【牛年新春】 窝心祝福 精选新年贺礼建议 轻食/甜品/面食/茶酒
2021-01-25

每年新春拜年,最头痛嘅莫过於拣贺礼。今个新年,或者大家都会减少聚会,不过都可以搵机会为你珍惜嘅家人、亲友送上贴心嘅礼物,畀佢哋感受到你嘅温暖同祝福。开饭仔都为大家搜罗咗唔同范畴嘅贺礼建议,有轻食、面食或者茶酒等,总有款啱使。

YOKU MOKU 雪茄蛋卷/曲奇

对於一众挂住日本嘅朋友仔,呢几款由日本直送嘅贺年礼盒,一定系最佳嘅新年礼物嘞。雪茄蛋卷系佢哋嘅人气招牌,以北海道牛油制作,喺铁板上烤制,牛油味特别香浓,口感松脆。特别介绍「贺年杂锦曲奇蛋卷礼盒」,除咗有呢款招牌蛋卷外,仲有两款全新口味嘅曲奇,分别系双层朱古力夹心宇治抹茶味曲奇,同双层朱古力夹心焙茶味曲奇,两者茶味突出,前者甘香後者幽香,加埋微甜朱古力馅,人见人爱。

望月 杂锦曲奇/脆脆系列

呢个品牌嘅月饼一向都有好多粉丝,嚟到新年佢哋都推出咗唔同嘅贺年曲奇礼盒,例如经典口味杂锦曲奇礼盒、日本茶口味杂锦曲奇礼盒同埋脆脆系列等。经典口味包括有伯爵茶、双重朱古力同杏仁曲奇,全部由纽西兰牛油制成,口感松化。脆脆系列则选用法国朱古力Valrhona,配松脆脆米创出柚子、黑朱古力同红桑子三款口味。朱古力嗰款更系今年新出嘅,带有莓果、坚果等香味。

Valérie 双重芝士酥条

抹茶控对於呢个品牌绝对唔会陌生,今个新年可以试下佢哋其他嘅烘焙食品呀。金装杂锦礼盒就有齐招牌蝴蝶酥、曲奇同新产品:双重芝士酥条,够晒丰富。双重芝士酥条相当脆口,以帕马森芝士同车打芝士制成,咸香芝味十足得嚟又有少少辣辣地几过瘾,原来系仲有加埋西班牙微辛烟燻红椒粉。5款曲奇口味则包括牛油、抹茶、伯爵茶、朱古力同咖啡味。

甄沾记    椰子花生糖/椰露蛋卷/椰子糖礼盒

呢个本地1915年创立嘅椰子糖品牌今年一口气推出三款新礼盒!椰丝花生软糖礼盒有独立包装嘅椰丝花生软糖,花生香气同椰子甜味好夹!椰露蛋卷及椰子海盐糖礼盒就有香脆椰露蛋卷同热卖嘅椰子海盐糖,最後椰子糖礼盒就有齐五款口味,从经典嘅椰子软糖、椰子硬糖,到椰子海盐糖、椰子海盐软糖,到椰子姜糖应有尽有。全部都无添加防腐剂或人造色素,而家去铜锣湾皇室堡一楼嘅Pop-up店就买到喇。
 

Paul Lafayet    首创Cookirons

呢个六角形嘅金牛迎春礼盒,打开有三层架,惊唔惊喜?意唔意外?第一层系品牌首创嘅Cookirons,顾名思义即系将曲奇同马卡龙混合,加入香甜嘅马达加斯加云呢嗱忌廉做馅,啖啖甜到入心。第二层有三款特色口味嘅法国精致糖果,包括Weiss 精选朱古力、牛奶榛子朱古力同开心果杏仁鸟结糖;至於第三层则系别注版金牛陶瓷碟,系收藏家嘅至爱。每个礼盒仲会附上一套十个嘅限量版利是封添,送完即止。

moono    新春纯素礼盒

呢个本地纯素甜品品牌今年再度推出纯素礼盒,以传统全盒为概念,里面有四款甜点小食:桂花乌龙黑朱古力雪球、100%海苔白芝麻脆片、「山楂」琥珀糖、黄金千层脆条,前三款仲系无麸质!「山楂」琥珀糖其实系用车厘子同豆蔻制作,颜色同味道都似返细细个食嘅山楂饼。黄金千层脆条就用自制纯素牛油制作,口感酥脆。
 

微热山丘  新年旺来礼盒

台湾微热山丘嘅招牌土凤梨酥大家可能都食过,佢哋今年就推出旺来饼。唔单止卖相改为有层层凤梨花瓣嘅圆形,里面除咗经典土凤梨果酱,仲特别加入柔滑嘅奶黄,少少咸香更带出土凤梨嘅酸甜!点解个名系旺来饼?原来因为凤梨台语谐音系「旺来」,旺来饼就可以象徵新嘅一年好运旺来!
 

