麵屋黑岩 (深水埗)

為咗揀部Notebook出國，少不免要去做高登仔，坐住部神駒去到北河街落車，啱啱好喺呢間舖對出，本來我係想食雲吞麵嘅，又不過呢度有個平日限定嘅午市套餐，時間啱啱好又無謂miss咗佢吖，咁變心快過打針嘅我就入咗去食喇。



四款拉麵可以選擇，基於海老湯底喺香港較少人做，就揀佢試試。叉燒都可以揀厚切或火炙，當然火炙比較吸引。配菜可以揀蔥或椰菜，椰菜似乎唔太夾就揀返蔥。麵都係揀返硬身啱我口味。小食除咗炸雞外就唔太吸引我，再加支汽水，$78真係同茶餐廳唔會差太多。


汽水估唔到會係用玻璃樽裝，雖然容量少啲但啲汽係比罐裝多，所以我係鍾意樽裝多啲。


一個人食就通常會坐吧枱位，可以見到廚房嘅運作，因為我揀咗個煮麵位坐，有女職員問我會唔會覺得熱，幾細心唔錯。


炸雞先到，我從來無期望過跟餐嘅炸雞會係即炸，果然一食就知係預先做起，微暖同唔太脆。雖然肉汁唔多但肉厚，感覺似係來貨唔係自家做，沒有期望就沒有失望。


拉麵嚟到，估唔到舖到咁滿，仲有預計以外嘅蔥白同肉碎添。


叉燒有經過充份火炙程度，亦有一定厚度，但咬落去除咗火炙香外，叉燒嘅調味唔太明顯。由於肥膏唔多，就算火炙咗佢都唔會話好有油香，好睇但又未到好食。


湯底就相當濃郁，蝦味極重，以價錢計我好難想像佢會咁濃蝦味，但又唔會話好鹹，飲完又唔會口好乾。櫻花蝦就浸到軟晒唔脆口，可能佢地係放櫻花蝦乾去煮所以咁濃味掛？總之湯底我就好滿意。


拉麵顏色比較雪白，食落去好似唔喺硬麵質地，唔通我剔錯？除咗硬度之外個麵就無話太特別，滑係幾滑但唔夠咬口，無咩碱水味算係優點，但佢係全碗麵最大缺陷。


價錢而言呢間拉麵店算係偏中下游，湯底質素我都幾欣賞，可惜啲麵整成咁晒咗碗湯啦。

麵屋丸京 (牛頭角)

前排去觀塘食蛇，咁啱見到間蛇舖對面有間拉麵，作為偽日本人當然要去八下間拉麵店主打啲咩，原來係醬油拉麵系，而唔係香港最主流嘅豬骨拉麵。仲要有數量限定嘅slow cook叉燒拉麵，喺日本食過slow cook雞肉叉燒後念念不忘嘅我梗係唔會放過呢間舖啦。



門口嘅告示牌雖然有大大張拉麵相，但吸引我嘅其實係左上角唔起眼嘅真叉燒拉麵，賣slow cook叉燒嘅拉麵全香港應該一隻手數得晒。因為我嘅目標只有一個仲要限定廿份，入去前先同店員確定無賣晒先入去，真係有種一係唔食一係我就要食最好嘅霸氣，咳咳。


既然只有一個人，坐喺吧枱位就好正常，我都好鍾意睇住廚房嘅運作，呢種位置啱晒我。睇到枱頭有蒜頭辣醬胡椒粉同醋，再加埋個水壺真係日本常用嘅冰水壺，未食加定分先。


拉麵嘅湯頭就分濃淡兩種，濃嘅會加入背脂即係豬肥，雖然京都系嘅拉麵係以濃厚見稱，不過食醬油湯底就梗係食清湯，我覺得醬油湯底唔應該落豬肥，好易冚過醬油味嫁嘛。


等咗唔係好耐碗拉麵就嚟到，睇落幾大碗而且叉燒份量唔少，計落幾抵食喎。Slow Cook嘅叉燒梗係要帶啲粉紅色啦，但因為湯係熱湯，浸係湯裡面都會變熟好似生牛河咁，所以第一時間梗係食返塊叉燒。


