合浓郁威士忌嘅烟燻味、适合搭配陈年Tequilas或者甜威嘅辛辣味、同烟燻威士忌、清淡Rum酒好夹嘅木质味。记住唔好就咁饮啊。
7-11 可口可乐苹果味汽水
可乐迷又有新嘢试,唔使飞过乡下喇,由日本直送过嚟嘅苹果味可乐,系有淡淡果香嘅。
7-11 Tapioca珍珠奶茶味软糖
好多人都系珍奶fans,咁呢只新出珍奶软糖点睇?一粒粒珍珠造型,食落又真系有奶茶味喎,烟烟韧韧咁几有咬口。下次可摸以叫杯奶茶之後配呢只糖嚟食(误)?
7-11 品客薯片
薯片叔叔又有3款新味,薯片控真系好忙,几款都系海鲜小炒嘅味道嚟,包括夏威夷风蒜香虾味、极上黑胡椒螃蟹味同虾球味,都几浓味下。
***9月27日更新***
各大便利店 雀巢 日式柚子乳酪
乳酪本身都带有微酸,今次新口味仲要系日式柚子味,淡淡酸甜,偶尔会有啖食到粒粒柚肉。一次过出晒杯装同饮品装呀。
各大便利店 百事可乐X高达
各位高达迷,今次唔系买figure系买可乐喇!话说百事可乐联乘《机动战士高达》推出别注纪念罐呀!总共有4款包括高达、渣古II、马沙专用渣古II同哈罗。兼且可以喺指定地点加钱换购一系列嘅限量版精品添——金属工具箱(7-11)、折叠伞(Circle K)、汽车太阳挡(各大油站)。
7-11 台湾阿萨姆茶叶蛋
以茶叶同新鲜鸡蛋卤制而成嘅茶叶蛋,而家喺便利店都买到啦,即拆即食又得,口感爽滑,锺意整返热佢先食都得,茶味更香。
7-11 Hershey’s朱古力批
韩国直送嘅朱古力批,以朱古力蛋糕包住棉花糖,浓甜到不得了。醒你多个食法,唔怕烦嘅就放入微波炉轻轻加热,令到朱古力同棉花糖都变得溶溶地,就更加甜。
7-11 五色波波肠、可乐鸡髀
呢几粒串串波波肠又几得意,仲要唔同颜色唔同口味,分别系德国风味、墨鱼味、香辣味、咖喱味同原味,加多只大大只甜甜地嘅可乐鸡髀,咁又一餐。
7-11 扎幌一番牛角监修牛肋骨味炒面
连锁日本烧肉店推出嘅即食炒面,酱汁以牛肉为精华,有时瘾起,唔使特登落舖头或者飞日本,都可以随手就有个面食。
7-11 卡乐B
千岛虾堡味虾条,清新微酸;咖喱炒蟹味粟一烧则有淡淡咖喱香,两者各有捧场客,留意返,期间限定口味嚟。
***9月17日更新***
各大便利店 雀巢 柠檬茶冰条
柠茶唔止饮得,仲食得!最新出嘅雀柠雪条,外层有轻轻嘅茶香,中间夹心由柠檬酱凝固而成,双重冰感,酸中带甜咁,系好熟悉嘅味道,同平时饮开嘅雀柠冇乜分别。
各大便利店 维记 烤黄豆粉姜母雪米糍
黄豆粉雪米糍本身就已经有蕨饼嘅影子,烟烟韧韧,加埋姜粉仲微微带辣,无论味道定包装,都开始带有秋意。
Circle K 维他奶 冲绳紫薯豆奶
期间限定嘅新味啊,系冲绳紫薯味,不过比想像中嘅味道较淡,紫薯控试完可能会有少少失望。
***9月13日更新***
7-11 日本直送甜品
中秋都过咗(虽然天气仲好热),但系开始栗子嘅季节啦。栗子忌廉铜锣烧嘅外皮松软富奶香,不过栗蓉味道就略为轻咗少少喇。栗子朱古力班戟亦差唔多,有微微栗香嘅,但朱古力比较抢镜罗。
7-11 十胜大福本舖甜薯夹心糯米糍
呢款糯米糍包装细细包咁,小心走漏眼啊。一包三粒,口感软腍,甜薯味超香浓啊,薯控实锺意,三粒都太少喇。
各大便利店 NESCAFE 新包装罐装咖啡
每日都要饮咖啡嘅朋友仔,去到便利店突然搵唔返熟悉嘅包装?认住新罐啦,换咗新装啊。金色嘅系香滑咖啡,啡色系香浓,黑色系浓香焙煎,而米白色嘅系欧陆奶滑。
7-11 Hot Shot全新粒粒水果茶
7仔都有即叫即冲嘅粒粒水果茶喇,选用冻顶乌龙做茶底,茶香突出,再加入以天然水果制成嘅果蓉,放埋粒粒生果喺顶,可以边饮边食。四款口味包括菠萝味、青苹果味、热情果味、红西柚味,有甜有酸,各有巿场。
