【特约分享】开饭咪嘥嘢 港大名物盐酥鸡·自助素食齐惜食
2022-01-28

「食饭咪嘥嘢呀!」并唔系口号,当你知道食物对好多人黎讲系奢侈品,你又点舍得浪费呢? 平时喺OpenRice 搵食,我哋可以经进阶搜寻拣选「咪嘥嘢食店」,依啲食店愿意主动减少剩食、厨余同实践环保。作为食客,我哋可以配合依啲餐厅食饭唔嘥嘢源头减厨余,一齐「惜饮惜食」,为地球出一分力喇。

打开OpenRice 进入「进阶搜寻」,喺「食品/餐厅类型」就可以搵到「咪嘥嘢食店」喇。

赏味轩】帮基层开饭 减少剩食.善用食材
香港大学嘅食店「赏味轩」就同学生合作,以成本价提供饭盒,再免费派发卖剩嘅饭盒畀有需要人士。业务经理Elaine 提到:「我哋会预先倾好派发数量,确保饭盒唔会过剩浪费。我好欣赏学生们嘅热诚,希望呢个举动可以帮到更多人。」其实如果我哋屋企有过剩食材、罐头,都可以自发捐畀有关机构,咪嘥嘢之余亦令更多人得到温饱。

香港大学外卖店「赏味轩」。

每日必有素食 低碳足迹
「赏味轩」主打外卖,每日提供约4款午餐选择,其中一道必定系素食。除咗可以令学生食得健康之外,素食生产过程中所需嘅能量都比肉食低,所以素食可以做到低碳足迹、低醣,环保又健康。

素食选择,日式杂锦海藻芝麻酱捞乌冬。

下午茶时段平售午餐 减少剩食
虽然菜式设计可以低碳环保,但卖唔晒始终都会浪费。Elaine 透露自有办法:「如果午餐卖唔晒,下午茶时段我哋会调整份量再以相宜价钱出售,减少剩食。而且我哋开业多年,有丰富经验,因应每月学生嘅流量调整入货量,所以每日都剩余极少食材㗎。」

善用食材 卖几多、煮几多
除咗控制食材入货量,原来善用食材都系一大学问。Elaine提到:「如果当日餐单有鸡髀、鸡翼,剩左落黎嘅鸡肉会整成盐酥鸡,尽量减少浪费。好多学生都好锺意我哋嘅盐酥鸡㗎,因为我哋即叫即炸。食落特别脆口惹味。不过最紧要都系善用食材,确保卖几多、煮几多,唔会嘥咗。」

台式椒盐盐酥鸡。

三椒沙茶牛肉饭。大厨具40年经验,设计多款惹味香口菜式吸引学生。

温馨提示 少饭咪做大嘥鬼
店内嘅餐牌同收银处都有贴上「珍惜食物,如有需要减少份量」嘅温馨提示,只要大家记住每啖饭都相当珍贵,就自然会按自己食量嗌适当份量,食晒啲饭餸唔做大嘥鬼。

店内贴上「咪嘥嘢食店」惜食海报。

自助外卖区 减少即弃废物
自律除咗可以减少厨余,同样可以减少即弃塑胶废物㗎!「赏味轩」欢迎食客自备餐具同食物器皿。餐厅唔会主动提供外卖餐具或者调味料,而系摆放喺自助区,等食客有需要时先自行取用。咁做可以大大减低即弃塑胶废物,尤其系胶餐具同埋调味料包装。除此之外,餐厅依家已经以纸饮管代替胶饮管,希望可以全方位齐齐走塑。

特设自助外卖餐具、调味料区,食客有需要先自行取用,减少浪费。

一念素食】望对环境友善 食客亲身体验惜食环保 
同样位於香港大学嘅「一念素食」就唔单只系素食,更系全素无五辛、无麸质。餐厅创办人Thomas 嘅理念好简单,就系想对环境友善一啲,而依份简单嘅环保理念就充分贯彻左喺佢嘅装潢设计同埋食材处理上面。

「一念素食」自助素食,全素无五辛、无麸质。

实现学生心愿 环保物料融入装潢
只要你细心留意,就会发现呢度小至挂灯、枱凳;大至墙壁、地板都系环保物料。Thomas提到:「设计初期,我同设计师有共识地采用大量环保物料。呢度好多挂灯都系回收50、60年代碗碟,枱凳亦系向学校回收再加工设计。」Thomas 指住天花一盏大挂灯续道:「呢盏灯系一班学生用回收胶樽制作而成,好开心我哋畀到机会一班学生完成心愿。另外店内嘅墙壁同地板用咗竹、仲有FSC认证嘅木材,咁做可以减少滥伐森林,促进森林生态可持续发展。」