鲜芋仙 冷冻芋圆

人气甜品店首次推出外卖冷冻产品——冷冻芋圆。100%台湾手工制作再直送香港,一盒有4款芋圆,包括细细粒嘅芋圆、地瓜圆,同埋大粒啲仲有馅嘅芝麻馅紫薯圆同芋泥馅芋薯圆,份量都几多下,最啱一家人开心share。烟烟韧韧,内馅唔算太甜,芝麻浓香。新年食汤圆时一齐食,都几满足。

Schoggi Meier 招财猫咪曲奇/90% 浓黑金箔松露朱古力

喺香港自设厂房嘅朱古力品牌,采用瑞士原材料Couverture 100% 可可脂朱古力制作,每粒手工朱古力都非常香甜幼滑。锺意dark chocolate嘅朋友仔,送90% 浓黑金箔松露朱古力畀佢哋就最啱,口感轻盈,内馅软心,入口即溶,食落有种幸福感呢。而曲奇则以可爱嘅招财猫做包装,榛子曲奇充满果仁香,伯爵茶曲奇茶味香浓。

Lady M   新春糖果礼盒

每个女生听到都会变心心眼嘅呢个品牌,出亲嘅礼盒都一定劲靓,呢个新年礼盒当然都唔例外。粉红色嘅五角形礼盒,打开晒啲格仔就好似一朵盛开嘅花咁,无论咩年纪嘅女性收到都实冧。内有6款贺年糖果同朱古力,款款造型精致,例如有鲜甜多汁嘅大桔柑橘软糖、士多啤梨金牛软糖、粉红杏仁朱古力同榛子夹心朱古力等。每个礼盒仲会附送同一系列嘅新春手抽袋,同 8 个相衬利是封。

Oisix 仙贝礼盒/金箔蜂蜜蛋糕

冇得飞日本买手信都唔使愁嘅,香港都可以买到东京手信。两款仙贝礼盒都好有日本手作嘅感觉,分别以江户摺纸同东京和服做主题,内里嘅仙贝全部人手制作,脆卜卜,系送礼嘅轻装之选。至於大家都好锺意食嘅金箔蜂蜜蛋糕,则换上新装。牛年,就变咗做牛牛造型,好cute呢~ 原味同抹茶两款口味嘅蛋黄味同样浓郁。

当文历饼店 红枣柑桔年糕磅蛋糕  

当文历饼店最锺意将港式嘅饮食文化加入西式甜品中,而今年佢哋推出首个农历新年蛋糕,以粘糯嘅年糕作为灵感,将年糕嘅软糯口感加入蛋糕中,再加入甜蜜嘅红枣同清新嘅糖渍柑桔,令蛋糕食落甜而不腻。新一年,新意思,收到呢个咁有创意嘅蛋糕一定好惊喜!

回味 x 南山园   抹茶·焙茶蛋卷

呢个本地蛋卷品牌今年亦同日本抹茶名家南山园联乘,推出香港限定嘅抹茶·焙茶蛋卷礼盒!南山园1935年创业,出产嘅抹茶连续三年获得最高金赏受赏。蛋卷用到嘅抹茶同焙茶粉都从日本直送,加上新西兰牛油、顶级面粉同鲜蛋,喺自家工厂沿用自家秘方制作。抹茶蛋卷茶香自然、带甘香,焙茶茶香更突出、味道微甜讨喜。全线菁云、诚品书店、city'super有售。
 

