第009期 2018年2月
香港人對打邊爐情有獨鍾，無論係一家人定成班Friend子圍爐取暖，都係咁溫馨咁有樂趣！以前打邊爐，係為咗冬季禦寒，坐係大排檔圍住個炭爐，有菜有肉有魚旦，簡簡單單，新鮮就夠。但係精於飲飲食食嘅香港人點會咁易滿足，時至今日簡直集大江南北之大成，實行一年四季都咁烚下烚下。
港式‧一字記之曰「鮮」
港式打邊爐最注重食材新鮮，除咗肥牛、海鮮外，湯底都係一大主角，由最傳統嘅清熱湯底，到養生嘅中藥湯底都一樣有大量嘅捧場客，係火鍋界的中堅分子。
川式‧重口味出沒注意
川式嘅火鍋一直畀人嘅印象都係深不見底嘅花椒湯底，但係近年都興起咗一啲新食法，就係先上主菜再打邊爐，食材全面咁吸收湯底嘅精華，啱哂重口味嘅Fans !
日式‧平衡飲食最緊要
Shabu Shabu湯底比較清淡，食材中加入大量蔬菜，啱哂注重飲食健康嘅Hotpot Lovers! 正宗嘅Shabu Shabu食法係先淥肉，再淥冬菇、大葱、半份菜，如是者肉菜相間，最後加白飯、雞蛋或麵同煮，好balance呢！
韓式‧無定向新食法
近年韓流對成個亞太區影響有幾大都唔需要多講，韓式餐廳開完一間又一間，韓式火鍋做主題嘅餐廳融會埋傳統食法，好似部隊鍋、芝士鍋、蒸氣火鍋，諗起都胃口大開！
每1隻
44 kcal
