2014年，香港正值多事之秋，社會上喊著「毋忘初衷」，「嗰陣我哋摸住酒杯底，想做啲嘢令香港人開心。咁我哋識得釀酒，覺得釀酒開心，就想同人一齊釀酒。」城釀就從那時起，開始醞釀。

 香港城釀創辦人

Koey以前是空姐，整日都飛來飛去，只是人家飛去看風景去打卡，她就去參觀各國的酒廠。比利時的一間酒廠，她足足到訪過四次。與各地釀酒師交流、學酒，漸漸就學懂一套看家本領。至於Eric則本來從事設計工作，工餘時喜歡拿著菲林相機四圍跑，把看到的人、事、物統統也攝進鏡頭內，不為甚麼，只求留個紀錄。

時代中的兩粒齒輪，適時遇上洪流巨變，就借勢重新組件、整裝。他們開班教釀酒、開啤酒零售店，再設立酒廠，生產屬於自己的一批酒，一步一步走過來。「我哋為呢個城巿釀啲酒，咁就叫城釀。同埋都係食字嘅，『承讓』。」他們更希望這城的人可以一同參與其中。故曾有過客席釀酒師系列（苦瓜味「空手魂」、花旗蔘味「高慶坊」） ，讓自釀者的啤酒也能推出巿場。

我城正在…

港女、港男、窩居……城釀推出的手工啤酒，一直都以「貼地」為題。最近，他們更推出一個名為「我城正在」的計劃系列，欲以相片和啤酒說香港故事。大事的緣起從來都是生於小事。去年某日，Eric如常乘搭巴士，忽爾想起幾年前一齣電視劇的經典對白：「『This city is dying』，我諗大家香港人一定聽過。咁但係係咪真係dying呢？我喺搭緊車度發現原來有好多嘢係進行緊，係進行式，呢個城巿發生緊嘅嘢，唔淨止係政治，仲有民生。」「我城正在」應運而生。

那這個城巿，這個我們身處的城巿，又正在怎樣呢？

Koey 認為我城正在「指示」。街道上會有指示牌、公司裡會有上司下指示……「所有嘢都要方向，要有人畀方向。」於是就出現了這支瓶身印著路標的印度芒果Pale ale，它有芒果的香甜，中和了啤酒花的苦度。

Eric則表示我城正在「沉睡」。酒瓶上的那隻貓，是Eric的主子。「純粹係有一日我起身，見到隻貓仲瞓緊覺，就覺得佢瞓得好舒服，但我哋長期唔夠瞓，成日會諗瞓醒要做啲乜，有冇一刻真係瞓得腍？我都希望香港人有一日可以瞓到咁舒服。」這款是哈蜜瓜IPA，用上帶有清新花香及果香的酒花，並加入哈蜜瓜釀製，後勁帶甜。

香港人的我城正在…

 我城正在逆流

兩人均認為「紀錄香港係一件幾重要嘅事。」哪怕將來「香港」變成怎樣，甚或不再存在，都會可以透過記錄知道香港、或香港人的故事。自認喜歡把無聊事認真做的Eric，此刻收起日常的嬉皮笑臉，認真地說：「記低呢個香港所有進行緊嘅事情，我哋好似做記錄者咁樣，而個媒介就係啤酒。」問及指示、沉睡、逆流，有否其他隱藏密碼，他倆表示每個人心中都有不同的感覺，歡迎大家隨便「對號入座」，「你睇呢個字諗到啲乜，就係你點睇呢個城巿。」

系列還沒有完，紀錄的也不只是他們二人眼中的香港。他們希望每個香港人都可以參與，或提供相片、或提供酒名，總之「你見到啲乜，就紀錄落嚟，擺喺酒度，話畀全世界聽」，共同紀錄當下的香港。

「做一支啤酒其實都好簡單，唔會話太複雜，但你背後可以表達到嘅嘢，係會比佢嗰支啤酒本身嘅價值更加多。」啤酒，除了讓人尋開心、解愁腸，原來還可以講夢想、記大事、錄時代。

部分提供城釀的餐廳：The Oak Crafted、何蘭正、Kowloon Taproom、WOFT、Hoppy Junction、Amico

文：Kar
相、片：Tom Li