Halogigi的個人專頁

上個星期已經好想去試下，但係撞啱無開，今日又心思思所以去碰下運氣。去到門口見到大概10個人排緊隊，不過既然一場嚟到就等下啦，等咗大概半個鐘左右，我哋唔介意坐門口外面，於是就可以入坐喇！我哋叫咗兩個set，分別係羽衣甘藍牛油果糖心蛋碗同埋牛油果煙三文魚班尼廸蛋呢度嘅牛油果真係好好味，好軟滑，口感非常好，羽衣甘藍沙律加咗檸檬汁，平衡咗羽衣甘藍嘅青澀味仲好醒胃，健康又好味。牛油果煙三文魚配埋蛋黃醬，成個配搭好match，個包微微烘過，好香口，伴碟嘅沙律加咗少少鹽提味，刺激咗味蕾👍🏼👍🏼本來好想飲咖啡，但今日太熱，想飲返杯凍嘢，於是叫咗芝士奶蓋。左邊四季春芒果橙芝士奶蓋，完全無糖水嘅甜味，淡淡地好清甜，上面層芝士唔會太濃烈搶走晒水果嘅味道。如果鍾意甜啲可以試下右邊果杯四季春熱情果士多啤梨芝士奶蓋，熱情果嘅味道好出，好甜👍🏼我地食完兩個餐之後仲未夠喉，我地再叫咗個香脆雞翼share，炸得脆但唔油膩，入面仲好juicy，話咁快又食晒。下次再嚟一定會試下呢度嘅咖啡，因為我係因為咖啡先接觸到Rings Coffee☕️ …查看更多

平時去中環揾食多數都係去Soho，今次就走咗嚟蘭桂芳，試下呢間新開嘅日本料理，睇openrice好多人都讚呢間嘅鐵板燒，所以一於試下因為去到時間尚早，餐廳安排咗一間私人箱房俾我地，可以睇住師傅為我地準備食物，我都有問下師傅俾客人望住做菜會唔會有壓力，師傅話佢其實都好享受我今次揀咗$1380嘅套餐，因為平時自己唔會整龍蝦食，唔識處理，唔識控制火候，今次有專人代勞當然要識下頭盤賣相相當精美，平時唔太食苦瓜，不過沖繩苦瓜確實唔苦，製作成天婦羅帶少少甘味又爽脆，好似食緊零食咁！值得一提個冬瓜羹，加咗少少海膽去提鮮，味蕾立刻豐富不少！侍應哥哥緊隨其後準備好食材拎入嚟俾師傅，龍蝦色澤漂亮，好吸晴呀！師傅處理食材嘅時候，我地就先淺嚐新鮮刺身剛熟嘅龍蝦去殼上碟再淋上以龍蝦膏同海膽製作嘅汁料，先係香氣撲鼻，入口仲非常爽口彈牙，隻龍蝦真係好新鮮接住就係燒鰻魚，我見到師傅花咗啲時間去煎層皮，所以我都好期待，結果當然無失望，外皮香脆，無煎過籠令塊皮變韌，好想請教師傅點控制到個時間同燒熱度鰻魚肉夠晒肥美又軟滑仲有龍蝦麵豉湯，炒雜菜同炒飯，真係好飽不過好戲在後頭....有甜品嘅晚餐先至夠完整，水玄子配黑糖漿，唔係以為好甜，其實啱啱好，但係我最愛都係焦糖多士，真係超！好！味！多士脆卜卜焦糖剛剛喺多士外層形成一層脆嘅薄膜，真係好好食，兩塊真係太少喇我印象好深刻係師傅每整一道菜都會介紹食材嘅來源、醬汁嘅配搭，而且師傅好用心去準備每一道菜，對烹調的拿捏好嚴謹，亦唔介意同我地分享心得同經驗，成餐飯都食得好輕鬆愉快…查看更多

