一個人閒逛到太子，正想到金翠餐廳食午餐，發現餐廳右邊新開了一間“多多翠”，不知是否與隔鄰金翠有關連？但店面標榜車仔麵、小吃，舖頭門口的淥麵位置整潔吸引我幫襯。

我揀了豬紅、牛筋、蘿蔔和菜芯配秘製辣汁及米粉（四餸一麵$28+汽水$5），牛筋炆得夠腍入味蘿蔔清甜無渣，秘製辣汁略甜，但不損醬汁本身的香辣惹味，而湯底略甜喝後不會口渴，我很快便食清整碗車仔麵。
意猶未盡我再點了魚蛋（$5/7粒）加燒賣（$5/6粒），雖然是一般貨色，但配上秘製辣汁及沙嗲汁味道不錯。
看見隔離枱食客點了個啡色砵仔糕，糕面佈滿紅豆好像很好吃，但我實在太飽只能留待下次再試。
買單時收銀姐姐推介蠔皇冬菇（當日沽清了），我下次一定會試。

幫襯集團式食肆太多好悶,想轉換口味,跟貓爸步行到屋企附近鯉魚門食茶記下午茶.我們經過市政大廈旁邊平房的順利江南小食,貓爸話既有佢想食的上海麵食,亦有我鍾意的烘包,可以一試.
我們點了川渝肥腸湯麵($34)配凍咖啡及厚蛋餐肉脆脆豬($28)配熱檸茶,肥腸湯麵上枱時我和貓爸奇怪點解"川渝"會唔辣向侍應姐姐反映後加回麻辣汁,貓爸話加麻辣汁後超正.而我的脆豬包烘得熱辣辣外脆內軟唔黏牙,加上嫩滑有汁厚蛋及煎香厚餐肉,好味兼飽肚,我會俾十個讚凍咖啡夠香濃熱檸茶唔澀口十足茶記風味值得下次encore侍應哥哥姐姐態度亦唔錯.

我今日突然好想吃肥豬肉,趁著閒日唔駛人迫迫地吃豬油撈飯.我同貓爸爸八點左右到酒樓,果然即刻有位,而場內大部份係自由行食客(這是題外話)......

我哋點咗"四月份平靚正"菜式 雞蛋焗魚腸($80) 薑蔥枝竹燜豬肚煲($80)
另加滷水大雞腳($23) 豬油撈飯($11)

雞蛋焗魚腸--焗得金黃夠香唔乾身,面層有油炸鬼夠香口,雞蛋結實但唔會老,魚腸夠肥又唔腥,唔加胡椒粉都好食,正!薑蔥枝竹燜豬肚煲--豬肚夠新鮮並非雪藏貨色,件件充滿彈性冇異味,雖然只係簡單地用鼓油,糖,蠔油燜,但煮得夠腍又入味,而煲底嘅枝竹同料頭薑蔥亦好食,讚!滷水大雞腳--新鮮雞腳大大隻幾好食

豬油撈飯--睇落細細砵但撈咗豬油後好飽肚,蝦仔米粒粒分明有飯香,兩個人share一砵啱啱好,加上頭抽充滿豆香,少食多滋味!另一驚喜係附送嘅糖水,並不馬虎,紅豆沙煲到起沙,有芋頭粒,麥米咬落清香,又一個讚!

最近我愛上吃素,今日約貓爸爸去吃素做晚餐.是晚有特價二人餐包兩客湯羹+兩客指定小菜,而我哋散叫三款小菜
1) 乾隆梅香崧子生菜包($78)
2) 五柳仙斑($65)
3) 沙爹素雞串($45)

乾隆梅香崧子生菜包--炒粒粒包括素火腿,甘筍粒,榨菜粒,冬菇粒,西芹粒,仲有香口嘅松子仁,用生菜包住粒粒食,就算冇加甜麵醬都好吃,我覺得粒粒炒得好惹味,整體味道比葷食炒肉鬆更出色,而且伴食嘅西生菜新鮮爽脆,讚!

五柳仙斑--外面香脆內裏軟滑,芋蓉加上五香粉已經無敵,沾上五柳甜酸汁更加醒胃.

沙爹素雞串--素雞粒油炸後再串起,雖然細細粒,但素雞裏面有海苔好香口,好味! 略嫌素沙爹汁味道略淡.

其實菜譜裏面仲有好多精美素菜我好想試,但我哋眼濶肚窄唔想浪費食物,下次再試!

我一直想試蘭香園生炸雞脾餐,約咗貓爸爸食宵夜,我哋零晨十二點到達,我叫咗宵夜餐生炸雞脾+熱奶茶($28),貓爸爸叫宵夜即食麵餐豬扒米粉+熱奶茶($20).
食物好快送上,落單時我聽到姐姐講最後一隻脾沽清.....雞脾正常size,炸得比較深色,雞皮有啲油,肉質較乾有少少雪味,沾茄汁食會好啲(平日我唔沾茄汁的),幸好有我最愛嘅奶茶伴食.
而貓爸爸嘅豬扒幾大件,佢話香煎味道ok.

