係南豐中心睇完醫生急急去醫肚。 新之城以前太興位置開咗間新餐廳，價錢正常，環境舒適明亮 一黎問下邊款唔使等，咁安全啲叫個肉燥扒飯啦😉例湯即上，一啖落口，咦咁清嘅，好有青紅蘿蔔味喎......唔通無落師傅？係就正喇，唔驚會口渴。多一個靚湯選擇 🥰 個肉燥好好味連埋隻靚蛋差不多撈晒個飯黎食。 但都唔好忘記塊大雞扒 見佢煎到脆脆咁，估唔到又保持到有肉汁又肉嫩，爭少少咸味啫，定係我病病地口寡寡呢？ Any肥最多好番再去試過咯 😆7點開始有早餐添喎。 今次試新店滿足❣️

新都會又有新店, 撘扶手梯發現有花籃喎, 即刻入去試下啦, 話晒同名三分親嘛 鋪頭光線充足, 夠舒服又唔焗促.  仲撘咗句 Fran Lebowitz 名言, 食物應該有番啲要求吧. (我諗) LUNCH SET 都算多選擇, 包個湯同咖啡, 加10%的. 價錢係新都會黎講都算好合理.  初試牛刀就揀兩意粉先. 
蕃茄羅勒海鮮意粉: 份量夠一個OL食, 蕃茄汁唔會過酸或太竭,  意粉好煙韌, 啱晒鍾意食爽意嘅大胃同事.
呢個燒汁意式安格斯牛肉丸意粉, 粒肉丸值得食多一次, 啲肉唔係機打死實實咁, 又無勁濃調味料, 仲好軟熟. 略為淡味少少, 加番啲TABASCO, 即刻醒胃好多.  下次可以試下個BURGER 同ALL DAY, 見隔離枱叫咗, 份量好澎湃下喎. 

以前三洋改咗做露露冰室 格局唔同，有裝修，座位濶落。 食過兩三次lunch, 水準都唔錯，但無set lunch, 問過收銀，佢地話餐牌未定，可能會有嘢改喎。 第一次去食，無咩人等位，午餐時間二人可佔四人卡位，夏天唔怕撘著個香味人 😅 第一個海南雞飯，份量大，雞又滑，超班過新都會間少爺×8，仲平足一半。 煎肉餅飯，極力推介，雖然40幾蚊唔包嘢飲，但個肉餅超正，夠大塊，肉唔係林pad pad，而且煎得外脆內嫩，食過翻尋味 第二次就試個雜扒飯，雖然撘咗隻蛋同火腿，但塊豬扒係好味喎，唔會鞋口，又有醃過。反而塊雞扒就普普通通，不過不失。 第三次食煎蛋豬扒飯，嘿嘿，明顯係用黎比拼敏華嘅😆😆。 結果係露露勝出，成個飯唔油膩，唔會滯住滯住，而且份量相約，價錢又相約。 見呢到啲咖哩好似好多人叫，搏一搏，就出事。咖哩牛腩就太韌，後生都咬唔開。但個咖哩好餸到飯，有少少辣，惹味喎。 影埋宜家個餐牌先，之後睇下佢係咪改嘢。

見到欣榮㗎啡室，即刻諗起懷舊冰室 係荃豐呢帶商場，一個小鋪位，午餐時段要等下咯 咦，無套餐喎，單點就可以加10蚊叫嘢飲。見到好多人叫咖哩雞飯，份量唔算多，一碗仔咖哩加一碟飯。啱細食之人。 先講飲品， 有好多吸引嘅，好想試。見到人哋飲嗰個奶茶紅豆冰，好小地方有喎。 但我最終係決定試杯朱古力咖啡，唔太甜，溝埋好飲過星×克喎🤣 回鍋肉豬扒出前一丁，ok呀，無話好出色，ok呀。 一杯嘢飲加一丁，47蚊埋單，有杯特飲就更加好嘞

