kk_genki's Profile

灣仔近日開咗間廚師發辦料理店，新店話題性十足，跟其他料理店一樣，除嚴選⽇本頂級時令⻝材外，更於傳統日式割烹料理中加入中華元素。真正中、日合作，完美展現「一場盛宴，兩種體驗」。新店裝修華麗優雅，半弧形式嘅雲石吧檯，加上前、後式嘅廚房設計，甚有氣派之餘，亦俾大家可以近距離、180度地欣賞主廚們嘅手藝。雖然呢度坐位唔多，12個左右，不過阿叔反而覺得更正，叫多少少人就可以包場，食、飲更盡情！🌌夜の献立 ($1,980 / $2,680) 晚市套餐價錢為$1980及$2680，前者19品配主食椒⿇乳鴿；後者22品就配主食宮保⾵新鮮⿓蝦。其餘2款套餐都有前菜、時令刺身、壽司、湯品、甜品等。🦀酒肴：北海道毛蟹 | 茅台啫喱用上北海道毛蟹，師傅們預先一早拆晒肉，配上以蟹殼整成嘅啫喱，食之前噴上少少茅台，賣相精緻，啖啖蟹肉食得好滋味。🦀蒸し物：松葉蟹燒賣 | 京都黑醋與柑橘細絲餐廳招牌手工菜之一！師傅先以莧菜汁揉成粉紅色嘅燒賣皮，入邊就包有全人手拆嘅松葉蟹蟹肉，食之前再喺面頭加少少咸蛋黃碎作點綴，成朵櫻花般嘅賣相，唔相機食先真係對唔住自己。🦞強肴：宮保風新鮮龍蝦 | 貴洲子彈頭辣椒龍蝦加上宮保醬汁，另有四川花椒同貴州⼦彈頭辣椒作為配菜，為本身帶鮮味嘅龍蝦肉更添多層次味覺。🐦‍⬛強肴：椒⿇⾵如果唔食龍蝦，就可揀經過48小時熟成嘅乳鴿，以半煎炸嘅烹調技術，肉質非常嫩滑，記得沾埋川味⻘椒醬一齊食，真心更惹味！🍜食事：青嵐抹茶⼿打担担麵。川味三⾹麵條以京都⻘嵐抹茶揉製而成，配上特製嘅担担醬汁，食到淡淡茶香之餘，亦有點點嘅辛辣味，好有驚喜嘅麵食。總結：好耐無食過一場滿足感咁大嘅廚房發辦喇！滿足感除咗來自勁飽肚外，亦來自欣賞到師傅們嘅精湛嘅廚藝同豐富嘅創意。每道菜都睇得出佢哋花盡心思設計，無論賣相、味道都好有驚喜，絕對值得嚟體驗一吓！…Read More

要嚟西環，想搵間既坐得舒服方便做嘢，又可飲吓啡食埋飯，大家可以試吓嚟呢間東京過江龍，走北歐簡約風嘅咖啡店。雖然呢度地方未算超大，但感覺非常舒服，店內木系傢具加上柔和燈光，啱晒同朋友嚟吹水chill吓。而阿叔就最鍾意室外嘅水泥風卡座，除咗呢處好好打卡外，更可以靜靜地俾自己做吓嘢！Tiger Prawns & Smoked Salmon ($158) 醬汁大放送嘅意粉，味道唔單止濃郁，口感仲好creamy。意粉吸晒啲醬汁，配埋鹹香味重嘅煙三文魚同埋肉質結實大蝦，食落滿足。Swedish Cinnamon Apple Crumble Cake ($38)如果鍾意甜食，不妨試埋店內自家製嘅肉桂蘋果金寶蛋糕， 蛋糕微微烤熱過，外脆內軟，配上肉桂同忌簾，酸酸甜甜嘅味道，平衡得啱啱好，唔會膩。…Read More