***9月10日更新***
优品360 松露朱古力
松露朱古力本身都好受大众欢迎,今次推出两款酒心口味,就更加吸引。锺意甜身啲嘅就拣Baileys啦,想要有少少甘涩酒香嘅就拣Guinness嗰款啦~
***9月6日更新***
7-11 波子汽水味雨滴啫喱
呢个雨滴啫喱拆出嚟成个浅蓝色汽球咁,靓得嚟仲充满玩味。附包装附有支牙签,拮穿外层嘅包装,再淋埋特制嘅糖浆就食得。滑捋捋,系甜甜地嘅波子汽水味。
各大便利店 Dreyer’s 日式苹果吉士泡芙味雪糕批
又又又有新雪糕,今个星期嘅新味轮到日式苹果吉士泡芙味雪糕批,外层系朱古力兼有粒粒脆粒,入面包住嘅雪糕有淡淡苹果清香,蛋香同牛乳味则较浓。
7-11 日清合味道 极辛大杯面
间唔中口痕总系会想渌下个杯面食,除咗长期飞佛嘅海鲜同香辣海鲜,可以试下最新出嘅极辛海鲜同极辛猪骨味!叫得极辛,当然加倍辣度啦,冲完热水之後,就见到红当当嘅辣浮晒面lu,好刺激。
各大便利店 M&M’s 焦糖牛奶朱古力
细细个就开始食嘅M&M’s 朱古力,食到今时今日仲有新口味登场!蓝色包装盒嘅焦糖牛奶味,同其他M&M’s 一样,外壳脆皮包住牛奶朱古力夹心,而核心嘅核心,系微甜得嚟仲可以做到微微拉丝嘅焦糖软心!
7-11 7 Premium 新系列
7仔又引入咗9款日本直送嘅小食,包括有牛肉乾、洋葱脆片、葡萄柚啫喱等。其中用鳕鱼制成嘅芝士鱼肉肠,仲加咗车打芝士、高达芝士、贡佐拉芝士同帕玛森芝士4款芝士咁多,啖啖都有浓郁芝士味呢!另外牛奶、朱古力味嘅泡芙口感松软,唔觉唔觉好快就清晒一包。
7-11 乐事+卡乐B 薯片
薯片控最锺意就系见到有新薯片就要试,今期一次过有三款新嘢你哋试啊!锺意紫菜嘅就要夏风海苔味薯片啦,另外两款鸡味,Lays嗰只就系厚切大波浪嘅煎鸡柳味,卡乐B则系口感较硬身嘅鸡翼味,後者嘅酱汁味好浓,但相对略为咸咗少少。
7-11 7 Signature日式面包
唔少人早餐都锺意买个包食,呢几款新口味嘅日式面包,用100%日本面粉同埋日式烘焙方法制作,分别系富良野蜜瓜包、朱古力白玉包、日式咖喱牛肉包同北海道3.6牛乳包,口感松软,朱古力白玉嗰个入面仲有麻糬添。
***8月20日更新***
7-11 迪士尼卡通连小食
卡通嘢几时都咁有巿场,今次仲要系迪士尼添~ 呢4只毛绒公仔pat pat好搞笑啊,入面仲有包棉花糖,锺意富贵猫、史迪仔、Chip或者康老鸭嘅就啱晒。另外,小猪、伊唷、小熊维尼、跳跳虎嘅4个圆罐内,就有草莓味馅饼。
7-11 丑比头白桃甜品
呢只粉红桃丑比头虽然好丑,但又收埋收埋唔少fans喎。今期仲化身成为白桃甜品添。白桃啫喱忌廉泡芙同白桃忌廉瑞士卷都系日本直送,食得到啖啖果肉㗎。
各大便利店Häagen-Dazs Barista系列
哈根大师又有新口味喇,四款新味包括:朱古力蛋糕咖啡雪糕、朱古力蛋糕咖啡脆皮雪糕批、香浓咖啡脆皮雪糕三明治同牛奶日式焙茶雪糕。朱古力蛋糕咖啡雪糕用上巴西咖啡豆制作,再加埋浓郁咖啡酱同粒粒朱古力布朗尼蛋糕,坚果味突出之余口感又丰富,咖啡控爱死了。至於焙茶嗰只,幼滑甘香,仲有牛油曲奇粒同朱古力酱。
各大便利店 DREYER'S REAL DELIGHT乳酪条系列
成日心思思想食雪糕但又怕肥,呢个新出嘅乳酪系列,每条雪条只系得80几kcal,或者可以减低少少罪恶感?暂时有士多啤梨乳酪味同蓝莓乳酪味,都系以真‧果蓉制作,味带微酸。
7-11 富蛋手工咸蛋酥
又一台湾人气手信抵港喇!手工咸蛋酥细细块,一啖一块,但就好香咸蛋味,口感酥脆,忍唔住食完一块又一块呢。鸡蛋盒嘅包装仲好鬼过瘾添。
