onpopc's Profile

見到有葡撻味雞蛋仔就諗住試吓，點知番到屋企一拎出嚟發現中晒伏，成底雞蛋仔係又淋又爛溶溶，仲要面頭嗰幾粒個樣已經係成底最正常，下面完全係一pat嘢咁變晒形，唔講真係唔知係雞蛋仔🤮我都鼓起勇氣試咗一兩粒，發現佢表面雖然深色，但入面係未熟晒，然後未熟嘅粉漿仲要同啲葡撻餡撈埋一齊，成件事係睇同食都極之唔開胃，仲好意思收$36一底🙄🤯但睇佢社交平台相入面嘅雞蛋仔又好正常，所以可能咁啱嗰姨姨唔識整，但唔識整可以照直講整唔到，而唔係整到爛晒又唔熟都仲比人食，如果係小朋友照食咗都唔知點算🤢今次當買個教訓，下次就算買雞蛋仔都要check下貨先好走，同埋希望老細見到可以改善下，以免做壞招牌😮‍💨…Read More

之前見人介紹好似唔錯就約埋朋友黎試下，佢鋪面比較細，連埋出面大約得8張枱，而個裝修帶點英倫風格，幾適合同朋友一齊黎打下卡。另外估唔到竟然唔洗加一服務費，整體性價比都幾高。同朋友嗌左幾樣野黎shaer食，首先係依個炸雞配印度窩夫，依個份量比我想像中大份，而佢個炸雞外脆內嫩，但就咁食既話可能會無咩味，所以一定要加埋佢個醬一齊食。而佢側邊d沙律絲同個個酸酸地既醬都好夾，真係有食緊印度菜既feel。而個窩夫就稍為遜色，味道同普通原味窩夫差唔多，但就比較淋身，如果可以脆、鬆軟多少少就好啦～ 整體佢三樣野其實都好夾，所以最好就係要夾晒一齊食，咁個味就比較豐富好食。之後就係依個LONDON，佢依個就無窩夫咁大份，一個人食都無咩問題。佢紅色個碗係番茄牛肉加蛋，雖然佢menu寫係炒蛋，但其實係煎蛋，不過個人覺得煎蛋係夾過炒蛋既，依個個味就有d似肉醬意粉既肉醬，但就比較濃郁，而個牛都好淋身，同埋會有濃濃既芝士味。而麵包都整得好鬆軟，而且有烘過，食落更香口。整體都係建議所有配料夾埋一齊食係最好，但因為個番茄牛肉比較濃味，所以食落會有點膩。之後仲叫左個玉桂卷，聽聞依間既玉桂卷都幾出名，而又真係名不虛傳。首先佢外形整得好靚仔，而入面都好鬆軟，而且有淡淡既玉桂香，不過作為玉桂控既我就覺得個玉桂可以再濃d。另外仲叫左件朱古力墶，個墶整體黎講唔算好特別，但鐘意佢個朱古力餡唔太甜，食完都唔會好膩，但個墶皮就略厭有點淋最後仲叫左兩杯咖啡，一杯flat white，一杯係cinnamon latte。佢地既咖啡係偏酸，但個人偏好nutty既咖啡，所以就唔太岩我口味，但個cinnamon latte飲落幾香，如果唔太好咖啡既朋友應該都會鐘意。…Read More

荃灣依間裝修得唔錯，全落地玻璃，光線充足。之前有係度買過野，但就第一次黎食，雖然佢平時賣既野幾貴，但佢lunch價錢都算ok，而且款式都算多。同朋友分別叫左一個未來漢堡咖喱飯、未來豬柳漢堡配薯條。個咖喱飯其實都幾頹，佢塊漢堡因為係素既關係，所以比正常既乾身同薄身，而個汁係有咖喱味，但就偏稀無乜配料，而面頭既紫菜係淋既，另外個飯算係比較好，因為個人鍾意食紅米飯，所以整體食落都好一般。依個豬柳漢堡配薯條就比個咖喱飯好，佢個包軟身，入面既菜同番茄都好新鮮，而個肉一樣係偏乾，但成個食落係真係同平時食既差唔多，唔似食緊素。而最驚喜係個薯條，佢粗身得黎又炸得岩岩好，外脆內軟，而份量都算多。最後試埋佢個燕麥奶latte，飲落無牛奶咁厚身，同埋咖啡味唔太濃，個人就一般。…Read More