阿叔久唔久都會一個人食晚飯，除咗快餐、拉麵、壽司外，近日又多一個好選擇！位於銅鑼灣耀華街嘅呢間日式餐廳，店內主打關西風壽喜燒，就算一個人嚟都可以一爐獨享。加上價錢大眾化，一人前套餐包前菜、野菜盛合、日本產黑毛A4和牛、米飯或烏冬同甜品都只不過係 $168 起，CP值相當唔錯。關西風壽喜燒煮法傳統，先以牛脂起鍋，再按個人口味加入自家製嘅壽喜燒汁烹煮。如果怕耐咗味太濃嘅話，亦可加入昆布汁調淡。個人覺得相比關東風，呢種煮法嘅牛肉會較香口，更能突出牛肉原汁原味。🥘極上肉眼壽喜燒套餐 ($238)今次阿叔揀咗套餐嘅正常牛肉份量，大約120g 左右，一共有3大塊。用上嚟自日本嘅薩摩牛，雪花紋理分明，肉質柔軟，雖油脂未算好重，但牛味依然濃郁，沾埋蛋汁一齊食，口感更滑。野菜盛合份量十足，有豆腐、大蔥、日本菇、芋絲等等，最後配埋用日本米煮成嘅白飯，飽足又滿足。☝🏽順帶一提，為慶祝餐廳一週年，宜家只要追蹤佢哋社交平台、影相出Story兼Tag番佢哋，就可以免費獲得生啤一或40g和牛赤身一客！…Read More

位於上環蘇杭街嘅呢間日式料理店，不知不覺原來已開業6年。今次為慶祝週年祭，上環店期間限定推出極致廚師發辦盛宴，無論豐富抑或滿足程度都會令你非常滿意。14品極致Omakase ($2,780)🔸先付三點：金平蓮藕 | 明太子半片 |鵝肝米紙🔹刺身三種▪️魴魩魚：阿叔第一次食，加上青檸點綴，味道鮮甜清新▪️石垣貝：呢個季節最啱食貝類，果然口感非常爽脆▪️德島縣真蠔：阿叔至愛，生蠔漲卜卜好肥美，而且味道濃厚🔸強肴：燒榮螺螺肉吸收晒鰹魚高湯精華，口感爽脆又有嚼勁🔹刺身二種▪️花咲蟹：啖啖蟹肉，蟹黃濃郁▪️北海道池魚：池魚切成條狀，加埋芝麻一齊食，更添魚油香🔸燒物：和牛薄燒用上鹿兒島A4等級和牛，肉味濃郁，口感幼嫩，又唔會太膩🔹刺身二種▪️白海膽配牡丹蝦：用上北海道白海膽，比起其他，阿叔認為佢味道更清淡、香甜，絕對會一食難忘▪️赤身、中拖羅、大拖羅：極邪惡嘅造法，師傅以紫菜一次過包住晒三款刺身。一啖放晒入口，嗰種唔同滋味嘅魚油香徘徊喺口腔之中，正到爆炸🔸燒物：北海道鹽燒喜之次選用被日本人視為最珍貴嘅魚鹽燒，魚皮夠香脆，魚肉又軟嫩，果然日本一🔹海道蝦夷鮑土鍋飯料理店怕你唔飽，最尾以鮑魚釜飯作結尾。北海道鮑魚原隻上，口感軟糯富彈性，飯粒吸收晒高湯精華，連埋三文魚籽、菇粒一齊食，極致滿足！🔸味噌湯🔹抹茶奶凍☝🏽阿叔總結：雖然呢個廚師發辦套餐價錢唔算平，但呢14道菜絕對係匠心之作，每一道都係今季當造食材，而且絕對係一級料理，款款都盡顯師傅們嘅廚藝同心思，食得阿叔好滿足，值得支持。…Read More

香港可以食到嘅日式料理多的是，壽司、魚生飯、火鍋、居酒屋周街都係，不過專食天婦羅丼飯就唔多，唯獨呢一間。佢嚟自東京日本橋，2010年開業後就迅速喺世界各地開分店。香港都有4間，遍佈灣仔、奧運、荃灣同東涌。餐廳以各式各樣嘅天婦羅丼飯作主打，憑其極度邪惡嘅賣相、獨有「秘傳江户前天丼醬汁」而廣受大家歡迎。🍤江户前天丼 ($138)單睇嗰條足30cm 長嘅穴子天婦羅就已經心心眼，除此之外，仲有海老 (加$38 升級虎蝦)、魷魚、溫泉蛋・海苔同莢豌豆天婦羅，澎湃程度連一粒飯粒都見唔到，非常吸晴！🤤🤤🤤建議先沾秘製醬汁食少少，品嗜天婦羅新鮮熱辣炸起嘅酥脆。食咗一半後，可戳破炸溫泉蛋，撈均蛋汁、醬汁一齊食，口感層次即時會更豐富。🦪日本產牡蠣 ($38/2隻)雖然阿叔平時鍾意食生蠔多，不過呢隻牡蠣天婦羅又幾唔錯，大大隻相當肥美，即叫即炸夠香脆，愛蠔人士值得一食。🍨獺祭雪糕 ($28)食完啲咁油膩嘅嘢，當然要食番個雪糕fresh番吓！專門店宜家期間限定推出100%日本製造、選用北海道鮮牛奶嘅獺祭純米大吟釀酒粕雪糕。阿叔想食好耐架喇，今次終於有機會試到。由於雪糕含有少於1%嘅酒精成分，所以食落一啲酒味都無，反而充滿奶味，大人小朋友都啱食。🤗🤗🤗…Read More