各大便利店 固力果红酒朱古力百力滋
细细个食到大嘅百力滋,除咗进化出多款口味外,仲进化到中间变成夹心馅。今次呢3盒分别就系红酒朱古力、抺茶慕丝同士多啤梨香草味。甜甜地,啪啪啪好快就食晒一盒。
7-11 珍珍 南乳猪手味薯片
薯片控又有几款新口味薯片要试喇。地道港式口味嘅南乳猪手,配上特制南乳粉,只味又几似食紧道餸咁,南乳特有嘅咸香令人留下深刻嘅印象。
7-11 品客薯片x小老板 紫菜/辣紫菜味
另一款新口味系联乘泰国人气紫菜品牌,两个Brand大玩cross over,出咗紫菜味嘅薯片同薯片味嘅紫菜,颇有玩味。一块块脆口嘅薯片上,可以见到粒粒紫菜碎咁,不过食落嘅紫菜味就唔算话太突出。
7-11 Oreo日本系列脆饼朱古力/云呢嗱慕丝味
成日话Oreo好甜,但又偏偏有好多人就系锺意佢够甜。今次出咗只得3mm厚度嘅脆饼,薄咗又再脆口咗。另外,同时仲推出咗红丝绒蛋糕味,颜色氹到女生之余,感觉亦冇咁甜腻。
7-11 明太子沙律x玉子烧饭团
有时贪方便或者求快,就会买个饭团填肚。呢个新口味嘅饭团应该hit中好多人嘅喜好,明太子沙律加玉子烧,用鲣鱼汤煲过嘅饭去制成米粒,啖啖鲣鱼香中又带有微辣。
***7月30日更新***
Circle K Skippy花生朱古力雪糕批
韩国大热嘅Skippy花生朱古力雪糕批嚟到香港!朱古力脆皮上面已经有粒粒花生碎,咬开里面系柔滑雪糕同Skippy花生酱。花生酱香味唔算好突出,不过花生酱同朱古力呢个配搭真系无得输嘅。
各大超市 家乐氏 X Hershey’s 香浓黑朱古力焦糖脆
韩国大热早餐一样嚟到香港,松脆焦糖脆皮加上香浓黑朱古力软心,口感丰富。而官方推介两种食法,一、就咁当零食食,二、加牛奶当早餐,各有风味。
7-11 Binggrae蜜桃荔枝牛奶
呢个牌子嘅香蕉奶可能大家都饮过,其实佢哋一直推出唔同特别新口味,好似呢个蜜桃荔枝牛奶唔单止听落就觉得够Sweet,包装仲以Pantone 2019年代表色Living Coral为主!饮落荔枝香比较突出,无想象中咁甜。
7-11 贾以食日麻花面、烧椒面
品牌旧年由台湾艺人贾静雯创立,麻花面严选日晒手摺细面,配香醇白芝麻酱同大红袍花椒油,冻食热食都得!而烧椒面糅合郫县豆瓣同台湾辣豆瓣,香、麻、辣三合一。
7-11 森永反斗奇兵夹心饼
反斗奇兵Fans必买,有朱古力同士多啤梨两款大路口味,最重要系每块饼上都印有人气角色,疗癒度十足。
7-11 维他奶薄荷朱古力味豆奶、维他青柠柠檬茶饮品
期间限定嘅薄荷朱古力味豆奶强势回归!朱古力味唔算好浓,反而真系有啲薄荷嘅清凉口感。而青柠柠檬茶就以红茶为茶底,加入青柠同柠檬,味道更清爽。
***7月25日更新***
7-11 十胜大福本舖波子汽水味蕨饼糯米糍
蕨饼糯米糍本身就好受烟韧控欢迎,呢次出咗只波子汽水味,都应该几多好奇心重嘅朋友仔会想试下。浅蓝色嘅糯米糍,食落都真系波子汽水嘅感觉,酸酸地,甜甜地,系青柠同柠檬嘅味道。
7-11 金鸭麻辣火锅什锦脆片
呢个人气品牌愈出愈多products,最新嘅有呢只麻辣火锅什锦脆片,入面有酥脆鱼皮、脆香腐皮、香辣杂菇等等,入口先系有麻嘅感觉,再慢慢feel到啲香辣味渗出嚟,都咪话唔似食紧麻辣火锅,啱晒辣椒仔女过口瘾。
***7月10日更新***
7-11 微热山丘D24榴槤蛋卷
早前台湾新出嘅微热山丘D24榴槤蛋卷,引入咗嚟香港啦~ 榴槤控仲等咩?呢款蛋卷系微热山丘马来西亚品牌FORBIDDEN嘅product,蛋卷内啖啖榴槤果肉,阵阵飘香,想静静鸡偷食应该有啲难度啊科科。