Luna Cake  巴斯克蛋糕   

Luna cake 将日系甜品嘅手艺加入传统巴斯克蛋糕做法,令蛋糕更浓郁。而佢哋最近推出期间限定嘅可爱猫喵造型巴斯克蛋糕,蛋糕采用澳洲顶级忌廉芝士同日本鸡蛋,用料上盛、口感湿润绵密,加上得意造型,吸引到爆,男女老幼都适合,用嚟送礼就啱晒,同三五知己或者一家人分享「芝」味又得~

经典面食

香港维港凯悦尚萃酒店 x 双喜粉面厂   虾子面贺年礼盒

位於北角嘅呢间酒店,联乘同区嘅老字号面厂,推出虾子面贺年礼盒。每个礼盒内有两种口味,粗幼面都有。瑶柱虾子面由原粒瑶柱同一级虾子制造,味道香醇突出;鲍鱼虾子面亦啖啖鲜香,面质爽滑。两款口味都唔需要特别加啲咩调味料,汤底已经好浓郁啦,而且煮两分钟就食得,够晒方便。

大囍庆   瑶柱花胶面

另一间本地制造嘅面厂,同样推出多款新年礼盒。佢哋嘅面食坚持无添加,唔加味精、防腐剂同硷水,但面条依然保持爽弹口感。几款礼盒包括有、经典虾子粗面、黄金蛋XO酱捞面、吉品鲍鱼面及富蚝捞面等。平时食开嘅虾子面通常都系幼身,而呢间嘅系粗面,更有口感呢。但讲到矜贵就一定系瑶柱花胶面喇,制作时喺面条中加入乾花胶同瑶柱,食嗰阵仲可以食到一丝丝瑶柱添,即刻升咗几个lvl。

茶酒类

FORTNUM & MASON 茶罐套装

呢个英国着名茶叶品牌,买嚟送畀一众茶叶迷就最啱数。其中专为农历新年设计嘅茶罐套装,就集合咗品牌最受欢迎嘅三种散叶茶:经典伯爵茶、皇家茶同埋下午茶。想再丰富啲嘅,就可以选择农历新年礼盒,除咗有茶饮外,亦有多款品牌自家嘅轻食,例如Piccadilly凝脂奶油饼乾、伯爵茶饼乾等。

Tea WG   福建春露

呢个茶叶品牌亦有唔少忠实粉丝,佢哋每逢节庆都会有新品推出,2021年新春系列茗茶中,就有款新嘅限量版福建春露,茶叶细嫩翠绿,仲散发出阵阵嘅天然蜂蜜、茉莉花香同埋雪松木余香,清新怡人。

轩尼诗  新年限量版

身边总有亲友系酒迷,送酒畀佢哋就实冇错。轩尼诗推出咗两款新年限量版,分别系红红紫紫嘅V.S.O.P,同埋火红带金嘅X.O,由当代艺术家刘韡创作。 净讲个包装已经好值得收藏,加上酒香醇厚,层次丰富,一定得到酒迷欢心。

大亚洋酒 匈牙利贵腐甜酒

酒都有好多款嘅,如果亲友锺意啲甜度高啲嘅酒,不妨考虑Oremus Tokaji Aszú 6 Puttonyos 2006 匈牙利贵腐甜酒。呢款酒甜酸度平衡,既有新鲜柠檬香,亦有烤杏仁、橙皮同奶油糖果等味道,可以单独饮用。如果做pairing嘅话,配搭水果类甜品、鹅肝或者芝士都相当夹。


重要优惠

另外,即日起凡经OpenRice购买贺年食品嘅餐饮券,输入优惠码【CNY200】,满HK$200即减HK$40,输入优惠码【CNY500】,满HK$500即减HK$120!优惠名额有限,先到先得,额满即止。
详情按此



文:Kar
相:Kar、Tom Li


关键字
新年
新春
送礼
礼盒
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
悠长假期 复活节下午茶推介
2021-03-26
【2021生日优惠】超爽着数!免费任饮任食日式烧肉/火锅(持续更新)
1天前
【只想专注做好牛腩】金融经纪转行湾仔开浓汤牛腩面店 招牌牛骨浓汤崩沙腩河
2021-04-01
【优秀开饭热店大赏2021】新店人气王 甜品Cafe过江龙健康炖汤样样齐
2021-03-31
【最平$298最贵$938】佐敦新开日式和牛烧肉放题 独家引入鹿儿岛小田和牛
3天前