隱藏喺銅鑼灣希雲街街尾嘅呢間日式料理店，佢可以話喺集鐵板燒同廚師發辦於一身，店內一邊食壽司刺身，另一邊就食鐵板燒。疫情時阿叔都嚟幫襯過佢哋嘅廚師發辦，今次就同同一朋友再嚟encore，試埋鐵板燒先。🥢晚市鐵板燒 ($1280)飽到嘔嘅一餐，除咗前菜沙律、炒飯、味噌湯、甜品外，仲有2款時令刺身、4件壽司同5款鐵板燒菜式。🐟時令刺身2点左口魚兩食，無論加紫蘇齋食，抑或包住海膽一齊食都咁正。梭子魚，炙燒過後，更添油脂香氣。🍣時令壽司4点無諗過嚟食鐵板燒，居然都會食到壽司。北寄貝、平政魚、拖羅同海膽，款款質素都唔差，滿足埋自己想食壽司嘅慾望。鐵板燒🐟馬友魚，燒至皮脆肉嫩，沾埋柚子汁一齊食，更能中和魚嘅油脂感。🦐大蝦大大隻，爽口又彈牙，加上以蝦膏煮成嘅醬汁，非常惹味。🥢北海道帶子，鮮嫩厚肉，輕輕煎香後加入高湯同小香菇，超鮮味。🥪鵝肝脆多士，鵝肝外表夠香脆，內裡就口感綿密，即使膽固醇指數略高嘅阿叔都忍唔住要破戒食。🐂美國特級牛肉薄燒，牛肉燒至5成熟，入面包住炸蒜片同香蔥，好滿足呢！…Read More

銅鑼灣又一新店開業，今次迎嚟新式大排檔！呢間位於登龍街嘅上樓大排檔嚟自坪洲，阿叔間唔時都會到小島幫襯，佢哋嗰種別樹一格嘅飲酒氛圍真係攪唔掂，每次都令阿叔樂而忘返。今次餐廳登陸銅鑼灣，除保留島上每日提供新鮮生猛海鮮外，仲主打多款傳統特色小菜，口水花甲王、酥炸台山蠔、蜂巢荔茸帶子、脆皮芝麻雞、鍋塔蝦籽豆腐等，款款都經典十足。菜式夠懷舊，店內裝修亦好有舊時回憶，門口、樓梯多個霓虹燈招牌，既搶眼，又夠氣氛。跟老闆傾開，宜家仲喺試業階段，菜式、裝修都會逐步優化，到時期望會以更好嘅資態示人。🥢口水花甲王 ($78)阿叔唔太辣得，但呢個口水花甲王就真係辣得幾過癮。花甲味道夠鮮甜，配上店內自家製嘅香辣醬汁，非常惹味，送酒一流。唔怪之得係店內嘅招牌菜，絕對係嚟到必食菜式之一！🥢鍋塔蝦籽豆腐 ($128)「鍋塔」嘅造法係先煎再烹，師傅將豆腐薄蘸麵粉，裹蛋汁，炸至金黃色後，再落湯等豆腐煨至收汁。呢種烹調方法令豆腐口感濕濕地之餘，亦有外脆內軟嘅質感，配合蝦籽嘅鹹香，雙重滋味。🥢海鮮泡脆飯 ($238)大大份嘅海鮮泡飯，足夠阿叔今次同2位朋友每人食足2碗半。湯底百份百用上新鮮魚熬製，再加入大蝦、帶子、星班等海鮮，味道鮮甜。上菜時，店員會即時加入即煎脆米同芫荽碎，前者增加口感層次，後者就提升鮮甜度，不如不覺，我哋三個就KO 咗成煲。…Read More