可能我太夜到訪,雞脾翻炸後變乾,我唔夠能要求太多,又或者下次應該加$6配細啤酒,感覺會更好.
我都係比較鍾意蘭香園嘅小菜多啲.

病咗幾日冇胃口,一個人到宜家食下午茶.
我今日冇揀平日常食嘅肉丸雞翼,點咗煎三文魚沙律 ($26) + tiramisu ($12) + 咖啡 ($5),
煎至表面金黃色嘅煙三文魚好甘香,濃濃煙熏配上混合香蔥碎嘅烚薯塊,一濃一淡十分夾.
tiramisu餅身夠濕潤充滿咖啡香,夠creamy,好味!
三文魚香,tiramisu甜,再配上簡潔北歐佈置,確係一個平日消磨時間嘅好地方!

是日返大埔娘家跟爸媽食冬至晚飯,我提早出門到街市食久違嘅豬扒麵.
三點左右到達,麵檔已差不多收工,所以好容易搵到吉位,心裏記掛住美味嘅竹筍,於是叫竹筍豬扒粗麵,但竹筍已經沽清,只好改為豬扒粗麵(價錢忘記了).
豬扒依舊沾滿薄薄脆漿,炸得金黃香脆,唔會油淋淋,豬扒有豬味及惹味蒜香,唔似坊間製作嘅鬆肉粉/梳打粉豬扒,正!麵條湯底一如以往,食後唔會口渴.
以今時今日標準去評價此店豬扒麵,或有人會認為不外如是.但對於响大埔長大嘅我,童年物質生活貧乏,星期日能夠跟媽媽去舊街市吃豬扒麵,再到富善街買餸菜,已經係一大樂事.就算我已經搬離大埔多年,依然記得陪我成長嘅竹筍豬扒,所以東記依舊係我心中最愛嘅豬扒麵!
P.S.是次叫咗"張煥記"熱奶茶,夠濃滑,讚!

天氣乍暖還寒,我終於病咗!去旺角睇醫生後搵午餐食,經過昨晚嗰餐唔合意嘅晚飯經歷,今餐都係食茶記比較安全......
原來餐廳除咗扒餐仲有是日午餐,適合病咗冇胃口嘅我.我揀咗C餐--焗椰汁雞球飯+餐湯+餐飲($34),
羅宋湯依然足料好味,餐飽軟熟.
焗飯好大碟,所以我要影低做証!汁面鋪上芝士夠香口,椰汁味香濃,雞球軟滑唔會焗到乾憎憎,好味到我可以食清晒碟飯!
$34免加一嘅午餐,味道好份量夠交足貨,同某連鎖食店嘅X姐推介$30飯有得揮,下次我有機會試埋其他款午餐!

一個人到德福遊蕩後肚餓，想食得清淡，分別行到元x壽司、板x壽司，門外堆滿食客等位，心急嘅我於是改去麵食一平安醫肚。
我叫咗一客三文魚剌身丼（$78)另加一，附一碗麵鼓湯，飯面鋪上六塊三文魚剌身，
三文魚及麵鼓湯係ok嘅，但飯粒另好似唔係日本米，冇黏力而且冇混入壽司醋（可能係我見識少未試過此種食法），完全係白飯一碗，要將飯沾上鼓油先勉強食完。
難怪晚飯黃金時間都唔駛等位，只好怪自己太心急，下次都係返屋企淥個大喜慶蝦子麵！

其實今日已經係第四次食雞脾下午茶餐，我依然忍唔住講：真係好大隻雞脾！
記得初次路過商場外，我被白底紅字”日月星”招牌吸引，充滿電視劇“香港8x”feel,後來上網搜查原來生炸雞脾遠近馳名，胃食嘅我當然要一試。
我通常會非繁忙時段，平日下午三四點左右幫襯，但我經驗係就算非繁忙時段，總會有雞脾粉絲聚集（中年男性居多，無性別歧視成份），互不相識但大家同樣手持滷水脾或生炸脾密密食，都幾得意！
講返正題，我每次心水必定係雞脾+火腿三文治下午茶餐（$23），包熱飲，生炸雞脾大大隻，熱辣辣，脆卜卜，但又唔會炸到乾哂，咬落真係有肉汁流出（唔係油或血水），三個字：正！
如果嫌炸雞脾熱氣，滷水雞脾亦係一個好選擇，雞皮吸收滷汁後肥美甘香，滷水汁味道適中，唔會太重八角草果香料而覺得食後上火口乾。
論價錢火腿三文治ok好食，原來亦可以加$3改為腸仔熱狗，我未食過但應該好味，因為曾經見過隔離位中年男士大啖咬熱狗，沙律醬從咀角流出，一臉滿足……
熱飲例如奶茶，華田都好飲。
既然食雞脾，當然唔少得食埋炸薯條（$11?)，大大碟波浪紋薯條炸得香脆，灑鹽熱食一流！