呢間Burgeroom嘅位置唔屬於商場嘅當眼位，我睇完水牌都行咗兩個圈先揾到😝門面裝修俾到人一種好Chill嘅感動，行到入去個環境好自然令你個人好放鬆，好想同朋友chit chat下，不過chat還chat都要叫嘢食先嘅芝士旋風薯條呢個一定要大力推介，一送到嚟我真係忍唔住’嘩！’咗一聲！芝士仲係melted狀態架！！！呢個賣點真係好重要！！！而且好香，啲薯條夠幼又熱辣辣，炸得啱啱好，真係好好好味！我一個人搶住食咗大半！睇番張相，又好想食🙈鵝肝牛肉漢堡點嘅時候都有少少怕油架，不過又想試下啲平時比較少點嘅漢堡，所以都下定決心試下。Burgeroom一啲都唔吝嗇芝士，個漢堡又有一層厚厚嘅芝士喺塊牛肉漢堡上面，又加分😝呢個Burger雖然有鵝肝喺入面，但係一啲都唔會令你覺得好油，反而當你咬落去鵝肝嘅油脂溶喺牛肉漢堡啲肉汁入面，成個感覺係好match👍🏼另外想讚嘅係，漢堡嘅擺位令到啲醬汁唔會索晒入個包度，浸到個包淋晒，呢樣真係好抵讚！Rootbeer仲俾我發現有Rootbeer飲，真係不得了！打完個食評，又好想再去放肆食返餐…查看更多

忙咗好幾個月，一直都無時間同老公出去食飯拍拖，所以今日有時間就想揾間環境舒服啲嘅餐廳，好好地認真食番餐飯。奧運非常方便搬咗去東涌綫沿線嘅我地，於是就同老公去揾食，今次就揀咗Cocina 3，貪佢地方大，燈光柔和，俾到我地一種放鬆嘅感覺，西班牙菜亦都合我地胃口。一坐低，就送上一大盤Nachos，超開心，仲可以無限refill架，最重要係配埋個sour cream，一邊食住一邊飲嘢傾偈等嘢食到，都幾爽，不過都唔敢食太多，驚一陣食唔落主菜。首先食番個沙津開下胃先，唔駛諗一定係帕爾瑪火腿配蜜瓜沙律，兩樣都係我至愛，呢個唔係蜜瓜當做嘅季節，但係啲蜜瓜都仍然係好甜而且好多汁，Parma ham唔會過咸，仲有個黑醋點綴，呢個沙律真係必叫之選！跟住嚟多個小食，西班牙香燒乳豬仔，無睇清楚個menu原來係多士串，不過呢個配搭又幾新鮮，夾住車厘茄青瓜同沙律醬，可以中和乳豬仔嘅油脂，唔怕有油膩感，而且個多士都烘得幾脆！另外，仲叫咗個西班牙炸奶糊，入面係好creamy嘅蘑菇松露sauce，其實呢個炸奶糊係好香口，入面個sauce都好滑好香，不過兩個人食每人兩粒都幾heavy😝如果多兩個朋友一齊share就perfect！無理由唔食pizza嘅，又揀咗Parma Ham🤣 個Pizza一嚟到嘅第一個反應係’嘩！好多Parma Ham呀！’真係舖滿成個pizza面，pizza最重要緊係個餅底啦，呢個餅底薄薄的又烤到脆卜卜，但係不失咬口👍🏼下次會想再試下其他款式，唔好成日Parma Ham咁悶丫嘛！最後揀咗個特色啲嘅西班牙燉牛肉，個sauce食得出係用咗好多唔同嘅香料配搭出嚟，牛肉燉到好淋，鍾意味道較濃嘅朋友可以一試😊餐廳環境食物同服務，會令我想同多啲朋友下次再嚟聚下！…查看更多