蠔迷又出動喇！今次嚟到銅鑼灣希慎廣場地庫嘅呢間生蠔專門店。呢度提供嘅生蠔全部嚟自愛爾蘭頂級生蠔養殖場Cooley Oysters，嗰度採用優質A級水域養殖，並獲得歐盟認證，質素絕對有保證。👍🏽👍🏽有別於一般生蠔專門店，呢度採用開放式廚房，氣氛無咁侷促，就算I人一個人嚟嘆蠔都唔會感覺尷尬。建議大家坐埋吧檯，一邊欣賞廚師嘅廚藝之餘，仲有額外9折優惠，一舉兩得！✌🏾✌🏾🦪生蠔 36m/45m/54m/60m ($55起)呢度精選多款生蠔，有36、45、54同60個月不同育成期可揀，價錢由$55起。鍾意飲酒人士不妨叫杯白酒襯托一吓，除可提升生蠔鮮甜味外，生蠔更有6折優惠，即一隻都唔使$33，抵食！今次先試45同54個月育成嘅生蠔，兩款肉質都幾肥美，前者就海水味較濃，口感較滑；後者就鮮甜啲啲，味道層次豐富。🦞加拿大龍蝦意式扁意粉 ($148) 餐廳嘅招牌菜式之一！用上嚟自加拿大嘅龍蝦，佢肉質結實，味道鮮甜。阿叔特別鍾意呢度嘅秘製龍蝦汁，味道濃郁之餘，質感亦濃稠，使每條意粉之間都掛滿醬汁，不知不覺咁就會令你食晒成碗意粉架喇。🍴白酒煮蜆 (套餐加$38) 隨以上主菜加$58可轉餐，有埋頭盤、餐湯或飲品。想食好啲啲，可下晝2點後嚟到再以$38升級叫埋呢款白酒煮蜆嘅頭盤。時令大蜆隻隻都厚身鮮甜，食到淡淡白酒同蒜蓉味。加上佢份量唔少，食極都好似仲有咁，呢個價錢值得追加。…Read More

呢間位於荃灣一商場入面嘅café小店，咪睇佢舖頭細細，但食物質素絕對係你估唔到咁高質。佢價錢大眾化，手工酸種麵包薄餅、漢堡包、炸魚薯等都只不過$68起，加上份量十足，絕對啱晒一眾學生哥同後生仔嚟幫襯。不過聽聞佢哋之前有意結業，好彩最後都有決定續租。難得繼續，阿叔當然要嚟支持分享俾大家睇吓啦！🍔型男漢堡 ($72)店內嘅招牌菜之一！單睇佢嘅賣相唔單只俾型男，似乎係要俾大隻男食多啲！漢堡牛扒加上流心蛋、紅菜頭、蕃茄、煙肉、芝士同沙津菜，加埋充滿牛油香嘅麵包，一層又一層，份量十足，唔用刀、叉食，真係攪唔掂。🍟Shake Shake 粉 (加$5)小店近日聯乘本地品調味超人，佢哋嘅Shake Shake 粉產地源自泰國，100%無添加味精同人造色素，絕對食得放心。今次聯乘一共有4款口味可揀，芥末、黑松露、甜粟米同燒烤，只要加$5 就可以食到其中2款。阿叔推介你必叫芥末口味，微辣嘅味道，令人食得好開胃，跟呢度熱辣香脆嘅粗薯條可以話係perfect match！🍰Oreo巴斯克芝士蛋糕 ($40) 除咗$5 Shake Shake 粉外，宜家只要消費滿$90，仲可以以半價價錢，即$20食埋巴斯克芝士蛋糕。蛋糕除咗芝士味濃郁，入口即化外，中間仲真係食到Oreo 餅乾碎，加上份量都幾大件吓，呢個價錢同質素，真心好抵食！…Read More