Slow Cook叉燒量多之餘並非燈影級，唔會一下就畀熱湯淥熟，帶微粉紅嘅叉燒食落的確夠軟熟，而且會多一份煙韌嘅口感，除咗醬油味外，仲會畀你一種類似風乾火腿嘅味道，無令我失望。


麵係最常見果隻黃色鹼水麵，醬油湯底十居其九都配呢種麵，雖然我自己就唔太鍾意鹼水嘅味道，但佢嘅鹼水味就唔太明顯，食落口彈牙唔會過淋，令人滿意。


用豬骨煲嘅湯，就點都會有油花嘅，不過睇下湯面嘅油花其實唔多，絕對配得上清湯呢個名。飲一啖，醬油味突出而不失豬骨同木魚嘅鮮味，飲真啲仲會飲到薑味，好有日本嘅感覺，喺香港屬一流水準，就算走到日本都唔失禮。以為咁就完？少年你太年輕了，枱頭仲有一支醋，一加落去，由豬骨風變成魚介風，用清鮮嘅味道作結，就唔覺得有罪惡感啦。


無論湯底、叉燒都唔會輸畀日本嘅拉麵，價錢亦同日本相差無幾，唔想食香港主流嘅豬骨湯底，呢度絕對係個好選擇。

漁場台風 (旺角)

香港嘅拉麵店，我最鍾情就一定係漁場台風，佢係咪全港最好食我唔敢講，避免某某黨走出嚟話某某先至係世界級，但我可以肯定漁場台風一定係全港宅味最濃嘅拉麵店，啲宅味唔係貼幾張poster整幾件figure就扮得到，而係連員工、食客都係非等閒之輩臥虎藏龍，唔知咁講店主會唔會怒った呢？


適逢三週年慶祝，出咗兩日限定嘅海膽拉麵，真係要神咁早出去排隊，果然未開舖已經排一百幾十人，前面有人用tablet打太鼓，後面有人話爆咗幾袋UO…呢啲嘢你唔會明嫁喇。

當日只賣一款海膽拉麵唔需要頭痕，只要揀好湯底濃淡同埋落唔落蔥就得，不過麵質都可以手寫決定軟硬，我就一定食硬身嘅。講起上嚟我其實無食過漁場台風嘅拉麵，因為我鍾意食沾麵多啲而沾麵只有午市會做。


雖然係最忙嘅週年慶，枱面都唔會七國咁亂。牆身有好多客人同餐廳嘅互動，裡面真係好多宅嘢…咳咳。


唔使好耐拉麵就已經做起，呢日排長龍都咁高速真係要用摩打手做嘢。湯底明顯比其他拉麵舖少，可能濃湯嘅意思就係唔去兌水掛。個濃湯味道就真係好重豬骨味，飲落亦夠漿口，鹹味重少少啦，或者正常濃度會更適合我。


聽講今次嘅豬肉係荷蘭豬，荷蘭豬又係咪真係荷蘭叻啲荷蘭好食啲呢？咁佢梗係出色過荷蘭叻果個渠頭啦，瘦肉嘅部份就韌少少但係肉香味濃，肥肉部份就入口即融充滿油香，平時街市啲豬肉梗係比唔上啦。呢度嘅叉燒又比其他舖頭嘅厚肉，啱晒我。


週年慶嘅麵聽講係特製，我無食過呢度嘅拉麵底所以比較唔到。落單時要求咗硬麵，呢點毫無疑問做得到，食落口硬度夠又唔會未熟。麵條掛湯能力亦強，吮麵時可以將豬骨湯一齊吮入口，唔會比沾麵遜色喎。


食拉麵溏心蛋就唔少得嘅，不過隻蛋蛋唔見咗？得返阿黃係度？平時溏心蛋我就成隻啪，既然佢搞成咁我直頭打散佢連埋拉麵一齊吮落去。就算無咗蛋白都仲有濃厚蛋黃香，一樣令人滿足。