雖然天氣好熱，但都冇減我打邊爐嘅興趣，今晚去左呢間環境吾錯嘅火鍋店。位於金朝陽29樓，上到去望住個景都幾靚，仲要係任食任飲，好爽。嗌左個台灣香辣三杯雞涮涮鍋，我特別嗌左少辣，真係少辣嚟，好岩食，好香好惹味。點了海鮮拼盤，都好多野食，有鮑魚，珍寶桶蠔，鮮蝦，大硯，馬刀貝，全部都好新鮮。肉方面，點了手切安格斯prime grade牛頸脊肥牛肉，好正丫，落呢個香辣湯底之中，牛有牛味之餘，又辣辣地，諗起都流口水。另仲有手工配料，好多都好好食，推介安格斯霜降牛丸，黑松露蟹肉餃。仲有任食任點menu，不過食晒上面set嘅食物都飽死，冇點嗌更多任食嘅，不過都一大張menu，菜丸肉魚都有。整體吾錯，食得飽價錢又合理，幾滿意。…查看更多

有小朋友之後都好少機會自己同朋友出街食飯，今日難得有機會出嚟就想揀間坐得舒服傾到偈又可以試下新菜式嘅餐廳慢慢食。呢間餐廳裝潢用咗粉紫色做主題，感覺好girlish，枱上放咗小盆栽做裝飾，令人感覺好舒服。雖然係一間素食餐廳，但係菜式設計好頴，唔講都唔知自己食緊素。我地兩個人叫咗一個dinner set，加一個招牌菜黑松露薯蓉焗大啡菇share食，已經飽到不得了！Dinner set 前菜: 四喜烤麩，泰式鮮果沙律再加羅馬蕃茄藜麥伴胡麻醬手卷: 香芒牛油果手卷，手卷配搭入口非常之清新，而且塊紫菜脆卜卜，真係好好食，原本諗住唔夠飽嘅話會再encore多一份手卷，點知...要留番下一次再幫襯先可以再食到🤣湯品: 蟲草花竹笙黃耳蓮子冬瓜燉湯，出咗名係湯王嘅我，只要去到有湯叫嘅地方我都一定會點，呢個湯超足料，一啲味精都無，但係所有食材嘅味道都出晒嚟，而且呢個配搭好健康養身保健主食: 三杯猴頭菇雙薯煲配十穀飯，一上枱香味撲鼻而來，要整到呢個水準真係唔容易，蕃薯薯仔都煎香咗，個汁料濃度十足，送飯一流！仲有甜品同飲品，一個Dinner set真係夠我地兩個女生食到捧住個肚！之但係我地一坐低就見到隔離枱點咗個焗大啡菇，賣相極吸引，又見到係招牌菜，所以都點咗！大啡菇載住啲薯蓉再加層芝士同黑松露喺面先拎去焗，芝士控又點會忍得住口！三件我包辦咗兩件🤣焗過嘅芝士煙煙靱靱豐富咗口感，黑松露嘅香味又豐富咗味蕾，呢道招牌菜真係必叫！下次屋企聚會，呢間餐廳一定on list，健康之餘又好食，價錢又affordable!原本影咗好多食物相，可惜電話壞咗，朋友電話只係得零星照片T_T…查看更多

聽到好多朋友食過呢間Goobne韓國烤雞都話好食，所以今日嚟到荃新天地都去試下！習慣早食lunch，所以未開門已經到咗，成間餐廳佈局都好光猛乾淨，感覺非常良好：)坐低掀一掀個menu，竟然首先俾飲品吸引咗，所以拿拿地叫兩杯嘢飲先，出面熱到透唔到氣，要揀杯超冰涼嘅，我就揀咗杯無酒精嘅藍橙沙冰，老公就揀咗杯有酒精嘅鯊魚之淚！兩杯賣相都極討好，忍唔住影咗幾張相，藍橙之冰甜甜地，texture就好似思樂冰咁，我自己就好鍾意喇！老公杯鯊魚之淚我試咗一啖，有少少檸檬味，易入口嘅，望住條鯊魚，不期然心情都輕鬆起來😆我地喺果味蒜香烤雞同BBQ醬煙燻烤雞兩者之間爭扎咗好耐，最後猜包剪揼揀咗煙燻烤雞，其實心諗如果有雙拼就好喇，兩個人叫兩款又驚太多食唔晒，叫一款又好似得一種味唔夠喉🤔BBQ醬煙燻烤雞上枱好香，熱辣辣，真係口水直流，外層BBQ醬甜甜地，啲肉又帶有濃郁嘅煙燻味，停唔到口，不停食食完個烤雞我地兩個都意猶未盡，仲好想試多一款嘢，左揀右揀終於決定order芝士烤雞串，雞塊好嫩，個醬好惹味，個sauce配埋芝士其實好match，奈何我食咗兩舊之後啲辣味開始散出嚟，條脷頂唔順，所以唯有撩啲芝士食😂老公就食得好滋味😑其實仲好想試埋甜品架，不過已經太飽，唯有下次同朋友再嚟先食。另外，雖然lunch hour，不斷有客入座，但係呢度啲staff好有禮貌，無急住一食完就收碟，可以俾你慢慢享受盡情傾偈👍…查看更多

