星期六經開深水埗，諗住深水埗多美食，特登上黎搜尋下，見呢間賣相唔錯，最後特登去搵間黎試下。 當日一點左右去到見門口有幾個人等緊，都照拎飛等，等左10分鐘左右就有位，咁啱前面果枱同我一樣都係3個人，首先入到去見到有張四人枱，前面果枱走左埋去，個侍應阿姐叫佢地唔好坐果張，坐入面張卡位，咁我地咪自然走去坐張四人枱，點知一坐低阿姐又話叫我地坐返入面張卡位，因為前面果枱話唔坐⋯當時我已經覺得間野安排坐位好差，人地唔坐就比我地坐呢句真係好難聽，仲要一句唔好意思都無 算啦，反正都無得揀，咁我地就入左最入近廚房隔離張「卡位」，一見到個位就明點解上一枱唔坐，果個根本唔算卡位，有一張卡位嘅凳但係兩個人坐會勁迫，對面就係坐圓凳（因為對面係走廊），一埋去阿姐呼喝就話「兩個坐入面一個坐出面」，因為我另外兩個係男性朋友，佢地自然讓我坐卡位果邊，但如果坐多一個男人入黎又會好迫，所以佢地兩個想坐走廊果邊，但係凳又得一張。 跟住我就燥底問阿姐一句「你想我地點坐呀？」，果度啲阿姐真係「唔話得」，即刻中氣十足應我，「得啦得啦！比隔離張卡位你地呀！」 我真係未去過一間餐廳到我發火出聲佢都依然「未驚過」咁嘅態度回應我 最後坐左隔離張真正嘅卡位，我地叫左兩個午餐，一個芝士豬頸肉撈丁，飲品果度又落錯，同佢講又唔認衰，悔悔氣氣就換返杯啱嘅俾我哋 先黎嘅係我嘅芝士豬頸肉撈丁，芝士味濃，賣相都唔差，連一塊厚多士$48，不包飲品。當我食到一半，發現朋友果兩個午餐仲未到，連啲侍應阿姐都望下我地張單，我朋友就好聲好氣問阿姐「個午餐仲要等幾耐？我地唔夠時間食喇，一係求其轉一個飯比我地啦」 個阿姐就嗌入廚房問兩個午餐F得未？個廚房佬好大聲嗌出嚟特登講比我地聽「燒春雞要燒架，同人地講至少要等15分鐘」，個阿姐又再語氣唔友善同我地講「我地係即叫即燒架，所以要等」我即刻大聲同我朋友講「嗱！一陣試下係咪即燒喇」點知個廚房佬仲繼續駁「燒春雞梗係要等耐啲架啦！唔係點叫燒呀？」我朋友聽完即刻著火，大叫取消果兩個午餐，淨計飲品，或者照計兩個午餐價錢，錢我地照比，不過兩個餐唔洗黎！啲阿姐聽完都一啲歉意都無，真係幫我地改返兩杯飲品價錢 我真係未去過一間茶餐廳啲態度差到連廚房果個都會出聲話啲客，相信連「澳牛」都做唔到！

放假前夕，難得出外吃完飯時間尚早，突然很想吃碗糖水，但由元朗廣場走到松記實在太遠⋯邊行邊走沿途看到這一間糖水舖，看見門面和相片賣相不錯便打算試一試。

我們三個人每人點了一個糖水⋯

先來的是椰皇燉蛋白雙丸，因為朋友說很想食芋圓，怎想到一放進口已經有中伏的感覺，第一次吃芋圓是甜的，而且整個燉蛋白都只有甜味，完全蓋過了芋圓的味道再來第二個叫星空的甜品，其實是楊枝甘露加龍眼肉，本來打算點一個最普通的甜品會最保險，怎想到楊枝甘露沒有楊枝甘露味用芒果沙冰做底，加幾片芒果，再加幾粒龍眼肉，而且只有食到甜味⋯最後一個甜品亦是楊枝甘露⋯除此之外⋯發現這間糖水舖異常多蚊，隨時隨地都會在你面前飛過，很影響食慾呢總括來說，我認為街邊宵夜檔的糖水比較好食吧！

一早已聽聞要等好耐位先有得食⋯尋日見時間尚早，5點半左右所以照拎飛等位⋯當時叫到6號，我係15號。等左20-25分鐘終於可以入座，入座前講明食75分鐘，佢安排我地坐outside,但我望到原來inside仲有十張八張「吉枱」，點解唔比人坐，要人等咁耐呢？
我叫左3碟，2杯飲品⋯食完第一碟「烏卒卒」，第二碟都未上，跟住侍應走過黎收碟嗰陣問我地啲嘢係咪到齊？我真係O咀隻碟都未用過就當我地食飽？我應佢「第一碟咋喎！」btw,條「烏卒卒」係好味嘅！

第二碟炸雞咖喱麵，味道唔錯
到上薄餅個碟，食到最後一塊，我一拎上手佢就收左我隻碟，我話等等先⋯佢真係企係度等收我隻碟我話你轉頭先收得唔得呀？佢先行開⋯隻碟有D酸忌廉用黎點D薄餅架嘛!人地未食完洗唔洗收得咁快！
點知轉個頭又有第二個人走埋黎又想收走隻碟，「食完喇可？」我發惡話「未呀未呀！」，佢先走開！今次呢個侍應就係食完第一碟當我地食晒個位！
到我真係食完塊薄餅佢就9秒9收晒我地枱D野，隨即抹枱（呢個行為好明顯係想趕人走，亦都係非常無禮貌，因為當時仍未能75分鐘！）
隔多5分鐘就有人問我地要唔要叫甜品，唔洗就賣埋張單⋯當時仍然未夠75交枱的，不過已經唔想再留喺度對住佢地
臨出門口前經過inside,我發現之前個幾張「吉枱」依然唔入人坐，但出面已經企滿人等位⋯究竟佢地呢間餐廳係咩經營模式？侍應多到一字排企喺度傾計！入座非常慢，收枱非常快！