咁岩見佢做緊優惠，dinner set $298/位，第二位有半價，於是就約埋朋友黎試下。餐廳位於灣仔藝術中心入面，而裡面都幾大，所以2個人都可以坐大大張既4人枱，唔會有同人逼住既感覺。咁我同朋友各自叫左d唔同款既菜式share食。頭盤叫左生蠔同布拉塔芝士，生蠔都幾大隻，同埋都新鮮無腥味。另外布拉塔芝士都唔錯，最鍾意係佢下面酸酸地既homemade tomato sauce，味道清新得黎又好夾個芝士。之後主菜叫左catch of the day、牛肩扒。catch of the day係一碟會有幾款唔同海鮮，例如烤魚、魷魚、蜆，佢份量都幾多，而且每樣都新鮮，同埋佢係有d似烤完再煮既感覺，因為佢無整到好乾身，而且食落會有d似蒸海鮮，同埋佢個底會有d海鮮既精華，飲落都幾鮮甜。整體味道著唔會太濃，而係著重本身既鮮味，但略厭有d部份煮得有點老。另外依個牛肩扒叫左五成熟，外面封煎得唔錯，而入面質地唔算好軟淋，但食落又唔會話好難咬，而佢肉味算濃，調味都岩岩好，另外配左個滑身既薯蓉，整體都係值得叫黎食既～最尾甜品叫左tiramisu，質地滑身，手指餅有濃濃咖啡香之餘唔會過濕，係一個有水準既tiramisu！…Read More

約左朋友食飯，揀左間大家都方便去既旺角餐廳。佢鋪面都幾大同樓底都算高，坐落都舒服，但燈光比較暗，所以同朋友影相d色就差d，不過有光照住張枱，所以影食物既話就ok既～第一樣上枱就係都幾多人推薦既水牛城雞翼，雞翼雖然唔算大隻，但入面雞肉嫩滑唔會乾晒，另外佢醃得入味，而且醬料夠味得黎唔會過辣，所以唔太食得辣既人都可以試下，整體係一碟好唔錯既雞翼。第二樣就係威靈頓牛柳，本身都幾期待，因為今次係第一次食威靈頓牛柳，但食完係有d失望。首先個酥皮唔夠香同酥脆，而且仲要同舊肉分離左。另外個牛柳雖然中間係淋身但無咩肉汁，牛肉味都唔夠濃，同埋肉同底層既酥皮係淋晒出水，食落口感唔多良好。雖然係第一次食，但同我認知上既威靈頓牛柳都幾大出入第三樣就係pizza，佢係薄脆底既pizza，面頭既配料都分得好平均，但略厭有d少，同埋兩款肉既咸香味都唔係好夠，食落似euro gogo既pizza，唔算好特別，所以感覺唔太值依個價。最後仲叫左個卡邦尼扁意粉，依個意粉意外地幾出色，首先佢意粉同配料既份量都多，而意粉都煮得岩岩好咬落彈牙，個汁加埋溫泉蛋既味道都岩岩好，香濃滑身得黎唔會過膩，但就略厭佢稀左d，不過整體都係好食，尤其鍾意佢面頭刨左好多芝士…Read More