各大便利店 雀巢Pink Black 甜筒
雀巢甜筒换新装,全新Pink Black 系列,由个cone到球雪糕都系同一色系,型格全黑嗰支系曲奇味,少女心粉红色嗰只系士多啤梨味~
7-11 海胆小食系列 – 日本直送
系好多人都锺意嘅海胆啊!整埋做小 食~ 米饼又好,薯片又好,饼乾、鲷鱼干同鱿鱼丝都好,全部都系海胆制!唔算好浓但都嗒到微甜嘅,作为海胆控都会想试下。
***7月3日更新***
7-11 反斗奇兵4精品+食品
无论大人定细路哥,都对就嚟上映嘅《反斗奇兵4》充满期待,由细睇到大感情系深啲嘅。身为粉丝,呢排就要大出血啦,周围都出咗劲多佢哋嘅products。最就手嘅当然系便利店啦~ 兼且又有得睇又有得食添~ 三眼仔牛仔袋,新角色宾尼帆布袋呀等等都好靓,全部都有馅der,有啲系小麦饼,有啲系朱古力或者糖果……好想全部带晒佢哋返屋企呀呜呀!
***6月28日更新***
各大便利店 雀巢 丝滑奶茶雪糕杯
各位奶茶控又多样奶茶嘢食啦~ 呢款奶茶雪糕杯,口感顺滑,茶味甘醇突出,亦带有奶香,都几似喺茶记饮到嘅奶茶啊。
各大便利店 Pringles「在地好滋味」系列
呢期啲薯片新口味,唔知点解好锺意用菜式做变奏。最新嘅有薯片叔叔嘅糖醋牛小排同蒜头虾口味,前者酸酸甜甜,後者蒜香浓郁,有淡淡虾鲜味,都几有惊喜。送住酒食仲开心。
各大便利店 可口可乐能量饮品
巿面上都有唔少能量饮品,但要满足到可乐迷嘅,应该只有呢只!可口可乐推出嘅可口可乐能粮饮品,都真心有可乐味嘅,甜甜地,但当然都mix咗能量饮品嘅特性——微酸啦。仲有有糖同无糖两种选择,饮多几罐都唔怕肥(好似系)。
***6月26日更新***
7-11防弹少年团热酿咖啡
之前出过嘅冷萃咖啡,BTS粉丝储晒樽未先?未都帮你唔到,又有新一轮嘅樽要储啦。今次暗红色嘅呢几支,系热酿咖啡嚟,同样都系有晒佢嘅嘅靓仔样喺度㗎呜呀!
***6月14日更新***
各大便利店 Haagen Dazs 雪糕杏仁脆筒
天口热,成日都想食雪糕降降温。Haagen Dazs又出新款,仲要系雪糕杏仁脆筒!终於有cone喇!三款口味分别系云呢嗱焦糖杏仁、抹茶同朱古力杏仁,唔止脆筒边边有层比利时朱古力酱,雪糕球上仲有粒粒杏仁朱古力碎粒,多重口感,系球雪糕球细咗啲罗……6月17号起有得食。
7-11 新加坡直送 F.EAST薯片
薯片口味愈嚟愈多,呢三款新加坡直送嘅薯片,就取材自几款亚洲美食,分别系海南鸡饭、喇沙、咖喱鱼配鸡蛋印度薄饼味。是咪想像唔到?勇士买嚟自己试啦科科。
7-11 Jolly Tasty shake shake 蝴蝶酥
薯条有shake shake、薯片有shake shake,而家连蝴蝶酥都有shake shake!本地手工制嘅蝴蝶酥几酥脆,期间限定口味有双重芝士黑椒味、黑松露味,落完粉 shake几下,前者黑椒味几重,盖过咗淡淡嘅芝士;後者嘅松露味都算突出。
7-11 蜘蛛侠x 多乐脆粟米片、乐事薯片
蜘蛛侠出戏就上映,最开心一定系一班粉丝,有好多产品联乘呀!好似多乐脆粟米片波士顿香蒜虾味、辛辣味粟米片嘅包装都系spiderman,Lays嘅烧烤同海苔味薯片亦都变咗装,系型嘅。
***6月6日更新***
7-11 北海道富良野蜜瓜忌廉瑞士卷+北海道富良野蜜瓜忌廉闪电泡芙
两款甜品都用咗北海道富良野蜜瓜制作嘅忌廉,瑞士卷用松软蛋糕包住,甜度适中有蜜瓜香。闪电泡芙嘅忌廉外卖就系朱古力脆皮泡芙,不过朱古力甜味略为抢走蜜瓜香咁罗。
***5月31日更新***
各大便利店 珍珍Shake Shake 咸蛋味薯片
