呢排身體好d就身痕，是夜係朋友公主既生日，佢想食墨西哥菜啵(因為掛住d野食，無記錯佢係南美出世架) 所以就黎左呢度食啦，我就有個藉口去飲酒! YEAH!!!!! 未戒酒之前，聞到『掘爛地』係會深呼吸架同埋食翅一定要佢~ 同男性朋友去飲一定叫埋佢地一齊飲，哈~~~ 鬥快醉! 不過一講啤酒我半杯就到頂架啦! 無啦，而家唔飲架啦，亦都唔識飲架啦~~~

一去到，唔好講笑一人叫杯Margarita先啦，邊飲邊等呀麻，1個peach 味、1個strawberry同埋1個mango味，不過其實我淨係飲到tequila 味! 真係醒神! 仲叫左一個Nachos食，因為公主同我都好喜愛Guacamole，個面焗起就有，真係食到唔停得口呀!

黎齊就叫野啦，我地叫左1個ceasar salad、1個chicken Fajites (一定會叫架啦)同埋1個chicken wings; 甜品就係Chocolate Brownies同埋Key Lime Pie死未?! 真係會飽死~~~

因為我一早表明唔想食太多豆，所以無叫炆牛肚呀個d野食囉! 個salad就ok啦，個Fajites就份量比較多，我地之後仲要叫多1客wrap先食得晒。個chicken wings超正! 又辣又惹味，好彩有朋友生飛滋，所以先唔駛打交爭食!

甜品我少食，留返俾呢班甜品狂，不過個lime pie真係好夠lime味，我都食左兩啖。全晚飲飽食醉埋單$780，由7:30玩到11:30都幾抵呀~~~~

想睇多d靚相, 請睇http://hk.myblog.yahoo.com/alison1803/article?mid=8266&fid=5

因為公事要係lunch 時間去銅鑼灣，拿拿聲去訂位食飯，要知道稍為好少少既日本料理店係真係成日都full架。本來想食第２間，不過呢間有位就去食。其實都未試過架，不過而家試左之後都會少去。唔係佢唔好，而係佢未好到可以取代順日本料理即。

朋友叫左一個５件壽司＋１蕎麥麵同埋１個細既鰻魚飯既套餐，而我係叫左魚生＋５件炸物＋鰻魚飯。壽司- 朋友好似食左２件就無食，覺得唔吸引囉；蕎麥麵係熱食就得唔到朋友既歡心因為佢鐘意冷麵；鰻魚都係ｏｋ囉。

我個ｄ魚生ｏｋ新鮮但新鮮程度完全唔可以同"順" 相比；炸物ｏｋ可以既，如果唔好既話就真係抵打，話晒佢同"天扶良" 都係同一集團，佢ｄ炸物都係"天扶良" 供應架啦。其實鰻魚就一般，可能我之前都係食飽左啦，所以呢個飯都係可食可唔食。

我最唔鐘意係坐吧檯，因為佢個檯面D客係睇到，個師傅處理魚生個陣咩都睇晒，"順" 個邊有個冷凍櫃遮一遮就好少少啦，我睇到就覺得唔多開胃啦。我仲要一食完就有少少肚痛，所以no good啦。

如果要睇相, 請到:http://hk.myblog.yahoo.com/alison1803/article?mid=8476&fid=5

呢日同朋友去完睇完戲之後，朋友話一定要黎呢間飲咖啡，因為離旺角UA不遠，同埋咖啡好味，最重要係天氣好熱，點都去嘆下冷氣好ｄ既！

其實最初只係知道間野叫Magic Cafe，入到去都係一般而家既cafe，不過見佢個餐牌ｄ咖啡都幾多選擇，朋友要左一杯薄荷朱古力同埋一個炸墨魚咀，而我就叫左一杯Vanilla Latte加Creme Burlee。

所有野都好快就黎左啦，樣樣都唔錯，我就諗係唔係佢唔記得左我杯野呢?再等左一陣，終於見到啦，原來佢將糖水放左最底，跟住有雲呢拿咖啡，面頭仲有cream同朱古力花，嘩，真係好花心機呢～～而且味道一ｄ都唔甜，起碼我呢個平日唔加糖飲野既人都唔抗拒杯凍飲，真係等下都值得架！

另外，我見到好多書係門口係任人睇既，不過我估老闆應該係對風水／命理／玄學都有研究，因為有大量既有關既書籍都有，仲有易經添，如果你都鐘意既話就唔好錯過啦!