已經好耐無黎食，耐到原來佢已經換晒裝修，由黑白風變左pink pink少女風，但記憶中佢d食物同飲品質素係唔錯，所以就約埋朋友一齊黎食個飯，睇下佢仲keep唔keep到個水準。首先叫左依個軟殼蟹凱撒沙拉，佢份量唔算話多但女仔食係夠既，生菜比例較多而且都算新鮮唔會食到有苦味，但略厭配料比較少，同埋軟殼蟹比較淋身，有d似炸完放左係到一陣，整體食落不過不失，但未必會再叫。之後仲叫左個我最愛既明太子義大利麵，我覺得佢既明太子義大利麵係數一數二好食，首先份量夠大份，而明太子汁既份量都好足夠，而且香濃而唔會太稀身，每一啖都掛到上去d意粉度，同埋鍾意佢面頭有大量紫菜碎，撈埋一齊食會好滿足，整體佢都仲keep到個水準，唯一有d美中不足就係有d紫菜飛左喺條邊度。然後個人都幾鍾意佢d咖啡，其中一個原因係佢會配一塊我好錐意食既lotus餅，同埋佢d咖啡都有好多味道選擇，而每款既味道都唔錯，所以每次都會叫佢唔同款既咖啡試下，而依杯摩卡味道都好岩我口味，咖啡味同朱古力味夾得黎唔會俾其中一邊搶左個味，但就略厭佢d咖啡味唔夠香。…Read More

係佐敦搵食時見到依間之前有人推介過既牛腩店，見咁岩無咩人就一於入去試下佢。入面環境光猛，同埋當日無咩人，兩個人都有得坐四人枱，所以都坐得舒服。而最有趣既係竟然播緊英文歌，雖然有d違和感，但d歌幾好聽首先就叫左依個招牌川醬干炒牛河，佢一上枱就聞到佢陣香味，雖然係下午茶餐，但都幾大份同足料，食落唔會好油，而且炒得都算乾身，同埋d河粉仲feel到佢有d彈性唔會淋晒，味道香濃帶辣，但又未至於辣到要即刻飲水，而牛肉份量雖然唔多，但都幾大舊，同埋都夠淋，整體個炒河係幾出色，唯獨可能個人唔係太食得濃味野，所以食完會有d膩既感覺。另外仲叫左個都係招牌既清湯牛腩河，依個又係都幾大碗，河粉煮得岩岩好，就算夾起都唔會斷開，而主角牛腩雖然都唔係好多，但又係大大舊，佢連埋d蘿蔔都煮到好淋好入味，另外個清湯底味道都適中，唔會過咸或蓋過牛腩既味，而且好鍾意佢有一大匙既蔥，加埋一齊食令到成碗牛腩河更加香同好味，整體黎講係一碗令人好滿意既牛腩河，而且連埋飲品先＄49，性價比非常高，一定會再番黎食！…Read More

當日晏晝去到已經大排長龍，都等左40分鐘左右先有位。而佢入面樓底都幾高，而且綠白色牆身同整體既擺設配搭有種外國cafe既感覺，不過佢鋪面好細，所以坐落會覺得有d逼。佢成間鋪都係以pancake同coffee為主，今次就叫左依個Bacon ＆ Egg Pancake，pancake上面配有煙肉、薯餅同煎蛋，而側邊有楓糖同烘過既杏仁片，平時比較少食依個配搭，所以覺得都幾特別。個pancake唔似平時好鬆軟個款，而係食落會有d咬口，比平時食開既實身。雖然佢係以pancake為主，但個人覺得佢d配料都好食，煙肉香得黎唔會過鹹／過油，薯餅香脆，煎蛋流心有燶邊。整體味道都襯得唔錯，而且食一份都已經非常飽。另外叫左杯叫Ying Yang既咖啡，佢係咖啡入面加入左竹炭，令到個漸層有d似墨水化開咁，飲落會比一般既咖啡無咁濃同易入口。…Read More

依間成日都有聽人提起，但一直都未飲過，咁岩平日經過見無咩人就買左杯黎試下～ 雖然佢出名係大甲芋鮮奶，但因為我唔係太好芋頭，所以就無嗌到，反而比較想試下佢d奶蓋，所以就叫左杯芝士奶蓋烏龍。因為我係叫走甜少冰，所以飲落個茶味應該已經比正常既濃，但個人覺得個茶味都係偏淡。而最重點就梗係要試下佢個奶蓋，佢個奶蓋係偏輕身，奶味都唔會話好重，就算就咁飲個奶蓋都唔會覺得膩，，而連埋茶一齊飲既話就會令個茶滑身左，但整體味度都係偏淡，同埋因為個奶蓋偏輕身同淡味，所以覺得可以再加多少少奶蓋，咁個奶味可以出d，但總結黎講依個未必係我杯茶啦～…Read More

