「菇」軍作戰 7間食大啡菇大蘑菇的餐廳小店（有片）

上年興食芝士、抹茶同紫薯，到而家都依然好多人鍾意食。不過，最近似乎有一種食品開始愈嚟愈受歡迎，以往多數只係喺高級餐廳先有機會食到嘅，而家都多咗小店賣。講緊嘅就係烤菇，而烤菇都有好多種唔同嘅配搭同食法，有啲舖頭用芝士烤，有啲用黑松露……

芝士通心粉烤菇　　Foodies

藍田商場有間烤啡菇店。行過舖面會以為佢係淨係賣蛋糕，但望下餐牌就會發現呢度有4款烤菇，其中3款都有芝士：焗芝士通心粉、忌廉芝士菠菜、流心蛋配巴馬火腿、同埋芝士肉醬蕃茄。$16蚊個，算係咁多間菇店嚟講比較平嘅一間，不過個菇就好似略嫌細咗少少，三兩啖食晒唔多夠喉。想感覺好似多少少嘅，揀焗芝士通心粉烤菇啦，搭喺面嘅通心粉都幾多。個菇係幾多汁嘅，但可惜芝士味唔夠出，仲要燒完啲芝士面頭食得到少少燶味，扣咗啲分。

蒜容芝士帶子烤菇　　就是烤菇

Photos by Chongjacky & westtietie
柴灣呢間烤菇店，選用嘅大啡菇全部都係嚟自馬來西亞。喺度有8種口味嘅烤菇揀，其中要講下嘅係周打蜆肉薯蓉烤菇，同蒜容芝士帶子烤菇。前者用白汁焗蜆肉，再加入洋蔥、火腿，連埋嚿菇一齊食，係好似飲緊周打蜆湯咁，菇底加埋薯蓉，飽肚啲之餘口感都豐富咗。另外，我諗你都冇諗過，啡菇配帶子呢種食法。佢粒菇上面有兩粒帶子，連埋一切就流晒出嚟嘅芝士醬，都咪話唔吸引。不過留意返，呢間舖傍晚5點鐘先開門，太早去會摸門釘。

芝士流心蛋烤菇　　Happy Toast

葵廣愈開愈多新嘢食，已經成為新西人掃街嘅指定地方之一。裡面呢間小店有兩種烤菇賣，芝士牛油果同芝士流心蛋。講到視覺效果，一定係芝士流心蛋！真流心㗎，一刀切落去，就有蛋黃汁流出嚟，截都截唔住。不過截唔住嘅結果就係令到個菇少咗啲蛋香味，食嗰陣要自己喺側邊撈返啲蛋汁嚟食。個菇都算大個，而且幾多汁。

芝士焗肉醬鮮烤菇　　M Station 1

喺元朗嘅呢間烤菇店，烤嘅都係有機種植嘅菇。同其他餐廳有啲唔同嘅係，呢度可以任你揀菇嘅大細，按返重量去計錢，最貴最大嘅百幾蚊，兩隻手板咁大嘅菇都有，就算最平嘅廿四蚊都有接近一隻手掌咁大。不過，有得揀size就冇得揀味喇，清一色芝士焗肉醬鮮烤菇，即叫即整都要等返一段時間。半熱溶芝士嘅面仲大過嚿菇，切開就會見到喺芝士同菇中間，其實仲有一層，有煙肉、火腿、香料同茄醬，係幾夾嘅，不過塊芝士嘅味就偏淡，芝士控可能會失望。不過呢間都係開5點。

黑松露薯蓉烤菇　　悠蔬食

Photos by duckduckchic & Fabulous Jay
啡菇本身其實就係一種素食，咁素食餐廳都有焗大啡菇食又有幾奇？不過係將上面啲火煙肉芝士變晒做其他素食食材啫。呢間素食店就揀咗黑松露同薯蓉嚟配大啡菇嘞。好似好清咁，但焗完出嚟又幾香喎。

牛肩胛蘆筍黑松露烤菇　　CHOO CHOO

Photos by zoolook & tungyu127
長沙灣呢間西餐廳嘅菇，除咗都係用黑松露之外，仲另外配埋牛肩胛同蘆筍，無論係口感定味覺上都再多咗一個層次。牛肩胛肉比較結實而牛味濃，至於蘆筍就比較清新，兩者有互相平衡嘅效果，黑松露嘅香加菇嘅鮮，係match廚嘅。

黑豚肉白汁芝士大蘑菇　　川燒

Photos by hunger hunter & Staice
燒肉店嘅燒菇都不容忽視。燒烤本身就係熱氣嘅，但想清少少都唔係唔得嘅，紐西蘭大蘑菇，有啲草青味，但咁先係原汁原味嘛。如果唔係，就試黑豚肉白汁芝士大蘑菇啦，燒完嘅菇已經好香，仲要三種食材嘅汁加埋一齊，一個字，juicy！

文：Kar

隨時接收最新資訊
讚好OpenRice專頁！