呢一两年好兴咸蛋整嘅嘢食,由细食到大嘅珍珍都忍唔住要加入呢个潮流,新出咗包SHAKE SHAKE咸蛋味薯片!包装内有一包原味薯片,同一细包咸蛋黄调味粉,然後shake几shake就食得。不过温提一句期望唔好太高,咸蛋味唔算好浓咋……
7-11 日本直送焦糖布甸类饮料
听到焦糖呢两个字,甜魔双眼已经发光。但唔好咁心急即刻开嚟饮住,先摇匀7下再开,焦糖布甸就变成啫喱啦,混埋北海道鲜奶忌廉,奶味劲浓。啖啖都啜到滑捋捋嘅啫喱添呀。
7-11 韩国直送 Tom’s Farm杏仁
做紧嘢时总系想搵啲嘢咬下咬下,呢几包杏仁可以系个选择,一嚟细细包,二嚟系韩国直送嘅新款口味,包括朱古力曲奇、Tiramisu同埋星际爆炸糖味,感觉几新奇。爆炸糖嗰只,口感都几似爆炸糖。
***5月24日更新***
7-11 日本直送Häagen-Dazs雪糕
哈根大师呢两款雪糕都系日本直送㗎,恭喜呢排未有机会返乡下嘅朋友仔都食得到!一打开盖就会「哗」一声,因为好多粒粒铺喺面,感觉好丰富。抹茶芝士曲奇嗰只就系抹茶芝士扭纹雪糕再加抹茶酱,甘浓细滑,阵阵芝香,系好清纯嘅抹茶味;而杏仁焦糖曲奇则肯肯定系甜魔之选,焦糖奶油雪糕都未够甜,仲要加埋焦糖酱,甜中带甘,一食即上瘾,面层有曲奇有杏仁,坚果咸香味同口感好rich。
7-11 天仁茗茶香橙绿茶雪葩+铁观音雪糕
天仁茗茶又出雪糕喇,香橙绿茶雪葩口味好啱夏天,酸酸甜甜同埋感觉几light,绿茶味就相对淡少少;至於铁观音味则使用顶级铁观音磨粉,再加入北海道浓厚牛乳,所以食落除咗有甘醇嘅茶香之外,口感仲好软滑。
***5月22日更新***
各大便利店 卡乐B – 香港地道口味
由细食到大嘅卡乐B,愈出愈多味,嚟紧5月底仲准备出两只香港地道口味——深井烧鹅同细蓉味!到底平时食开嘅烧鹅同云吞面变成薯片,会系咩味?想像唔到呢?开饭仔试咗喇,前者好重炭烧同酱汁嘅味道,不过好努力咁想像都未必食得出系烧鹅啦;後者就有淡淡虾肉味,咸中又有微甜咁,都几搞笑。
***5月17日更新***
Circle K Skippy花生酱雪条
个个见到呢条花生酱雪条都会即变心心眼,好想买返条嚟试。开饭仔都唔例外,只系一句「期望别要太高」。雪条偏软身,外层奶味较高,中间有花生酱馅仲要系粗粒嘅,咸咸甜甜咁但未算有惊喜。
Circle K 荣屋 抹茶布甸条
抹茶控心软系列,又一条抹茶雪条面世,虽然个名话就话布甸,但都唔觉有特别布甸质感,有带微甘嘅茶味,唔会话太甜咁啦。
Circle K 森永 芝士雪糕棒
感觉唔太腻嘅芝士味雪糕,配埋脆脆地嘅饼底食,口感即刻又丰富咗,可以一试。
7-11真 水蜜桃鲜果雪条
每年夏天都系水蜜桃嘅季节,除咗食个多汁嘅生果,食返条坚用果肉制嘅雪条都有够爽。呢条雪条,淡淡水蜜桃果香之外,仲有粒粒真‧果肉,系几开心嘅。
7-11 DELI FRESH全新冷压果汁
时下兴冷压果汁,呢个品牌亦推出咗两款新口味,分别系酸酸甜甜嘅芒果加苹果加热情果,同埋双色鲜奇异果汁,即系金奇异果加青奇异果,够晒清甜解暑又感觉健康。
Watson’s 苏打水
有时就咁饮水觉得好dry,会想饮下啲有味/有汽水,soda water可以系个选择。有两款新口味登场,分别系无糖零卡路里嘅盐味苏打水同低糖蜜桃味苏打水。前者少少咸多多爽,後者虽则甜低但仍有蜜桃本身嘅清甜味。
***5月15日更新***
各大便利店 固力果 芫荽味百力滋
嚟紧有好「荽」食喇!使用真‧芫荽制作嘅芫荽味百力滋,即将登场,一打开包装已经闻到超重嘅芫荽味,怕嘅人弹开,锺意嘅人就会起势索!条条百力滋都青BB,沾满住芫荽粉,食落口唔使问,重!口!味!够晒浓啊!