個日我同朋友就book左下晏時間黎食，去到已經full左，所以強烈建議要book左位先，唔係walk in真係未必有位。間cafe本身樓底都算高但唔算大間，加上放晒乾花同埋燈光較暗，所以感覺會有d壓逼，另外個人唔係咁鐘意佢枱面隻香薰味，所以環境黎講除左d花幾靚之外就一般般啦～我地兩個人叫左一個意粉、一個燉飯share食，依個明太子貓耳朵係cafe既人氣食品，佢個意粉軟硬適中，明太子味濃滑，蟹棒同鮭魚子都有質素，但份量唔多所以主要都係用黎做裝飾，而整體黎講係幾好食，但份量唔算多，女仔食就剛好，同埋唔知係咪期望過高，所以食落唔算話好特別。之後個人覺得依個帶子燉飯好有驚喜，佢係我鐘意既偏硬燉飯，而且好足料，每啖都會食到配料，同埋佢個稀稠度都做得非常好，唔會過水或過稠，而佢個調味都恰度好處，香草醬、菇味香濃得黎唔會過膩，但芥末味唔算明顯。另外個帶子都煎得岩岩好，外香內嫩，得兩粒真係唔夠喉！整體佢份量適中，意料之外咁好食，10分滿分既話會比佢11分！另外仲叫左兩杯咖啡，一杯係比較少見既短笛，咖啡豆味香濃，同奶既比例都岩岩好，唯獨係略厭d奶打得唔夠滑；而另一杯係莫卡，用左我最愛既Valrhona朱古力，飲落個朱古力味會比一般既莫卡濃同明顯，所以咖啡味就會無咁出，總結兩杯咖啡都唔錯～…Read More

之前網上見人推薦已經一直想黎食，今日終於都可以一嚐佢地既雞蛋仔 佢間鋪唔係好大，但出面都放左張枱同櫈比人可以坐係度食，同埋仲有大大個pepe既打卡位～今次叫左個NUTELLA 榛子花生味既雞蛋仔，佢係即叫即整，不過咁岩個日唔多人，所以叫完好快就有。一拎上手已經feel到佢好脆身，而入面係軟身得黎又唔會整到成個蛋糕仔咁既質地，個榛子味道雖然唔係話超濃郁，但個人覺得佢香得黎味道適中，而中間亦食到花生碎粒，整體黎講係一個好唔錯既雞蛋仔！…Read More

當日平日下晝去到已經滿晒人，係出面排左半個鐘左右先有位，入面唔算大，d位都比較逼，不過個日好好彩兩個人都坐到四人枱，所以都算坐得舒服。同埋當日人流較多，所以都比較嘈，如果想靜靜地傾計就未必岩啦～同朋友一齊嗌左個意粉同一個梳乎厘share食，首先講下佢依個Cheezy Tomato Spagetti，佢個意粉煮得岩岩好，而個蕃茄醬偏稠身，同埋有好多車厘茄，所以啖啖都有濃郁既蕃茄味。而佢面頭會有層燒過既芝士，但攪混後個芝士對比下就無咁濃郁，但整體都係一個幾出色既意粉，而且份量都幾多。之後到依個人氣既Black Forest Souffle Panckaes，佢依個pankcake係偏空氣感，唔加配料就咁食既話係無咩味，但夾埋d朱古力cream一齊食就有種食緊軟心朱古力蛋糕既感覺，個cream係偏濃既朱古力味，唔會好甜，而且佢加左d脆脆同朱古力碎，令到口感更豐富，同埋個櫻桃酒味同朱古力幾夾，但如果就咁食個櫻桃就會得苦味，整體黎講佢個pankcake就正常發揮，反而d配料比預期出色。另外仲叫左杯Caramel  Latte，佢既咖啡味唔會話好濃，但同隻焦糖味幾夾，而且奶泡打得幾好，滑身得係飲到尾都仲見到個拉花。…Read More