話明海膽拉麵，說好的海膽呢？咁係得返呢舊嘢姐？之但係，泡嚟嘅？食一啖，師父明白了。點解隻蛋骨肉分離無咗蛋白，因為個蛋白用咗嚟打泡，否則單單係海膽又點會係白色？咁即係有無海膽味呢？係食得出嘅，但味道梗係無直接食一板板咁濃，$50就唔好要求太過份。只用蛋白嘅聰明之處係蛋白幾乎無味，所以就唔怕蓋過海膽味，同理我覺得唔好同個湯溝埋一齊食，否則就只會食到豬骨味。


$50蚊可以食到一碗完整嘅拉麵，計埋燈油火蠟人工舖租點都無可能有錢賺，絕對係感謝祭殺必死，為咗以後都有得食週年限定，係要多啲幫襯嘅。

泰海鮮 (屯門)

雖然米芝蓮係飲食指南，不過佢哋鬼佬嘛，講到香港菜，真係識條鐵咩。生抽皇黃秋生就唔同，雖則佢都係半個鬼佬，但最少係香港土生土長，佢話好食嘅，我信嫁。早排見到佢去屯門食海鮮食得咁開心，梗係跟，做唔成影帝都可以食影帝餐嘅﹗



餐廳就酒樓格局，無咩特別，最多就係坐房同坐大廳有唔同收費。平時食飯就頭痕揀咩食，今次簡單，黃秋生食咩我食咩，唔夠飽就搵伙記推介，完全係思想殘廢餐。唯一要揀嘅，咪汽水定啤酒囉，畀我見到佢哋係玻璃樽版本，一定係飲汽水，啲氣「鋸」好多～

影帝餐第一道係白酒忌廉煮花甲烏冬，花甲係啲肉係飽滿到貼邊而唔係空殼公司，抵食吖，同埋就算有忌廉汁係度都食得出隻花甲嘅清甜。作為好酒之人我當然希望白酒味再濃啲，不過食得出白酒嘅香味已經好夠。而忌廉就比平時食西餐嘅白酒忌廉黃身同多幾份甜味，量多但唔係水汪汪，就算攤凍咗入口都唔會好膩。烏冬本來無太大期望，又估唔到佢食落夠滑溜，口感唔會過鬆散或太結實，唔係我買開十蚊幾包果種純醫肚Cheap貨。


泰皇芝心蝦丸就係成粒手榴彈咁嘅炸芝士蝦丸，香脆嘅麵包粒食落去無油膉味，裡頭包住嘅蝦丸亦彈牙唔係一口麵粉，而且仲有個一咬就爆嘅芝心，除咗要小心啲芝士係口裡面爆出嚟，仲要注意唔好畀滾熱辣嘅芝士顏射哦～



雖然佢係一碗蕃茄薯仔海鮮湯，但並唔係橙紅色，呢碗湯都應該係我人生中最貴嘅蕃茄薯仔湯喇，佢係用咗瀨尿蝦同沙白去煮，真係一聽就知佢鮮味。飲落就好老實，蕃茄味唔重，海鮮嘅鹹鮮味比較明顯，咁嚟得呢頭食飯海鮮先係主角嘛。飲完湯梗要食埋湯渣，可以見到十隻八隻瀨尿蝦隊落去煲，真材實料嫁﹗


薑蔥鮑魚煲聽個名好似晒咗隻鮑魚，不過佢地係用鮮鮑魚而唔係乾鮑，而鮮鮑味道其實幾淡，配薑蔥簡簡單單就相當好。呢個薑蔥鮑魚，爆香咗大量薑蔥蒜，再加埋強勁嘅鑊氣，淡味都升級成惹味。而且鮑魚夠大隻又夠嚼頭，真係唔會比乾鮑輸蝕。