以前喺佐敦返工，收工好鍾意去諾士弗臺happy hour，轉咗工之後都好少嚟喇！今日心血來潮想飲杯嘢輕鬆下，所以就嚟咗呢度喇！其實都係隨便揀一間有酒飲有扒食環境又chill chill地嘅餐廳呢度happy hour好扺，Draft Beer每杯只係$49，坐低即刻叫兩杯先啦！話咁快兩杯冰凍嘅啤酒就送到！我揀咗Boddingtons，鍾意佢易入口又帶有好香嘅麥味既然難得出嚟飲嘢就唔想叫薯條薯皮呢啲咁普通嘅小食，所以揀咗酥焗芝士菠菜釀大蘑菇同白酒忌廉煮鮮蜆！其實個蜆唔係小食嚟嘅，不過我地當小食咁食，反正蜆係食唔飽人嘅，一邊傾偈飲啖啤酒食隻蜆都幾寫意個焗蘑菇好有驚喜，熱辣辣，蘑菇仲好Juicy無焗到乾晒，啲涵料嘅調味好配合，濃郁得嚟又無搶走蘑菇嘅味道，好食個蜆嘅醬汁都幾creamy，用嚟沾面包食幾唔錯。仲叫咗個steak，認真思考咗一陣，決定揀炭燒安格斯證書牛扒，因為俾menu上面幅圖吸引咗。Order咗medium，裡面真係仲有少少紅但係無血水Good Good個steak正正常常，Steak旁邊有個砌得好靚嘅蒜頭，用叉唧咗啲蒜蓉出嚟配牛扒食，好香！ 揀咗個黑松露sauce，個sauce好惹味，Side dish揀咗Signature Yam Fries，其實係蕃薯條，我至愛炸到外面脆卜卜，甜甜地，好好食，一條都無嘥，全部落晒肚…查看更多

好耐冇打邊爐呢，今次食呢間出名正嘅火鍋店，不過都係第一次嚟食。佢會先送上開胃小菜，有我喜歡嘅中華沙律，嗌左双拼鍋，可以選兩種湯底，我選了瑤柱清湯鍋同四川麻辣鍋，兩個都好正丫，點了食物就等打邊爐，呢個時間拎埋醬料準備定開餐，注意要收醬料費啊，不過都好合理公道嘅。點了不少食物，有西班牙黑毛豬豚肉，手打鮮蝦滑，蟹籽墨魚滑，鯇魚片，酥化魚皮，黑椒鮮牛丸，蘇格蘭聖子皇，手切雪花牛小排，手切肥手，桂花蚌等等，食到飽晒丫，超級豐富。當中海鮮桂花蚌，聖子皇好鮮甜彈牙，手切嘅牛肉又特別好食，蝦滑墨魚滑又好滑好味，牛丸同其他丸類就好爽口彈牙，全部都好好味，食到好爽丫，正丫。價錢公道嘅，一分錢一分貨，食物幾高質，新鮮，味道好食，吾錯嘅一間火鍋店。…查看更多