心血來潮想食上海菜，係openrice見到依間評價唔錯，就一於黎食個lunch。個日係星期六晏晝時間，去到已經好多人，所以都等左陣先有位。而鋪面唔算大，但咁岩2個人分到一張四人枱，所以都坐得鬆動。個日同朋友每人叫左一個set，而兩個set都跟杯飲品。本身揀個個set無小食，但老細好好咁送左個小食比我地。依個四喜烤麩味道濃郁得黎唔會話太酸，係一個唔錯既前菜。然後本身好期待個小籠包，但食完有d失望 個皮偏厚，入面既湯汁都唔多，肉味雖然正常，但肉質有d乾，整體都同其它人既食評有d出入，所以唔知係米咁岩個日轉左師傅整。之後到依個酸菜魚配菜飯，酸菜魚非常足料，魚肉份量都多，同埋唔會好老，但就唔算話好鮮，同埋唔知係米叫左少辣，整體個味唔係好濃，同埋連平時唔食得辣既我都可以係咁食。而個菜飯好大碗，有平時兩碗飯咁多，但d菜略厭有d少，同埋無咩菜味。最後我同朋友都係叫左凍豆漿，個人覺得太甜，飲完會有d黏喉既感覺。總結依間既上海菜性價比好高，佢每個set既份量都好多，但價錢唔貴，仲要唔收加一。唔怪得keep住都有人等位或者叫外賣。…Read More

去開油麻地見到新開左間幾靚既小清新cafe就即刻入去試下～ 入面雖然唔係話好大，但樓底好高，所以有好大既空間感，唔會話好焗促同埋都好光猛。另外佢食物、飲品選擇都幾多，而最後就嗌左一個小食、一個主菜、一杯咖啡。首先講下個小食－－海鹽甜蕃薯條，由於蕃薯條只係加左鹽調味，所以可以食得出蕃薯條既原味，同埋唔會話炸得好硬，岩岩好係外脆內軟。但唯一既敗筆就係唔知點解佢側邊加左塊霉霉地既生菜做裝飾，見到會有d唔開胃。之後就叫左個綠茶素麵配燒鯖魚，雖然叫綠茶素麵，但知其實唔會話有好濃既綠茶味，佢既軟硬度適中，同埋d配料份量都算多，而個素麵汁都唔會話好咸。而條燒鯖魚比我想像中大條，但就略厭燒得唔夠香脆，所以會有少少腥味。整體素麵同鯖魚味道都普普通通，會有種住家菜既感覺，而最大敗筆又係d菜，同個素麵完全唔夾呢…最後仲叫左杯latte，奶泡同溫度都適中，但個人就覺得咖啡味可再濃d。另外發現咖啡同鯖魚都幾唔夾，所以有機會再黎既話唔會再嗌依兩樣野一齊食。…Read More

作為一個蘋果批迷見到新開左間日本過江龍蘋果批就緊係要黎試下啦！ 佢間鋪係近時代廣場，一入去就聞到香噴噴既蘋果批味，而且間鋪比我想像中大，有好幾個位可以比客人坐低慢慢品嘗。好好彩個日咁岩食到岩岩出爐既蘋果批，拎上手仲係好熱，蘋果批既香味不斷湧出黎，但由於真係好熱，所以只好細細啖咁慢慢咬，佢個外皮好酥脆，雖然都有牛油香，但就唔及西式酥皮既牛油味重，所以食落唔算好膩。而內餡就有蘋果粒、豆乳忌廉同吉士忌廉，而出奇地唔會話好甜，同埋會咬到一粒粒既蘋果，整體d味係幾夾同埋以日式蘋果批黎講都幾出色，但就未去到話要專登黎食，不過如果同sogo地下個間RAPL比既，咁我自己就鐘意依間多d啦～…Read More