尖沙咀呢间新店，可以满足大家想搵个地方放松下、影张伪出国打卡相，同享受精致西日料理嘅三个愿望啊！占地约3,600平方尺，唔同区域有唔同装修主题，好似中间放满绿色植物系模仿紧日本嘅公园，後面仲有个榻榻米走廊。主打日式同西式Fusion轻食，用三层木盒奉上嘅Picnic Box同可以自己动手烘面包嘅Toast Set最受欢迎。
餐厅内设有榻榻米座位，坐喺度食西日料理感觉更有仪式感！
MUTA Restaurant位於尖沙咀，系同区主打艺术甜品ATUM Restaurant嘅姐妹店，秉持求变、创新嘅理念，同时新店会更着重於打造一个感觉轻松悠闲、畀大家放空嘅空间。菜式绝不添加味精，而且以少盐少油方式制作，尽量以昆布高汤等天然调味去提鲜。
Picnic Box（$428/2人用）
打卡首选系呢个以木盒送上嘅套餐！负责人阿邦笑指近年大家都无得去旅行，唔少人就转而去行山或者野餐，所以就谂到呢个好有户外野餐Feel嘅Picnic Box。唔少茶点都糅合日式元素，例如英式松饼除咗原味，仲会有绿茶、黄豆粉口味。
好似珠宝盒咁打开木盒後，系放满三层嘅英式松饼配自家制果酱同精选咸甜小点。茶点会定期更换款式，拍摄呢日嘅咸点就有三文鱼子吞拿鱼最中饼、鹅肝慕斯最中饼、蟹肉伴柚子啫喱，甜点就有朱古力柠檬挞、焦糖杏仁挞、血桃挞、迷你布朗尼、马卡龙同泡芙。
鹅肝慕斯最中饼、马卡龙
虽然无特定次序，不过都建议可以先食两款最中饼以免变腍，鹅肝慕斯最中饼最有惊喜，熊仔造型可爱加分，而且慕斯柔滑甘香令人回味。而三文鱼子吞拿鱼最中饼加咗柚子酱油调味，带出鲜味又清爽。甜点平均水准都唔错，特别系血桃挞嘅血桃相当香甜多汁。套餐亦包括日式玉米奶油汤或南瓜奶油开心果浓汤，鲜果汁或茶或咖啡。两款浓汤都相当Creamy香甜，而鲜果汁更会以高脚杯奉上，打卡更抢镜呀。
（前）季节鲜花甜蔬菜沙律/接骨木花（$108）
叫得西日轻食餐厅，当然有唔少轻食选择，季节鲜花甜蔬菜沙律/接骨木花选用多款新鲜蔬菜，拍摄当日就有坊间少见嘅宝塔菜，配搭樱桃萝卜、红菜头、蕃茄仔等蔬果同味道微酸嘅酱汁，清爽开胃。加上本地农场出产嘅可食用鲜花点缀，非常吸引。
富士苹果/三文鱼/柚子醋沙律（$118）
如果无肉不欢就可以点富士苹果/三文鱼/柚子醋沙律，以富士苹果嘅爽甜同柚子醋嘅酸香平衡三文鱼嘅油脂感，同时唔会盖过其鲜味。分量十足，细食嘅女士当Light Meal完全无问题。
更多【新店直击】： |
寿喜烧牛肉蛋汁意大利饭（$158）
主菜推介之一，顾名思义牛肉以日式寿喜烧酱汁煮过，微微甜味衬托出酱油咸鲜同牛肉本身嘅肉香，识食当然系要笃穿生蛋黄捞埋一齐食，更滑溜更香口！另外值得一讃嘅系意大利饭系正宗带米心、外软内硬嘅口感。
软奶油巧克力/大黄/红桑莓（$88）
姐妹店ATUM Restaurant以招牌艺术甜品起家，呢度嘅甜品可想而知亦有水准。呢道软奶油巧克力/大黄/红桑莓就令人印象深刻，主角Chocolate Ganache口感厚滑，喺口腔融化後满嘴浓郁可可香气！配搭以大黄茎（红西芹）同红桑莓制作酸酸甜甜嘅酱汁，增添味道层次又平衡甜腻。
海盐焦糖咖啡（$48）
未饮先闻到好夹嘅焦糖同咖啡香气，咖啡选用Fruity Blend，所以入口微酸，之後系焦糖嘅苦甜同咖啡嘅香醇交织，口感顺滑。
云呢拿苹果批茶（$46）
热茶以茶壶奉上，紫红色嘅云呢拿苹果批茶带肉桂香同苹果嘅微酸，无论香气同味道都的确有还原到苹果批呀。
餐厅负责人阿邦指新店理念系希望可以令大家嚟放松一下，因而从装修到食物摆盘等都花咗唔少心机
MUTA Restaurant
地址：尖沙咀弥敦道132号美丽华广场1期地库B131号舖
文：Cathy.H
相、片：Wilfred Chui