【又到圣诞】睇得又食得!应节圣诞蛋糕大哂冷
2018-12-17

平时食饭最後都会想食甜品,何况圣诞佳节,满足大餐之後又点少得蛋糕呢?今年唔少蛋糕店都以白色圣诞做主题,或者以可爱造型取胜,打卡一流!
 

The Cakery 冬日毛衣白色红桑子蛋糕


Pompalicious(4寸$680,6寸$1,260)

呢间以健康生活为理念嘅蛋糕店今年以冬日毛衣做主题!蛋糕外面用无糖白朱古力甘纳许唧花模仿麻花冷衫质感,切开里面系红桑子蛋糕,富果香而且带微酸,味道清新。而且蛋糕无添加防腐剂,用天然糖代替精制糖,可以食得健康安心啲。
 

Vive Cake Boutique 浪漫玫瑰圣诞树蛋糕


(左)Twinkle, Twinkle(0.8磅$580,1.6磅$1,008),(右)Let it Snow!(1磅$780,2磅$1,380)

呢间精品蛋糕就推出呢款一定会令女孩子变成心心眼嘅Twinkle, Twinkle,用粉嫩色系嘅牛油忌廉唧成玫瑰,组成圣诞树再以珍珠同星星软糖点缀,梦幻感十足!里面系红丝绒牛油蛋糕配忌廉芝士。Let it Snow!仲有传统口味甘笋蛋糕,同焦糖牛油蛋糕两款口味选择。
 

Twinkle Baker Decor 水晶球愿望树蛋糕


(左)愿望树 Make a Wish($598),(右)芝士控 Say Cheese($428)

梦幻水晶球里面系用绿茶曲奇叠成嘅愿望树呀!下面嘅树干系朱古力牛油蛋糕配榛子脆脆同焦糖脆脆,味道香甜口感丰富。而芝士控就名副其实系设计畀各位芝士控嘅,用芝士慕斯、焗纽约芝士夹心同云呢拿海绵蛋糕组成巨型芝士,加上红色丝带超抢镜!
 

La Famille 圣诞戚风蛋糕


(左)Snow Christmas,(中)Christmas Cheese,(右)Forest Christmas(各15cm$450,17cm$580)

呢间戚风蛋糕专门店亦一口气推出三款唔同口味嘅圣诞蛋糕!Christmas Cheese好似棵红色为主嘅圣诞树,特别选用日本獭祭纯米大吟酿带出北海道同法国忌廉芝士嘅香味。而Snow Christmas同Forest Christmas就分别系戚风蛋糕加士多啤梨,同双重朱古力戚风蛋糕配焦糖鲜忌廉。
 

Meltlyplace 开心果慕丝圣诞树


(左)Christmas Joy($48/个),(右)Holiday Wishes(细$48/个,大$380/磅)

Christmas Joy呢颗迷你圣诞树其实系开心果慕丝蛋糕,上面有白朱古力星星、朱古力条同金箔点缀,而切开开心果慕丝里面系红莓夹心,酸酸甜甜咁唔会太腻。另一款Holiday Wishes就系橙朱古力蛋糕。仲有Chestnut Wonderland栗子慕丝蛋糕,同Seasonal Love榛子柠檬蛋糕四款选择。
 

更多【圣诞专题】:
1. 唔想做送礼勤?精选圣诞礼物建议返
2. 【玩转圣诞食匀美食】2018圣诞市集遂个睇!
3. 任食各款海鲜、环球美食!圣诞自助晚餐精选

 
Lady M 美式经典红丝绒蛋糕


红丝绒蛋糕($68/件)

呢间嚟自纽约嘅蛋糕店今年圣诞再次推出美式经典红丝绒蛋糕,不过就换上银白色圣诞树叶作装饰,增添圣诞气氛!可可牛油蛋糕焗成嘅酒红色後,喺蛋糕当中同外层加上新鲜打发嘅忌廉同忌廉芝士。留意返分店只有切件,原个蛋糕要12月喺官网预订呀!
 