社交平台睇得多，今次終於現場睇到兼食到呢條有成半米長嘅八爪魚腳喇！阿叔講緊嘅係呢間位於海港城地下嘅日式料理店，佢哋由東京米芝蓮一星餐廳嘅日藉師傅岩央泰同佢徒弟主理，店內主打江戶前風格嘅廚師發辦，多款菜式例如慢煮汁燒八爪魚、鮟鱇魚肝、毛蟹都係佢哋嘅招牌菜。皇 すめらぎ ($1,780)晚市廚師發辦嘅其中一款餐單，有前菜、刺身、燒物、手握壽司、玉子燒、湯品同甜品17道菜式。呢度每一道菜都不時不食，而且非常精緻，絕對係視覺同味覺嘅雙重享受。其中最令阿叔期待當然係慢煮汁燒八爪魚！近2kg、有成半米長嘅八爪魚腳先慢煮，後再以醬油浸烹製而成。咬落去味道甜甜地，口感軟腍得嚟又好彈牙，層次感豐富。配埋wasabi同柚子胡椒，個咸香味真係令成件事升級！每一啖都好滿足。除咗八爪魚，其他菜式都好出色，仙鳳趾真蠔肉身肥厚，味道鮮甜。手握壽司阿叔大推青森大間拖羅同根室赤海膽，前者唔使多講，油脂甘香，入口即溶，後者呈深黃色，味道濃厚甘甜。加埋玉子燒、湯同甜品收尾，好圓滿嘅體驗。先付水雲醋 | 芝士蟹肉卷 | 里芋刺身深海池魚 | 北海道仙鳳趾真蠔 | 慢煮水八爪魚燒物網燒吞拿魚 | 太刀魚酒盜燒手握壽司池魚 | 北寄貝 | 車海老 | 小肌 喜知次 | 青森大間拖羅 | 根室赤海膽 | 海鰻玉子燒味噌湯靜岡蜜瓜…Read More

以前喺灣仔返工，呢間刺身壽司專門店都算係阿叔同同事、朋友成日嚟慶祝生日嘅好地方。原來佢哋近排開咗分店，仲要喺銅鑼灣添，以後嚟食又再方便咗！月見 - 極丼定食 ($245) 一碗有齊海膽、三文魚籽、本鯖魚腩蓉同日本夢王蛋蛋黃，絕對係午市嘅豪華丼飯！刺身逐層一環一環地鋪滿成碗飯，賣相非常吸睛之餘，食落款款刺身亦鮮味無窮！我自己就最鍾意三款刺身撈埋蛋汁一口食，一次過品嚐晒鹹、鮮、甜、滑嘅滋味。呢種感覺，極致幸福！自問細食嘅你要小心，因為除咗丼飯，定食仲跟有一碗高野豆腐手打烏冬、海帶味噌湯、胡麻田園沙律同海鮮茶碗蒸，樣樣都份量十足，小心飽到嘔，哈哈！特濃開心果雪糕脆窩夫杯 ($68)如果嚟同朋友慶祝生日，唔好唔記得叫番個甜品打吓卡。料理店桀咗會幫你寫名外，仲會免費畫公仔，真心畫得好靚，畫乜似乜！今次阿叔就揀咗呢款開心果雪糕脆窩夫杯，雪糕味道濃郁，又唔會太甜，連埋窩夫杯一齊食，更添口感。…Read More

平日中午時份走入中環蘇豪區，嚟到呢間位於士丹頓街、充滿北歐風情嘅西餐廳食宴。呢度空間寬敞，裝修簡約。店內以純白色作主色調，另配上原木色嘅傢俱，加上樓底夠高，採光度十足，令人感覺恬靜舒適。如果天氣唔太熱，建議坐出出面，一邊享受日光，一邊嘆番個靚lunch，更添悠閒感架！餐廳除咗全日早餐、沙律、麵包、窩夫等外，更以多款手工意粉作主打，螺絲粉、蝴蝶粉、貝殼粉等都食得到。Pesto Cream Chicken Fusilli ($138)手工螺絲粉配上味道濃郁嘅香草青醬同嫩雞肉！值得一讚係螺絲粉口感真係好有嚼勁，非常掛汁，連埋松子一齊食，口感層次更添豐富。實屬阿叔嘅個人推介！Butter Cream Seasonal Mixed Seafood Conchiglioni ($158)手工長意粉伴有帶子、青口同大蝦，賣相吸睛！相對上一款，呢款意粉就較粗身，口感較硬，Butter Cream 醬汁就有香醇嘅奶香味，口感creamy。…Read More