如果要睇多d相, 請到:http://hk.myblog.yahoo.com/alison1803/article?mid=8632&fid=5

今日見到個海膽三文魚子飯，我又好想食啦~~~ 不過今次極力克制自己，我叫左朋友食呢個飯，我就試左個天婦羅套餐，仲叫左多個軟殼蟹沙律添，兩個人都唔太肚餓，不過又想試下新野即。


我個天婦羅拍得住出名既天扶良呀，仲要係咁抵既價錢，真係食得好開心。不過個沙律我就覺得個組合麻麻地，本身個軟殼蟹係好食架，不過加埋沙律就麻麻地即，下次唔會再叫。個海膽三文魚子飯+冷麵一上到檯我都忍唔住食左少少呀，每次食都覺得自己有得食而好幸福呀，好耐都未試過食野落肚有好幸福既感覺啦! 所以【順】真係一定要做落去，如果唔係無左佢我都唔知點算!

要睇多d相, 請到: http://hk.myblog.yahoo.com/alison1803/article?mid=8863&fid=5

星期六同朋友食個晏然後都行街街，我地都好鐘意食鵝肝，我就一搵到好野就一定話俾大家知既。今次呢間我係一年多前已經介紹過佢既靚早餐架啦(參考網誌)，你點都唔會諗到佢既位置同價錢係咁一絕既。

一去到佢地就俾普通既餐牌我地，我就梗係見到有鵝肝呢d字眼就唔放過啦。見到有一個鵝肝牛柳餐，有：龍蝦湯、三文魚他他、鵝肝牛柳、心太軟+雪糕及咖啡/茶，盛惠$138。朋友唔食牛就加左$10換左件牛做龍脷柳。


麵包一上黎熱辣辣，雖然普通不過有水準。龍蝦湯差左少少，多左少少酸味，我估係師傅懶，只係煲左一個番茄湯底，而未有牛/魚湯底用，所以未有預期效果。三文魚他他好好多，尤其是個幾粒黑椒粒，非常醒胃，好味道。個牛柳一上檯就知正，原來仲加埋個炒意粉，係用Basil炒，又香又爽口；牛柳話要五成就有五成，就算個邊都無overcooked。鵝肝煎得香、個邊脆，入口即溶，食落一d都唔膩，仲想食落去。朋友件龍脷柳又厚身，不過無煎得好鞋，食落仲係好滑，加$10都係抵既。我無食早餐，所以咩都食得晒，真過份。

不過心太軟就麻麻啦，紅豆雪糕太甜，個心太軟份量拿捏得準，一上檯打開就流朱古力漿出黎.......不過個蛋糕既粉就好似由麵粉轉左做栗粉，所以過份煙靭，一d都唔好食! 唔好改食譜改到為左個賣相而唔好食啦，我真係情願好食唔好睇啦。

要睇相就要去:http://hk.myblog.yahoo.com/alison1803/article?mid=8782&fid=5

朋友提議去呢間食，點知佢最後都要甩底因為要返大陸做野，不過我地無理佢，照去食，真係一個唔錯既地方而且可以嘆足一晚!

呢間都係食東南亞咖喱，我地叫左: 柚子海鮮沙律、雞沙嗲、naan同埋一個紅咖喱牛。個柚子沙律就預左好新鮮架啦，難得佢唔係用紅柚不過都好甜美，d蝦又大又彈牙。個沙嗲先好味，好多沙嗲一係燒唔夠，一係就燒得太乾。呢個就好味啦，又juicy又嫩滑，除左有沙嗲醬之外，仲有辣椒+乾蔥+蒜泥同醋汁最後仲加埋個鮮車厘茄。

紅咖喱牛就梗係唔少得有naan食啦~~~ 一個新鮮熱辣既naan，美味既咖喱汁再加埋炆得鬆軟既牛肉，又有咩理由食唔晒呢?! 食得飽又好味，又可以同幾個朋友天南地北咁傾一餐，爽呀!