***5月14日更新***
各大便利店 Pringles泰式冬荫功味薯片
夏天又准备到,好系泰国嘢嘅天下,就连薯片叔叔都唔执输,推出全新泰国特色口味——冬荫功!每片薯片橙橙地系有啲色水,味道酸酸地,微辣,都几开胃。
各大便利店 雀巢 Cold Brew即饮装咖啡
每日都要饮杯咖啡嘅朋友,又有新选择喇。潮流大兴嘅冷萃咖啡都有即饮版!两款口味分别系醇黑咖啡同云石牛奶咖啡,前者无糖,尽量保留到咖啡原有香气、味道香醇;後者奶味较浓,入口顺滑。
7-11 BTS美式冷萃咖啡
有冇BTS粉丝喺度?有好消息呀,唔使飞韩国都买到喇今次!男团防弹少年团嘅靓仔样,印咗上呢款美式冷萃咖啡樽上呀,一系列7个齐晒!要储樽咯!
***4月29日更新***
7-11 百利甜酒雪糕批
各位Baileys迷可能仲对早前出过嘅家庭装雪糕念念不忘,唔使心挂挂喇,嚟紧5月1号又有新嘢出,今次系Baileys雪糕批呀,酒精浓度不过系0.4%,唔使怕醉喎,浓厚朱古力外层包住100%新鲜澳洲牛奶制嘅Baileys雪糕,坚系吸,系细条咗少少罗。
Haagen Dazs 清新果味雪糕
准备投奔初夏,哈根大师出咗两款清新口味嘅果香雪糕,分别系酸酸咪咪嘅柚子香橙雪糕同酸甜嘅奇异果芒果乳酪雪糕,後者仲加入咗真‧奇异果肉,食嗰阵连粒粒奇异果籽都咬到,好有口感,行过各大便利店同超巿就搵下啦。
雀巢黑牛朱古力
黑牛呢样经典港式饮品,嚟到2019年,变奏成雪条口味!外层系可乐味,里面系朱古力味雪糕,一啖两种味,够爽够凉,各大便利店同超巿都有。
7-11 广岛蚝酱油饭团
想食个又快又平嘅便利lunch,7仔饭团都系口袋名单中嘅一员。最近新出咗广岛蚝酱油口味,每个饭团都有原只广岛蚝,叮一叮热就食得,连啲饭都渗有蚝嘅香味,啖啖鲜甜啊。
***4月4日更新***
Dreyer's 日式柚子扭纹脆筒
雪糕以牛奶同浓郁柚子酱制成,柚子味道酸甜,超级清新。甜筒面头有杏仁碎同朱古力,口感香脆丰富。
销售点:各大超市及便利店
Circle-K 乐天荔枝雪芭雪条
混合荔枝、芒果同椰子味,配搭酸甜清新,入面仲有粒粒果肉,食落有咬口。
开售日期:4月11日
Circle-K 乐天蓝莓芝士雪条
外层系白朱古力芝士脆皮配脆脆粒,口感香脆。而内层芝士雪糕夹杂蓝莓酱,味道酸甜丰富。
开售日期:4月11日
Circle-K 乐天士多啤梨芝士蛋糕雪条
雪条分2层,上层系幼滑云呢拿雪糕,下层系士多啤梨雪糕配粒粒芝士蛋糕,一条雪条食到2款口味,富层次感。
开售日期:4月11日
7-11 Binggrae Melona蜜瓜味唧唧冰
一向主打 Melona雪条嘅Binggrae,今次推岀Melona同系列嘅蜜瓜味唧唧冰。唧唧冰蜜瓜味香浓但偏甜,沙冰口感超级消暑。
Circle-K KAKAO FRIENDS快餐食品
KAKAO FRIENDS嘅热潮吹埋嚟香港啦!今次便利店同韩国KAKAO FRIENDS合作,推出一系列嘅KAKAO快餐食品。包括APEACH夹心飞碟、RYAN三文治、拉面同MUZI杯面,仲有桃味同芒果味嘅啜啜啫喱,全部都可爱到唔舍得食啊!锺意KAKAO嘅朋友快啲去抢购啦~
***4月3日更新***
7-SIGNATURE 抹茶忌廉泡芙
7-11同伊藤久右卫门联乘推出嘅抹茶泡芙,采用咗宇治抹茶制成抹茶忌廉,茶味回甘,同充满蛋香嘅泡芙好夹。
7-SIGNATURE 抹茶忌廉瑞士卷
同样系联乘系列嘅抹茶甜品,特制嘅抹茶忌廉甜而不腻,有淡淡奶香。而外层嘅抹茶蛋糕湿润软绵,入口香甜软熟。
***3月27日更新***
7-11 期间限定点心车
话说仔推出咗14款全新点心,包括蒸饺、包点、牛肉球、鲜竹卷、烧卖等,全部一叮就食得。仲由即日起至4月3日期间,7仔茶车会游走港九新界,兼送免费点心换领券。
***3月21日更新***
7-11 珍珍XO酱炒萝卜糕味薯片