上兩星期第一次去試，由於感冒未試真， 今次約埋為食仔三個人再試一次 由於經常無位，記得要預先book枱 前菜海蜇頭，夠爽，有少少辣少少酸，開胃小食 白胡椒豬肚杏仁湯， 好夠味呀。一煲三個人分可以有六碗。杏仁味又夠香，白胡椒又夠辣。 而且夠老火，啱曬為食仔口味。 麥皮蝦球，粒粒有拳頭咁大， 甜甜地又鹹鹹地，係蝦球有啲過咗小小火喉，但係整體嚟講係好食嘅 呢個好似叫做海鮮豆腐呀，其實應該係叫嗰個廚師推介鐵板豆腐會好食啲囉，呢個就太過簡單冇乜特別 牛油雞翼，細碟都有八隻，夠曬三個人食。熱辣辣上枱，夠脆夠香口，可以encore。 誠意推介黑胡椒炒蟹，呢份係中份，三至四人份量， 蟹蓋唔算多膏，不過黑胡椒好夠味，肉又夠嫩。 馬拉盞炒通菜，又係略甜，少少怪，唔推介 炒貴刁 麻麻地，個粉唔夠滑 椰汁西米湯圓糖水，幾好味，不過怕甜的就唔好叫咯 仲有，最重要係兩次都無話限時交枱，可以慢慢歎住食

久唔久先黎一次，欠違了的荷曄庭， 對上一次已經係三年嘞 環境依然清靜，六點鐘坐室外，由日光食到夜晚。情調一流。皆因，食客寥寥可數。 好，落單先，田螺....無貨。。。。咁$29x 12oz肉眼吖，侍應即刻真心誠意比忠告我地，肉眼嘛，麻麻地，不如叫$69x 32ozT骨吖,或者$69x小牛排， 咁奇怪嘅，邊有侍應咁倒公司米。 我地覺得32ozT骨唔夠食，所以照叫每人一客肉眼。 一客鵝肝有兩件，夠厚但煎太乾了，無咗入口即溶 一客凱撒沙律，普普通通 跟住酥皮龍蝦湯，篤穿個皮，個湯竟然一半都無，嘩，咁慳水㗎。味道.....比一田買個龍蝦湯仲淡 主菜黎嘞，五成肉眼.....咬落去.....嘩，鞋過鞋底，兩位愛牛之人一大半無食，反而兩位女士就本著唔好嘥就頂埋去。實在又鞋又無肉味，邊值咁多呀 唉，礙於地方太偏遠，要再另覓糖水確難搵，唯有試埋佢啲甜品。個$48心太軟，真係好難食呀，佢好似用啲奶粉開水，加啲無朱古力味奶粉整出黎，oh no, 不如唔好賣啦，咁無heart, 食到我地ee鞋鞋。 呢個$3x椰汁紅豆糕, 紅豆甩晒出黎，又無豆味。 好失望呀，佢係咪轉咗老闆呀？唔好用荷曄庭呢個名啦。 我地2011年第一次黎食，比咗9個讚。 今日?1個讚都兼多。

一班老女同學走去一間young line girl boss, 試下promote緊嘅一送一龍蝦包, 同埋成set好靚嘅3層架套餐. 由於好多唔同嘅選擇，避免人多口水多所以交由兩位高效率同學挑選，嘩，好多可以揀喎。 五女一男，叫兩set 再加1送1龍蝦包。係夠食喎。 drink list 都算多款，呢杯hot coffee就普普通通。 龍蝦包果然一絕，麵包雖然有烤過，但咬落仍然軟綿綿。龍蝦肉雖然係散修修，但份量唔少，配埋白醬汁，唔膩喎 我地被安排咗馬蹄型卡位，可以自成一角，不過檯面有限，2份套餐已經放滿張枱。令到我哋嘅一送一龍蝦包要係廚房焗住，等清咗碟先可以放低。可能咁樣濃咗包面 茶漬飯又幾清新，當面將熱茶倒入縠物飯內。炸蝦變成大配角了 慢煮三文，ok喎，肉嫩，但襯底薯蓉好creamy 好食 呢個Miss 70s Cider, 就過甜，唔多有cider 杯杯沙律有四大杯，樣樣都新鮮，配汁酸酸地，啱晒女仔口味。健康之人最好選擇 呢杯Black boss coffee 原來係竹炭咖啡....只能講中伏

