or#tm66705076's Profile

三個人去食晚飯，叫咗個二人套餐+三件蝦多士。最期待嘅海南雞+油飯不過不失啦，有一定水準但又唔係有太過特別驚喜，反而個蝦多士相當唔錯，係香港應該屬於頂流嗰批👍。至於其他菜式都可以。不過全店最唔好係太過逼夾，我哋被安排座張十二人長枱中間，同隔離只係用塊透明膠板隔開😓，因為落雨又要擺放雨具，咁啱隔離枱講嘢又大聲，而前前後出入又一定被撞到，真係坐得好唔舒服。以呢個價位其實客人真係expect係可以坐得舒服啲😔…Read More

星期日晚約咗住太古嘅親戚食晚飯，諗住試吓新酒樓。7:00入座，7:10落單。過咗5分鐘有親戚話想食咕嚕肉，於是搵咗個侍應諗住叫佢加單，點知乜都未講，佢就話：「啲餸嚟緊啦，等多一陣啦。」呢個時候已經覺得瀨瀨哋嘢。到7:45先嚟咗一碟叉燒燒肉。催咗兩次，每次都只係hea我哋睇住冇跟進過，到咗8:00先再嚟個粟米魚肚羹，於是叫咗個類似部長嘅嚟反映，最好笑係聽到佢同廚房溝通，廚房好似係完全唔知有我哋張單，個部長要逐樣逐樣講俾佢聽要煮乜，但唔係已經電子系統落單咩？到咗8:30，啲嘢陸續嚟啦，其實都只係叫椒鹽鮮魷、蒜蓉西蘭花、咕嚕肉、蒸魚呢啲，都唔係咩複雜嘢嚟，但都仲可以漏咗個豉油王海蝦，再催咗幾次，到9:00都未嚟，結果都係冇嚟，最終都要放棄。其實全間餐廳運作混亂不堪，好似啲傳菜員完全唔知啲枱號，係間餐廳周圍搵，啲待應之閒又互相埋怨。服務又唔得，除咗hea食客之外，叫佢加水，佢竟然可以將枱面壺滾水倒落壺茶到就就算，然後走咗去。至於食物，燒肉同咕嚕肉基本上都係肥膏，完全冇肉，椒鹽鮮魷則完全冇味。其實你未準備好就唔好營業，咁即係擺明當食客係水魚，你一個小菜平均都收$150，但食到仲勞氣過食茶餐廳。講真，你咁樣我就一定唔會再有下一次，你都應該主力係做街坊生意，你咁樣經營，實冇回頭客。所以香港嘅飲食業，執笠嘅時候，唔好怨天尤人，怪港人北上，麻煩自己反省吓你點營運間餐廳、點樣對待啲食客！…Read More

性價比唔高嘅中菜，無論食物或服務都真好一般，無邊方面突出，無甚驚喜。首先食物同一般中價酒樓差唔多，有啲點心嚟到甚至已經唔熱，只係暖暖哋。服務方面，第一次係香港酒店中菜食飯，係全程冇waiter幫手斟過一次茶，同埋竟然有漏單情況。普遍waiter嘅態度都唔係太過積極主動，同一般酒樓又係唔係太大分別。總括嚟講，除咗環境，整體質素同合和中心其他啲酒樓差唔多，但就收4-5星級酒店嘅價錢，所以係有啲失望。其實去遠少少，去PP或六國，已經可以搵到性價比相對較高嘅選擇。…Read More