饮茶时你一定食过XO酱炒萝卜糕,而家珍珍将佢变成薯片,食落有微微XO酱辣味,但萝卜糕味唔明显,畀咸味盖过。
7-11 天仁茗茶全新口味爆谷
珍珠奶茶控召集!天仁茗茶爆谷系列推出全新口味,分别系黑糖珍珠奶茶味同铁观音焦糖味。黑糖珍珠奶茶爆谷混合奶茶同珍珠2款味道爆谷,奶白色嘅奶茶味爆谷满满香甜奶茶味,而啡色嘅珍珠味爆谷食落有黑糖甜香,两款爆谷混埋一齐食,完全呈现到黑糖珍珠奶茶嘅精粹。而铁观音焦糖爆谷入口时先会品嚐到焦糖甜味,慢慢再有茶味渗透,味道有层次感。
7-11 辣子鸡味粟一烧
锺意麻辣嘅朋友有口福啦!卡乐B推出辣子鸡味粟一烧,食落有阵麻辣香,鸡味都非常浓郁,完全呈现到辣子鸡嘅精粹啊。
759 日清湖池屋杯装薯条
合味道又有新惊喜比大家,继先之前出薯片之後,今次推出出前一丁麻油味同合味道香辣海鲜味杯装薯条。薯条非常脆口,麻油味同香辣海鲜味好突出,配上薯香都几夹,不过两款杯装薯条都偏咸,比较适合重口味嘅朋友~
各大便利店 雀巢MEGA榛子朱古力味雪糕批
之前雀巢以期间限定形式推出过MEGA榛子朱古力雪糕批,结果大受欢迎,所以佢而家回归啦!雪糕批外层系铺满粒粒饼乾碎嘅朱古力脆皮,入面系榛子朱古力味雪糕,浓郁朱古力味带淡淡榛子香,食落超夹,朱古力控万勿错过啊!
***3月20日更新***
Circle K 午後之红茶x固力果
今次系午後之红茶x固力果合作嘅产品,午後红茶同Pocky合拼埋一齐後系课室情景嚟,仲有好多唔同配搭,好青春啊,买嚟表白就啱晒!而Pocky就系咖啡朱古力味,咖啡味相对就突出啲,锺意咖啡嘅人要试下~
***3月13日更新***
7-11 一风堂 盒装生面
好多人都锺意食拉面,而家仲可以喺便利店买返屋企自己泡制啦~ 有白丸同赤丸两款招牌口味,两款嘅豚骨汤底都香浓嘅,要辣定唔辣就自己决定啦。
7-11 PREMIUM 日式甜点
最近佢哋一次过引入咗6款日式轻食甜品,全部独立包装好方便,早餐、下午茶或者随时肚饿口痕想食都得。栗子日式馒头入面仲有原粒栗子添!另一款就系鸡蛋口味,将蛋黄加入豆蓉内;长崎蛋糕松软湿润,富有蛋香同蜜糖甜味。
***3月4日更新***
7-11雀巢KitKat朱古力X迪士尼储物筒
姑勿论呢4个罐里面装咗啲咩,迪士尼粉丝本身应该已经会好想要嚟收藏,而家仲要内藏2包KitKat朱古力就更加多个藉口畀自己啦。不过只得米奇、 米妮、唐老鸭同Daisy四款。
***3月1日更新***
7-11森永岩盐牛油焦糖雪糕
又有新雪糕,呢只岩盐牛油焦糖雪糕,岩盐味好突出,入口一阵咸味过後就轮到浓郁嘅焦糖爆发,每啖都觉得好甜好甜,甜魔应该几锺意,但食食下会有啲腻。
开售日期:3月6 日
Circle K Pino琥珀焦糖雪糕
同样都系焦糖雪糕,相比下,呢只感觉冇咁甜。Pino系列继续用朱古力包雪糕,焦糖味香,而且带有淡淡奶油香,一啖一粒好似冇咁evil(误)。
开售日期:3月14日
***2月27日更新***
7-11 金奇异果味新地
7-Eleven推出新口味金奇异果味新地,原材料由日本直送,用上佐贺县当季金奇异果,使用非加热方法提取果蓉,雪糕质感有啲似雪葩,而且味道都几清甜。2月 27日起於海港城分店优先发售,海港城分店即日至3月19日仲可以享有优惠价$10杯,3月6日起於指定香港7-Eleven有售,售价$15。
7-11发售分店:
***2月22日更新***
优品360 吉百利Oreo朱古力粉
Oreo控要留意啦!呢间零食店就推出咗吉百利Oreo朱古力粉,先加入4匙朱古力粉,再倒入200ml热水或牛奶,oreo味都几突出,不过用奶冲的话味道就更香浓~
***2月15日更新***
KiKi椒香麻酱拌面
KiKi拌面喺香港推出新口味椒香麻酱拌面!独家纯素芝麻酱配上椒麻粉,芝麻酱香浓之余带有微微辣。面条系手工日晒波浪式扁面条,经过日晒风乾,面条有天然防腐效果。KiKi香港网店同埋部分7-11优先发售!
