平時食開另一間日本過江龍壽司店，今次難得預約到，就梗係要試下啦。預約左18:15，18:00去到，未有卡位，等左5分鐘左右就👍🏻。 舖裝修好日系，簡潔光猛，座位寛躺舒適。 一坐低就可以即刻點食物，出餐速度快，2分鐘內已經出第一碟。最開心係有章魚燒👏🏻，不過味道一般，章魚粒略嫌太細。拉麵反而有驚喜😲，$29一碗，以為只係普通貨色，點知湯底夠味，拉麵又夠爽口，性價比高👍🏻。適逢做緊蟹祭，試晒全部推廣壽司🤪。特大蟹棒真係冇得輸，鮮甜蟹味，有海水味又唔會咸💯。其他蟹肉壽司一樣咁出色，壽司飯又係要讚👍🏻，軟硬度，熱度剛剛好，醋味又唔會好濃。另外仲食左蟹肉茶碗蒸，不過唔太出色，蟹味唔夠突出。大家如果預約到，不妨一試。

估唔到置樂附近都有高質cafe，見網上評語唔差，所以去試下，飲下咖啡，又有熱食，竟然有驚喜添。 去到咁岩二人枱full晒，得返兩張bar枱，諗住都係飲杯咖啡，食少少輕食，冇所謂啦，照坐。我地兩個人，叫左Espresso Tonic，Cafe latte，松露炒蛋bagel，蘑菇雞肉批。 杯Espresso Tonic好有驚喜，之前飲過幾間cafe，今次係最好飲！Tonic唔會搶左咖啡味，平衡得好好，同埋好夠凍。Cafe latte一般水準，都知道唔會有太大差落。松露炒蛋bagel，好香松露味，蛋夠滑，不過bagel略嫌硬左啲，唔夠口感。蘑菇雞肉批個饀好正，夠豐富，批皮夠脆口，不過甜左啲。 下次去開置樂既街坊，可以黎試下，價錢親民，食物質素中上。

約左朋友喺土瓜灣交收，好日都唔去土瓜灣，難得一去，當然上網睇下有咩好食。見到有幾間都唔錯，中式、西式、泰式都有。好似好耐冇食過泰國野，所以最後揀左呢間。 果然冇揀錯，一間唔起眼既舖頭，但味道好正中，唔似九龍城一般泰國食店。 夏天食煲仔飯真係第一次，呢個冬蔭功海鮮煲仔飯好味到呢。。。又唔會好辣，冬蔭功味道又夠香，重點係有飯焦。 蝦餅皮蛋又係第一次食，原來皮蛋加蝦餅係咁好味。炸到好香口既蝦餅，上面放皮蛋，脆得黎又食到皮蛋香。 去開土瓜灣既朋友，值得一試。

上網見啲食家話呢間蝦拉麵好掂，今日去開尖沙咀，就記得要黎試下。去到舖頭對面街，見到落左閘，好失望，行過去閘前睇下張告示講咩，原來搬左對面街，即係正正我地頭先企果個位置。好彩行過去望一望，唔係就走寶了！ 舖頭唔大，咁岩都仲有張人枱，所以可以即刻入座。店員細心話今日淨係蝦拉麵，其他款式都冇晒。冇所謂，我地原先都諗住係食蝦拉麵，另外仲加左個醬油青口小食。 先講拉麵，店員放低拉麵後，會喺你面前落蝦油，落完之後已經聞到好香蝦味。食麵前先飲啖湯，好濃郁，同埋個湯好杰身，仲有啲蝦米粒。拉麵本身唔會煮到好淋，夠爽口。最欣賞係麵入面兩隻蝦，蝦身已經脫晒殼，肉質鮮嫩，彈牙。 醬油青口反而冇咩驚喜，醬油有少少辣辣地，都好食既。我地冇額外叫飲品，食完麵過左兩個鐘，都唔口渴，証明冇落味精，非常欣賞。 去開尖沙咀既朋友，不妨一試。