今日去左鑽石山，見到有Mr iron.原來呢度都開左分店，太開心啦，拉埋朋友去食。可能算早，吾洗等好耐就有得入去食啦，環境一樣好型格嘅，韓味十足，坐底點左吾少正野，傾住計準備等食。好正有專人幫我地燒埋，真正等食丫，要推介黑毛豬，好正丫，濟洲直送嚟架，肉質好岩用燒，好爽口，又有保留肉質，吾會太乾，當然可能人地燒比較尊業，燒得好好食。另外仲點了調味豬皮，先75元大大碟，份量都好多，燒得好彈牙丫，好有咬口，幾好味。另外流心墨魚球都好特別，入面加左芝士，芝士控實喜歡，外脆肉流心，多重口感，味道吾錯。前菜同鍋邊蛋係任食架，食左幾round蛋，店員都好nice 咁又會主動嚟問我地仲要吾要蛋，所以食左幾round蛋都吾覺得吾好意思，哈哈，可以架芝士落去整，仲好食，正丫。服務同食物都好正，環境氣氛吸引，搞幾個朋友一齊食下燒下幾過引，推介。…查看更多

雖然最近天氣都好熱，不過喜歡食火鍋嘅我，又點會因為天氣而卻步呢？今次挑戰嘅係旺角正宗水上人氣鍋專門店。佢正吾正宗我非水上人不太清楚，不過好冇食我就一清二楚，我推介得都真心覺得吾錯，我點了個套餐，大概三百蚊，有超過十款食物海鮮，幾正又幾抵，當中包括花蟹，鳳凰蚌，生猛鮑魚，海蝦等等。花蟹肉都實，鮮甜都有膏算係幾好鮑魚有咬口，幾大隻，蚌都新鮮，帶點海水咸味，蝦食得出新鮮，肉實彈牙，仲有沙白同硯，都好肥美，冇食到沙，好食。五款自選中，我推介墨魚滑，手打蝦魚，兩者都好好食，墨魚滑好香嘅墨色味，彈牙，又好滑，好好味，另外手打蝦丸，都好大粒，真正人手手打，都好彈牙，而且入面仲有蝦肉，記得係fb讚好埋，會送田園蔬菜盛盤一份。今次呢間水上人幾正，食到幾飽，三五知己邊食邊傾計，爽丫。…查看更多

又係每月一次嘅八婆聚會，唔想再去啲限時嘅餐廳影響傾偈嘅心情，今次就千里迢迢走咗出銅鑼灣揾食！之前同屋企人食過尚鮮佐敦店，覺得可以再encore，所以今次就同朋友嚟試下銅鑼灣店嘅水準！銅鑼灣店燈光比較昏暗，所以入到嚟反而感覺比較relax，有種辛苦咗成日可以放鬆下嘅感覺！今次揀個二人精選套餐，上次試過冬蔭功湯底好正，可以飲完再加湯打邊爐，所以今次再encore個湯底，不過朋友就擔心冬蔭功湯底太濃所以再加埋個清湯雙拼！個冬蔭功湯底依舊足料，有好多蝦好多菇同埋配料，唔好過咸，好好味，我飲咗兩碗先叫店員幫我加湯開始烚嘢食！套餐嘅食物好快就上晒枱，都幾多嘢食架！一定要讚下個牛，手切架，啲雪花均勻，一食就知係靚牛，牛味濃厚，好香， 好滑口，呢碟特尚手切牛我同朋友都讚不絕口，最快清晒！另外鮮打牛丸同豬肉丸都係手打，手打嘅肉丸的確同平時打邊爐嘅急凍或者機打嘅肉丸有好大分別，食落有肉汁又爽口，我個人就比較鍾意牛丸喇！火鍋點可以無午餐肉架，所以我地都後加咗個韓國午餐肉，見到啲午餐肉排得咁整齊靚靚已經好開心，厚切成條狀，食起上嚟好方便，而且呢度嘅午餐肉唔係用cheap嘢，口感實淨，有香濃嘅肉味，就算致癌都忍唔住口鯇魚片爽脆，其他都不過不失，standard嘢啦！我相信我會為咗個牛同個冬蔭功湯底再帶其他朋友嚟幫襯！…查看更多