睇完open rice comments，本來諗住會係一次幾有expectation嘅用膳體驗，點知會係第一次試過係酒店餐廳用膳，遇過咁差嘅service：首先一行三個人去到，個reception竟然可以就咁擺低一份menu就走咗去就算，即係諗住我哋一份menu輪流睇？都唔話冇簡單介紹吓有咩recommendation，連drink list又冇俾，又冇人問吓飲咩。直到落完order，先有人俾三杯水我哋，但都係由頭到尾冇人問過我哋要飲咩。跟住上starter，可以食食吓先有waiter走嚟同我哋換餐具，我都真係打個穾。到main course嘅時候，竟然可以上錯，俾咗隔離枱嘅食物我哋。我係香港酒店食過咁耐嘢，我都真係第一次試過上錯食物嘅情況發生！我已經未講啲食物嚟到仲要逐個問我哋邊個食乜，乜唔係suppose應該記低咗邊個order咗啲乜咩？我main course就order咗一份steak，要medium rare，但嚟到嘅係一份接近well done嘅牛扒，完全過熟。我當時好有衝動一生第一次去要求餐廳再整過，換過一份新嘅俾我。食完main course，啲waiter行過又唔會收碟，到收咗碟，又完全冇跟過個desert，等咗差唔多15-20分鐘，我忍唔住叫個waiter幫我跟進吓個甜品，先轉頭即有。其實個desert只係一個tart，冇任何side dish，相信都係ready made等上碟，唔係咩難度複雜嘢嚟。係酒店食飯要remind餐廳幫我上菜，又係第一次。其實以上嘅體驗，如果係spaghetti house，pokka cafe呢啲餐廳發生，我會失望但完全唔會感到意外。但如果發生係一間4or5星級酒店嘅餐廳，我係覺得遺憾，一定black list and no next time囉 ！BTW，除咗提過嘅steak之外，其他食物唔難食，但質素同味道只係好一般，冇任何驚喜，絕對唔係value for money。…Read More

睇一間中菜館得唔得可以睇吓佢嘅楊州炒飯炒得好唔好，英國餐廳就睇佢嘅fish and chips，而西班牙餐廳當然睇佢嘅Paella啦！第一次嚟呢間餐廳，佢嘅Paella基本上完全唔正宗唔得，唔好話同西班牙食到嘅完全兩回事，就連香港好多其他本地嘅西班牙餐廳都比唔上。飯質嘅口感、滲透嘅海鮮味、賣相完全唔可以稱得上正宗，最莫名其妙嘅係喺啲飯上面加咗啲類似沙律醬嘅物體，真係有啲懷疑佢有冇違反商品說明條例。另外叫咗個Croquetas同Sangria都有類似情況，不過個蒜蓉蝦就整得唔錯。服務算可以，不過有人駐埸唱歌就比較嘈（可能因為佢嘅唱功有好大嘅進步空間）！…Read More

訂咗枱5位7:30晚餐，但竟然可以出現以下情況：1）屋企兩位老人家早咗10分鐘左右到，竟然唔俾佢哋入，要佢哋坐係𨋢口等。我一家3口準時7:30到，同我講張枱未準備好，未入得。等咗差唔多5分鐘，先帶我哋一家人入去坐，但講緊當時餐廳一半滿都未必有。講真如果唔係有老人家，我一早走咗！2）帶到我哋去到座位，位待應求其擺低啲menu係張枱就走咗去，唔認真望都唔知有menu係張枱到，冇人話會簡單介紹有咩特別嘢食，亦冇人會問吓飲啲乜，唔係我主動問，水都冇人酙。3）餐具完全俾錯哂，最離譜係我食完前菜，將刀叉放係碟到，個侍應竟然可以將份刀叉放返係枱面，即係叫我用返同一份餐具食主菜？果然上主菜時，係冇人俾份新嘅餐具俾我。4）5份主菜竟然可以分3次上，每次隔成10-15分鐘，即係叫我唔好等埋一齊食。5）張枱食完啲碟又冇人收，到下一道菜嚟到時，竟然用下一道菜隻碟推走食完隻碟埋一邊。6）有屋企人生日，帶咗個蛋糕去切，但拎咗個蛋糕嚟，刀又冇俾把我切，到我吹完爉燭，又冇人會主動嚟幫手分個蛋糕，叫極又冇人理，但切餅費就收足。如果以上嘅事情發生係花園餐廳、金鳳餐廳、Pizza Hut呢啲，我一啲都唔覺得有問題。但你收我貴3-4倍嘅價錢，我完全唔expect會係啲咁嘅service囉！我expect好少少嘅service唔係太高要求呀？啲待應全部好似未train過咁，都未講完全冇笑容個個木口木面，加上食物唔係差但完全冇乜驚喜，呢個價位真係有極多更好嘅其他選擇，我真係搵唔到理由有下一次囉！…Read More