蒜茸粉絲蒸元貝雖然屋企有時都會整，不過屋村街市仔要又大又靚嘅元貝唔容易，既然呢度有大隻元貝，梗係唔可以錯過。個元貝殼大過我隻手，肉就有掌心咁大，咁大粒元貝真係可以話係肚滿腸肥，食落啖啖肉又唔會黐殼，加埋蒜香粉絲真係無敵組合。


呢度嘅招牌菜焗芝士龍蝦呢個無理由唔食啦，我要了解吓咩叫做有芝士香無芝士臭嘅芝士。睇報導話用咗三種芝士，小弟不才唔會食唔到係邊三隻，不過有芝士無拉絲，應該都無水牛芝士。首先由個頭開始食，啲芝士味確實香濃，同埋食落去面頭微脆裡面就似蛋糕咁軟熟，幾有趣而且我鍾意。焗過嘅龍蝦肉並無焗過龍，口感唔韌而且有肉汁，扯起成舊龍蝦肉然後好似雞髀咁一啖咬落去，真係好爽。食完終於明咩叫有香無臭嘅芝士，應該係指佢無芝士果種奶膻味－－雖則本人係連羊奶羶都唔怕。


雖然食咗好多海鮮，但係見秋生哥食過鹽油焗奄仔蟹，一場嚟到唔嗌又好似可惜咗啲。望住啲蟹黃漏出嚟咁款，梗係一啖啜落去阿黃度。阿黃同大閘蟹黃其實幾相似，味道一樣都係鹹中帶甜。呢隻奄仔蟹嘅蟹肉明顯比大閘蟹肉厚紥實，唔似大閘蟹食完個黃就無肉食，同埋唔使等咩九圓十尖一年一造咁悽涼，幾時都有得食。


食海鮮，最緊要食得夠鮮，有咩鮮得過係海邊食先？再加埋有影帝加持，個朵夠響嘢食夠鮮，值得食啦。

壹級日本料理 (大圍)

上次喺大圍搵到間平靚正嘅日本嘢，我個返鄉下（I mean日本）仲多過我嘅老死又話想去試下，諗起又好耐無喺果邊踩單車，就決定踩完單車再過嚟吔。


以前運動完可以大吃大喝，而家老喇，反而係攰到食唔到咁多嘢，就揀啲特別想食嘅啦。

魚生飯本來就唔特別，不過呢碗山形角切魚生粒珍寶赤蝦飯，多出嚟隻蝦就真係夠大隻喇，純目測佢有成六吋長兩隻手指粗，蝦肉口感結實帶黏性唔會霉爛，再啜埋個清甜嘅蝦腦，感動。魚生粒就符合預期，都係三文魚吞拿魚油甘魚呢啲，睇個色澤都知品質唔錯，魚生粒嘅份量甚至乎多過飯添﹗


點刺身飯可以換購三文魚頭鮫，我係相當鍾意食三文魚頭嘅，應該話我鍾意食熟嘅三文魚多過生嘅，因為煮過嘅三文魚啲魚油逼咗出嚟更好食。有時啲餐廳嘅燒三文魚頭，就真係得個頭無肉食，呢度仲有埋個魚鮫位，價錢相同肉量Double up。雖然魚頭係樣衰咗少少，但食落去肉質就好細滑，而且魚頭皮（唔係柒頭皮）燒得香脆嗦嗦聲。而魚鮫就幾厚肉，魚肉夾起嚟唔會散但入口即融，又伴隨住魚油嘅甘香，呢個價錢真係自己整都無咁平。


明太子手羽個樣脹卜卜好似BB嘅雞髀仔咁，賣相相當吸引，見佢咁脹卜卜就知裡面釀咗唔少明太子啦。雞肉咬落去雖然肉汁唔多，但肉質唔會霉，雞皮如果再脆口啲就更好。裡面嘅明太子份量同預期一樣多，辣味唔會好強，加杯啤酒就爽喇。


今次食嘅款式同上次唔同，不過一樣水準唔錯，尤其係呢度價錢夠街坊，又唔使係旺區排大隊，同埋我喺度返屋企仲快過由旺角返呢。