新開日式咖啡店，都預左要排隊，下晝2點攞飛，等左差唔多兩個鐘先有位。 滿心歡喜終於等到，點知手機落單，發現全部漢堡已經售罄，只係下晝4點多啲，竟然賣晒。真係好失望，店員可以放個牌喺門口通知等緊位既客人，一心諗住食漢堡既客，就會白等。 結果揀左炸蝦餅方堡同燒雞烤三文治。炸蝦餅方堡個包都唔錯，中間夾住厚厚既炸蝦餅，洋蔥，椰菜絲，再加醬汁。蝦餅炸得夠香脆，略嫌冇蝦味。燒雞烤三文治，雞肉近乎冇燒過，冇香味又唔熱，而且肉質好粗糙。加$20要左個脆薯角，炸得過左火，燶晒，差啲想退貨。 總括黎講，食物一啲都唔值得等兩個鐘先有得食，失望而回。

幾年前食過一次，覺得好抵食。當然價錢反映食物質素，呢個價錢可以食到唔差既吉列豬，已經好好，基本上好過好多日式餐廳。 叫左一個吉列豬柳拼吉列蝦定食，唔駛10分鐘就到。先講賣相，炸物望落唔油，只係碟邊有啲油蹟，不過$80都唔駛，就一定唔會介意。定食有一碗湯，一個鹽漬前菜，一碗白飯。 吉列蝦炸漿略為厚左啲，不過蝦肉爽口彈牙。豬柳好食，麵包糠唔硬，好怕食一啲麵包糠太厚，最後會整損個口。肉質不過不失，起碼冇雪味先。 老公叫左個吉列豬扒拼雞扒定食，份量多到一個男人都食唔晒既定食，哈哈，好誇張。如果豬扒同豬柳比較，我會鍾意食豬柳多啲，可能肉質淋啲。下次可以試下滑蛋丼，見到隔離枱食，好似都幾唔錯。

3年前食過一次段純真，已經覺得好好食。今日再一次特登去食，未夠7點去到，竟然唔駛排隊，可能同場有太多選擇，包括台式火鍋。 今日食左原味牛肉麵（細麵)，涼拌小青瓜，愛玉蜂蜜西檸特飲。揀原味牛肉麵既原因係諗住唔辣，menu寫住紅燒有一隻辣椒，所以唔敢試。但食食下，發現都有啲辣。牛肉湯好濃，唔同一般牛肉湯比較多味精，不過帶有辣味，所以飲唔到太多。牛肉夠淋，一啲都唔“痴牙”。而且有啲筋位，連牛肉一齊食，口感好好。涼拌小青瓜偏咸左啲，淡返啲會更好。愛玉蜂蜜西檸特飲好香蜂蜜味，唔會太甜，每啖都食到愛玉粒，好fresh。今日食既牛肉麵同3年前食既大緻都差唔多，冇退步。

朋友聚會建議食串燒，揀左呢間位於歌賦街“炭家”串燒店。由地鐵站行上黎，都唔太遠，不過如果天氣熱就有啲辛苦。 店舖近街頭位置，離遠已經見到招牌燈牌，好搶眼。不論店內或店外，格局都好有日本風格。雖然店舖唔大，但坐得舒服，一啲都唔迫，好岩三五知己飲下酒，傾下計。 叫得做“炭家”，當然用以炭燒聞名，所以我地都叫左幾款串燒同鰻魚試下。咁岩我地坐既位置，隔離就有塊玻璃，望到師傅喺入面不停用扇撥，作為顧客，就最鍾意望住師傅整野食，特別有風味。 食物質素當然唔需要懷疑，每款串燒既有炭香味，又唔會過火。特別係雞肉同豬肉串，外皮香脆，肉質嫩滑，又有肉汁。當然唔少得鰻魚，我地試左兩款，一款係白燒，一款係蒲燒。白燒係冇加任何醬汁，純用炭燒，能夠以呢個方法煮，鰻魚一定要夠新鮮，所以一啲腥味都冇，仲好清甜。蒲燒就適合濃口味既朋友，炭燒完，再搽一層薄薄既蒲燒汁。唔會太漏，個底又夠脆。如果要食白飯既朋友，可以選擇鰻魚丼飯。 特別一讚，老闆非常細心，連洗手間都有日式風格，擺放左一小盒即棄漱口水，即棄牙刷俾有需要客人使用。