老公平時好少食海鮮，所以今年生日特別揀左海鮮餐賀下佢，點知遇著8號風球，初初仲擔心餐廳唔開，打電話去問，好開心，餐廳照常營業！我地揀左首爾塔，＄398/位，超豐富海鮮，有鮑魚、蟶子、海蝦、元貝、刀蚌、象拔蚌，北寄貝、大花蛤、仲有花蟹同龍躉，老公話今餐已經食晒一年海鮮quota！哈哈！粥底揀左經理推介嘅韓式豬手湯！佢話好多客都讚呢個豬手湯好食！首先出場嘅係韓國四色前菜，個泡菜好好味，夠酸而且辣度啱啱好，蕃石榴都開胃！我不停係咁食食食！韓式嘅海鮮塔全部都係清蒸，同中式海鮮會加好多蒜蓉粉絲一齊蒸好唔一樣，所以韓式嘅食材一定要好新鮮，稍為唔夠新鮮就真係一啖見真章，呢度嘅海鮮食材就very good喇，全部都好鮮味，基本上完全唔需要醬料去調味！第一層嘅蟶子同象拔蚌係我至愛，好大隻，仲好爽脆彈牙，有粒車厘茄又可以refresh下味蕾再繼續！由於店員話我地每層大概有5分鐘食用時間，keep住呢個pace去食就唔會令到其他層數嘅海鮮蒸得太耐影響口感，我地都初初都乖乖地用枱上面個漏斗計時，不過食下食下，我地發現我地清得太快，根本唔會過時！哈哈！元貝都係我平時好鍾意嘅海鮮，今次較啱時間蒸得剛剛好，口感十足，爽滑！之後嘅海蝦、刀蚌、花蛤、鮑魚都無失色，貝殼類全部都處理得好，一粒沙都無食到！好欣賞每層都會有啲蔬果類嘅配菜清下舌頭，而且啲配菜一啲都唔馬虎，當中個木瓜我比較印象深，蒸完好甜好好味，老公就大讚南瓜同蕃薯夠晒甜！由於老公唔食蟹，隻花蟹就成為我囊中物，蟹膏夠香，蟹鉗仲啖啖肉，蟹肉一啲都唔梅！食到最後其實已經好飽，諗到仲有個粥未食，不其然有少少膩嘅感覺，點知一試又停唔到口，個粥底好好味，好鮮味，海鮮嘅精華完全融合左落個粥度，而且個豬手好入味，我平時好抗拒食豬手，因為好唔鍾意果層皮，但係呢個豬手我都忍唔到口食左幾舊，估唔到今次最大收穫係個粥底，比起我之前食蒸氣火鍋個粥底真係差好遠，呢個真係好好味好鮮甜！最後經理仲話打風我地都去幫襯請我地食雪糕！又一個意外收穫！…查看更多

去到先知原燒道場同拳王泰國餐廳係share一個門口，上層係原燒道場，地面層就係拳王泰國餐廳，店員遞上兩間餐廳嘅menu話食串燒食到悶悶地嘅話可以叫埋泰國菜refresh下串燒種類都算多，前後兩頁有好多選擇熱辣辣，叫咗杯西瓜沙冰潤下喉，好清甜，係用新鮮西瓜調制，夏天飲真係好消暑朋友叫咗杯手工啤酒其實都幾surprise可以叫埋泰國菜，我同朋友都係泰迷，所以都忍唔住叫咗個金柚沙律開下胃先沙律個汁好正，酸度啱啱好，做頭盤真係好開胃，而且柚子嘅份量一啲都唔少雞泡魚干係每次食串燒都必叫嘅，呢度嘅雞泡魚干係幼切嘅，所以燒完出嚟多咗份香脆感，感覺又幾得意，個醬汁好入味，唔點沙律醬都好夠味另外叫咗個明太子雞翼，一上枱真係“嘩“一聲，啲明太子好多好重手呀，幾乎舖滿成隻雞翼，實在太正喇！要提一提呢度嘅串燒係可以揀辣度架，落單嘅時候可以揀大中小辣定唔辣，嗜辣嘅我地當然揀大辣啦！我仲另外叫佢俾咗啲辣椒粉我地自己再加辣，呢度嘅辣椒粉好香好麻試咗唔同嘅串燒之後，我地一致認為瓜類、菜類嘅串燒係特別香口惹味，其中翠玉瓜同原條茄子係需要再encore嘅，好juicy唔會燒到乾晒，不過瓜類串燒特別吸味，所以辣度係要有所調整，如果唔係真係會流鼻水另外牛舌都好好味，個醬汁應該係自家調制，同出面食嘅唔一樣味，帶有少少甜味，好特別，熱辣辣上枱特別吸引！食咗咁多串燒，又心思思想飲番個湯，於是叫咗個冬蔭功，呢個冬蔭功真係有驚喜，勁足料兩隻大大隻嘅蝦一大堆菇，個湯超夠味唔會太酸唔會太辣，味道拿揑得啱啱好呢度嘅泰國菜真係有水準，唔怪得一路都見到好多人入嚟食，就算要等位啲人都唔介意，一間餐廳可以食到兩種完全唔同風味嘅食物，啱晒貪心又心大心細嘅我地…查看更多