雖然阿叔唔太好甜品，但唯獨對著日式布甸🍮同班戟🥞就好難抗拒！就好似呢間位於佐敦廟街嘅日式梳乎里班戟店咁，一直都喺阿叔嘅to-go-list入邊。趁住自己暫休生活，就繼續平日嚟探店一吓先。班戟店2021年開業，短短4年間就連大圍、元朗都有佢分店。呢度由法國藍帶廚師主理，店內除咗提供唔少主食外，更主打日式梳乎里班戟同窩夫等甜品，款款都非常IGable，難怪開業無耐就火速成為網紅店。🥞宇治抹茶梳乎里班戟 ($138)店內每日限量供應嘅班戟，抹茶控人士值得一試！3層高嘅梳乎里班戟唔單止蛋香味濃郁，而且空氣感十足，震吓震吓咁，非常有治癒感。配埋抹茶忌廉、自家製蕨餅、紅豆蓉、白玉一齊食，味道、口感層次再豐富。🍝帆立貝明太子蟹肉扁意粉 ($128)甜品幾好，估唔到主食都唔差。大大份嘅意粉，2大粒帆立貝、滿滿嘅明太子、蘑菇，非常足料，而且味道濃郁，口感creamy。🥤草莓番石榴乳酸配草莓果乾 ($38)食完啲濃味主食，飲番呢杯特飲就剛剛好中和番。佢味道清新，唔會太酸，又唔會太甜，仲要夠凍，夏天飲啱晒！…Read More

香港地一街都係日式料理店，要突圍而出，唔單止要保留食物水準，宜家更要攪啲gimmick吸吓人嚟打卡！就好似呢間位於旺角、新開無耐嘅上樓日式料理店。佢都算係阿叔近期去過，最有心思、最有誠意嘅一間。呢度以達摩為主題，由一入門口嘅裝修設計、到坐低食野檯面嘅擺設，以至食完抽公仔、祈福許願等，通通都見到達摩嘅蹤影，盡見店主嘅心思。除咗主題夠鮮明兼場內多個打卡位外，佢哋嘅食物由五星級酒店前總廚主理，所以水準都唔差，特別係佢哋嘅擺盤設計，絕對值得一讚，打卡一流。🦞達摩天丼 ($198)店內其中一款嘅招牌丼飯！以經過鰹魚昆布湯烹煮嘅米飯做底，面頭加上原隻澳洲龍蝦、極厚切炙燒帶子同大量吞拿魚蓉，賣相非常邪惡，絕對份量十足，一個人真心係會食唔晒架！建議可加多$10 加埋日本夢王蛋，撈埋吞拿魚蓉、蛋汁連飯一齊食，更添蛋香味。🥟明太子雞翼 ($78)一客有4隻，隻隻都塞滿明太子，脹卜卜咁炸到金黃色，真正外脆內軟，值得一食。🍮伯爵茶布丁 ($38)賣相的的骰骰，好可愛！口感彈滑之餘，亦食到淡淡嘅伯爵茶味。…Read More

位於鰂魚涌海光街嘅呢間新啡店，不知不覺原來已經開咗3個月有多，今次到訪後先知係由深水埗楓樹街開到過嚟。比起原店，雖然兩者同樣以日式裝修設計，不過呢度就用上深木色色系，感覺帶點沉實穩重之餘，仲滲出淡淡復古味道添！聽店員講，呢度為顧及附近返工人士，特別提供多款午市套餐。當中，居然俾阿叔發現有近期喺Threads同IG都大熱嘅捲捲意粉。一場嚟到，唔係唔叫嚟試呀嘛！香煎海蝦龍蝦汁捲捲意粉 ($148)Fusilli Lunghi Bucati (捲捲意粉)，以長螺旋造型見稱，有啲似直版嘅公仔麵。佢咁特別嘅螺旋中空設計原來能令意粉更掛醬汁，加上口感煙韌嚼勁，所以火速網上大熱。今次啡店用上自家製嘅龍蝦汁，另配多隻香煎海蝦可以話係完美嘅結合。海蝦爽口結實，龍蝦汁味道濃郁，加埋捲捲意粉一齊食，一食就真係停唔到口架！日式焦糖布丁 ($48)相對主食，呢度布甸蛋味唔差既，賣相亦非常可愛吸睛，不過阿叔略嫌佢口感太結實，整體就不過不失啦！…Read More