之前諗緊冬至同唔同家中長老試吓北上過節，但最終因為公司有嘢做，請唔到假，唯有留港消費。訂咗枱第二輪8:00pm，未坐低已經話啲套餐冇哂，咁唯有散叫，點知叫乜冇乜，燒味連燒肉、燒鵝、切雞全冇，所有有關雞嘅食物亦都冇，真係有冇攪錯？而唯一仲有嘅燒味 - 叉燒，份量仲少過快餐店燒味飯啲叉燒。大集團，做節、兩輪枱訂滿，竟然連最基本嘅燒味同雞都可以冇預備夠，呢啲係咩餐飲管理？跟住有樣餸催咗幾次都未嚟，催咗一個鐘後，先同我講廚房漏咗單，但嗰樣餸買哂，乜唔係已經電腦落單，點解都可以漏？點解我係全世界咁多地方食嘢，只係係香港先可以出現經常漏單嘅情況？仲有帶咗個生日蛋糕嚟切，叫個待應收碟上蛋糕，第一次就就咁放低個蛋糕就算，叫第二次收碟，就求其收一半就算，蛋糕碟就就咁一叠放係枱就算，又唔分碟又唔幫手切蛋糕。最離譜係班待應，當仲有七、八成客時，寧願去set枱準備第二日早/午市，都唔去serve現場啲客：無人加水，冇人收碟，叫佢又唔耐煩，收10%service charge又唔見咁嘅態度？所以大集團都係咁，過年過節你叫香港人仲點唔北上消費呀？…Read More

一排冇嚟，今晚三個人約7:15pm入座，當時有七、八枱客。叫咗兩個拉麵一個咖喱豬扒飯，兩個拉麵等咗約廿分鐘嚟，食咗10分鐘食完，個咖喱飯都未到。催咗兩次都話整緊，催到第三次竟然先同我講漏單，終於等到成八點先有得食。其實成間餐廳啲運作，由出菜、上菜到埋單，都感覺相當混亂，啲伙記好似完全唔知自己做緊乜，見隔離幾張枱都有出錯情況。其實已經電子落單，唔明點解都仲可以有咁多甩漏情況，我係外國包括大陸，都未試過有漏單情況。所以香港做飲食業嘅唔好怨點解冇客，個個北上，麻煩認真檢討吓自己個行業先！…Read More

今日一家五口去飲茶，耐唔耐都有去食飯，一向服務態度都唔多好，點知今日再創新低。有兩個點心等咗超過半個鐘都未有，諗住搵個人跟下，搵極都搵唔到有人就預咗，好辛苦捉到個經理，佢夠膽死話佢好忙呀，跟住走咗去，冇返過嚟follow up，亦唔會話搵第二個嚟睇吓有咩幫到我。跟住搵咗個阿姐，check完返嚟話其中一樣賣哂，嘩，即係我唔問你酒樓就唔使主動同返個客講？ 跟住我仲問佢咁另外仲掙個春卷又點呀？佢竟然可以答我咩春卷？我即刻回佢：乜有好多款春卷咩？寸完轉頭唔使3分鐘咪拎出來，明顯漏單啦！仲有叫極唔冲水，未夠兩點仲有六、七成客都可以係你前後左右係咁搬枱搬櫈執定晚市啲枱，埋單又要自己出收銀，都仲好意思又收荼錢又收加一。咁嘅服務我食貴野都唔會係嚟幫襯你啦！所以香港啲飲食業成日埋怨港人北上，唔該你哋檢討吓自己啲咩服務態度俾啲客先啦！唔好掉返轉好似係個客欠咗你哋咁！…Read More

個仔係附近學嘢，耐唔耐都會去食嘢。食物質素係可接受，但一路以嚟樓面啲阿姐態度都已經係麻麻。噚日星期六大約12:55分入去，入面唔係枱多，十張左右，坐滿8成左右，門口三四個人等緊外賣。但中午繁忙時間，樓面竟然可以只係得一個阿姐係度，落單、上菜、執枱、埋單、執外賣，全部都係一個做哂。當時叫阿姐落單差唔多十分鐘，都唔肯埋嚟落，凈係處理啲外賣單，樓面啲嘢幾乎唔理，而且係全程極度黑面。眼見等咗咁耐都仲未有人嚟落單，其他枱啲食物煮好擺哂係度冇人拎俾啲客，阿姐凈係識鬧㕑房啲人攪錯嘢，又見其他有一兩張枱啲人都等落單等得唔耐煩走人，心諗就算落到單都唔知又要等幾耐先有嘢食，加上見阿姐超級面黑，於是做咗人生第一次嘢都未食，就決定斬欖即走，並且black list埋佢，應該都唔會有再幫襯佢嘅機會。…Read More