要睇相可以去:http://hk.myblog.yahoo.com/alison1803/article?mid=8879&fid=5

朋友生日，佢食咩有無所謂，所以就去左食泰國野啦~~~ 之前都去過食架啦，不過今次去食d新野。今次叫左個柚子大蝦沙律、米紙卷、冰鎮露筍，燒雞、紅咖喱燒鴨同埋naan。

個沙律我覺得Spice好食d尤其是係d蝦，個邊真係鮮好多。米紙卷就好得意，最緊要係食落唔肥膩，無犯罪感。冰鎮露筍好嫩，佢都好捨得，真係粗d同鞋既都掉晒，我同朋友食左好多呀!

個燒雞係一般啦，因為朋友個男友都黎埋，驚佢唔飽，所以先叫架，如果唔係都唔知佢食咩好啦~~~ 因為要食naan，所以先要叫咖喱，naan先係重點，咖喱反而係其次。

是晚既set dinner 係有湯或者係Pear Salad，主菜係Grilled Seabass、煎牛扒同埋燒春雞，甜品係Chocolate Mousse、Bread Pudding同埋Apple Crumble。其實樣樣我地都有食d架。

個湯就無試，不過睇落都幾OK；個啤梨沙律就麻麻啦，因為片得太薄，多d就好味d囉。個主菜既燒春雞好得，醃得好又煎又焗完都好嫩滑，呢個係主廚推介，值得一試。個魚都幾好，煎完出黎好金黃但係又keep 到水份。我件牛扒我估係最易整架啦，不過竟然失左手，後尾大廚話因為件扒薄左，所以煎個陣over左囉，做唔到我要既半生熟。

甜品個朱古力慕絲唔知點解食左落去有d『封喉』既感覺，食完兩啖就咳啦。至於個Bread Pudding 我都無試因為我重來都唔食既!

呢間小餐廳都係剛剛開始，做左都未夠一個月，希望下次黎個陣佢再進步d啦。

好耐都無去過一間咁大間既日本料理店啦–有分開梳化區、和食區同鐵板燒區。每一區都唔細而擺佔左SOGO既22樓。未食飯，行到入去都已經開心，而家好多好食既料理店都係細細間好似【順】同【雪】都係。至於鐵板燒，我好耐都無食過啦，因為你要食完唔好成身味，個師傅又整得好，個餐又抵食就真係好難搵囉，如果你有既話聲俾我知，ok?

同朋友又黎試新野，朋友黎過幾次，次次都係和食，今次見有人取消訂位，我地二話不說即刻轉去食鐵板燒啦。我問朋友和食好味麻，佢話自從我介紹左佢去食【順】之後佢就變左心啦! 哈~~~~ 你地可以試下兩間然後我地睇下邊間多人鐘意食呀?!

我地叫左兩個餐，但係都係一齊食既，分別係和牛鵝肝餐同海鮮餐。其實仲包左有前菜既沙律、湯、炒菜同炒飯架，所以一定食得飽! 海鮮係有一隻好大既帶子啦、一隻又大又彈牙既虎蝦、仲有一塊肥美既鱈魚。和牛係燒成一粒粒，不過我對和牛無咩好感，反而佢將條肥邊燒晒d油出黎然後就用油黎炒菜就好香啦。要知一個鐵板燒好唔好，佢個碗炒飯真係好重要：要乾身、一粒粒咁跳起不過又唔可以太乾，要入味又要香口，我呢碗係好出色架。

繼之前唔再去Triple O’s 之後，其實真係無其他既可以去食下，尋晚去左星街就食左呢間啦。

你問係唔係好貴，係架，我地叫左一個Hot Dog (Doggie Style)、一個藍莓Smoothie、一個Burger (Cushin’& Pushin’) 同埋一個汽水，都要成$140架。全間舖都係得9個位，一多人入黎都好逼架。個熱狗就要左一條唔辣既腸，你可以係個架到落配菜–有酸瓜、辣椒、醃蘿蔔等等。除左檯面有茄汁、芥辣、Tabasco、醋、黑椒同鹽之外，都仲有幾款醬汁都唔錯架。

我個漢堡係好juicy架，睇住佢大大件咁慢慢煎，仲放塊芝士係面等佢慢慢溶~~~ 嘩，味覺享受! 不過罐汽水好唔抵，因為要成$18，不過個包真係無得彈! 佢而家係銅鑼灣都開左分店啦，真係唔駛去Triple O’s啦，好野!