7-11优先发售分店:
Circle K KITKAT红宝石朱古力
KitKat又有新口味啦~ 趁住情人节档期而出嘅红宝石朱古力,由包装到条朱古力都系粉红色,散发住特有嘅少女心,莓香浓郁。你哋听唔听到honey嘅呼唤呀?识做啦?
7-11 雀巢 港式土炮奶茶甜筒
减肥大计又要暂且搁置啦~ 事关雀巢呢条新出嘅奶茶味雪糕好吸引。有花生碎同朱古力酱做衬托,主脚当然系奶茶雪糕啦,味道都几突出啊。
7-11 HERSHEY’S 朱古力爆谷
呢个朱古力品牌,一向深受朱古力控爱戴,佢哋时不时都出下周边product,最近连爆谷都出埋喇!香浓微苦嘅朱古力包住又脆又甜嘅爆谷,系甜上加甜嘅感觉。唔使惊佢大大包开咗就要一次过食晒,入面系独立包装嚟呀。
***1月30日更新***
7-11 日本直送 日清湖池屋盐味金箔薯片
日本早前出嘅金箔薯片,而家嚟咗香港喇,仲系情人节限定版,粉红色包装背後仲可以写嘢。每片薯片都沾满金箔,系名副其实嘅放闪呀。
7-11 日本直送甜品 朱古力忌廉瑞士卷、朱古力忌廉泡芙
日本便利店成日都有好多甜品,其中朱古力忌廉瑞士卷、朱古力忌廉泡芙呢两款,今日起香港都有售喇。前者忌廉幼滑,後者泡芙软熟,共通点系佢哋嘅朱古力味都好香浓!
Circle K 雀巢Smarties聪明豆雪条
细细个好锺意食聪明豆,有冇聪明到就唔知喇,但大个咗,估唔到聪明豆都跟住大个,变咗做一条条聪明豆雪糕!云呢嗱味嚟,顶头仲真系有一粒粒聪明豆,入面又有粒粒豆碎喎,童心返晒嚟。
***1月17日更新***
7-11 Oreo雪糕杯、Oreo脆皮雪糕批
面头有大大粒Oreo碎,加埋忌廉味雪糕,成件事好Oreo!即系点?好甜罗。仲有脆皮雪糕批,出面嗰层脆皮由Oreo碎制成,同样都系好甜身。
7-11新东阳珍珠奶茶酥/拿铁酥
珍珠奶茶舖开到成行成巿,终於进化到珍珠奶茶酥喇!呢两盒都系台湾人气零食嚟,而家嚟咗香港啦。虽然咬开冇一粒粒珍珠嘅口感可能会有少少失望,但系奶茶/咖啡味香浓搭够。
Circle K 日本乐天北海道练乳雪条
牛乳雪条可能食得多,咁炼奶呢?呢条以北海道炼奶制嘅炼奶雪条,由外到内都系白雪雪,中间仲要有流心嘅炼奶,甜甜der ~ OMG,唔减肥住喇。
7-11 日式酱油溏心蛋
流心蛋一向都得到好多人嘅欢心,依家终於等到香港嘅便利店都有啦~ 用味醂同鳗鱼汁浸过嘅流心蛋,真‧流心得嚟仲好香,重要系一开就食得,好方便。不过就太受欢迎,可能要行多几间先搵到包。
7-11 甜薯忌廉红豆铜锣烧
日本制造直送过嚟㗎,铜锣烧软熟,包住九州甜薯再包住北海道十胜红豆馅,口感丰富,味道香甜。
文:Kar、Yanica
相:Kar、Yanica、便利店网站