Häagen-Dazs 快乐小鹿蛋糕


快乐小鹿(细$399,中$509,大$609)

之前就介绍过外卖雪糕火锅,其实Häagen-Dazs今年圣诞仲有呢个非常可爱嘅圣诞蛋糕!蓝色嘅雪糕蛋糕旁边有两棵白色圣诞树,好有冰天雪地嘅冬日Feel,上面再加两只鹿仔,得意之余又有圣诞气氛。而里面系经典朱古力口味雪糕,浓厚可可香味。
 

东海堂 圣诞列车长


(左)圣诞列车长($268),(右)雪国企鹅、雪国秋田犬、雪国麋鹿($25/件,$65/3件)

呢间连锁饼店今年就以开往梦幻圣诞村庄嘅雪国列车为主题,点题蛋糕当然就系圣诞列车长、即系士多啤梨云呢拿慕丝蛋糕!松软海绵蛋糕当中系幼滑云呢拿慕丝,同香甜士多啤梨果酱,够哂Sweet。人数少嘅话以可以考虑买细细件嘅慕丝甜品,有云呢嗱、芒果,同朱古力三种口味唷。
 

DALLOYAU 白雪歌剧院蛋糕


(左)白雪歌剧院蛋糕($58/件),(右)迷你雪人泡芙塔($58/件)

呢间正宗法式甜品店最出名嘅就系皇牌歌剧院蛋糕,嚟到圣诞佳节就摇身一变成雪白色!一层层分别系浸过焦糖牛奶嘅法式杏仁海绵蛋糕、榛子奶油同榛子朱古力酱,顶部再淋上白朱古力。仲有可爱嘅迷你雪人泡芙塔同圣诞树头蛋糕畀大家选择。
 

美心西饼 法国士多啤梨圣诞老人


(左)圣诞雪人($258)、圣诞老人($278)、圣诞小鹿($258)

圣诞老人变成立体慕斯蛋糕呀!切开里面有法国士多啤梨的果蓉同乳酪慕丝,甜而不腻。而小鹿雪人同小鹿同样系可爱立体造型,口味分别系紫薯云呢嗱慕丝同软芝士比利时朱古力慕丝。另有一系列唔同口味嘅圣诞蛋糕同圣诞甜品,选择丰富。
 

Italian Tomato 日本士多啤梨蛋糕


(左)赤姬‧雪($330),(右)梦幻芝味圣诞($238)

每年冬天就系日本士多啤梨开始当造嘅季节,所以圣诞食返个士多啤梨蛋糕应节都系个唔错嘅选择。呢间连锁店皇牌推介就系选用日本直送新鲜原粒士多啤梨配海绵蛋糕嘅赤姬‧雪。而梦幻芝味圣诞士多啤梨双重芝士蛋糕,另外仲有朱古力黑森林蛋糕、朱古力红茶慕斯蛋糕等选择。
 

Das Gute 白色圣诞梦工场


(左)白色圣诞梦工场($270),(右)梦幻闪烁圣诞($238)

芝士控亦可以一试呢个白色圣诞梦工场,即系KIRI忌廉芝士慕丝蛋糕呀!用KIRI忌廉芝士慕丝搭配比利时朱古力脆脆同黑加仑子棉花糖,蛋糕上面仲有精致白朱古力圣诞树装饰。而梦幻闪烁圣诞就系海绵蛋糕配福冈县「甜皇」士多啤梨酱同芒果粒,上面再加新鲜士多啤梨。
 

A-1 Bakery 森林欢欣雪人


(左)森林欢欣雪人($238),(右)圣诞树头卷蛋($168)

而呢间连锁日式面包店就以雪人做主题,好似森林欢欣雪人其实系黑森林蛋糕,蛋糕当中有幼滑比利时朱古力忌廉同香甜车厘子夹层,上面再加朱古力碎同可爱嘅雪人。另一款圣诞树头卷蛋就用以秋田县米粉制作嘅海绵蛋糕搭60%朱古力,食落唔会过於甜腻。

 SIFT  法式别致圣诞蛋糕棒

圣诞蛋糕棒($36/件),($180/5件) 

精致法式饼店SIFT今年圣诞严选世界各地高质食材,推出各款造型蛋糕。就好似呢个圣诞蛋糕棒咁,用上唔少圣诞元素,将驯鹿同圣诞树化成色彩缤粉嘅蛋糕棒。香浓嘅朱古力脆面,包住松软嘅蛋糕,最啱开Party嗰阵,人人拎住一条食住玩!总共有榛子、柑桔、朱古力、红莓、云呢嗱咁多只味,梗有一款你啱!

文:Cathy
关键字
圣诞节
蛋糕
戚风蛋糕
红丝绒蛋糕
歌剧院蛋糕
雪糕蛋糕
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】便利店寻宝 每周新品速报
7天前
【2019圣诞】早鸟优惠! 圣诞自助餐推介
2019-11-27
秋风起!5间大闸蟹放题食店集合
2019-11-19
【2019圣诞】年尾叉电 圣诞下午茶集合推介
2019-11-19
【2019圣诞】约会之选 圣诞市集推介
2019-11-22