尋日星期六下午2:40分一家三口兩大一小入座，諗住食佢個afternoon tea set，另外加多一客炸魚餅。2:45落單，當時全餐廳冇一半滿。3:15都未有任何食物嚟，已經叫一名女侍應跟進，點知佢單都唔check，諗都唔諗就想求其打發我，話咩廚房一個一個跟單做。再隔十分鐘，都冇任何食物嚟過，今次叫個類似經理嘅男人嚟，佢竟然話tea set啲麵廚房已經一齊開始煮緊！吓，我等咗40分鐘，宜家先同人哋啲食物一齊煮？宜家先開始煮啲麵，咁其他食物點？果然，過多5分鐘，廚房真係十幾二十碗麵一次過出，即係話無論你一個鐘前嚟，定係五分鐘前嚟，廚房都係等夠單先一次過煮。嘩，呢啲咩餐飲管理嚟，茶餐廳都唔會咁做😡再過多十分鐘，tea set其餘啲食物又係十幾份一次過出😤另外額外加嘅魚餅，分量少得驚人，一般泰國、東南亞餐廳正價嘅分量，都會有四至六件不等，但呢度得三件之餘，size仲比一般餐廳食到嘅細成三分一，而餐牌係冇標明分量！好彩只係食下午茶，如果係正餐返屋企要食多碗杯麵！講真，太古城、康怡、蘇豪東都仲有唔少泰國、東南亞食肆可以選擇，食物質素、性價比、服務質素，一定唔會俾呢間差，所以真係好難搵到個原因會有下次光顧！…Read More

食物質素係可以嘅，但服務方面真係不敢恭維。剛剛開張時試過一次，星期六上午11:30去，4個人入座，當時只約一半滿，但送第一份食物嚟，同最後嗰份，可以相差30分鐘。當然同服務員提出過要跟進唔少次，但都冇正面嘅結果啦。其實唔單止跟進食物，就算點餐、索取餐具、埋單，永遠唔會係叫一次就會立即跟進，而重點係，當時餐廳唔係滿座，當時我已經諗你平日lunch hours點算。其實呢間餐廳最大問題係，成班年輕人服務員，啲工作態度，個個都好似提不起勁，懶懶閑，沒精打采，做又36唔做又36，茶餐廳伙記都有火有heart過佢哋。但問題係，佢嘅收費又唔係茶餐廳收費呢！剛過去嘅星期日，諗住俾多次機會佢，去食個下午茶。今次送餐嘅情況係有改善，我3個人去3樣食物都分開3次送，但今次15分鐘內都送哂嚟，但服務態度方面仍然冇乜改善。講真，類似嘅餐廳係太古城仲有好幾間，收費同食物質素一定唔會差過呢間，但人哋就真係冇一間會係啲咁嘅服務質素囉！所以基本上都真係唔會有第3次光顧呢度！…Read More

差不多半年以上冇去過，工作關係今日要去油塘附近，做完嘢便約家人去食飯。約七點四十五分入座，當時入座率8、9成左右。點餸後，等咗成半個鐘，我小朋友睇完成本多啦A夢，都未有上菜。很難找到待應去check單，先嚟咗一籠小籠包。小籠包完全唔熱，只可以講係微暖，明顯廚房煮完擺咗係到無人上菜；而最大問題係我從來未食過啲小籠包，裏面啲湯淡到只係有味過啲水小小！之後上嘅鍋貼同樣只係微暖，而且今次裏面直情完全冇湯！平時我小朋友食呢啲好論盡會攪到啲湯周圍都係，今次完全冇呢個煩惱！我今年8歲個仔食完，都識話北京樓、翡翠拉麵小籠包、上海姥姥啲好食好多。另外叫咗四樣嘢，都有兩樣唔熱。而最後都有一個砂鍋雲吞雞煲，要再同待應講，先上到菜。另外待應又唔會主動加水，見到隔離一兩枱客，都係自己拎壺茶去櫃檯自己冲水。知道這間食肆老闆經常標榜良心食肆同改革/創新經營管理模式，但見到今晚咁嘅情況，食物同服務同之前比較直線下降，完全只係覺得呢啲只不過做show嘅宣傳技量，今晚之後真係好難再有下次。…Read More