【美食博览2018攻略】精选必行、必食摊档 鹅肝炖蛋、鲜黑松露手工啤酒(有片)
2018-08-02

继续同大家准备定美食博览嘅攻略先~ 讲完有咩一蚊货,今次就讲下有咩必行必食嘅摊位啦,一早做足功课,唔使怕走宝。

尊贵美食区

蓝尾龙虾汤、鹅肝焦糖炖蛋

用传统配方烹调,加热就饮得,极之方便,仲要龙虾味都真系几香浓呀。每日头10名顾客仲可以用50蚊就买到!

估唔到将鹅肝加入焦糖炖蛋度整,又几match厨喎,蛋香中渗出阵阵鹅肝嘅油香,好吸引,但系要喺尊贵美食区先享受到。

摊档:欧洲食品有限公司  (3E-C02)
 

牛奶芝士

芝士控变心心眼啦,睇住师傅将个芝士圈一圈圈咁搅下搅下就搅咗成朵花出嚟!不得了!空口食又得,配面包、意粉各样都一流。另外将烟薰原味牛奶芝士配埋青提一齐食,又几醒神。青提嘅酸甜饮芝士味更加香浓。

摊档:芝士BB(3B-D21)
 

鲜黑松露手工啤酒、鲜黑松露咸蛋鸡蛋仔

手工啤酒近年大行其道,款式口味愈嚟愈多,今次本地品牌「吹啤啤」仲加入埋新鲜嘅意大利黑松露添,每批生产大约得500支,而food expo今次就限量200支,仲有现场生啤试饮,各位啤迷想试要趁早啦~

同档仲有鲜黑松露咸蛋鸡蛋仔,先喺蛋浆度已经混入黑松露酱,表面再刨鲜黑松露都未够,最後仲要淋埋白松露蜂蜜,松露控认真要试。

摊档:宏展 (3B-A20)
 

蓝莓冰酒、夏威夷椰子味Vodka

酒鬼就要mark实呢档喇,两只分别嚟自加拿大同夏威夷嘅酒,前者莓味浓郁,果香醇厚;後者系加入新鲜椰子一齐蒸馏,所以饮落充满椰香。

摊档:溢怡 (3B-B08)
 

法国Raclette热溶芝士锅贴、黑松露神级生煎包、黑松露锅贴


呢间今次搵嚟米芝莲推荐嘅祥兴记上海生煎包合作,将法国Raclette热溶芝士同意大利黑松露酱加到锅贴同生煎包里面,记得相机食完要趁热食。

摊档:义生洋行(3B-B10)
 

公众馆

台式手工咸汤圆、红烧牛肉面



之前喺餐厅到冬至先有得食嘅手工咸汤圆,今年去美食博览都食到!用圆糯米磨成米浆後揉成软糯汤圆皮,再包肉馅就成为正宗台湾古早味咸汤圆啦。餐厅必食嘅红烧牛肉面会场一样有售。

摊档:厨家班程班长饮食集团股份有限公司(1B-B32)
 

九重海鲜杯


自问贪心咩都想试嘅话,呢间就有九重海鲜杯,有齐炸鱼蛋、香菇烧、章鱼烧、墨鱼烧同鱼蓉烧卖。而且仲有五款酱汁任拣,包括醋意香草汁、浓香咖喱汁、北欧龙虾汁、麻辣花椒汁同牛肝野菌汁。

摊档:陈记食品有限公司(1A-E28)
 

Shake Shake雪糕


Shake Shake薯条就听得多,雪糕原来都可以Shake!有3.6牛奶雪糕+美禄粉,同朱古力雪糕+美禄粉两款口味,将雪糕同美禄粉摆落杯一齐Shake就食得。味道惊喜唔大,不过有得Shake Shake下又几得意。

摊位:可可贝妮雪糕有限公司(1C-D21)
 

Shake Shake虾片、Shake脆肉松斋鸡粒


又一Shake Shake食品,继旧年大热Shake Shake虾片後,今年新加Shake Shake怀旧小食斋鸡粒呀。味粉仲有芝士、咖喱味、辣味、泡菜味、BBQ味同芥末味六款任拣。

摊位:冠华食品菓子厂有限公司(1D-B28)
 

华辉苹果批、弹弹(猪)面



呢间肉丸老字号为咗推广大埔墟美食,特别将米芝莲推介华辉餐厅嘅名物苹果批带去会场!每日14:00限量发售100个呀。另外品牌主打嘅牛骨浓汁牛丸同猪骨浓汁贡丸一样有,仲可以配虾子面𠻹。

摊位:大埔振兴有限公司(1A-C05)
 

原只海参酿黑松露、芝士鱼子酱热狗


想食得豪啲?呢度就有意大利黑松露酱!加埋原只海参真系够哂霸气。另一款热狗睇落好似无乜特别,但其实系用咗拉脱维亚嘅芝士鱼子酱,香味十足。

摊档:云君品味有限公司(1A-C07)
 

咸蛋辣椒味手工面


世人已经无法阻止咸蛋变任何食品!今次有香港六十年老字号制面品牌推出咸蛋辣椒味嘅手工面,微辣带咸蛋香,就咁食都好够味。

摊档:贸丰发展有限公司(3E-A06)
 

松竹梅白壁蔵清酒


平时锺意饮返两杯嘅朋友或者都饮过唔少清酒,咁有无试过有气嘅清酒?呢度就有齐宝酒造株式会社<澪>嘅有气清酒、有气清酒(DRY)同今年新增嘅有气浊酒。会场特价$100/3支,$350/箱(12支)呀!

摊档:新大和(香港)有限公司(1B-C18)
 

Joie乳酪饮品


日本人气乳酪饮品,除咗乳酸菌之外仲额外加入钙同维他命D。香港7-8月有暑假限定迪士尼特别包装!包括原味、蓝莓味、士多啤梨味同期间限定嘅柠檬蜂蜜味。

摊档:香港益力多乳品有限公司(1B-C27) 

果醋mocktail

呷醋有益?讲紧嘅系饮果醋呀,呢个摊档仲请嚟专业调酒师,将果醋变成mocktail,加入排毒水、班兰或蝶豆花等。另外,每日3点同7点仲会免费派发指定呷醋特饮添,每round名额50个!

摊档:高格行 (1C-A10)

第29届美食博览
展览日期:2018年8月16至20日
地址:香港湾仔港湾道1号香港会议展览中心
开放时间及购票指南:官方网站



文、相:Kar、Cathy


关键字
美食博览
湾仔
甜品
黑松露
手工啤酒
小食
攻略
开饭专题
开饭仔为你提供各类型最新饮食情报及优惠,全面照顾你的饮食喜好。
本月热门
【随时更新】零食速报 每周新款零食、酒品点评
2020-09-11
全城抗炎!屋企都叹到三层架下午茶 Tea Set外送/外卖自取推介
2020-09-18
悠闲时光 9月份下午茶推介
2020-09-02
【9月生日优惠】最低至半价!生日平食放题.韩式炸鸡
2020-09-02
油麻地新开小木屋Cafe 叹西日Fusion龙虾汤乌冬配咖啡
2020-09-08