未食過湯加, 見個名以為有湯飲, 點知原來係湯飯湯麵.
座位逼逼地, 肥少少會座唔入卡位. 侍應姐姐比譚仔口音仲難聽得明.  而且樓面人手非常不足, 叫極都無人理, 黎到就黑晒臉. 係經理黎confirm order就好啲。
淮生麵好似幾健康咁喎, 一於試下, 幾爽吖, 但一飲個湯底, 咦~~~ 有師傅.  即刻唔使諗有第二次. 食完口渴. 另外加8蚊（定10蚊）換兩粒雞腿.  無錯, 係兩粒, 炸到乾晒的兩粒雞腿.......
而個湯飯, 係唔可以叫小飯, 餐牌上寫住可以添飯, 咁我地諗住有得添就有得少啦, 唔好食剩嘢嘛. 點知姐姐話, 無呀, 無得少呀. 但又解釋唔到點解喎.最終係要等上菜先知, 原來個飯係一砵砵, 唉, 溝通上真係有啲困難.  除白飯，可以選三色飯，又幾健康喎。
整體黎講, 唔係難食, 只係味精重啲. 

係openrice搵buffet介紹，就見到呢間，有7折添喎，一行11人黎試下啦 6:20已安排入座，座位唔算多，而且寬敞，燈光柔和，幾好feel 趁開動時人少少，即刻攞刺身先，除 希靈魚無試之外，其餘5款都ok啊。隻龍蝦鉗就麻麻地，無味。 細粒壽司略嫌啲飯太硬 每一位客人都贈送半隻龍蝦同一件和牛，但可能stand by 太耐，件和牛比牛小排還韌，老到不似和牛。而龍蝦亦同樣焗得過火了。 冷盤有生蠔喎，每次出小量，每人只可攞3隻，珍珠蠔，無咩肉，一般水準，唔使添食嘞。 羊架夠嫩，可以encore. 至放廚房推介的豬肋排，鞋過鞋底，一口都嫌阻訂。 中湯幾朋友話好味，西湯就稀咗啲，我就搵冬蔭功湯，唔太辣，啱怕辣嘅我。但食開辣的朋友就話太咸。 跳去甜品格，先黎2球double chocolate, 雪到死晒，一筆就散晒一細舊，咩鬼雪糕😣 仲口多多叫埋窩夫，嘩，厚粉，又硬，又唔好食。千祈唔好試。 嘢食選擇唔可以話少，長腳蟹都幾好，但令人回味的却是零。

睇完tbb曹永廉介紹呢間大排檔, 梗係搵機會去試下啦. 好彩有訂會, 唔係有排等呀, 勁多人. 大連鮑魚: 冇諗過原來係凍食 但係粒粒都入味, 少少辣又夠彈牙 呢個大蜆胡椒豬肚湯, 胡椒味夠濃喎,好正呀. 凍凍哋飲返碗湯暖胃嘛. 嘩,呢個椒鹽鮮魷, 我覺得真係麻麻地喎.  個炸漿多到爆,  好難先搵到啲啲魷. no good. 呢個金銀蛋豆苗, 一般般啦, 都冇咩特別驚喜 呢一個潮州炸蝦棗: 拳頭咁大粒, 但係蝦棗呢就唔夠爽, 而且仲有少少霉,  同九龍城買返嚟嗰啲差得好遠呀, 失望 舖頭推介呢個草莓骨: 又幾好食喎甜甜地,  攞嚟送飯就一流. 呢個係主角頭抽雞:  肉夠嫩, 鼓油甜甜地. 但係要成三百又要等三十分鐘, 仲要叫一隻, 因為唔知有冇第二張枱夾到半隻. 我就覺得唔須要咯.