(左)挂灯来自回收50、60年代碗碟。
(右)向学校回收枱凳再加工设计。

(左)蓝白色吊灯俨如云朵,系一班学生想完成嘅环保心愿。
(右)羽毛球座枱灯亦系学生作品,为羽毛球重新赋予生命。

每日两次采购食材 减少食材浪费
由於蔬菜系即日入货,对减少食材浪费都有一大好处。「一念素食」每日朝早净系购入午市所需用量,下昼两点几再依据剩货量采购。所以每日剩余嘅原材料极少,就算用净左要储存到听日先再用,都会按先入先出原则、正确控制存放温度、离地至少5cm 避免腐烂同防治虫鼠。确保物尽其用,唔会浪费。

水果存於适当温度,若即将过期会作汤底、甜品,减少浪费。

自助素食形式 教育咪嘥嘢过程
Thomas 坦言,自助形式亦系一个教育咪嘥嘢过程:「我哋接近休市时间就会停止上菜,减少剩食。但好多食客见到餐盘剩返少少就嫌弃唔想要。其实平时出街食饭,你都有机会食到最後一份餐点,但点解你又会觉得无问题?其实食物本身真系无问题,千祈唔好因为观感而浪费食物,呢个系好好嘅教育机会。」

食客按自己食量舀餸,依重量付款食几多、拎几多。

店内写上标语,提醒食客珍惜食物。

外卖提供可重用餐盘,鼓励食客饭後洗净交还。

支持「丑食文化」 蔬果生得唔靓都食得
的确,好多食材因为「生得唔靓」被嫌弃,结果出现一堆卖唔出等烂嘅蔬菜瓜果。外国早有「丑食文化」,解构蔬果稍有瑕疵并不影响营养、味道、健康。Thomas 亦身体力行同本地农夫合作,出售「有机丑萝卜」制作嘅萝卜糕。

萝卜糕插画包装,可二次使用作挥春或明信片留念。

餐厅同时向本地农场引入卖剩蔬果,制作「粒粒冬瓜露」冲调饮品及「萝卜和风甘酢渍」入馔煮餸,由食材源头开始减少掉弃,尽用食材。

「粒粒冬瓜露」及「萝卜和风甘酢渍」。

鼓励回收厨余 发电.绿化生生不息
厨余处理系餐厅同食客都需要着重嘅课题,所以「一念素食」设有厨余收集桶,鼓励食客自行收拾餐盘时,将可以回收嘅厨余同垃圾分开。

餐厅员工会运往香港大学厨余收集站,最後厨余会送到小蚝湾有机资源回收中心,利用厌氧分解技术将厨余转化为生物气发电,过程中产生嘅残余物又可以用嚟堆肥,用於园林绿化同农业生产上,将厨余循环再用,生生不息。

(左)设厨余收集桶,鼓励食客分开可回收厨余、垃圾。
(右)香港大学厨余收集站。

家中种植 重用咖啡茶叶渣
厨余处理睇落好似遥不可及,但其实简单至咖啡渣都做到。「一念素食」部分香料会摆放喺香港大学种植,员工不时将咖啡渣、茶叶渣烘乾整成肥料,亲身示范其实有机种植都可以好简单,喺屋企种可以食几多、摘几多,减碳环保之余又减少浪费。餐厅表示欢迎食客自携器皿拎咖啡渣循环再用,甚至放入雪柜、鞋柜吸味都得㗎。

有机种植香料好简单,食几多、摘几多,减碳环保。

聘请听障人士主理手冲咖啡。推荐香草果仁中烘焙,果仁味香,甘而不苦。

「一念素食」提供私房菜,以养生食材入馔。

(左)姬松茸五指毛桃椰子腰果汤。
(右)松露石榴球。以意大利果醋、黑醋等调味,酸甜开胃。

手工饺子。分别以菇菌、沙葛做出两种口感。

客户专讯
本月热门
【随时更新】零食速报 每周新款零食、酒品点评
6天前
【2022生日优惠】持续更新!5月寿星+指定月份补祝生日 叹火锅78折起
2022-04-29
晚市堂食恢复!最新酒店自助晚餐一览 低至78折、龙虾/海胆主题
2022-04-20
好消息!6间老店/人气小店 结业重开
6天前
8大必试片皮鸭!超平$178/只、特色北京填鸭三食
2022-04-27