【又到圣诞】麦兜、米奇陪你过圣诞 一家大细开心食主题乐园大餐
2018-12-19

仲有一星期就到圣诞,谂好节目未呢?仲未谂好去边?唔惊女朋友、仔女或者老婆嬲嬲咁大胆?杀到埋身啦,仲谂咁多!未谂好节目唔知点安排,又唔想四周围频扑嘅你,最啱梗系去主题公园直落,一次过玩成日机动游戏、睇表演同埋重点,食埋个圣诞大餐啦!

今年海洋公园首次同麦兜联乘,推出全港最大规模麦兜主题美食派对同主题圣诞餐;而迪士尼适逢今年系米奇老鼠90周年,所以趁住圣诞,就同米奇米妮一齐庆祝啦,户外小食亭就有三眼仔、Pluto圣诞爆谷桶。两者都一样咁可爱咁高人气,系有啲难拣嘅,睇埋介绍再决定啦。

麦兜圣诞餐  海洋公园

海洋公园嘅冰极餐厅有「麦兜春田花花圣诞大餐」陪你喺冰天雪地渡过圣诞。由头盘去到甜品,你都会见到麦兜个唛头同佢个Frd阿辉嘅出现。前菜系挪威烟三文鱼伴虾肉薯仔沙律、青豆蓉汤伴烟火鸡,甜品士多啤梨慕丝伴曲奇及鲜果直情系麦兜本尊个样添,点舍得食?

除咗搵到麦兜「变装」藏喺菜式入面之外,主菜仲会还原成个圣诞嘅特色场景。就好似威灵顿牛柳配薯菜呢道菜咁,着住圣诞老人装嘅麦兜坐喺嚿威灵顿牛柳雪橇,仲畀两只炸薯球整嘅圣诞小鹿拖住,十万个cute。即刻觉得麦兜会讲句:「妈妈啊,我唔去马尔代夫,我准备去芬兰过圣诞啦!」

供应日期:即日至2019年1月1日

米奇过圣诞  迪士尼乐园

而迪士尼嘅圣诞套餐就有超过80 款节日限定美食,包括迪士尼朋友造型嘅嘢食同埋季节特饮。甜品卖相最为吸引!例如星航图咖啡厅就有为米奇生日而设嘅栗子香草慕丝蛋糕、棉花糖松饼配自家制意大利雪糕、而圣诞限定嘅芝味朱古力冻饮就可以喺米奇厨师餐厅度饮到。几款美食嘅造型都好鬼可爱,拎住嚟同喺餐厅入面嘅迪士尼朋友自拍,即刻呃多十倍like!

有得食仲有得拎,户外小食亭有圣诞版嘅三眼仔谷桶,巿集饼店又有米奇米妮嘅圣诞曲奇,拎住佢哋周围行,肯肯定有好多双羡慕嘅眼神望住你。

供应日期:即日起至 2019 年 1 月 1 日


文:Yanny

关键字
圣诞节
主题公园
迪士尼
海洋公园
麦兜
米奇
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】零食速报 每周新款零食、酒品点评
2天前
悠长假期 复活节下午茶推介
2021-03-26
【2021生日优惠】超爽着数!免费任饮任食日式烧肉/火锅(持续更新)
2天前
【只想专注做好牛腩】金融经纪转行湾仔开浓汤牛腩面店 招牌牛骨浓汤崩沙腩河
2021-04-01
【最平$298最贵$938】佐敦新开日式和牛烧肉放题 独家引入鹿儿岛小田和牛
5天前