第一次食呢間燒肉店，一入門口已經知道同普通燒肉店好唔同。首先唔會有油煙味，店內裝修日式風格，座位寛躺。可能今日係平日，所以唔多人，職員安排我地坐梳化卡位。 我地叫左一個2-3人set，有4款唔同部位牛，2款豬，2款雞，一塊和牛扒。由於我地好鍾意食牛舌，所以額外再加1份牛舌芯。 Set包左兩客沙律菜同少少Kimchi ，食完岩岩好上主菜，牛肉好新鮮，好鮮紅。最好食一款係“和牛友三角”肉味濃厚，入口即溶，又唔漏。食到中途，order左一個紫菜飯，總係覺得燒牛配飯係最正。之後開始食豬同雞，估唔到都有驚喜。特別係豬，有鮮甜肉味，燒肉店通常主打牛肉，冇諗過豬肉都咁好食。雞腿同雞柳，外皮香脆，肉質嫩滑。接住食終極和牛扒，職員教我地撈蛋漿食，不過我地覺得就咁食已經好好味。脂肪同肉比例非常好，唔會淨係食到油脂。不過可能太薄，我地燒既時間多左少少，但仍然咁好味。最後食埋牛舌芯，真係好好好味呀！牛舌芯係厚切，一啲都唔韌，爽口又有肉汁！溫馨提示鍾意食牛舌既朋友，建議俾多少少錢揀牛舌芯，因為menu有兩款牛舌，一款係普通特上牛舌，另一款係牛舌芯。呢個價錢食到高質燒肉，物有所值。

之前朋友帶我黎食過一次，環境坐得舒服，食物質素又唔差。所以今日老公生日，決定再黎多次。 訂左枱6點，入座時只有一枱客，但慢慢就多幾枱，雖然係平日，但都算多客。 我地兩個人叫左一個沙律，一個小食，兩個主菜，仲有個生日甜品，哈哈....兩個人食左好多野。 柚子蝦沙律-酸甜柚子汁配沙律菜，絕對係用黎醒胃，好鍾意個柚子汁係分開一個兜，唔會加落沙律菜入面。有兩隻蝦，新鮮爽口。 黑松露薯條-一黎到已經聞到陣陣黑松露香味，如果唔鍾意食黑松露既朋友，一定會覺得好臭。 肉眼扒配紅酒汁-牛扒要求要5成熟，都煮得岩岩好，唔會over cook，肉質都算夠香口，牛味略為淡，紅酒汁有啲搶左主角，唔係好食到牛味。 士多啤梨醬豬肋骨-呢個真係不得了，份量頗大，見到真係嚇親。職員好好，見我唔知點切開，就話叫廚房幫我切開一舊舊。甜甜地，不過唔係好食到士多啤梨味，豬肋骨肉質偏鞋，咬得比較辛苦。建議多人share，兩個人都食唔晒。 蘑菇蛋糕-先講造型，可愛蘑菇，配上食用花，同蛋糕碎扮泥，冇得輸。以為咁靚賣相既蛋糕，味道通常都一般，但呢個絕對有驚喜蘑菇頂部中間夾心係紅桑子醬，酸酸地，外層白朱古力脆皮，加埋一齊食好正，唔會好甜。蘑菇根部係純海綿蛋糕，一啲都唔漏。如有朋友生日，可以訂位時預訂埋呢款甜品，店員會寫埋Happy birthday喺碟邊。