一直都想試蒸氣石鍋好耐架喇！見到呢間任飲任食都係三百幾蚊，一於book位試下！可能Blue Wednesday嘅關係，餐廳唔算好多人，我地兩個人被安排坐喺卡位，呢度嘅座位好闊落，坐得好舒服。餐廳似乎裝修完嚟，好光猛，感覺新淨得嚟又乾淨，仲有好大範圍嘅生猛海鮮區俾客人揀海鮮！餐廳仲設有自助醬料吧呢個任揀任食任飲蒸氣海鮮餐嘅玩法就係要首先揀咗粥底，然後揀一款燉湯，另外除咗乳鴿同貝殼盛盆之外再揀要龍蝦定刺身，再揀四款你鍾意嘅海鮮，去到呢個位，我已經覺得好豐富，所以之後嘅肉類丸類我都暫時唔點住！粥底：我就揀咗新鮮排骨粥，真係生米連料放喺石鍋入面即製架！燉湯：我就揀咗姬崧茸燉螺肉湯，個燉湯好足料，好夠火喉，我超級like，飲完一碗都唔夠喉，想飲多碗脆皮乳鴿：乳鴿比我想像中，有肉咬下，而且啲肉唔係鞋烚烚，都算嫩食完啲唔駛蒸嘅嘢，就正式進入今日嘅主打菜式喇！全程都有店員協助，唔駛怕唔知蒸幾耐唔知啲嘢熟唔熟，因為個個店員都好熱心招呼你，如果想自己落手落腳都無問題，個爐有預設timer，餐牌都有指示每種食材要蒸嘅時間！好貼心！首先出場係龍蝦！跟住有蟶子，鮑魚，象拔蚌同埋蝦，蜆！呢度嘅海鮮都好新鮮，好鮮味，基本上完全唔駛落醬汁，不過最重要係呢度嘅貝殼類全部都處理得好好，好乾淨，一粒沙都無，呢樣真係好抵讚，出街食海鮮新鮮好味當然重要，但係如果處理得唔好，食完之後個肚唔舒服就無謂啦！基本上，食完啲海鮮已經有少少飽嘅感覺，不過都一定要試下其他嘢食嘅，最多每樣試一兩件唔好蝕丫嘛！我一定要推薦蟲草花清遠雞同順德污糟雞，啲雞超級嫩滑，好好味，唔知點解可以咁滑！另外馬拉糕都一定要試，可能純粹自己對馬拉糕情有獨鍾，所以我一個人食咗2舊最後個仲食咗碗粥，真係超級飽！食飽店員仲送上西瓜一碟，夠晒透心涼整體嚟講，我覺得呢餐飯絕對係物超所值，呢個值錢食到呢個質數嘅食物同服務，而且仲有啤酒汽水竹蔗水任飲，同屋企人食飯或者朋友聚會都係一個好選擇…查看更多